ཟླ་8ཚེས་30ཉིན་གྱི་སྔ་དྲོ་རྒྱལ་ཡོངས་ཡུལ་སྐོར་བོད་སྐྱོར་ལས་དོན་བཞུགས་མོལ་ཚོགས་འདུ་ལྷ་སར་འཚོགས་པ་རེད།
རྒྱལ་ཁབ་ཡུལ་སྐོར་ཅུས་ཀྱི་ཅུས་ཀྲང་ཧྲའོ་ཆི་ཝུའེ་དང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ཀྱི་ཀྲུའུ་རེན་བྱམས་པ་ཕུན་ཚོགས་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་རེད།
ཚོགས་འདུ་དེ་རྒྱལ་ཁབ་ཡུལ་སྐོར་ཅུས་ཏང་ཙུའི་ཧྲུའུ་ཅི་གཞོན་པ་ཅུས་ཀྲང་གཞོན་པ་ཝང་ཀྲི་ཧྥ་ཡིས་གཙོ་སྐྱོང་གནང་བ་རེད།
ཧྲའོ་ཆི་ཝུའེ་ཡི་གསུང་བཤད་ནང་རྒྱལ་ཁབ་ཡུལ་སྐོར་ཅུས་ཀྱིས་སྔར་ནས་བོད་ཀྱི་ལས་དོན་སྐོར་གྱི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་བྱེད་ཕྱོགས་སྲིད་ཇུས་མཐའ་གཅིག་ཏུ་ལག་བསྟར་དང་། བོད་ཀྱི་དོན་དངོས་དང་ཟུང་འབྲེལ་དམ་ཟབ། ལས་རིགས་ཀྱི་ལེགས་ཆ་འདོན་སྤེལ་གང་ལེགས་བཅས་བྱས་ཏེ་བོད་ལ་སྤྱི་ཡོངས་ཀྱི་ཡུལ་སྐོར་འཆར་འགོད་དང་གཙོ་གནད་ཡུལ་སྐོར་མཛེས་ལྗོངས་ཁུལ་གྱི་ཡུལ་སྐོར་འཕེལ་རྒྱས་འཆར་འགོད་བཟོ་བའི་ལས་དོན་ཡག་པོ་སྒྲུབ་རོགས་བྱེད་པ་དང་། ཡུལ་སྐོར་འཕེལ་རྒྱས་ཐེབས་རྩ་གཏོང་རྒྱུའི་ཐད་བོད་ལ་གཟིགས་སྐྱོང་བྱེད་པ་དང་འབྲེལ་2003ལོ་ནས་བཟུང་ཡུལ་སྐོར་སྣེ་ཤན་པ་བོད་སྐྱོར་ལོ་བཅུ་བྱེད་པའི་འཆར་གཞི་ལག་བསྟར་བྱས་ནས་བོད་ཀྱི་ཡུལ་སྐོར་ལས་རིགས་སྤྱི་ཡོངས་ཀྱི་ཞབས་ཞུའི་ཆུ་ཚད་དང་འཕེལ་རྒྱས་ཆུ་ཚད་ནུས་ལྡན་མཐོ་རུ་ཕྱིན་ཡོད། གོམ་སྟབས་རྗེས་མར་རྒྱལ་ཁབ་ཡུལ་སྐོར་ཅུས་ཀྱིས་ཡུལ་སྐོར་བོད་སྐྱོར་ལས་དོན་སྔར་བས་ཡག་པོ་བསྒྲུབས་ཏེ་ཡུལ་སྐོར་བོད་སྐྱོར་ལས་དོན་ལམ་སྲོལ་འཛུགས་པ་དང་རིག་སྟོབས་ལ་བརྟེན་ནས་བོད་སྐྱོར་ལས་དོན་སྒྲུབ་ཤུགས་ཆེ་རུ་བཏང་ནས་ཡུལ་སྐོར་བོད་སྐྱོར་ལས་འགན་ཁག་ཐུགས་གྲ་ལེགས་འགྲིག་ཡོང་བ་བྱས་ཏེ་བོད་འདི་ཉིད་འཛམ་གླིང་ཡུལ་སྐོར་བྱ་ཡུལ་གལ་ཆེན་དུ་སྐྲུན་ཆེད་དང་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་ཆེད་ལེགས་སྐྱེས་དེ་བས་ཆེ་བ་འབུལ་རྒྱུ་ཡིན་ཞེས་གསུངས་པ་རེད།
བྱམས་པ་ཕུན་ཚོགས་ཀྱིས་ཐོག་མར་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ལྗོངས་ཡོངས་ཀྱི་མི་རིགས་ཁག་གི་མི་དམངས་ཀྱི་ཚབ་ཞུས་ནས་ཧྲའོ་ཆི་ཝུའེ་ཡིས་སྣེ་འཁྲིད་པའི་རྒྱལ་ཡོངས་ཡུལ་སྐོར་བོད་སྐྱོར་ལས་དོན་གྱི་འཐུས་མི་ཚོགས་པ་དང་བཅས་པ་བོད་དུ་ཕེབས་པར་སྤྲོ་སེམས་འཁོལ་བའི་དགའ་བསུ་ཞུས་པ་དང་རྒྱལ་ཁབ་ཡུལ་སྐོར་ཅུས་དང་རྒྱལ་ཡོངས་སྤུན་ཟླའི་ཞིང་ཆེན་དང་གྲོང་ཁྱེར་ཁག་གིས་ཡུན་རིང་ནང་བོད་ལ་རྒྱབ་སྐྱོར་ཤུགས་ཆེན་དང་སྒེར་སེམས་མེད་པའི་རོགས་སྐྱོར་གནང་བར་སྙིང་དབུས་ནས་ཐུགས་རྗེ་ཆེ་ཞུས་པ་རེད། བྱམས་པ་ཕུན་ཚོགས་ཀྱིས་ཡུན་རིང་ནང་རྒྱལ་ཁབ་ཡུལ་སྐོར་ཅུས་དང་ཁ་གཏད་བོད་སྐྱོར་ཞིང་ཆེན་དང་གྲོང་ཁྱེར་གྱིས་བོད་ཀྱི་ཡུལ་སྐོར་འཕེལ་རྒྱས་ལ་སྔ་ཕྱི་བར་གསུམ་དུ་ཚད་མཐོའི་མཐོང་ཆེན་གནང་སྟེ་སྲིད་ཇུས་ཐད་རོགས་སྐྱོར་བྱེད་ཤུགས་དང་། མ་དངུལ་གཏོང་ཤུགས། རྣམ་གྲངས་དོན་འཁྱོལ་བྱེད་ཤུགས། ཤེས་ལྡན་མི་སྣའི་བོད་སྐྱོར་བྱེད་ཤུགས་བཅས་རྒྱུན་ཆད་མེད་པར་ཆེ་རུ་བཏང་ནས་རང་ལྗོངས་ཀྱི་ཡུལ་སྐོར་ལས་རིགས་ཀྱི་འཕེལ་རྒྱས་ལ་སྐུལ་འདེད་ཧ་ཅང་ཆེན་པོ་བཏང་བ་དང་འབྱོར་འབྲིང་བོད་ལྗོངས་དང་། དུས་བདེའི་བོད་ལྗོངས། ཞི་མཐུན་བོད་ལྗོངས། སྣོད་བཅུད་བཟང་བའི་བོད་ལྗོངས་བཅས་འཛུགས་སྐྲུན་བྱེད་པའི་ཁྲོད་ནུས་པ་གལ་ཆེན་བཏོན་པ་དང་ལེགས་སྐྱེས་གལ་ཆེན་ཕུལ་ཡོད། སླད་ཕྱིན་རང་ལྗོངས་ཀྱིས་ཚོགས་འདུ་དེ་གོ་སྐབས་སུ་བརྩིས་ནས་རྒྱལ་ཁབ་ཀྱི་དམིཌ་བསལ་གཟིཌ་སྐྱོང་སྲིད་ཇུས་དང་རྒྱལ་ཡོངས་ཡུལ་སྐོར་ཁོངས་གཏོགས་ཀྱི་ཁ་གཏད་རོགས་སྐྱོར་གྱི་ལེགས་ཆ་བེད་སྤྱོད་ཡག་པོ་བཏང་ནས་ཡུལ་སྐོར་འཆར་འགོད་སྔར་བས་ཡག་པོ་བཟོ་བ་དང་། ཡུལ་སྐོར་གྱི་རྨང་གཞིའི་འཛུགས་སྐྲུན་དམ་འཛིན་ཡག་པོ་བྱེད་པ། ཡུལ་སྐོར་བདེ་འཇགས་ཀྱི་འགན་ལེན་ཆུ་ཚད་མཐོ་རུ་གཏོང་བ། ཁྱད་ལྡན་ཡུལ་སྐོར་ལམ་ཐིག་ཡག་པོ་གཏོད་པ་བཅས་བྱས་ནས་རང་ལྗོངས་འདི་ཉིད་འཛམ་གླིང་གི་ཡུལ་སྐོར་བྱ་ཡུལ་གལ་ཆེན་དུ་འཛུགས་སྐྲུན་ཧུར་ཐག་བྱས་ཏེ་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་བའི་འདེགས་སྐྱོར་ནུས་ལྡན་ཞིག་མཁོ་འདོན་བྱེད་རྒྱུ་ཡིན་ཞེས་ནན་བཤད་གནང་བ་རེད།
ཚོགས་འདུའི་ཐོག་རང་སྐྱོང་ལྗོངས་ཡུལ་སྐོར་ཅུས་ཏང་ཙུའི་ཧྲུའུ་ཅི་ཡུས་ཡུང་ཀུའེ་ཡིས་བོད་ཀྱི་ཡུལ་སྐོར་ཐད་ཀྱི་འབྲེལ་ཡོད་གནས་ཚུལ་ངོ་སྤྲོད་བྱས་པ་དང་རྒྱལ་ཡོངས་ཀྱི་ཁ་གཏད་བོད་སྐྱོར་ཞིང་ཆེན་དང་། ཁེ་ལས། སློབ་གླིང་། ཡུལ་སྐོར་སྣེ་ཤན་པའི་འཐུས་མི་བཅས་ཁག་གཅིག་དང་སྤེལ་རེས་གཏམ་བཤད་བྱས་པ་རེད།