ཟླ་8ཚེས་1ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཝུའུ་དབྱིང་ཅེས་ལྷ་སར་ཕྱི་འབྲེལ་པུའི་པུའུ་ཀྲང་གཞོན་པ་ཚུའེ་ཐན་ཁའེ་བཅས་པ་དང་མཇལ་འཛོམས་གནང་བ་རེད།

    ཝུའུ་དབྱིང་ཅེས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་དང་དེ་བཞིན་ཧྲུའུ་ཅི་ཁྲེན་ཆོན་གོ་དང་ཀྲུའུ་ཞི་པད་མ་འཕྲིན་ལས་ཀྱི་ཚབ་ཞུས་ཏེ་ཚུའེ་ཐན་ཁའེ་དང་བཅས་པ་བོད་དུ་ལས་ཀར་ཞིབ་བཤེར་མཛུབ་ཁྲིད་གནང་བར་ཕེབས་པར་སྤྲོ་སེམས་འཁོལ་བའི་དགའ་བསུ་ཞུས་གནང་བ་མ་ཟད། ཕྱི་འབྲེལ་པུས་དུས་ཡུན་རིང་པོའི་ནང་བོད་ཀྱི་འཕེལ་རྒྱས་བརྟན་ལྷིང་ལས་དོན་ཁག་དང་ལྷག་པར་དུ་ཕྱི་ཕྱོགས་འབྲེལ་བའི་ལས་ཀར་ཐུགས་ཁུར་དང་དམིགས་བསལ་རྒྱབ་སྐྱོར་ཤུགས་ཆེན་གནང་བར་ཐུགས་རྗེ་ཆེ་ཞུས་པ་དང་འབྲེལ་རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་སྐོར་ངོ་སྤྲོད་མདོར་བསྡུས་ཤིག་ཀྱང་གནང་བ་རེད།

    ཝུའུ་དབྱིང་ཅེས་ཟླ་7ཚེས་17ནས་ཚེས་21ཉིན་བར་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་ལི་ཁྲང་ཁྲུན་བོད་ཀྱི་ཉིང་ཁྲི་དང་ལྷ་ས་སོགས་སུ་ཕེབས་ནས་རང་ལྗོངས་ཀྱིས་ཏང་གི་སྐབས་བཅུ་བདུན་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་དང་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་ལག་བསྟར་དོན་འཁྱོལ་བྱས་ཚུལ་དང་། མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཡོང་བར་སྐུལ་མ་བཏང་ཚུལ། མི་རིགས་མཐུན་སྒྲིལ་ཡར་ཐོན་དྲིལ་བསྒྲགས་སློབ་གསོ་དང་རིག་གནས་འཛུགས་སྐྱོང་ལ་ཤུགས་སྣོན་བརྒྱབ་ཚུལ་སོགས་ལ་རྟོག་ཞིབ་དང་བརྟག་དཔྱད་གནང་སྟེ། བློ་མཐུན་ཧུའུ་ཅིན་ཐའོ་ཡིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་ས་ཁྱོན་སྤྱི་ལེ་ངོས་གྲུ་ཁྲི་120ཟིན་པའི་གངས་ལྗོངས་ས་མཐོའི་ས་གཞི་ཡངས་པོར་ཁྱབ་པར་གནང་བ་དེ་ཐོག་ནས་བོད་ཀྱི་ལས་དོན་ཁག་ལ་ཏང་ཀྲུང་དབྱང་གིས་མཐོང་ཆེན་པོ་གནང་བ་མཚོན་པས་ལྗོངས་ཡོངས་ཀྱི་མི་རིགས་ཁག་གི་ལས་བྱེད་དང་མང་ཚོགས་རྣམས་ལ་ལྕག་སྐུལ་ཆེན་པོ་ཐེབས་པ་དང་ཧུར་སེམས་རབ་ཏུ་འཕེལ་བར་བརྟེན་ང་ཚོས་བློ་མཐུན་ལི་ཁྲང་ཁྲུན་གྱི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་དོན་འཁྱོལ་ནན་ཏན་བྱས་ནས་བསམ་བློ་དང་བྱ་སྤྱོད་དེ་ཀྲུང་དབྱང་གི་ཐབས་ཇུས་བཀོད་སྒྲིག་ཐོག་གཅིག་གྱུར་ཡོང་བ་དང་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཡོང་རྒྱུར་འབད་བརྩོན་ཆེན་པོས་སྐུལ་མ་བཏང་སྟེ་གྲུབ་འབྲས་ཕུལ་བྱུང་ཐོག་ནས་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་རྒྱུ་ཡིན། ཕྱི་འབྲེལ་པུས་བོད་ཀྱི་ཕྱི་ཕྱོགས་འབྲེལ་བའི་ལས་ཀར་མུ་མཐུད་རོགས་རམ་དང་རྒྱབ་སྐྱོར་གནང་ནས་ཕྱི་ཕྱོགས་སུ་བོད་དྲིལ་བསྒྲགས་བྱ་ཤུགས་ཆེ་རུ་གཏོང་བ་དང་ཀྲུང་གོ་གུང་ཁྲན་ཏང་གི་འགོ་ཁྲིད་འོག་བོད་ལ་བྱུང་བའི་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་འཛམ་གླིང་ཀུན་ལ་ལེགས་པར་བསྟན་པའི་ཐོག་ནས་རྒྱལ་སྤྱིའི་དགྲ་ཡའི་ཕྱོགས་གཏོགས་དང་ཏཱ་ལའི་རུ་ཚོགས་ཀྱི་གཏམ་འཆལ་སྣ་ཚོགས་ལ་སུན་འབྱིན་དགག་རྒྱག་བྱས་ཏེ་འཛམ་གླིང་སྐྱེ་བོ་ཀུན་ལ་ཇི་མ་ཇི་བཞིན་དང་། འཕེལ་རྒྱས་འགྲོ་བཞིན་པ། གྲ་རྒྱས་ཕུན་སུམ་ཚོགས་པ་བཅས་ཀྱི་སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་ཤེས་སུ་འཇུག་རྒྱུའི་ཐུགས་རེའང་གནང་བ་རེད།

    མཇལ་འཛོམས་ནང་ཚུའེ་ཐན་ཁའེ་ཡིས་བོད་ཀྱི་ལས་དོན་ཁག་ལ་སྔར་རྒྱུན་བཞིན་སེམས་ཁུར་དང་རྒྱབ་སྐྱོར་བྱས་ནས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཆེད་ལེགས་སྐྱེས་གང་ཡོད་འབུལ་རྒྱུ་ཡིན་ཞེས་གསུངས།