བོད་ལྗོངས་ཉིན་རེའི་ཚགས་པར་ཁང་དུ་ཆབ་མདོ་ནས་གློག་འཕྲིན་འབྱོར་གསལ། ཟླ་8ཚེས་12ཉིན་ལྗོངས་ཏང་ཨུད་ཀྱི་རྒྱུན་ཨུ་ཆབ་མདོ་ས་ཨུད་ཀྱི་ཧྲུའུ་ཅི་ནོར་བུ་དོན་གྲུབ་ཀྱིས་དཔའ་ཤོད་རྫོང་ཡིད་ཆེན་ཤང་དུ་བསྐྱོད་ནས་ལས་དོན་ལ་ཞིབ་བཤེར་དང་མཛུབ་ཁྲིད་གནང་བ་སྟེ་དགོན་སྡེར་བསྐྱོད་པ་དང་། ཞིང་དུད་ལ་འཚམས་འདྲི་བྱེད་པ། དམངས་ཀྱི་གནས་ཚུལ་ལ་ལྟ་ཞིབ་བྱེད་པ། དམངས་ཀྱི་འདོད་བློ་ཉན་པ་བཅས་བྱས་པ་དང་འབྲེལ་གྲོང་ཚོར་བཅའ་སྡོད་ལས་བྱེད་པ་དང་དགོན་སྡེའི་དགེ་འདུན་དང་གཞི་རིམ་གྱི་མང་ཚོགས་ལ་གཟིགས་པ་དང་འཚམས་འདྲི་གནང་ནས་དམངས་འཚོ་ལེགས་གཏོང་དང་། སྤྱི་ཚོགས་བརྟན་ལྷིང་། སྲིད་ཇུས་དོན་འཁྱོལ་སོགས་གནས་ཚུལ་ཐད་ས་གནས་ས་ཐོག་ཏུ་བརྟག་ཞིབ་གནང་བ་རེད།
ནོར་བུ་དོན་གྲུབ་ཀྱིས་ཡིད་ཆེན་ཤང་མདོ་ཆེན་གྲོང་ཚོའི་གྲོང་ཚོ་ཨུ་ཡོན་ལྷན་ཁང་དུ་ཕེབས་ནས་མདོ་ཆེན་གྲོང་ཚོའི་གྲོང་ཚོར་བཅའ་སྡོད་ལས་དོན་རུ་ཁག་དང་ཡིད་ཆེན་དགོན་སྡེའི་དོ་དམ་ཨུ་ལྷན་གྱི་ལས་བྱེད་པ་ལས་གནས་ཐོག་མེད་པ་ཤེས་སྐབས་ཁོང་གིས་ངེས་པར་དུ་ལས་ཀའི་སྒྲིག་ལམ་ནན་པོ་སྲུང་ནས་དགོན་སྡེར་བཅའ་སྡོད་དང་གྲོང་ཚོར་བཅའ་སྡོད་ལས་བྱེད་པའི་ནུས་པ་འདོན་སྤེལ་གང་ལེགས་ཀྱིས་གཞི་རིམ་གྱི་གཞི་རྩ་བརྟན་པོ་ཡོང་བ་བྱེད་པ་དང་། དགོན་སྡེར་བཅའ་སྡོད་དང་གྲོང་ཚོར་བཅའ་སྡོད་རྒྱ་ཆེའི་ལས་བྱེད་པས་འགན་འཁྲིའི་ལས་གནས་བརྟན་སྲུང་གིས་དམངས་ཆེད་དུ་བསམ་བློ་གཏོང་བ་དང་དམངས་ཆེད་དུ་སེམས་ཁྲལ་སེལ་དགོས་པའི་ནན་བཤད་གནང་བ་དང་། ཁོང་གིས་དཔའ་ཤོད་རྫོང་ཡིད་ཆེན་ཤང་མདོ་ཆེན་གྲོང་ཚོ་དང་ཡིད་ཆེན་དགོན་སྡེར་ཐོན་པའི་ལས་གནས་ལས་བྲལ་བའི་གནད་དོན་ཚབས་ཆེན་དེ་ཐོག་ནས་ཏང་ཡོན་ལས་བྱེད་པ་ཉུང་ཤས་ཤིག་གིས་བརྟན་ལྷིང་སྲུང་སྐྱོང་གི་དུས་བབ་ལ་ངོས་འཛིན་བྱེད་ཤུགས་མི་འདང་བ་དང་། བསམ་བློས་ལྷོད་གཡེང་དང་བག་གཡེང་བྱེད་པ། བཀོད་པར་མི་ཉན་པ། བཀག་ཀྱང་མི་ཉན་པ། འགན་འཛོལ་དང་ལས་འཛོལ་ཚབས་ཆེན་ཤོར་བ་བཅས་མངོན་གྱི་ཡོད་པས་ས་ཁུལ་དེ་ཡོངས་ཀྱི་རིམ་ཁག་ཏང་སྲིད་རྩ་འཛུགས་དང་རྒྱ་ཆེའི་ཏང་ཡོན་ལས་བྱེད་པས་ངེས་པར་དུ་དེའི་ཁྲོད་ནས་བསླབ་བྱ་གཏིང་ཟབ་བླངས་ཏེ་ནུས་ལྡན་གྱི་བྱེད་ཐབས་སྤྱད་ནས་ཆབ་མདོའི་ལས་དོན་ཁག་སྔར་བས་ཡག་པོ་དང་ཏན་ཏིག་བསྒྲུབས་ནས་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཀྱི་གྲུབ་འབྲས་དངོས་ལ་བརྟེན་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་ཞེས་ནན་བཤད་གནང་བ་རེད།
ཡིད་ཆེན་དགོན་སྡེར་བརྟག་ཞིབ་གནང་སྐབས་ནོར་བུ་དོན་གྲུབ་ཀྱིས་དགོན་སྡེའི་དོ་དམ་ཨུ་ལྷན་དང་དགོན་སྡེར་བཅའ་སྡོད་ལས་བྱེད་པས་རྒྱ་ཆེའི་གྲྭ་བཙུན་དང་དད་ལྡན་མང་ཚོགས་ལ་ཁྲིད་སྟོན་ཧུར་ཐག་གིས་ཏང་གི་འགོ་ཁྲིད་ལ་བརྩི་བཀུར་ཞུས་ནས་མི་རིགས་མཐུན་སྒྲིལ་དང་། སྤྱི་ཚོགས་བརྟན་ལྷིང་། མེས་རྒྱལ་གཅིག་གྱུར་བཅས་ལ་སྲུང་སྐྱོང་བྱེད་པའི་འགན་འཁྲིའི་བསམ་པ་ཆེ་རུ་ཏན་ཏིག་བཏང་ཐོག་དགོན་སྡེའི་དོ་དམ་གྱི་བྱེད་ཐབས་ཁག་རྒྱུན་ཆད་མེད་པར་འཐུས་ཚང་དུ་བཏང་སྟེ་ཆབ་མདོའི་སྤྱི་ཚོགས་ཀྱི་ཞི་མཐུན་དང་བརྟན་ལྷིང་སྲུང་སྐྱོང་བྱེད་དགོས་ཞེས་གསུངས་པ་རེད།
དེ་རྗེས་ནོར་བུ་དོན་གྲུབ་ཡིད་ཆེན་ཤང་སོ་སྣར་གྲོང་ཚོའི་གྲོང་ཚོ་ཨུ་ལྷན་དུ་ཕེབས་ནས་གྲོང་ཚོར་བཅའ་སྡོད་ལས་བྱེད་པར་གཟིགས་པ་དང་འཚམས་འདྲི་གནང་ནས་གྲོང་ཚོའི་གནས་ཚུལ་ལ་ཤེས་རྟོགས་ཞིབ་ཕྲ་གནང་བ་རེད།