ཟླ་8ཚེས་27ཉིན་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་བདེ་སྐྱིད་ཀྱིས་ལྷ་སར་ནེ་པ་ལའི་གཙོ་ཆེའི་སྨྱན་སྦྱོར་རྟོག་ཞིབ་ཚོགས་པ་དང་བཅས་པར་མཇལ་འཕྲད་གནང་བ་རེད།

    བདེ་སྐྱིད་ཀྱིས་དང་ཐོག་རང་སྐྱོང་ལྗོངས་སྲིད་གཞུང་གི་ཚབ་ཞུས་ཏེ་རྟོག་ཞིབ་ཚོགས་པ་དང་བཅས་པས་བོད་དུ་རྟོག་ཞིབ་གནང་བར་ཕེབས་པར་དགའ་བསུ་ཞུས་པ་དང་འབྲེལ་སྐུ་མགྲོན་ཚོར་རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་འགྲོ་ཚུལ་ངོ་སྤྲོད་སྟབས་བདེ་ཞིག་ཀྱང་གནང་བ་རེད། དེ་རྗེས་ཁོང་གིས་ཀྲུང་ནེ་ནི་རི་ཆུ་གཅིག་ཏུ་སྦྲེལ་བའི་རྒྱལ་ཁབ་གཉིས་རེད། ང་ཚོ་ནི་ཁྱིམ་མཚེས་ཡག་པོ་དང་། རོགས་ཟླ་ཡག་པོ། སྤུན་ཟླ་ཡག་པོ་བཅས་ཡིན་པ་དང་། རྒྱལ་ཁབ་གཉིས་པོའི་མཐོ་རིམ་དབར་འགྲོ་འོང་མང་བ། དཔལ་འབྱོར་ཚོང་དོན་འབྲེལ་བ་ཟབ་པ། རིག་གནས་སྤེལ་རེས་ལས་དོན་སྤེལ་མང་བ་བཅས་ཡིན། བོད་དུ་བཅིངས་འགྲོལ་བཏང་ནས་ལོ་60ལྷག་ཙམ་རིང་ཀྲུང་དབྱང་དང་རྒྱལ་ཡོངས་མི་དམངས་ཀྱི་རྒྱབ་སྐྱོར་འོག་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་སྟེ་དཔལ་འབྱོར་འཕེལ་རྒྱས་མྱུར་པོ་བྱུང་བ་དང་། མི་དམངས་ཀྱི་འཚོ་བའི་ཆུ་ཚད་མངོན་གསལ་དོད་པོས་མཐོ་རུ་ཕྱིན་པ། བདེ་སྡོད་ལས་གྲྭ་ཚད་བརྒལ་སར་བྱས་པའི་སྤྱི་ཚོགས་རིང་ལུགས་ཀྱི་གྲོང་གསེབ་གསར་པ་འཛུགས་སྐྲུན་ལ་སྐུལ་འདེད་ཏན་ཏིག་ཐེབས་པ། འགྲིམ་འགྲུལ་ཆ་རྐྱེན་མངོན་གསལ་དོད་པོས་ལེགས་སུ་ཕྱིན་པ་། ཞིང་འབྲོག་པའི་བུ་ཕྲུག་ལ “འགན་ལེན་གསུམ ”གྱི་སྲིད་ཇུས་ལོངས་སུ་སྤྱོད་རྒྱུ་བྱུང་བ། སློབ་གསོའི་ཆུ་ཚད་མངོན་གསལ་དོད་པོས་མཐོ་རུ་སོང་བ། སྤྱི་ཚོགས་འགན་ལེན་མ་ལག་རྒྱུན་ཆད་མེད་པར་ལེགས་སུ་ཕྱིན་པ། སྨན་བཅོས་ཆུ་ཚད་རྒྱུན་ཆད་མེད་པར་མཐོ་རུ་སོང་ཡོད་ཅེས་གསུངས་པ་རེད།

    བདེ་སྐྱིད་ཀྱིས་ནེ་པ་ལ་སྲིད་གཞུང་གིས་ཐོག་མཐར་བར་གསུམ་དུ “ཀྲུང་གོ་གཅིག ”གི་རྩ་དོན་མཐའ་འཁྱོངས་གནང་བར་ཐུགས་རྗེ་ཞུ་རྒྱུ་དང་སྦྲགས་རྟོག་ཞིབ་ཚོགས་པས་བོད་དུ་རྟོག་ཞིབ་གནང་རིང་སྤྲོ་པོ་ཡོང་བའི་སྨོན་འདུན་ཡང་ཞུ་རྒྱུ་ཡིན་ཞེས་གསུངས་པ་རེད། ནེ་པ་ལའི་གཙོ་ཆེའི་སྨྱན་སྦྱོར་རྟོག་ཞིབ་ཚོགས་པའི་ཚོགས་གཙོ་ཤིས་སེ་ཏ་·ཡ་རྨི་ཡིས་རང་སྐྱོང་ལྗོངས་སྲིད་གཞུང་གིས་སྤྲོ་སེམས་འཁོལ་པོས་སྣེ་ལེན་གནང་བར་ཐུགས་རྗེ་ཆེ་ཞུ་རྒྱུ་ཡིན་ཞེས་དང་ཀྲུང་ནེའི་མཉམ་ལས་ཁྱབ་ཁོངས་ཤིན་ཏུ་ཆེན་པོ་ཡོད། སླད་ཕྱིན་རྒྱལ་ཁབ་གཉིས་པོས་མཉམ་ལས་ལ་ཤུགས་སྣོན་བརྒྱབ་ནས་ཐུན་མོང་ཐོག་འཕེལ་རྒྱས་འགྲོ་རྒྱུར་སྐུལ་འདེད་གཏོང་རྒྱུའི་རེ་བ་ཡོད་ཅེས་གསུངས་པ་རེད།

    མཇལ་འཕྲད་གནང་རིང་བདེ་སྐྱིད་ཀྱིས་ད་དུང་རྟོག་ཞིབ་ཚོགས་པས་དོ་ཁུར་བྱེད་པའི་གནད་དོན་ལ་ལན་ཡང་བསྐྱོན་པ་རེད།