ཟླ་9ཚེས་1ཉིན་གྱི་སྔ་དྲོ་བོད་ལྗོངས་སྤྱི་ཚོགས་རིང་ལུགས་སློབ་གླིང་གིས་སྟོན་དུས་ཀྱི་དགོན་སྡེའི་དོ་དམ་ལ་ཤུགས་སྣོན་དང་གསར་གཏོད་བྱེད་པའི་ཆེད་དོན་ཞིབ་འཇུག་འཛིན་གྲྭ་སློབ་འགོ་ཚུགས་པའི་མཛད་སྒོ་ལྷ་སར་འཚོགས་པ་རེད།
རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་། ལྗོངས་སྲིད་གྲོས་ཏང་ཙུའི་ཧྲུའུ་ཅི། ཀྲུའུ་ཞི་གཞོན་པ། ལྗོངས་ཏང་ཨུད་འཐབ་ཕྱོགས་གཅིག་གྱུར་པུའི་པུའུ་ཀྲང་བཅས་ཡིན་པའི་མགོན་པོ་བཀྲ་ཤིས་ཕེབས་པ་དང་འབྲེལ་གསུང་བཤད་ཀྱང་གནང་བ་དང་། རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་ལྗོངས་མི་རིགས་དང་ཆོས་ལུགས་ལས་དོན་ཨུ་ཡོན་ལྷན་ཁང་གི་ཀྲུའུ་རེན་བློ་བཟང་འགྱུར་མེད་ཞུགས་ཡོད་པ་རེད།
མགོན་པོ་བཀྲ་ཤིས་ཀྱིས་དགོན་སྡེའི་དོ་དམ་ལ་ཤུགས་སྣོན་དང་གསར་གཏོད་བྱེད་པ་དང་ལས་བྱེད་པ་འདེམས་མངགས་ཀྱིས་དགོན་སྡེར་བཅའ་སྡོད་བྱས་ནས་གྲྭ་བཙུན་ཚོའི་དོ་དམ་དང་། སློབ་གསོ། ཞབས་ཞུ་བཅས་ཀྱི་ལས་དོན་ཡག་པོ་བསྒྲུབ་རྒྱུ་དེ་ནི་ཧྲུའུ་ཅི་ཁྲེན་ཆོན་གོས་པན་ཀྲང་གནང་བའི་ལྗོངས་ཏང་ཨུད་ཀྱིས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ་དང་སྤྱི་ཚོགས་དོ་དམ་ལ་ཤུགས་སྣོན་དང་གསར་གཏོད་བྱེད་པའི་ཀྲུང་དབྱང་གི་བསམ་འཆར་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱས་ཏེ་བོད་བརྒྱུད་ནང་བསྟན་དགོན་སྡེའི་དོ་དམ་གྱི་ཕུགས་ཕན་ལམ་སྲོལ་ཧུར་ཐག་བཏོད་པ་དང་ཆོས་ལུགས་ཁྱབ་ཁོངས་ཀྱི་ཡུན་རིང་བདེ་འཁོད་དང་ཞི་མཐུན་བརྟན་ལྷིང་ལ་སྲུང་སྐྱོང་ཧུར་ཐག་བྱ་ཆེད་གནང་བའི་གལ་ཆེའི་འཐབ་ཇུས་ཀྱི་བཀོད་སྒྲིག་ཅིག་ཡིན། འདི་ལོ་ཚུན་ལྗོངས་ཏང་ཨུད་ཀྱི་སྲ་ཞིང་བརྟན་པའི་འགོ་ཁྲིད་འོག་ལྗོངས་ཡོངས་ཀྱི་དགོན་སྡེའི་དོ་དམ་ལ་ཤུགས་སྣོན་དང་གསར་གཏོད་བྱེད་པའི་ལས་དོན་རྒྱུན་ཆད་མེད་པར་གཏིང་ཟབ་ཏུ་ཕྱིན་ནས་ལམ་སྲོལ་དང་སྒྲིག་སྲོལ་དེ་བས་འཐུས་ཚང་བྱུང་བ་དང་། འགན་འཁྲིའི་ལམ་ལུགས་དེ་བས་འཐུས་ཚང་བྱུང་བ། དོ་དམ་ཞབས་ཞུ་དེ་བས་ཚད་ལྡན་བྱུང་སྟེ་ཏང་ཨུད་ཀྱིས་ཚད་མཐོའི་མཐོང་ཆེན་བྱེད་པ་དང་། གཞི་རིམ་སྲིད་གཞུང་གིས་སྒྲིག་འཛུགས་ནུས་ལྡན་བྱེད་པ། དགོན་སྡེ་དོ་དམ་ཨུ་ལྷན་གྱི་ནུས་པ་མངོན་གསལ་དོད་པ། དགོན་སྡེར་བཅའ་སྡོད་ལས་བྱེད་པས་སེམས་ནུས་ཡོད་རྒུས་ལས་དོན་སྤེལ་བ། རྒྱ་ཆེའི་གྲྭ་བཙུན་ཚོས་ཧུར་ཐག་ཞུགས་པ། དད་ལྡན་མང་ཚོགས་ཚོས་རང་འགུལ་ངང་གཞོགས་འདེགས་བྱེད་པ་བཅས་ཀྱི་ལས་ཀའི་རྣམ་པ་བཟང་པོ་ཞིག་ཐོན་ཡོད་ཅེས་གསུངས་པ་རེད།
མགོན་པོ་བཀྲ་ཤིས་ཀྱིས་མིག་སྔའི་དགོན་སྡེའི་དོ་དམ་ཐད་འཕྲད་པའི་ཪྙོག་འཛིང་ཆེ་བའི་དུས་བབ་ལ་ངེས་པར་དུ་ངོས་འཛིན་གང་ལེགས་ཐུབ་པ་བྱས་ནས་ཆབ་སྲིད་ཀྱི་འདུ་ཤེས་དང་། འགན་འཁྲིའི་འདུ་ཤེས། ཉམས་ཉེན་གྱི་འདུ་ཤེས་བཅས་རྒྱུན་ཆད་མེད་པར་ཟབ་ཏུ་བཏང་སྟེ་དུས་དང་རྣམ་པ་ཀུན་ཏུ་རིག་པ་དྭངས་གསལ་བྱ་རྒྱུ་མཐའ་འཁྱོངས་ཀྱིས་ཀྲུང་དབྱང་དང་ལྗོངས་ཏང་ཨུད་ཀྱི་འཐབ་ཇུས་བཀོད་སྒྲིག་ཆད་ལུས་མེད་པར་ལག་བསྟར་དོན་འཁྱོལ་ཡག་པོ་བྱེད་དགོས་པ་སྟེ། དགོན་སྡེའི་དོ་དམ་གྱི་བྱེད་ཐབས་དོན་ཐོག་ཏུ་འཁྱོལ་བ་བྱེད་པ་དང་དགོན་སྡེའི་དོ་དམ་གྱི་འགན་འཁྲི་དོན་ཐོག་ཏུ་འཁྱོལ་བ་བྱས་ནས་རང་ལྗོངས་ཀྱི་འཕེལ་རྒྱས་དང་བརྟན་ལྷིང་ལས་དོན་གྱི་སྤྱི་ཡོངས་ལ་དམ་པོར་དམིགས་ནས་འགན་འཁུར་ཕོད་པ་དང་རང་འགུལ་ངང་ལས་དོན་བསྒྲུབས་ནས་སྲ་ཞིང་བརྟན་པའི་བྱེད་ཐབས་ལ་བརྟེན་ནས་སློབ་གསོ་དང་། མཐུན་སྒྲིལ། དོ་དམ། ཞབས་ཞུ་བཅས་དགོན་སྡེའི་ལས་དོན་ཁག་ནང་མངོན་པ་བྱས་ཏེ་དགོན་སྡེའི་ཚན་རིག་ཅན་གྱི་ཆུ་ཚད་རྒྱུན་ཆད་མེད་པར་མཐོ་རུ་བཏང་ནས་དགོན་སྡེ་ཞི་མཐུན་བརྟན་ལྷིང་དང་ཡུན་རིང་བདེ་འཁོད་ཡོང་བའི་འགན་ལེན་བྱེད་དགོས་པ་དང་། དགོན་སྡེའི་དོ་དམ་ལ་ཤུགས་སྣོན་དང་གསར་གཏོད་བྱེད་པའི་སྲིད་ཇུས་ཀྱི་རྩ་དོན་ཁོང་དུ་ཡང་དག་ཆུད་པ་བྱས་ནས་དགོན་སྡེའི་དོ་དམ་ལས་དོན་ཁྲོད་ཀྱི་གཙོ་གནད་ལས་འགན་མངོན་གསལ་དོད་པའི་ངང་དམ་འཛིན་ཡག་པོ་བྱས་ཏེ་དགོན་སྡེའི “དྲུག་འཛུགས ”ཀྱི་ལས་དོན་མུ་མཐུད་འཐུས་ཚང་དུ་གཏོང་བ་དང་། ཁྲིམས་ལུགས་དྲིལ་བསྒྲགས་ཀྱི་བརྗོད་དོན་གཙོ་བོའི་སློབ་གསོའི་བྱེད་སྒོ་མུ་མཐུད་གཏིང་ཟབ་ཏུ་གཏོང་བ། ཆོས་ལུགས་དང་འདུལ་ཁྲིམས་ཀྱི་གསལ་འགྲེལ་ལས་དོན་མུ་མཐུད་ཡག་པོ་སྒྲུབ་པ། དགོན་སྡེའི་བརྟན་ལྷིང་སྲུང་སྐྱོང་ལས་དོན་མུ་མཐུད་གཏིང་ཟབ་ཏུ་གཏོང་བ་བཅས་བྱས་ནས་དགོན་སྡེའི་དོ་དམ་གསར་གཏོད་བྱེད་པའི་ལས་དོན་འཕེལ་རྒྱས་གཏིང་ཟབ་ཡོང་བར་རྒྱུན་བསྲིང་ལྷོད་མེད་ངང་སྐུལ་འདེད་གཏོང་དགོས་ཞེས་ནན་བཤད་གནང་བ་རེད།
མགོན་པོ་བཀྲ་ཤིས་ཀྱིས་ཚང་མར་གོ་སྐབས་ལ་གཅེས་སྤྲས་བྱས་ནས་གསོ་སྦྱོང་བྱ་རྒྱུ་དེ་སྲིད་ཇུས་དང་རིག་གཞུང་ཐད་ཀྱི་ཆུ་ཚད་མཐོར་གཏོང་དང་། ལས་སྒོའི་བྱང་ཚད་མཐོར་གཏོང་། ཕན་ཚུན་སྤེལ་རེས་དང་ཕན་ཚུན་སློབ་སྦྱོང་བྱེད་པ་བཅས་ཀྱི་བརྒྱུད་རིམ་ཞིག་ཏུ་བརྩི་དགོས་པ་དང་། ཁྱོན་ཡོངས་ཀྱི་འདུ་ཤེས་དང་གོ་སྐབས་ཀྱི་འདུ་ཤེས་བཙུགས་ནས་ལྷག་བསམ་རྣམ་དག་ངང་རང་འགན་གཙང་སྒྲུབ་བྱེད་དགོས་པ། སློབ་སྦྱོང་བྱས་པ་བརྒྱུད་ལྗོངས་ཏང་ཨུད་དང་སྲིད་གཞུང་གི་འཐབ་ཇུས་བཀོད་སྒྲིག་རབ་དང་རིམ་པའི་དགོངས་དོན་གྱི་སྙིང་པོ་སྔར་བས་ཁོང་དུ་ཆུད་པ་བྱེད་པ་དང་སྲིད་ཇུས་ཀྱི་དབྱེ་མཚམས་སྟངས་འཛིན་ཡག་པོ་བྱེད་པ། རྩ་དོན་རང་བཞིན་དང་སྟབས་བསྟུན་རང་བཞིན་གཅིག་གྱུར་ཡོང་རྒྱུར་སྔར་བས་སྣང་ཆེན་བྱེད་པ། སྲིད་ཇུས་ཁག་དོན་འཁྱོལ་ཡག་པོ་བཅས་བྱས་ནས་ལས་དོན་དེ་གྲྭ་བཙུན་ཚོའི་སེམས་ནང་ཟུག་པར་བྱས་ཏེ་བྱ་སྤྱོད་དངོས་ཀྱི་ཐོག་ནས་གྲྭ་བཙུན་ཚོའི་རྒྱབ་སྐྱོར་དང་བརྩི་བཀུར་ཐོབ་པ་བྱེད་པ་དང་ལས་དོན་ཐད་ཀྱི་རང་འགུལ་ཐོབ་པ་བྱས་ཏེ་ཆོས་ལུགས་ཁྱབ་ཁོངས་ཀྱི་བརྟན་ལྷིང་སྲུང་སྐྱོང་གི་ཕུགས་ཕན་ལམ་སྲོལ་ཆགས་པ་བྱ་ཆེད་རྨང་གཞི་ལེགས་པོ་ཞིག་འདིང་དགོས་པའི་རེ་བ་བཏོན་གནང་བ་རེད།