ཟླ་8ཚེས་27ཉིན་གྱི་ཕྱི་དྲོ་ལྗོངས་ཏང་ཨུད་ཀྱི་རྒྱུན་ཨུ་ལྗོངས་ཏང་ཨུད་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཏེང་ཞའོ་ཀང་གིས་བོད་དུ་ལས་དོན་ལ་རྟོག་ཞིབ་དང་མཛུབ་ཁྲིད་གནང་བར་ཕེབས་པའི་ཀྲེ་ཅང་ཞིང་ཆེན་ཞིབ་དཔྱོད་ཁང་གི་ཞིབ་དཔྱོད་དཔོན་ཁྲེང་ཡུན་ལུང་བཅས་པ་དང་བཞུགས་མོལ་གནང་བ་རེད།
རང་སྐྱོང་ལྗོངས་མི་དམངས་ཞིབ་དཔྱོད་ཁང་གི་ཅན་ཁྲ་ཀྲང་ཀྲང་ཕེ་ཀྲུང་གིས་བཞུགས་མོལ་ཚོགས་འདུ་གཙོ་སྐྱོང་གནང་བ་རེད།
ཏེང་ཞའོ་ཀང་གིས་དུས་ཡུན་རིང་པོའི་ནང་ཀྲེ་ཅང་ཞིང་ཆེན་ཞིབ་དཔྱོད་ཁོངས་གཏོགས་ཀྱིས་ཏང་ཀྲུང་དབྱང་གི་འབོད་སྐུལ་ལ་བརྡ་ལན་ཧུར་ཐག་ཞུས་ནས་བོད་ཀྱི་ཞིབ་དཔྱོད་ལས་ཀར་ཤུགས་ཆེའི་རྒྱབ་སྐྱོར་དང་འཇུངས་པ་མེད་པའི་རོགས་རམ་གནང་བ་དང་ལྷག་པར་དུ་ལོ་མང་རིང་ཀྲེ་ཅང་ཞིང་ཆེན་ཞིབ་དཔྱོད་ཁང་དང་གྲོང་ཁྱེར་ཡན་ལག་ཞིབ་དཔྱོད་ཁང་གིས་སློབ་གསོ་དང་། ཤེས་ལྡན་པ། མ་དངུལ། སྒྲིག་ཆས། རྨང་གཞིའི་སྒྲིག་བཀོད་སོགས་ཀྱི་ཐད་རང་ལྗོངས་ཀྱི་ནག་ཆུ་ས་ཁུལ་གྱི་རིམ་གཉིས་ཞིབ་དཔྱོད་ལས་ཁུངས་ལ་ཤུགས་ཆེའི་རྒྱབ་སྐྱོར་གནང་ནས་བོད་ཀྱི་འཕེལ་རྒྱས་བརྟན་ལྷིང་ཆེད་ལེགས་སྐྱེས་མངོན་གསལ་དོད་པོ་ཕུལ་ཡོད། ད་རེས་རྟོག་ཞིབ་ཚོགས་པ་དང་བཅས་པས་ཆེད་མངགས་བོད་དུ་བོད་སྐྱོར་ལས་ཀར་མཛུབ་ཁྲིད་གནང་བར་ཕེབས་པ་དེ་ཐོག་ནས་ཀྲེ་ཅང་ཞིང་ཆེན་ཞིབ་དཔྱོད་ཁོངས་གཏོགས་ཀྱིས་ཚད་མཐོའི་ཆབ་སྲིད་ཀྱི་འགན་སེམས་དང་། ཁྱོན་ཡོངས་ཀྱི་འདུ་ཤེས། འགན་འཁྲིའི་འདུ་ཤེས་བཅས་བཅངས་པ་གང་ལེགས་མཚོན་ཡོད་ཅེས་གསུངས་པ་དང་། ཏེང་ཞའོ་ཀང་གིས་རང་སྐྱོང་ལྗོངས་ཏང་ཨུད་དང་ལྗོངས་ཏང་ཨུད་སྲིད་ཁྲིམས་ཨུ་ལྷན་གྱི་ཚབ་ཞུས་ཏེ་ཁྲེང་ཡུན་ལུང་དང་བཅས་པས་བོད་དུ་ཕེབས་པར་སྤྲོ་སེམས་འཁོལ་བའི་དགའ་བསུ་ཞུས་ནས་དུས་ཡུན་རིང་པོའི་ནང་ཀྲེ་ཅང་ཞིང་ཆེན་ཞིབ་དཔྱོད་ཁོངས་གཏོགས་ཀྱིས་རང་ལྗོངས་ཀྱི་ཞིབ་དཔྱོད་ལས་ཁུངས་ལ་འཇུངས་པ་མེད་པའི་རོགས་རམ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་པ་རེད།
ཏེང་ཞའོ་ཀང་གིས་ནག་ཆུ་ས་ཁུལ་གྱི་རིམ་གཉིས་ཞིབ་དཔྱོད་ལས་ཁུངས་ལ་ཁ་གཏད་རོགས་སྐྱོར་བྱེད་མཁན་ཀྲེ་ཅང་ཞིང་ཆེན་ཞིབ་དཔྱོད་ཁོངས་གཏོགས་ཀྱིས་བོད་ཀྱི་ཞིབ་དཔྱོད་ཁོངས་གཏོགས་དང་མཉམ་དུ་ནག་ཆུའི་ལས་དོན་ཁག་ལེགས་པར་བསྒྲུབ་རྒྱུར་དོན་སྙིང་ཆེན་པོ་ལྡན་པས་ས་གནས་གཉིས་ཀྱི་ཞིབ་དཔྱོད་ལས་ཁུངས་དབར་འབྲེལ་ལམ་ཡག་པོ་འཛུགས་པ་དང་ཕན་ཚུན་མཐུན་སྒྲིལ་དང་གཞོགས་འདེགས་ཡག་པོ་བྱས་ཏེ་གནད་དོན་ལ་ཞིབ་འཇུག་ཞིབ་ཚགས་དང་དཀའ་གནད་བསལ་ནས་ཁ་གཏད་རོགས་སྐྱོར་ལས་ཀ་སྔར་ལས་གཏིང་ཟབ་ཏུ་གཏོང་རྒྱུའི་རེ་བ་ཡོད་ཅེས་གསུངས་པ་དང་། ཁོང་གིས་ཅན་ཁྲ་ཀྲང་ཁྲེང་ཡུན་ལུང་དང་བཅས་པས་བོད་དུ་ཕེབས་པ་དེས་བོད་སྐྱོར་ཞིབ་དཔྱོད་ལས་ཀར་རྣམ་པ་གསར་པ་ཐོན་རྒྱུ་ཡིན་པ་མ་ཟད། ནག་ཆུ་ས་ཁུལ་གྱི་འཕེལ་རྒྱས་དང་བརྟན་ལྷིང་ལ་སྔར་ལས་ལྷག་པའི་སྐུལ་མ་ཐེབས་ངེས་ཡིན་པའི་ཡིད་ཆེས་ཡོད་ཅེས་གསུངས།
ཁྲེང་ཡུན་ལུང་གིས་ད་རེས་ཀྱི་རྟོག་ཞིབ་ལས་དོན་དེ་ཉེ་ཆར་མཐོ་རིམ་ཞིབ་དཔྱོད་ཁང་གིས་འཚོགས་པའི་རྒྱལ་ཡོངས་ཀྱི་ཞིབ་དཔྱོད་ལས་ཁུངས་ཀྱི་བོད་སྐྱོར་དང་ཤིན་སྐྱོར་ལས་ཀའི་ཉམས་མྱོང་སྤེལ་རེས་ཚོགས་འདུ་གོ་སྐབས་སུ་བྱ་རྒྱུ་དམ་འཛིན་དང་བབ་བསྟུན་ཡར་རྒྱས་ཡོང་བ་བྱས་ནས་བོད་སྐྱོར་བྱེད་སྟངས་གསར་གཏོད་དང་། བོད་སྐྱོར་བྱ་བའི་དོ་དམ་ནན་དུ་གཏོང་བ། བོད་སྐྱོར་ལམ་སྲོལ་འཐུས་སྒོ་ཚང་དུ་གཏོང་བའི་སྒོ་ནས་བོད་སྐྱོར་ལ་ཕན་ནུས་སྔར་ལས་ཆེ་བ་ཐོན་པ་དང་བོད་སྐྱོར་ལས་ཀའི་ཁྲོད་ཐོན་པའི་གནད་དོན་གཏིང་ཟབ་པོར་སྔར་བས་ཞིབ་འཇུག་དང་ཐག་གཅོད་བྱེད་པ་དང་ལྷག་པར་དུ་ཁ་གཏད་རོགས་སྐྱོར་བྱ་ཡུལ་ནག་ཆུ་ས་ཁུལ་གྱི་བོད་སྐྱོར་ཞིབ་དཔྱོད་ལས་ཀ་དེ་ཉིད་གཏིང་ཚུགས་དང་། ཞིབ་ཕྲ། དངོས་དངོས་རྗེན་རྗེན་བཅས་ཀྱི་ཐོག་ནས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་ལེགས་སྐྱེས་གསར་པ་འབུལ་རྒྱུ་ཡིན་ཞེས་གསུངས་པ་རེད།