བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཚེས་6ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷས་ཆེད་མངགས་འབྲས་སྤུངས་དགོན་དང་སེ་ར་དགོན་དུ་ཕེབས་ཏེ་ཞོ་སྟོན་རིང་གོས་སྐུ་འགྲེམས་རྒྱུའི་གྲ་སྒྲིག་ལས་དོན་སྤེལ་ཚུལ་ལ་གཟིགས་ཞིབ་གནང་བ་དང་སྦྲགས་འབྲེལ་ཡོད་སྡེ་ཚན་གྱིས་ལས་དོན་སྙན་སེང་ཞུས་པའང་གསན་པ་རེད།
ཞོ་སྟོན་རིང་གོས་སྐུ་འགྲེམས་རྒྱུའི་གྲ་སྒྲིག་ལས་དོན་སྤེལ་ཚུལ་སྐོར་གྱི་ལྷ་ས་གྲོང་ཁྱེར་འབྲེལ་ཡོད་སྡེ་ཚན་གྱི་སྙན་ཞུ་གསན་རྗེས་ཆེ་དགྲ་ལྷས་ལོ་འགའ་ཤས་རིང་སྐྱེད་སྲིང་དང་གཏོད་འཛུགས་བྱས་པ་བརྒྱུད་ཞོ་སྟོན་འདི་ཉིད་ལྗོངས་ཡོངས་ཀྱི་མི་རིགས་ཁག་གི་མི་དམངས་ཀྱི་བསམ་པའི་ཉམས་འགྱུར་བཟང་པོ་མཚོན་པ་བྱེད་པའི་སྟེགས་བུ་གལ་ཆེན་ཞིག་ཏུ་གྱུར་ཡོད་པས་ཞོ་སྟོན་རིང་གི་བྱེད་སྒོ་ཁག་གཟབ་རྒྱས་དང་། དགའ་སྤྲོ། བདེ་འཇགས། ཞི་མཐུན་བཅས་ཀྱི་སྒོ་ནས་སྤེལ་ཐུབ་པའི་འགན་ལེན་བྱེད་དགོས་ཞེས་བསྟན་གནང་བ་རེད།
ཆེ་དགྲ་ལྷས་ཞོ་སྟོན་འགོ་ཚུགས་པའི་ཉིན་དང་པོའི་གོས་སྐུ་འགྲེམས་པའི་བྱེད་སྒོ་བདེ་འཇགས་དང་། ཞི་མཐུན། གོ་རིམ་ལྡན་པ་བཅས་ཀྱི་སྒོ་ནས་སྤེལ་ཐུབ་པ་བྱ་རྒྱུ་ནི་ཞོ་སྟོན་གྲུབ་འབྲས་ཐོབ་པའི་ངང་སྤེལ་རྒྱུའི་འགག་རྩ་ཞིག་རེད། འཐབ་ཕྱོགས་གཅིག་གྱུར་དང་། མི་རིགས་ཆོས་ལུགས། སྤྱི་བདེ། མེ་ཟོན་སོགས་སྡེ་ཚན་ལ་དེ་སྔའི་ཉམས་མྱོང་ནན་ཏན་ངང་ཕྱོགས་སྡོམ་བྱས་ཏེ་འབྲེལ་ཡོད་ཇུས་གཞི་སྔར་བས་ཞིབ་ཚགས་དང་འཐུས་སྒོ་ཚང་དུ་གཏོང་དགོས་པ་མ་ཟད། ད་དུང་མི་རིགས་ཁག་གི་མང་ཚོགས་ལ་སྔོན་ཚུད་ནས་བརྡ་ཐོའང་གཏོང་དགོས་པ་དང་། འབྲེལ་ཡོད་ཚན་པ་ཁག་ལ་ངེས་པར་དུ་འབྲེལ་གཏུག་བྱ་རྒྱུར་ཤུགས་སྣོན་རྒྱག་པ་དང་མཐུན་སྦྱོར་ཧུར་ཐག་བྱས་ནས་ཞི་མཐུན་དང་དགའ་སྐྱིད་ལྡན་པའི་དུས་ཆེན་གྱི་རྣམ་པ་ཞིག་གཏོད་དགོས་པ། གོས་སྐུ་འགྲེམས་པའི་བྱེད་སྒོའི་ནང་ཞུགས་མཁན་ལས་དོན་མི་སྣ་ཡོངས་རྫོགས་ལ་ནུས་ཤུགས་ཡོད་རྒུ་འདོན་པ་དང་ཆབས་ཅིག་དཀའ་ངལ་ལ་མི་སྐྲག་པ་དང་། ངལ་དུབ་ལ་མི་སྐྲག་པ། ཪྙོག་དྲར་མི་སྐྲག་པ་བཅས་ཀྱི་སྒེར་སེམས་མེད་པའི་ལེགས་སྐྱེས་འབུལ་བའི་སྙིང་སྟོབས་དར་སྤེལ་བཏང་སྟེ་རྒྱ་ཆེའི་མང་ཚོགས་དང་ཡུལ་སྐོར་བར་ཞབས་འདེགས་ཡག་པོ་ཞུས་ནས་ལྷ་ས་གྲོང་ཁྱེར་གྱི་ཤེས་དཔལ་སྒོ་དབྱེའི་གཟུགས་བཪྙན་བཟང་པོ་ཧུར་ཐག་གཏོད་དགོས་ཞེས་ནན་བཤད་གནང་བ་རེད།