ཟླ་8ཚེས་27ཉིན་གྱི་སྔ་དྲོ་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷས་ལྷ་སར་དྲག་ཆས་ཉེན་རྟོག་གསེར་གཏེར་བཀོད་འདོམས་པུའི་ཆབ་སྲིད་ཨུ་ཡོན་དབྱང་ཅི་མིང་བཅས་པ་དང་བྱམས་བརྩེའི་ངང་མཇལ་འཛོམས་གནང་བ་རེད།

    དང་ཐོག་ཆེ་དགྲ་ལྷས་ལྷ་ས་གྲོང་ཨུད་དང་གྲོང་ཁྱེར་སྲིད་གཞུང་དང་དེ་བཞིན་གྲོང་ཁྱེར་ཡོངས་ཀྱི་མི་རིགས་ཁག་གི་མི་དམངས་ཀྱི་ཚབ་ཞུས་ནས་དྲག་ཆས་ཉེན་རྟོག་གསེར་གཏེར་བཀོད་འདོམས་པུའི་ཆབ་སྲིད་ཨུ་ཡོན་དབྱང་ཅི་མིང་དང་བཅས་པས་བོད་དུ་ཕེབས་པར་སྤྲོ་སེམས་འཁོལ་བའི་ངང་དགའ་བསུ་ཞུས་གནང་བ་དང་འབྲེལ་དྲག་ཆས་ཉེན་རྟོག་གསེར་གཏེར་དཔུང་སྡེས་ལྷ་སའི་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་རྒྱབ་སྐྱོར་ཤུགས་ཆེན་གནང་བར་ཐུགས་རྗེ་ཆེ་ཞུས་པ་རེད། ད་ཕན་ལོ་ཤས་རིང་ལྷ་ས་གྲོང་ཁྱེར་ལ་ཐོབ་པའི་གྲུབ་འབྲས་གཙོ་བོ་དང་2012ལོའི་ལྷ་ས་གྲོང་ཁྱེར་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་བསམ་ཕྱོགས་གཙོ་བོ་ངོ་སྤྲོད་རགས་ཙམ་གནང་རྗེས་ཆེ་དགྲ་ལྷས་ལྷ་ས་ནི་རང་བྱུང་ཐོན་ཁུངས་ཧ་ཅང་ཕུན་སུམ་ཚོགས་པའི་ས་ཁུལ་ཞིག་ཡིན། དྲག་ཆས་ཉེན་རྟོག་གསེར་གཏེར་དཔུང་སྡེས་ཏང་ཀྲུང་དབྱང་གི་ནུབ་རྒྱུད་ཐོན་འབྱེད་ཆེ་མོའི་འབོད་སྐུལ་དང་ལེན་བྱས་ནས་ལྷ་སར་གཏེར་ཐོན་རྩད་ཞིབ་ལས་དོན་ཧུར་ཐག་སྤེལ་བ་མ་ཟད་ཚད་བརྒལ་དང་དུས་མཚམས་རང་བཞིན་གྱི་གྲུབ་འབྲས་ཐོབ་ནས་རྒྱལ་ཁབ་དང་ལྷ་སའི་དཔལ་འབྱོར་འཕེལ་རྒྱས་འགྲོ་རྒྱུར་རྒྱབ་སྐྱོར་བྱ་ཆེད་དགེ་མཚན་ལྡན་པའི་ལེགས་སྐྱེས་ཕུལ་ཡོད། དྲག་ཆས་ཉེན་རྟོག་གསེར་གཏེར་དཔུང་སྡེས་ལྷ་སའི་ས་གཤིས་རྩད་ཞིབ་ལས་དོན་ལ་མུ་མཐུད་རྒྱབ་སྐྱོར་དང་དེའི་ནང་ཞུགས་ཏེ་ལྷ་སའི་དཔལ་འབྱོར་དང་སྤྱི་ཚོགས་འཕེལ་རྒྱས་ཆེད་དེ་བས་ཆེ་བའི་ལེགས་སྐྱེས་འབུལ་རྒྱུའི་རེ་བ་ཡོད། ལྷ་ས་གྲོང་ཁྱེར་གྱིས་དྲག་ཆས་ཉེན་རྟོག་གསེར་གཏེར་བཀོད་འདོམས་པུའི་ཉིང་ལག་རུ་ཁག་བཅུ་གཅིག་པ་ལྷ་སར་བཅའ་སྡོད་དང་གཏེར་ཁ་འཚོལ་བ་དང་དེ་བཞིན་འབྲེལ་ཡོད་ཀྱི་ལས་དོན་སྤེལ་རྒྱུར་ནུས་ཤུགས་ཡོད་རྒུས་རྒྱབ་སྐྱོར་དང་གཞོགས་འདེགས་བྱ་རྒྱུ་ཡིན་ཞེས་གསུངས་པ་རེད།

    དབྱང་ཅི་མིང་གིས་རང་སྐྱོང་ལྗོངས་ཏང་ཨུད་དང་ལྷ་ས་གྲོང་ཨུད་ཀྱི་ཤུགས་ཆེའི་རྒྱབ་སྐྱོར་འོག་དྲག་ཆས་ཉེན་རྟོག་གསེར་གཏེར་དཔུང་སྡེས་ལྷ་སར་ས་གཤིས་རྩད་ཞིབ་བྱེད་ཤུགས་སྔར་བས་ཆེ་རུ་བཏང་ནས་ལྷ་སའི་དཔལ་འབྱོར་དང་སྤྱི་ཚོགས་འཕེལ་རྒྱས་ཆེད་མུ་མཐུད་ལེགས་སྐྱེས་གསར་པ་འབུལ་རྒྱུ་ཡིན་ཞེས་གསུངས་པ་རེད།