བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་ཟླ་8ཚེས་3ཉིན་གནས་ཚུལ་འབྱོར་གསལ། ཚེས་3ཉིན་གྱི་སྔ་དྲོ་རང་སྐྱོང་ལྗོངས་ཀྱི་བརྟན་ལྷིང་སྲུང་སྐྱོང་ལས་དོན་བཀོད་འདོམས་པུས་ཚོགས་འདུ་འཚོགས་ནས་མིག་སྔའི་བརྟན་ལྷིང་སྲུང་སྐྱོང་གི་ལས་དོན་ཞིབ་འཇུག་དང་བཀོད་སྒྲིག་བྱས་པ་རེད། རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་བརྟན་ལྷིང་སྲུང་སྐྱོང་ལས་དོན་བཀོད་འདོམས་པུའི་སྤྱི་ཁྱབ་བཀོད་འདོམས་པ་ཧའོ་ཕུང་གིས་ཚོགས་འདུ་གཙོ་སྐྱོང་གནང་བ་མ་ཟད་གསུང་བཤད་ཀྱང་གནང་ཞིང་། ཁོང་གིས་བསམ་བློའི་ཐོག་ནས་ཚད་མཐོའི་དོགས་ཟོན་བྱ་རྒྱུ་རྒྱུན་འཁྱོངས་བྱེད་པ་དང་ལས་དོན་ལ་ལྷོད་གཡེང་སྤུ་ཙམ་ཡང་མི་གཏོང་རྒྱུའི་འགན་ལེན་བྱས་ནས་ཀྲུང་དབྱང་དང་རང་སྐྱོང་ལྗོངས་ཏང་ཨུད་ཀྱི་བརྟན་ལྷིང་སྲུང་སྐྱོང་གི་བྱ་ཐབས་ཁག་སྒོ་ཀུན་ནས་དོན་འཁྱོལ་བྱེད་པ་དང་མིག་སྔའི་བརྟན་ལྷིང་སྲུང་སྐྱོང་གི་ལས་དོན་ཏན་ཏིག་ངང་ཡག་པོ་བསྒྲུབས་ཏེ་ལྗོངས་ཡོངས་ཀྱི་སྤྱི་ཚོགས་ཞི་མཐུན་བརྟན་ལྷིང་ཡོང་བའི་འགན་ལེན་བྱེད་དགོས་པའི་ནན་བཤད་གནང་བ་རེད།

    རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷ་དང་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཏེང་ཞའོ་ཀང་ཚོགས་འདུར་ཕེབས་ཡོད་པ་རེད།

    འབྲེལ་ཡོད་ཕྱོགས་ཁག་གི་སྙན་ཞུ་གསན་རྗེས་ཧའོ་ཕུང་གིས་འདི་ལོ་ཤར་ཚུན་ཀྲུང་དབྱང་གི་ཚད་མཐོའི་མཐོང་ཆེན་དང་ལྗོངས་ཏང་ཨུད་ཀྱི་སྲ་ཞིང་བརྟན་པའི་འགོ་ཁྲིད་འོག་ང་ཚོས་ཕྱོགས་གཅིག་ནས་མཉམ་འགོག་མཉམ་འཛིན་ལ་དམ་འཛིན་བྱེད་པ་དང་གཅིག་ཤོས་ནས་རྩ་སྲ་རྨང་བརྟན་དམ་འཛིན་བྱས་ཏེ་ཁ་ཕྲལ་ཕྱོགས་གཏོགས་ཀྱིས་གཏོར་བཤིག་གཏོང་བའི་ཇུས་ངན་ཐལ་བའི་རྡུལ་དུ་མཐའ་གཅིག་ཏུ་སློག་པ་དང་ཁ་ཕྲལ་ལ་ངོ་རྒོལ་བྱེད་པའི་རང་འགུལ་དབང་ཆ་ཐོག་མཐའ་བར་གསུམ་དུ་སྟངས་འཛིན་ཐུབ་པས་བརྟན་ལྷིང་སྲུང་སྐྱོང་གི་ལས་དོན་དེ་ཟམ་མི་ཆད་པར་རྒྱ་ཆེ་དང་གཏིང་ཟབ་ཀྱི་ཕྱོགས་སུ་རྒྱ་བསྐྱེད་འགྲོ་རྒྱུར་སྐུལ་མ་ནུས་ལྡན་ཐེབས་པ་དང་ཀུན་སེམས་གཅིག་སྒྲིལ་གྱིས་བརྟན་ལྷིང་སྲུང་སྐྱོང་བྱེད་པ་དང་། འཕེལ་རྒྱས་ལ་སྐུལ་མ་གཏོང་བ། མཐུན་སྒྲིལ་ལ་སྣང་ཆེན་བྱེད་པ། ཞི་མཐུན་དོན་གཉེར་བྱེད་པ་བཅས་ཀྱི་འཕེལ་ཚུལ་བཟང་པོ་སྲ་བརྟན་དང་གོང་འཕེལ་བྱུང་ཡོད་པ་རེད། མིག་སྔར་རང་ལྗོངས་ཀྱི་སྤྱི་ཚོགས་དུས་བབ་ཁྱོན་ཡོངས་ནས་བརྟན་ལྷིང་ཡིན་ཡང་ང་ཚོས་བརྟན་ལྷིང་སྲུང་སྐྱོང་དུས་བབ་ཀྱི་ཪྙོག་འཛིང་རང་བཞིན་དང་ཛ་དྲག་རང་བཞིན་སྔར་བཞིན་མཐོང་ཐུབ་པ་བྱེད་དགོས། ས་ཁུལ་དང་གྲོང་ཁྱེར་ཁག་དང་། སྡེ་ཚན་ཁག རིམ་པ་ཁག་གི་བརྟན་ལྷིང་སྲུང་སྐྱོང་བཀོད་འདོམས་པུའུ། ཕྱོགས་ཁག་གི་ལས་འགན་སྒྲུབ་མཁན་དཔུང་སྡེ། གྲོང་ཚོ་དང་དགོན་པར་བཅའ་སྡོད་ལས་བྱེད་པ་ཡོངས་བཅས་ཀྱིས་སྤྱི་ཁྱབ་ཧྲུའུ་ཅི་ཧུའུ་ཅིན་ཐའོ་ཡིས་ཟླ་7ཚེས་23ཉིན་ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོའི་ཆེད་དོན་ཞིབ་བསྡུར་འཛིན་གྲྭའི་འགོ་ཚུགས་མཛད་སྒོའི་ཐོག་གནང་བའི་ཡིས་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱེད་པ་དང་བློ་མཐུན་ལི་ཁྲང་ཁྲུན་བོད་དུ་ཞིབ་བཤེར་མཛུབ་ཁྲིད་གནང་བར་ཕེབས་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་བྱས་ནས་རྒྱལ་ཡོངས་ཀྱི་སྤྱི་ཚོགས་བརྟན་ལྷིང་སྲུང་སྐྱོང་ལས་དོན་གྱི་བཪྙན་འཕྲིན་ཁ་པར་ཚོགས་འདུའི་ཐོག་གནང་བའི་བློ་མཐུན་ཀྲོའུ་ཡུང་ཁང་གི་གསུང་བཤད་གལ་ཆེན་གྱི་དགོངས་དོན་དང་བློ་མཐུན་ཁྲེན་ཆོན་གོའི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་གཞིར་བཟུང་བོད་ཀྱི་ཞི་མཐུན་བརྟན་ལྷིང་སྲུང་སྐྱོང་ཏན་ཏིག་བྱ་རྒྱུ་དེ་གུང་ཁྲན་ཏང་ཡོན་ཚང་མ་དང་འགོ་ཁྲིད་ལས་བྱེད་པ་ཚང་མའི་བླ་ན་མ་མཆིས་པའི་འགན་འཁྲི་ཞིག་ཏུ་བརྩིས་ནས་སྣང་མེད་ལྷོད་གཡེང་ནན་འགོག་བྱེད་པ་དང་འཐབ་འཛིང་ཉེན་ཟོན་རྒྱུན་འཁྱོངས་བྱས་ཐོག་ཉེ་དུས་ཀྱི་དུས་ཆེན་དང་རྟེན་འབྲེལ་བྱེད་སྒོ་ཆེ་གྲས་ཁག་གི་བདེ་སྲུང་དང་སྤྱི་ཚོགས་ངོས་ཀྱི་འགོག་སྲུང་ཚོད་འཛིན་སོགས་ཀྱི་ལས་དོན་ཏན་ཏིག་ངང་ཡག་པོ་བསྒྲུབས་པ་དང “གསུམ་མི་ཐོན་པ ”འགན་ལེན་བྱ་རྒྱུར་དམ་པོར་དམིགས་ནས་ཀྲུང་དབྱང་གིས་སྤྲད་པའི་ལས་འགན་ལེགས་སྒྲུབ་ཡག་པོ་བྱས་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་སྐོང་ཚོགས་བྱ་རྒྱུའི་འགན་ལེན་བྱ་ཆེད་འབུལ་དགོས་ངེས་ཀྱི་ལེགས་སྐྱེས་ཕུལ་དགོས་ཞེས་གསུངས་པ་རེད།

    ཧའོ་ཕུང་གིས་ཉེ་དུས་ལྗོངས་ཡོངས་ཀྱི་ས་ཁུལ་ཁག་ཏུ་དུས་ཆེན་དང་རྟེན་འབྲེལ་བྱེད་སྒོ་ཆེ་གྲས་མང་བ་དང་ལྷག་པར་དུ་ཀྲུང་གོའི་དུས་ཆེན་དང་རྟེན་འབྲེལ་ཆེ་གྲས་བཅུའི་གྲས་ཤིག་ཡིན་པའི་ཀྲུང་གོའི་ལྷ་སའི་ཞོ་སྟོན་དེ་བོད་འདི་ཉིད་ཚན་རིག་དང་མཐུན་པའི་གོང་འཕེལ་དང་། ཞི་མཐུན་བརྟན་ལྷིང་། མི་རིགས་མཐུན་སྒྲིལ་བཅས་མཚོན་པའི་སྟེགས་བུ་དང་སྐར་ཁུང་ཞིག་ཏུ་གྱུར་ཡོད། གཏོགས་ཁོངས་ས་ཆར་དོ་དམ་བྱ་རྒྱུའི་འགན་འཁྲི་ནན་ཏན་ངང་བསྒྲུབས་པ་དང་། བདེ་སྲུང་ལས་ཀའི་ཇུས་གཞི་སྔར་བས་འཐུས་ཚང་དུ་གཏོང་བ། འཕྲལ་སྡོམ་ཐག་གཅོད་ཀྱི་སྔོན་ཇུས་ཞིབ་ཕྲ་བཟོ་བ་བཅས་བྱས་ནས་གཙོ་གནད་བྱེད་སྒོར་དམིགས་པ་དང་ཕྱོགས་ཁག་གི་སྟོབས་ཤུགས་མཐུན་སྦྱོར་གྱིས་བྱེད་སྒོ་སྤེལ་ཡུལ་གྱི་བདེ་སྲུང་དང་སྤྱི་ཚོགས་ངོས་ཀྱི་སྔོན་འགོག་ཚོད་འཛིན་ལས་དོན་གཅིག་གྱུར་འཆར་འགོད་ངང་བཀོད་སྒྲིག་ཡག་པོ་བྱེད་དགོས། མི་སྣར་བདེ་འཇགས་ཞིབ་བཤེར་བྱེད་པ་དང་། མི་འགྲུལ་བཤངས་པ། འགྲིམ་འགྲུལ་དོ་དམ་བཅས་བྱ་རྒྱུར་ཤུགས་སྣོན་རྒྱག་པ་དང་། དམངས་ཕན་ཞབས་འདེགས་གང་ལེགས་ཞུ་བ། ཡུལ་དངོས་ཀྱི་སྒྲིག་ལམ་སྲུང་སྐྱོང་ཏན་ཏིག་བཅས་བྱས་ནས་བྱེད་སྒོ་བདེ་བླག་དང་ཞི་མཐུན་ངང་ཐུགས་གྲ་ལེགས་འགྲིག་ཡོང་བའི་འགན་ལེན་བྱེད་དགོས། ས་ཁུལ་ཁག་དང་གྲོང་ཁྱེར་ཁག་གིས་ས་ཁུལ་དེ་གའི་རིམ་པ་ཁག་དང་རིགས་ཁག་གི་ཡུལ་སྐོར་དང་རིག་གནས་དུས་ཆེན་དང་རྟེན་འབྲེལ་བྱེད་སྒོའི་བདེ་སྲུང་ལས་དོན་ཡག་པོ་བསྒྲུབ་རྒྱུར་ཚད་མཐོའི་མཐོང་ཆེན་བྱས་ནས་བདེ་འཇགས་འགན་ལེན་བྱེད་དགོས་ཞེས་གསུངས་པ་རེད།

    ཧའོ་ཕུང་གིས་ལྗོངས་ཡོངས་ཀྱི་རིམ་ཁག་ཏང་སྲིད་རྩ་འཛུགས་དང་ཕྱོགས་ཁག་གི་བརྟན་ལྷིང་སྲུང་སྐྱོང་སྟོབས་ཤུགས་ཀྱིས་སྤྱི་ཚོགས་ངོས་ཀྱི་དོ་དམ་དང་ཚོད་འཛིན་གཙོ་བོར་བྱེད་པའི་བརྟན་ལྷིང་སྲུང་སྐྱོང་གི་གཙོ་གནད་ལས་དོན་མུ་མཐུད་ཡག་པོ་བསྒྲུབས་པ་དང་འབྲེལ་ཡོད་སྡེ་ཚན་ཁག་གིས་རྡུང་རྡེག་གཏོང་བ་དང་ཆེད་དམིགས་བཅོས་སྒྲིག་གི་བྱ་སྤྱོད་གཙོ་བོར་བྱེད་པའི་གཙང་བཤེར་དང་བཅོས་སྒྲིག་གི་ལས་དོན་ཁག་ལ་མུ་མཐུད་སྐུལ་འདེད་བཏང་ནས་སྤྱི་ཚོགས་ཁྱོན་ཡོངས་ཀྱི་བརྟན་ལྷིང་འགན་ལེན་བྱེད་དགོས་པ་དང་། བདེ་འཇགས་ཞིབ་བཤེར་གྱི་བྱ་ཐབས་དོན་འཁྱོལ་བྱེད་པ་དང་ཞིབ་བཤེར་ལྟ་སྐུལ་ལ་ཤུགས་སྣོན་ཏན་ཏིག་བརྒྱབ་སྟེ་བདེ་འཇགས་ཞིབ་བཤེར་གྱི་ལས་དོན་དེ་ཐོག་མཐའ་བར་གསུམ་དུ་ནན་ཞིང་ཞིབ་ཚགས་པ་དང་ཡ་རབས་ཚད་ལྡན་ཡོང་བའི་འགན་ལེན་བྱེད་པ་དང་རིམ་ཁག་སྤྱི་བདེའི་ཞིབ་བཤེར་ས་ཚུགས་ཀྱི་མངོན་ཡོད་མངོན་མེད་ཀྱི་འཛུགས་སྐྲུན་ལ་སྐུལ་སྤེལ་ཏན་ཏིག་བཏང་ནས་མི་དང་གོ་མཚོན་དམིགས་སར་འབྱོར་བ་དང་ལམ་ལུགས་དང་བྱ་ཐབས་འཐུས་སྒོ་ཚང་དུ་གཏོང་རྒྱུའི་འགན་ལེན་བྱེད་དགོས་པ། གྲོང་ཁྱེར་གྱི་དྲ་མིག་ཅན་གྱི་དོ་དམ་ནན་དུ་གཏོང་བ་དང་དམངས་ཕན་ཉེན་རྟོག་ཞབས་ཞུའི་ས་ཚིགས་ཁག་གིས་ཁོངས་གཏོགས་མངགས་གཏོང་ཁང་དང་མཉམ་སྒུལ་གྱི་ལམ་སྲོལ་འཚོལ་ཞིབ་ཧུར་ཐག་བྱས་ནས་བརྟན་ལྷིང་སྲུང་སྐྱོང་གི་བྱ་ཐབས་ཁྱོན་ཡོངས་སུ་ཁྱབ་ཐུབ་པ་བྱེད་དགོས། དགོན་སྡེའི་སློབ་གསོ་དོ་དམ་གཏིང་ཟབ་ཏུ་བཏང་ནས་དགོན་སྡེར་བཅའ་སྡོད་ལས་བྱེད་པའི་སློབ་གསོ་དང་གསོ་སྦྱོང་ལ་ཤུགས་སྣོན་ནུས་ལྡན་རྒྱག་པ་དང་དགོན་སྡེའི་ཁྲིམས་ལུགས་དྲིལ་བསྒྲགས་ཀྱི་བརྗོད་དོན་གཙོ་བོའི་སློབ་གསོའི་བྱེད་སྒོ་གཏིང་ཟབ་སྤེལ་ནས་དགོན་སྡེ་ཞི་མཐུན་བརྟན་ལྷིང་ཡོང་བའི་འགན་ལེན་བྱེད་དགོས་པ། བརྟན་ལྷིང་ལ་གནོད་པའི་གནད་དོན་ཆེ་གྲས་མུ་མཐུད་གྲལ་བཤེར་བྱེད་པ་དང་སེལ་ནས་འགལ་བ་དང་རྩོད་གཞི་བར་འདུམ་འོས་འཚམ་བྱས་ཏེ་སྤྱི་ཚོགས་བརྟན་ལྷིང་ལ་གནོད་པའི་བྱ་བར་དཔྱད་དཔོག་བྱེད་པའི་ལམ་སྲོལ་ལག་བསྟར་ནན་པོ་བྱེད་དགོས་པ། བརྟན་ལྷིང་སྲུང་སྐྱོང་གི་འགན་འཁྲི་ནན་དུ་གཏོང་བ་དང་རིམ་ཁག་ཏང་སྲིད་འགོ་ཁྲིད་ལས་བྱེད་པས་ལས་གནས་བརྟན་སྲུང་དང་རང་འགན་ནན་སྒྲུབ་བྱེད་པ་དང་། རིམ་ཁག་བརྟན་ལྷིང་སྲུང་སྐྱོང་བཀོད་འདོམས་པུས་ལས་རེས་ཀྱི་སྣེ་ཁྲིད་སྡོད་བྱ་བྱེད་པའི་ལས་དོན་ལ་གཅིག་གྱུར་འཆར་འགོད་ཀྱིས་བཀོད་སྒྲིག་ཡག་པོ་བྱེད་པ། ས་ཁུལ་དང་གྲོང་ཁྱེར་དུ་མངགས་གཏོང་བྱས་པའི་བརྟན་ལྷིང་སྲུང་སྐྱོང་ལས་དོན་ཚོགས་ཆུང་གིས་འབྲེལ་གཏུག་མཛུབ་ཁྲིད་ལ་ཤུགས་སྣོན་རྒྱག་པ་དང་ལྟ་སྐུལ་ཞིབ་བཤེར་དམ་འཛིན་ནན་པོ་བྱེད་པ། རིམ་ཁག་བརྟན་ལྷིང་སྲུང་སྐྱོང་ལྟ་སྐུལ་ཚོགས་ཆུང་གིས་མངོན་ཞིབ་ལྐོག་འདྲི་མཐའ་འཁྱོངས་བྱེད་པ་དང་བརྡ་ཁྱབ་བཏང་ནས་ཞིབ་བཤེར་དང་ཡོ་བསྲང་ལམ་ལུགས་ནན་དུ་བཏང་སྟེ་བརྟན་ལྷིང་སྲུང་སྐྱོང་གི་ལས་དོན་དམིགས་སར་དོན་འཁྱོལ་ཡོང་བའི་འགན་ལེན་བྱེད་དགོས་པ་བཅས་ཀྱི་བླང་བྱ་བཏོན་གནང་བ་རེད།