ཟླ་8ཚེས་24ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་གིས་སྤྱི་བདེ་པུའི་མཐའ་སྲུང་དོ་དམ་ཅུས་ཀྱི་ཅུས་ཀྲང་ཝུའུ་ཏུང་ལི་བཅས་པ་དང་མཇལ་འཛོམས་གནང་བ་རེད།

    རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཏེང་ཞའོ་ཀང་མཇལ་འཛོམས་ནང་ཞུགས་པ་རེད།

    ཧའོ་ཕུང་གིས་ཐོག་མར་ཝུའུ་ཏུང་ལི་བཅས་པ་ཆེད་མངགས་བོད་དུ་བོད་ཀྱི་སྤྱི་བདེ་མཐའ་སྲུང་ལས་དོན་ལ་རྟོག་ཞིབ་དང་མཛུབ་ཁྲིད་གནང་བར་ཕེབས་པར་དགའ་བསུ་ཞུས་གནང་བ་དང་སྤྱི་བདེ་པུའུ་དང་དེ་བཞིན་མཐའ་སྲུང་དོ་དམ་ཅུས་ཀྱིས་དུས་ཡུན་རིང་པོའི་ནང་བོད་ཀྱི་ལས་དོན་ལ་ཐུགས་ཁུར་གནང་བ་དང་ལྷག་པར་དུ་བོད་ཀྱི་སྤྱི་བདེ་མཐའ་སྲུང་དཔུང་སྡེ་འཛུགས་སྐྱོང་ལ་དམིགས་བསལ་གྱི་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་རེད། ཧའོ་ཕུང་གིས་བོད་ཀྱི་སྤྱི་བདེ་མཐའ་སྲུང་དཔུང་སྡེའི་རྒྱ་ཆེའི་དཔོན་དམག་ཚོས་ལོ་བསྟུད་མར་གངས་ལྗོངས་ས་མཐོར་བཅའ་སྲུང་བྱས་ཏེ་བླ་ན་མེད་པའི་འགན་འཁྲི་ཟོལ་མེད་ངང་སྒྲུབ་པ་དང་། མེས་རྒྱལ་ལྷོ་ནུབ་ཀྱི་མཐའ་སྲུང་བརྟན་དུ་གཏོང་བ། བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་རྒྱུར་ལེགས་སྐྱེས་ཧུར་ཐག་འབུལ་བ་བཅས་བྱས་ནས་བོད་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་དང་བརྩེ་དུང་ཟབ་མོ་བཙུགས་པ་དང་ལྷག་པར་དུ་2008ལོའི་པེ་ཅིང་ཨོ་རྩལ་འགྲན་ཚོགས་ཀྱི་མེ་མཆོག་ཇོ་མོ་གླང་མའི་རྩེ་མོར་སྐྱེལ་བ་དང་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བའི་རྟེན་འབྲེལ་མཛད་སྒོ་སོགས་བྱེད་སྒོ་གལ་ཆེན་རབ་དང་རིམ་པའི་ནང་གི་བདེ་སྲུང་ལས་དོན་ཁག་ཕུལ་དུ་བྱུང་བའི་སྒོ་ནས་ལེགས་སྒྲུབ་བྱས་པ་དང་འགག་རྩའི་དུས་སུ་དཀའ་སྡུག་ལ་མི་སྐྲག་པའི་ཞུམ་མེད་ཀྱི་སྙིང་སྟོབས་མངོན་པར་བྱས་ཡོད། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་བོད་ལྗོངས་སྤྱི་བདེ་མཐའ་སྲུང་སྤྱི་ཁྱབ་རུ་ཁག་གི་ལས་དོན་ཁག་ལ་ཁས་ལེན་གང་ལེགས་དང་ཚད་མཐོའི་གདེང་འཇོག་གནང་ཡོད། སླད་ཕྱིན་སྔར་བཞིན་བོད་ཀྱི་སྤྱི་བདེ་མཐའ་སྲུང་དཔུང་སྡེ་འཛུགས་སྐྱོང་དང་འཕེལ་རྒྱས་ལ་ཐུགས་ཁུར་དང་རྒྱབ་སྐྱོར་གནང་སྟེ་དཔུང་སྡེ་དེས་མཐའ་བརྟན་མཐའ་དར་ཡོང་བ་བྱེད་པའི་ཁྲོད་ནུས་པ་དེ་བས་ཆེ་བ་འབུལ་ཐུབ་པ་བྱེད་དགོས་ཞེས་གསུངས་པ་རེད།

    ཧའོ་ཕུང་གིས་དེང་སྐབས་བོད་ཀྱི་དཔལ་འབྱོར་བསྡོམས་འབོར་དེ་སྐས་རིམ་གསར་པ་ཞིག་ཏུ་སླེབས་པ་དང་། རྨང་གཞིའི་སྒྲིག་བཀོད་འཛུགས་སྐྲུན་ལ་ཚད་བརྒལ་གསར་པ་བྱུང་བ། གྲོང་ཁྱེར་དང་གྲོང་གསེབ་ཀྱི་རྣམ་པར་འགྱུར་ལྡོག་གསར་པ་བྱུང་བ། མི་རིགས་ཁག་གི་མང་ཚོགས་ཀྱི་འཚོ་བ་ལེགས་སུ་ཕྱིན་པ་བཅས་དང་ལྷག་པར་དུ་ན་ནིང་ནས་བཟུང་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་སྔ་ཙམ་དམ་འཛིན་བྱེད་པ་དང་། ཆུང་ཙག་ནས་དམ་འཛིན་བྱེད་པ། དམ་འཛིན་མགྱོགས་པོ་བྱེད་པ། དམ་འཛིན་ཡག་པོ་བྱེད་པ་བཅས་ལ་གཞི་བཙུགས་ནས་ཕྱོགས་བཅུའི་ཐད་ཀྱི་བརྟན་ལྷིང་སྲུང་སྐྱོང་བྱ་ཐབས་བཟོས་པ་དང་བཏོན་ཏེ་བརྟན་ལྷིང་སྲུང་སྐྱོང་གི་ཕུགས་ཕན་ལམ་སྲོལ་གཏོད་དེ་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་གཞི་རིམ་རྨང་གཞི་སྔར་བས་བརྟན་དུ་བཏང་ཡོད། དུས་བབ་གསར་པ་དང་ལས་འགན་གསར་པའི་མདུན་དུ་རང་སྐྱོང་ལྗོངས་རིམ་ཁག་ཏང་སྲིད་རྩ་འཛུགས་དང་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་སེམས་པ་གཅིག་སྒྲིལ་དང་མཐུན་སྒྲིལ་འབད་འཐབ་བྱས་ཏེ་བོད་ཀྱི་བྱ་གཞག་ཁག་རྒྱུན་ཆད་མེད་པར་མདུན་ཕྱོགས་སུ་སྐུལ་འདེད་བཏང་སྟེ་གཡུར་ཟའི་གྲུབ་འབྲས་ཀྱི་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་ཞེས་གསུངས་པ་རེད།

    ཝུའུ་ཏུང་ལི་ཡིས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་སྔར་ནས་བོད་ལྗོངས་སྤྱི་བདེ་མཐའ་སྲུང་དཔུང་སྡེའི་ལས་དོན་ཁག་ལ་ཚད་མཐོའི་མཐོང་ཆེན་དང་། ཐུགས་ཁུར། རྒྱབ་སྐྱོར་བཅས་གནང་བར་ཐུགས་རྗེ་ཆེ་ཞུས་པ་རེད། ཁོང་གིས་ད་ཐེངས་བོད་སྐྱོད་ཀྱི་ལས་དོན་གཙོ་བོའི་གནས་ཚུལ་ངོ་སྤྲོད་མདོར་བསྡུས་གནང་བ་དང་ཁོང་གིས་སྤྱི་བདེ་པུའི་མཐའ་སྲུང་དོ་དམ་ཅུས་ཀྱིས་སྔར་བཞིན་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སེམས་ཁུར་དང་རྒྱབ་སྐྱོར་བྱ་རྒྱུ་ཡིན་ལ་བོད་ལྗོངས་སྤྱི་བདེ་མཐའ་སྲུང་དཔུང་སྡེས་ཀྱང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་ལས་འགན་དང་འགན་འཁྲི་ནན་ཏན་སྒྲུབ་ནས་ཁ་ཕྲལ་གཏོར་བཤིག་གི་བྱེད་སྤྱོད་སྣ་ཚོགས་ལ་དོགས་ཟོན་ནན་པོ་དང་རྡུང་རྡེག་ནན་པོ་བཏང་སྟེ་མེས་རྒྱས་གཅིག་གྱུར་དང་མི་རིགས་མཐུན་སྒྲིལ་སྲུང་སྐྱོང་དང་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་དགོས་ཞེས་གསུངས་པ་རེད།