ཟླ་8ཚེས་14ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་དང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་རྣམ་གཉིས་ཀྱིས་ལྷ་སར་ཀྲུང་གོ་གནམ་གཤིས་ཅུས་ཀྱི་ཏང་ཙུའི་ཧྲུའུ་ཅི་ཅུས་ཀྲང་ཀྲེན་གོ་ཀོང་དང་ཅུས་ཀྲང་གཞོན་པ་ཆའོ་ཧའེ་ཡན་དང་བཅས་པ་དང་མཇལ་འཛོམས་གནང་བ་རེད།

    རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་དང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་སྐལ་བཟང་ཚེ་རིང་། ལྗོངས་ཏང་ཨུད་ཀྱི་དྲུང་ཆེ་ཝང་རུའེ་ལན། རང་སྐྱོང་ལྗོངས་སྲིད་གཞུང་ཏང་ཙུའི་ཁོངས་མི་དྲུང་ཆེ་ཀའོ་དབྱང་བཅས་མཇལ་འཛོམས་ནང་ཞུགས་ཡོད་པ་རེད།

    ཁྲེན་ཆོན་གོས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ཏེ་ཀྲེན་གོ་ཀོང་བོད་དུ་བརྟག་ཞིབ་དུ་ཕེབས་པར་དགའ་བསུ་ཞུས་པ་དང་། ཀྲུང་གོ་གནམ་གཤིས་ཅུས་ཀྱིས་ལོ་མང་རིང་བོད་ཀྱི་འཕེལ་རྒྱས་དང་བརྟན་ལྷིང་གི་བྱ་གཞག་ཁག་དང་ལྷག་པར་དུ་བོད་ཀྱི་གནམ་གཤིས་བྱ་གཞག་ལ་རྒྱབ་སྐྱོར་དང་རོགས་རམ་ཤུགས་ཆེན་གནང་བར་སྙིང་དབུས་ནས་ཐུཌ་རྗེ་ཆེ་ཞུས་གནང་བ་རེད། རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་ངོ་སྤྲོད་མདོར་བསྡུས་གནང་རྗེས། ཁྲེན་ཆོན་གོས་ཀྲུང་གོ་གནམ་གཤིས་ཅུས་ཀྱིས་བོད་ཀྱི་གནམ་གཤིས་བྱ་གཞག་ལ་མ་དངུལ་གཏོང་ཤུགས་སྔར་བས་ཆེ་རུ་བཏང་སྟེ་བོད་ཀྱི་གནམ་གཤིས་ཁོངས་གཏོགས་ཀྱི་སྤྱི་པའི་ཞབས་ཞུའི་ཕན་འབྲས་ཆེ་རུ་གཏོང་བ་དང་། སྔོན་བརྡ་དང་སྔོན་དཔག་གི་ནུས་པ་ཆེ་རུ་གཏོང་བ། ཚན་རྩལ་གསར་གཏོད་ཀྱི་འདེགས་སྐྱོར་ནུས་པ་ཆེ་རུ་གཏོང་རྒྱུར་སྐུལ་འདེད་བཏང་ནས་རང་ལྗོངས་ཀྱི་གནམ་གཤིས་བྱ་གཞག་ཟམ་མི་ཆད་པར་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་བཏང་སྟེ་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཆེད་ལེགས་སྐྱེས་དེ་བས་ཆེ་བ་འབུལ་རྒྱུར་ལྷག་བསམ་དག་པའི་རེ་བ་འཆང་རྒྱུ་ཡིན། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་སྔར་རྒྱུན་བཞིན་གནམ་གཤིས་བྱ་གཞག་ལ་ཚད་མཐོའི་མཐོང་ཆེན་བྱས་ཏེ་བོད་འདི་ཉིད་ལེགས་ལ་མྱུར་བའི་སྒོ་ནས་འཕེལ་རྒྱས་འགྲོ་རྒྱུར་ཁོར་ཡུག་བཟང་པོ་གཏོད་ཆེད་སྤུས་ཀ་ལེགས་པའི་ཞབས་འདེགས་ཞུ་རྒྱུ་ཡིན་ཞེས་གསུངས་པ་རེད།

    ཀྲེན་གོ་ཀོང་གིས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་གྲུབ་འབྲས་མངོན་གསལ་དོད་པོ་ཐོབ་པར་བཀྲ་ཤིས་བདེ་ལེགས་ཞུས་པ་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དུས་ཡུན་རིང་པོའི་ནང་བོད་ཀྱི་གནམ་གཤིས་བྱ་གཞག་ལ་ཐུགས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཤིང་། ཁོང་གིས་ཀྲུང་གོ་གནམ་གཤིས་ཅུས་ཀྱིས་ད་ཐེངས་རང་སྐྱོང་ལྗོངས་མི་དམངས་སྲིད་གཞུང་དང་བཞག་པའི 《བོད་ཀྱི་གནམ་གཤིས་བྱ་གཞག་མཆོང་སྐྱོད་ལྟ་བུའི་འཕེལ་རྒྱས་འགྲོ་རྒྱུར་སྐུལ་འདེད་གཏོང་བའི་མཉམ་ལས་གྲོས་མཐུན 》ལག་བསྟར་དོན་འཁྱོལ་ལེགས་པར་བྱས་ཏེ་རང་སྐྱོང་ལྗོངས་སྲིད་གཞུང་དང་བོད་ལྗོངས་གནམ་གཤིས་སྡེ་ཚན་ཁག་དང་རྣམ་གྲངས་འབྲེལ་མཐུད་ཀྱི་ལས་དོན་ལེགས་པོ་བསྒྲུབས་ནས་2020ལོར་སླེབས་སྐབས་བོད་ཀྱི་གནམ་གཤིས་བྱ་གཞག་འདི་ཉིད་རྒྱལ་ཡོངས་དང་མཉམ་དུ་དེང་རབས་ཅན་མངོན་འགྱུར་ཐུབ་པ་བྱས་ཏེ་བོད་ཀྱི་མཆོང་སྐྱོད་ལྟ་བུའི་འཕེལ་ རྒྱས་དང་ཡུན་རིང་བདེ་འཁོད་ཆེད་གནམ་གཤིས་ཀྱི་འགན་ལེན་ནུས་ལྡན་མཁོ་འདོན་བྱ་རྒྱུ་ཡིན་ཞེས་གསུངས་པ་རེད།