ཟླ་8ཚེས་24ཉིན་གྱི་སྔ་དྲོ་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷས་ཀོན་ཏི་ལྷ་ཁང་དུ་ཕེབས་ཏེ་ཀོན་ཏི་ལྷ་ཁང་བཤམས་སྟོན་ཁང་དང་དེའི་ཞོར་གཏོགས་སྒྲིག་བཀོད་འཛུགས་སྐྲུན་རྣམ་གྲངས་སྤེལ་ཚུལ་ལ་བརྟག་ཞིབ་གནང་སྐབས་ཁོང་གིས་རང་སྐྱོང་ལྗོངས་དང་གྲོང་ཁྱེར་གྱི་འབྲེལ་ཡོད་སྡེ་ཚན་ཁག་གིས་མཐུན་སྦྱོར་ལ་ཤུགས་སྣོན་དང་རྣམ་གྲངས་འཛུགས་སྐྲུན་གྱི་ལས་དོན་ལ་གཞོགས་འདེགས་ཧུར་ཐག་བྱས་ཏེ་ཀོན་ཏི་ལྷ་ཁང་དེ་ཉིད་རྒྱལ་གཅེས་རིང་ལུགས་དང་མི་རིགས་མཐུན་སྒྲིལ་གྱི་སློབ་གསོའི་རྟེན་གཞི་དང་གྲོང་མི་དང་ཡུལ་སྐོར་བའི་ཡུལ་སྐོར་སྤྲོ་གསེང་བྱ་ཡུལ་གྱི་མཛེས་ལྗོངས་ཁུལ་གལ་ཆེན་ཞིག་ཏུ་བསྐྲུན་དགོས་པའི་བླང་བྱ་བཏོན་གནང་བ་རེད།

    རྣམ་གྲངས་ཀྱི་ཨར་ལས་བྱ་ཡུལ་དུ་ཆེ་དགྲ་ལྷས་ཕྱོགས་གཅིག་ནས་རྣམ་གྲངས་འཛུགས་སྐྲུན་བྱས་ཚུལ་ལ་གཟིགས་ཞིབ་གནང་བ་དང་ཕྱོགས་གཞན་ཞིག་ནས་རྣམ་གྲངས་ཨར་ལས་ཚན་པའི་འགན་ཁུར་བ་དང་འབྲེལ་ཡོད་སྡེ་ཚན་གྱི་འགན་ཁུར་བའི་གནས་ཚུལ་སྙན་ཞུ་ནན་ཏན་ངང་གསན་པ་དང་སྦྲགས་རྣམ་གྲངས་འཆར་འགོད་ཀྱི་ཇུས་འགོད་རི་མོར་ཞིབ་ཕྲ་གཟིགས་ཐོག་རྣམ་གྲངས་འཕེལ་ཚུལ་སྒོ་ཀུན་ནས་མཁྱེན་རྟོགས་གནང་བ་རེད། ཤོད་རྒྱུན་དུ་ཆན་ལུང་ཁྲི་ལོ་56རིང་གོར་ཥས་བོད་ལ་འཇབ་རྒོལ་བྱས་པས་ཆན་ལུང་རབ་ཏུ་ཁྲོས་ཏེ་དམག་དཔོན་ཆེ་མོ་ཕུའུ་ཨན་ཁང་ལ་དམག་ཧྲག་གི་སྣེ་འཁྲིད་དེ་རྒྱལ་ཁ་ལེན་དགོས་པའི་བཀའ་ཕབ་པས་ཟི་ལིང་ནས་ལྷ་ས་བར་ཉིན་30ཙམ་ལས་མ་འགོར་བར་ཤོར་བའི་ས་ཆ་ཚུར་བླངས་པ་རེད། རྒྱལ་ཁ་ཐོབ་པར་རྟེན་འབྲེལ་ཞུ་ཆེད་བོད་སྡོད་དཔོན་རིགས་དང་། དཔོན་དམག བོད་རིགས་མང་ཚོགས་བཅས་ཀྱིས་ལྷ་སའི་བ་མ་རིའི་ཐོག་རྒྱ་མཚོའི་ངོས་ལས་མཐོ་ཤོས་ཀྱི་ཀོན་ཏི་ལྷ་ཁང་དེ་བཞེངས་པ་རེད། མི་སེམས་འགུལ་བའི་ལོ་རྒྱུས་ཀྱི་གཏམ་རྒྱུད་དེ་སླར་ཡང་མངོན་པ་བྱེད་པ་དང་ཀོན་ཏི་ལྷ་ཁང་གི་རྒྱལ་གཅེས་རིང་ལུགས་དང་མི་རིགས་མཐུན་སྒྲིལ་གྱི་སློབ་གསོའི་ཁྲོད་ཀྱི་དཔེ་སྟོན་སྣེ་འདྲེན་གྱི་ནུས་པ་འདོན་སྤེལ་གང་ལེགས་བྱ་ཆེད་ད་ལོའི་ལོ་འགོར་ལྷ་ས་གྲོང་ཁྱེར་གྱིས་ཀོན་ཏི་ལྷ་ཁང་གི་བཤམས་སྟོན་ཁང་དང་དེའི་ཞོར་གཏོགས་སྒྲིག་བཀོད་འཛུགས་སྐྲུན་རྣམ་གྲངས་གཉེར་འགོ་ཚུགས་པའི་ནང་འགྲེམས་སྟོན་ཁུལ་དང་། འགྲོ་ལམ། རླངས་འཁོར་འཇོག་སའི་འཛུགས་སྐྲུན་སོགས་ཚུད་ཡོད་ཅིང་། མིག་སྔར་ལས་དོན་ཁག་ལས་འགོ་བཙུགས་ནས་ཛ་དྲག་ངང་ཨར་ལས་བྱེད་ཀྱི་ཡོད་པས་ད་ལོའི་ཟླ་9པའི་ཟླ་དཀྱིལ་གོང་ལས་མཇུག་འགྲིལ་རྒྱུ་ཡིན་པ་རེད།

    བརྟག་ཞིབ་བྱེད་སྐབས་ཆེ་དགྲ་ལྷས་ཀོན་ཏི་ལྷ་ཁང་ནི་རང་སྐྱོང་ལྗོངས་རིམ་པའི་རིག་དངོས་སྲུང་སྐྱོང་ཚན་པ་ཡིན་པ་དང་བོད་རྒྱ་མི་རིགས་ཞི་མཐུན་ངང་འགྲོ་འོང་བྱེད་པའི་དཔང་པོ་གལ་ཆེན་ཞིག་ཡིན་པ་རེད། ཀོན་ཏི་ལྷ་ཁང་བཤམས་སྟོན་ཁང་དང་དེའི་ཞོར་གཏོགས་སྒྲིག་བཀོད་འཛུགས་སྐྲུན་རྣམ་གྲངས་ལག་བསྟར་བྱས་པ་དེ་ཐོག་ནས་ཏང་དང་རྒྱལ་ཁབ་དང་། རང་སྐྱོང་ལྗོངས་དང་གྲོང་ཁྱེར་ཏང་ཨུད། སྲིད་གཞུང་བཅས་ཀྱིས་བོད་ཀྱི་རིག་གནས་ཤུལ་བཞག་སྲུང་སྐྱོང་བྱ་རྒྱུར་མཐོང་ཆེན་གནང་ལུགས་གང་ལེགས་མཚོན་ཡོད་ཅེས་གསུངས་པ་རེད།