ཟླ་8ཚེས་29ཉིན་བོད་ཀྱི་ཕྱི་དོན་སྒྲིག་གཞི་བཙུགས་ནས་ལོ་60འཁོར་བར་དྲན་གསོ་ཞུ་བའི་བཞུགས་མོལ་ཚོགས་འདུ་པེ་ཅིང་དུ་འཚོགས་ཤིང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་དང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་རྣམ་གཉིས་ཀྱིས་ཕྱག་ཡིག་སྤྲིངས་ནས་རྟེན་འབྲེལ་ཞུས་པ་རེད།
ཕྱི་འབྲེལ་པུའི་པུའུ་ཀྲང་གཞོན་པ་ཁྲེང་གོ་ཕིང་དང་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ཀྱི་ཀྲུའུ་རེན་གཞོན་པ་ཀྲང་གཡོད་ཕིང་བཞུགས་མོལ་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་རེད། ཀྲུང་དབྱང་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་གཞོན་པ་སྲི་ཐར་དང་། རྒྱལ་སྲིད་སྤྱི་ཁྱབ་ཁང་གི་ཕྱིར་སྡོད་རང་མིའི་གཞུང་ལས་ཁང་གི་ཀྲུའུ་རེན་གཞོན་པ་ཧོ་ཡ་ཕེ། རྒྱལ་སྲིད་སྤྱི་ཁྱབ་ཁང་གི་ཀང་ཨའོ་གཞུང་ལས་ཁང་གི་ཀྲུའུ་རེན་གཞོན་པ་ཧྭ་ཅན། རྒྱལ་ཡོངས་ཕྱི་ཕྱོགས་མཛའ་གྲོགས་མཐུན་ཚོགས་ཀྱི་ཚོགས་གཙོ་ལི་ཞའོ་ལིན་བཅས་བཞུགས་མོལ་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་རེད།
ཁྲེན་ཆོན་གོ་དང་པད་མ་འཕྲིན་ལས་ཀྱིས་རྟེན་འབྲེལ་ཞུ་བའི་ཕྱག་ཡིག་ནང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ལོ་60རིང་བོད་ཀྱི་ཕྱི་དོན་ལས་དོན་ལ་ཐོབ་པའི་འོད་སྟོང་འབར་བའི་གྲུབ་འབྲས་ལ་སྤྲོ་སེམས་འཁོལ་བའི་རྟེན་འབྲེལ་དང་། རྒྱལ་ཁབ་ཀྱི་འབྲེལ་ཡོད་སྡེ་ཚན་གྱིས་དུས་ཡུན་རིང་པོའི་ནང་བོད་ཀྱི་ཕྱི་དོན་བྱ་གཞག་ལ་ཐུགས་ཁུར་དང་། རྒྱབ་སྐྱོར། མཛུབ་སྟོན། རོགས་རམ་བཅས་གནང་བར་སྙིང་ཐག་པ་ནས་ཐུགས་རྗེ་ཆེ། བོད་ཀྱི་ཕྱི་དོན་བྱ་གཞག་ཆེད་ལེགས་སྐྱེས་མངོན་གསལ་དོད་པོ་ཕུལ་མཁན་བོད་སྐྱོར་བློ་མཐུན་རྒན་གྲས་དང་ལྗོངས་ཡོངས་ཀྱི་ཕྱི་དོན་ཁོངས་གཏོགས་ཀྱི་རྒྱ་ཆེའི་ལས་བྱེད་ལས་བཟོར་བྱམས་བརྩེའི་འཚམས་འདྲི་བཅས་ཞུས་པ་རེད།
ཁྲེན་ཆོན་གོ་དང་པད་མ་འཕྲིན་ལས་ཀྱིས་ལོ་དྲུག་ཅུའི་རིང་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཡང་དག་པའི་འགོ་ཁྲིད་དང་། ཕྱི་འབྲེལ་པུའུ་དང་འབྲེལ་ཡོད་པུའུ་ཨུད་ཀྱི་རྒྱབ་སྐྱོར་དང་མཛུབ་སྟོན་། རང་སྐྱོང་ལྗོངས་ཏང་ཨུད་དང་སྲིད་གཞུང་གི་མཐོང་ཆེན་དང་སྐུལ་འདེད་བཅས་ཀྱི་འོག་བོད་རང་སྐྱོང་ལྗོངས་ཀྱི་ཕྱི་དོན་སྡེ་ཚན་གྱིས་ཏང་དང་རྒྱལ་ཁབ་ཀྱི་ཕྱི་འབྲེལ་དང་ཕྱི་དོན་གྱི་མཛད་ཕྱོགས་སྲིད་ཇུས་ལག་ལེན་མཐའ་གཅིག་ཏུ་བསྟར་བ་དང་ཕྱི་དོན་ལས་དོན་གྱིས་རྒྱལ་ཁྱབ་ཀྱི་སྤྱི་ཡོངས་ཕྱི་འབྲེལ་ལ་ཞབས་འདེགས་ཞུ་རྒྱུ་མཐའ་འཁྱོངས་བྱས་ཏེ་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཞབས་འདེགས་ཞུ་ཆེད་བོད་དང་འབྲེལ་བ་ཡོད་པའི་ཕྱི་ཕྱོགས་བྱ་བ་ཐག་གཅོད་འོས་འཚམ་བྱེད་པ་དང་ཕྱི་ཕྱོགས་ལ་མཛའ་གྲོགས་འགྲོ་འོང་ཧུར་ཐག་སྤེལ་ནས་ཁྱིམ་མཚེས་མཛའ་གྲོགས་འབྲེལ་བ་རྒྱུན་ཆད་མེད་པར་བརྟན་དུ་གཏོང་བ་དང་ཕྱི་ཕྱོགས་ཀྱི་དྲིལ་བསྒྲགས་ཤུགས་ཆེ་རུ་ཏན་ཏིག་བཏང་སྟེ་ཇི་མ་ཇི་བཞིན་དང་། ཞི་མཐུན། གོང་དུ་འཕེལ་བ། མི་རིགས་ཁག་གི་མི་དམངས་བདེ་སྡོད་ལས་བརྩོན་བཅས་ཀྱི་སྤྱི་ཚོགས་རིང་ལུགས་བོད་གསར་འཛམ་གླིང་ཡོངས་ལ་ངོ་སྤྲོད་བྱས་ཏེ་ཏཱ་ལའི་རུ་ཚོགས་དང་རྒྱལ་སྤྱིའི་དགྲ་ཡའི་ཕྱོགས་གཏོགས་ཀྱི་སྐྱོན་འཛུགས་དང་དམའ་འབེབས་ལ་སུན་འབྱིན་ནུས་ལྡན་དང་བོད་ལ་འཛིན་པའི་རྒྱལ་སྤྱིའི་སྤྱི་ཚོགས་ཀྱི་ཕྱོགས་རེའི་ལྟ་སྟངས་དང་གོ་ནོར་གསལ་པོ་བཟོས་ནས་རང་ལྗོངས་འདི་ཉིད་ཚན་རིག་དང་མཐུན་པའི་གོང་འཕེལ་དང་། ཞི་མཐུན་བརྟན་ལྷིང་། དམངས་འཚོ་ལེགས་སུ་འགྲོ་བ། མི་རིགས་མཐུན་སྒྲིལ་བཅས་ཀྱི་དུས་བབ་བཟང་པོ་མངོན་པར་བྱས་ནས་མཐུན་སྒྲིལ་དང་། དམངས་གཙོ། ཕྱུག་པོ། ཤེས་དཔལ། ཞི་མཐུན་བཅས་ཀྱི་སྤྱི་ཚོགས་རིང་ལུགས་བོད་གསར་འཛུགས་ཆེད་ཕྱི་རོལ་གྱི་ཁོར་ཡུག་བཟང་པོ་ཞིག་བཏོད་ཡོད་ཅེས་བསྟན་པ་རེད།
ཕྱི་འབྲེལ་པུའི་པུའུ་ཀྲང་གཞོན་པ་ཁྲེང་གོ་ཕིང་གིས་འཕེལ་རྒྱས་དང་བརྟན་ལྷིང་དོན་ཆེན་གཉིས་ལ་དམ་འཛིན་ནན་པོ་བྱས་ཏེ་བོད་ཀྱི་དཔལ་འབྱོར་དང་སྤྱི་ཚོགས་མཆོང་སྐྱོད་ལྟ་བུའི་འཕེལ་རྒྱས་འགན་ལེན་དང་རྒྱལ་ཁབ་ཀྱི་བདེ་འཇགས་དང་བོད་ཀྱི་ཡུན་རིང་བདེ་འཁོད་འགན་ལེན་བྱ་རྒྱུ་དེ་ནི་ཀྲུང་དབྱང་གིས་ང་ཚོར་གནང་བའི་གལ་འགངས་ཆེ་ཞིང་གཟི་བརྗིད་ལྡན་པའི་ལས་འགན་ཞིག་རེད།
ཕྱིན་ཆད་ཕྱི་འབྲེལ་པུའུ་ཡིས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་ལག་བསྟར་དོན་འཁྱོལ་བྱ་རྒྱུ་དེ་གཙོ་གནད་དུ་བརྩིས་ཏེ་བོད་ཀྱི་ཕྱི་དོན་ལས་དོན་ལ་མུ་མཐུད་རྒྱབ་སྐྱོར་བྱེད་ཤུགས་ཆེ་རུ་གཏོང་བ་དང་བོད་འབྲེལ་གྱི་ཕྱི་དོན་ལས་དོན་གྱི་རྣམ་པ་གསར་པ་རྒྱུན་ཆད་མེད་པར་བཏོད་ནས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་མ་གཏོང་ཆེད་སྟོབས་ཤུགས་ལེགས་སྐྱེས་སུ་འབུལ་རྒྱུ་ཡིན་ཞེས་མཛུབ་སྟོན་གནང་བ་རེད།
ཀྲང་གཡོད་ཕིང་གིས་གསུང་བཤད་གནང་སྐབས་བོད་ཞི་བས་བཅིངས་འགྲོལ་བཏང་རྗེས “བོད་བཞུགས་ཀྲུང་དབྱང་མི་དམངས་སྲིད་གཞུང་གི་སྐུ་ཚབ་ཕྱི་དོན་སྒྲུབ་རོགས་གཞུང་དོན་ཁང ”1952ལོའི་ཟླ་9ཚེས་6ཉིན་དངོས་སུ་བཙུགས་པ་དེ་ཐོག་ནས་བོད་ས་གནས་ཀྱི་ཕྱི་དོན་ལས་དོན་དེ་ཀྲུང་དབྱང་སྲིད་གཞུང་གི་གཅིག་གྱུར་འགོ་ཁྲིད་འོག་འདྲ་མཉམ་གཉིས་ཕན་གྱི་རྨང་གཞིའི་ཐོག་ཕྱི་ཕྱོགས་མཛའ་གྲོགས་འགྲོ་འོང་བྱེད་པའི་དུས་རིམ་གསར་པར་སླེབས་པ་མཚོན་གྱི་ཡོད། ལོ་དྲུག་ཅུའི་རིང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་གཅིག་གྱུར་འགོ་ཁྲིད་དང་། ཕྱི་འབྲེལ་པུའུ་སོགས་རྒྱལ་ཁབ་པུའུ་ཨུད་ཀྱི་འགོ་ཁྲིད་དང་མཛུབ་ཁྲིད། རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐད་ཀའི་འགོ་ཁྲིད་བཅས་ཀྱི་འོག་ཕྱི་དོན་ལས་དོན་པ་མི་རབས་མང་པོས་འབད་བརྩོན་ལྷོད་མེད་བྱས་པ་བརྒྱུད་བོད་ཀྱི་ཕྱི་དོན་ལས་དོན་ལ་གྲུབ་འབྲས་མངོན་གསལ་དོད་པོ་ཐོབ་ཡོད། བོད་ཀྱི་ས་གནས་ཕྱི་དོན་ལས་དོན་དེ་ཀྲུང་དབྱང་གི་གཅིག་གྱུར་འགོ་ཁྲིད་འོག་རྒྱལ་ཁབ་ཀྱི་སྤྱི་ཡོངས་ཕྱི་འབྲེལ་གྱི་ཆེད་དུ་ཞབས་འདེགས་ཞུ་བ་དང་། མེས་རྒྱལ་གཅིག་གྱུར་དང་། རྒྱལ་ཁབ་ཀྱི་བདེ་འཇགས། བོད་ཀྱི་བརྟན་ལྷིང་བཅས་སྲུང་སྐྱོང་བྱེད་པར་ཞབས་འདེགས་ཞུ་བ། བོད་ཀྱི་དཔལ་འབྱོར་དང་སྤྱི་ཚོགས་མཆོང་སྐྱོད་ལྟ་བུའི་འཕེལ་རྒྱས་ཀྱི་ཆེད་དུ་ཞབས་འདེགས་ཞུ་བ་བཅས་ཀྱི་ཁ་ཕྱོགས་བློ་བརྟན་འགྱུར་མེད་ངང་མཐའ་འཁྱོངས་བྱེད་པ་དང་བོད་ཀྱི་ཕྱི་དོན་ལས་དོན་གྱི་རྣམ་པ་གསར་པ་རྒྱུན་ཆད་མེད་པར་བཏོད་དེ་གྲུབ་འབྲས་ཕུལ་དུ་བྱུང་བའི་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་ཞེས་གསུངས་པ་རེད།