ཟླ་8 ཚེས་23ཚེས་ཉིན་གྱི་སྔ་དྲོ་ལྷ་ས་གྲོང་ཁྱེར་གྱིས་ཀྲུང་གོ་གསེར་ལས་ཚོགས་པའི་ཧྭ་ཐའེ་ལུང་གཏེར་ལས་ཚད་ཡོད་ཀུང་སིའི་ལས་གྲྭ་དུས་ཐེངས་གཉིས་པ་བསྐྲུན་འགོ་ཚུགས་པའི་ལས་དོན་སྐུལ་འདེད་ཚོགས་འདུ་འཚོགས་ཤིང་། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷས་བསམ་བློ་གཅིག་གྱུར་དང་དམིགས་ཚད་ཁ་གསལ་ཡོང་བ་བྱས་ཏེ་ཀྲུང་གོ་གསེར་ལས་ཚོགས་པ་ཧྭ་ཐའེ་ལུང་གཏེར་ལས་ཚད་ཡོད་ཀུང་སིའི་ལས་གྲྭ་དུས་ཐེངས་གཉིས་པའི་འཕེལ་རིམ་མགྱོགས་སུ་བཏང་ནས་བོད་མི་དམངས་ལ་བདེ་སྐྱིད་བསྐྲུན་རྒྱུའི་བླང་བྱ་བཏོན་གནང་བ་རེད།

    ཆེ་དགྲ་ལྷས་ད་ཕན་ལོ་ཤས་རིང་ཀྲུང་གོ་གསེར་ལས་ཚོགས་པས་མ་རྐང་ཚོད་འཛིན་བྱས་པའི་བོད་ལྗོངས་ཧྭ་ཐའེ་ལུང་གཏེར་ལས་ཚད་ཡོད་ཀུང་སིས་ཆབ་སྲིད་དང་། མི་རིགས། ཁྱོན་ཡོངས། ཞི་མཐུན་བཅས་ཀྱི་འདུ་ཤེས་ཟབ་ཏུ་བཏང་སྟེ་ས་གཤིས་ཞིབ་འཇུག་རྩད་གཅོད་བྱེད་པ་དང་། རྣམ་གྲངས་འཛུགས་སྐྲུན་བྱེད་པ། ཁོར་ཡུག་སྲུང་སྐྱོང་བྱེད་པ་བཅས་ཀྱི་ལས་དོན་གནས་བབ་མངོན་གསལ་དོད་པོར་བཞག་པ་དང་དུས་མཚུངས་ཆབ་སྲིད་བརྟན་ལྷིང་དང་། མི་རིགས་མཐུན་སྒྲིལ། ཞི་མཐུན་མཉམ་གཏོད་བཅས་བྱ་རྒྱུ་དེ་རྣམ་གྲངས་བསྐྲུན་རིང་གི་གཙོ་བོར་བརྩིས་ནས་ངོ་མཚར་གྲངས་ལས་འདས་པ་བཏོད་དེ་གངས་ལྗོངས་ས་མཐོའི་ཐོག་མཆོང་སྐྱོད་ལྟ་བུའི་འཕེལ་རྒྱས་གཏོང་བའི་དར་ཆ་བརྟན་པོ་ཞིག་བཙུགས་ཡོད་ཅེས་གསུངས་པ་རེད།

    ཆེ་དགྲ་ལྷས་རིམ་ཁག་དང་སྡེ་ཚན་ཁག་ལ་བསམ་བློ་དེ་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་དང་དེ་བཞིན་རང་སྐྱོང་ལྗོངས་ཏང་ཨུད་དང་སྲིད་གཞུང་གི་འཐབ་ཇུས་བཀོད་སྒྲིག་ཐོག་གཅིག་གྱུར་ཡོང་བ་བྱས་ནས་མཐོང་ཆེན་བྱེད་པ་དང་དམིགས་ཚད་ཁ་གསལ་བཟོས་ཏེ་ཀྲུང་གོ་གསེར་གྱི་ཚོགས་པ་ཧྭ་ཐའེ་ལུང་གཏེར་ལས་ཚད་ཡོད་ཀུང་སིའི་ལས་གྲྭ་དུས་ཐེངས་གཉིས་པ་མགྱོགས་པོ་བསྐྲུན་རྒྱུའི་བརྩོན་ལེན་བྱེད་པ་དང་། མི་རྩ་བར་འཛིན་ཁར་མང་ཚོགས་ལ་ཞབས་འདེགས་ཞུ་བའི་འདུ་ཤེས་བཙུགས་ཏེ་མང་ཚོགས་ཀྱི་ལས་དོན་ཞིབ་ཅིང་གཏིང་ཟབ་ཅིག་སྒྲུབ་པ་དང་མང་ཚོགས་ཀྱི་ཁེ་ཕན་སྲུང་སྐྱོང་ཡག་པོ་དང་དཀའ་ངལ་ཐག་གཅོད་ཡག་པོ་བྱེད་པ། “སྔོན་དུ་འཆར་འགོད་བྱ་རྒྱུའི ”རྩ་དོན་མཐའ་འཁྱོངས་བྱས་ཏེ་སྔོན་ཐོན་གྱི་འདུ་ཤེས་ལ་བརྟེན་ནས་རྣམ་གྲངས་འཆར་འགོད་དང་། ཞིབ་འཇུག རིག་པས་ཁུངས་སྐྱེལ་བཅས་བྱེད་པ་དང་འབྲེལ་རྣམ་གྲངས་བསྐྲུན་རྗེས་འཕེལ་རྒྱས་གཏོང་བའི་གོ་སྐབས་བཟང་པོ་སྔོན་ལ་ཐོབ་རྒྱུའི་འགན་ལེན་བྱེད་པ་དང་། རྣམ་གྲངས་ཁུལ་གྱི་ཚོང་འདུས་གྲོང་སྡེ་བསྐྲུན་རྒྱུའི་འཆར་གཞི་ཞིབ་ཚགས་བྱས་ནས་རྣམ་གྲངས་ཁུལ་བཟོ་ལས་ཅན་དང་ཚོང་འདུས་གྲོང་སྡེ་ཅན་དུ་མཉམ་དུ་འགྱུར་རྒྱུའི་འགན་ལེན་བྱེད་པ། ངལ་ནུས་བཀོད་སྒྲིག་དང་གསོ་སྦྱོང་གི་འཆར་གཞི་ཡང་དག་ངང་བཏིང་ནས་རྣམ་གྲངས་ལག་ལེན་བསྟར་འཕྲལ་ཡུལ་དེའི་མི་སེར་ལ་འབབ་འཕར་ཕྱུག་འགྱུར་ཡོང་རྒྱུའི་འགན་ལེན་བྱེད་པ། མཐུན་སྒྲིལ་རོགས་ལས་ཀྱི་སྙིང་སྟོབས་དར་སྤེལ་བཏང་སྟེ་སྤེལ་རེས་དང་མཐུན་སྦྱོར་བྱ་ཤུགས་ཆེ་རུ་གཏོང་བ་དང་རྒྱལ་ཁབ་ཀྱི་འབྲེལ་ཡོད་པུའུ་ཨུད་ནས་རོགས་སྐྱོར་ཐོབ་ཐབས་བྱས་ཏེ་ལས་གྲྭ་དུས་ཐེངས་གཉིས་པ་བསྐྲུན་རྒྱུར་སྐུལ་འདེད་མགྱོགས་པོ་གཏོང་བ། འགོ་ཁྲིད་ཚོགས་ཆུང་བཙུགས་ཏེ་དུས་བཀག་ལྟར་སྙན་སེང་ཞུ་བ་དང་གནད་དོན་ཞིབ་འཇུག་ཐག་གཅོད་བྱས་ཏེ་2013 ལོར་བསྐྲུན་མཇུག་སྒྲིལ་ཏེ་ཐོན་སྐྱེད་བྱས་ཐོག་གཡུར་ཟའི་གྲུབ་འབྲས་ལ་བརྟེན་མཇུག་སྒྲིལ་ཏེ་ཏང་གི་ཚོགས་ཆེན་བཅོ་བརྒྱད་པ་བདེ་བླག་ངང་འཚོག་རྒྱུར་ཕྱག་རྟགས་འབུལ་དགོས་པའི་རེ་བ་བཏོན་གནང་བ་རེད།

    ཀྲུང་གོ་གསེར་ལས་ཚོགས་པ་ཀུང་སི་ཧྭ་ཐའེ་ལུང་གཏེར་ལས་ཚད་ཡོད་ཀུང་སིའི་སྤྱི་ཁྱབ་སྤྱི་གཉེར་ཏང་ཨུད་ཀྱི་ཧྲུའུ་ཅི་སུན་ཀྲའོ་ཞུའེ་ཡིས་ལས་དོན་ཁྱབ་སྤེལ་ཚོགས་འདུའི་ཐོག་ཀུང་སིས་རྒྱལ་ཁབ་དང་རང་སྐྱོང་ལྗོངས་ཀྱི་བླང་བྱ་ལྟར་ཧྭ་ཐའེ་ལུང་གི་ལས་གྲྭ་དུས་ཐེངས་དང་པོ་མུ་མཐུད་ཚད་ལྡན་ཡོང་བ་བྱེད་པའི་རྨང་གཞིའི་ཐོག་ལས་གྲྭ་དུས་ཐེངས་གཉིས་པ་བསྐྲུན་རྒྱུར་སྐུལ་འདེད་མགྱོགས་པོ་བཏང་ནས་སྔ་ཙམ་སྐྲུན་ཏེ་ཐོན་སྐྱེད་བྱེད་རྒྱུའི་བརྩོན་ལེན་བྱས་ཐོག་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཆེད་འབུལ་དགོས་པའི་ལེགས་སྐྱེས་འབུལ་རྒྱུ་ཡིན་ཞེས་གསུངས་པ་རེད།