ཟླ་8ཚེས་1ཉིན་གྱི་སྔ་དྲོ་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ཀྱིས་ཀྲུའུ་རེན་ཚོགས་འདུ་ཐེངས་143པ་འཚོགས་ནས 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འགྲོ་ལམ་འགྲིམ་འགྲུལ་བདེ་འཇགས་བཅའ་ཁྲིམས 》དང་དེ་བཞིན 《བོད་རང་སྐྱོང་ལྗོངས་འགྲོ་ལམ་འགྲིམ་འགྲུལ་བདེ་འཇགས་སྲོལ་ཡིག 》ཁྲིམས་འཛིན་ཞིབ་བཤེར་བྱེད་པའི་ལས་ཀའི་ཇུས་གཞིར་ཞིབ་འཇུག་དང་། རང་ལྗོངས་ཀྱི་གྲོང་ཁྱེར་སྡེ་ཁུལ་གྲོང་ལྷན་འཛུགས་སྐྲུན་བྱས་ཚུལ་སྐོར་གྱི་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ནང་སྲིད་ཁྲིམས་འཛིན་ལས་དོན་ཨུ་ཡོན་ལྷན་ཁང་གི་ཆེད་དོན་བརྟག་ཞིབ་སྙན་ཞུ་ཉན་པ། མི་དམངས་འཐུས་ཚོགས་སྐབས་དགུ་པའི་ཚོགས་འདུ་ཐེངས་དང་པོ་འཚོགས་ཚུན་འཐུས་མིས་བཏོན་པའི་གྲོས་འགོ་དང་། སྐྱོན་བརྗོད། བསམ་འཆར་བཅས་སྒྲུབ་ཚུལ་ལ་རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མིས་རྗེས་བསྙེགས་ཞིབ་བཤེར་བྱ་རྒྱུ་སྒྲིག་འཛུགས་བྱ་རྒྱུའི་སྐོར་གྱི་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་འཐུས་མིའི་མི་དོན་འདེམས་བསྐོའི་ལས་དོན་ཨུ་ཡོན་ལྷན་ཁང་གི་ལས་ཀའི་ཇུས་གཞིར་ཞིབ་འཇུག་བྱ་རྒྱུ་བཅས་རེད།

    བོད་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ཀྱི་ཀྲུའུ་རེན་བྱམས་པ་ཕུན་ཚོགས་ཀྱིས་ཚོགས་འདུ་གཙོ་སྐྱོང་གནང་བ་རེད། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ཀྱི་ཀྲུའུ་རེན་གཞོན་པ་ཀྲང་གཡོད་ཕིང་དང་། བསམ་སྡིངས་རྡོ་རྗེ་ཕག་མོ་བདེ་ཆེན་ཆོས་སྒྲོན། ཚེ་རིང་། ཀྲོའུ་ཁྲུན་ལའེ། སུང་ཧྲན་ལི། ཀྲའོ་ཀྲེང་ཤིའུ། ཨ་བསྟན། ཤིང་རྩ་བསྟན་འཛིན་ཆོས་གྲགས། རྡོ་རྗེ། ཝུའུ་ཅིན་ཧུའེ་བཅས་ཚོགས་འདུར་ཕེབས་ཡོད་པ་རེད།

    ཚོགས་འདུའི་ཐོག་སྤྱི་ཚོགས་ཀྱིས་དོ་ཁུར་ཆེ་ཙམ་བྱེད་པའི་འགྲོ་ལམ་འགྲིམ་འགྲུལ་བདེ་འཇགས་ཀྱི་གནད་དོན་ལ་གཞིགས་ནས་ཁྲིམས་འཛིན་ཞིབ་བཤེར་བྱ་རྒྱུ་དེ་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་འགན་སྲུང་བྱེད་པ་དང་འགྲིམ་འགྲུལ་བྱ་གཞག་སྐྱོན་བྲལ་ངང་འཕེལ་རྒྱས་འགྲོ་རྒྱུར་སྐུལ་མ་གཏོང་རྒྱུར་ཧ་ཅང་དགོས་ངེས་ཤིག་ཡིན་པའི་ངོས་འཛིན་བྱས་པ་རེད། ཚོགས་འདུའི་ཐོག་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ནང་སྲིད་ཁྲིམས་འཛིན་ལས་དོན་ཨུ་ཡོན་ལྷན་ཁང་གིས་ཀྲུའུ་རེན་ཚོགས་འདུའི་བསམ་འཆར་ལ་གཞིགས་ནས་ལུགས་མཐུན་ངང་མི་སྣ་སྒྲིག་འཛུགས་དང་། འཐབ་ཕྱོགས་དང་པོར་བསྐྱོད་པ། མང་ཚོགས་ཀྱི་བསམ་འཆར་དང་ཕྱོགས་ཁག་གི་བསམ་འཆར་རྒྱ་ཁྱབ་ཏུ་ཉན་པ། སྤུས་ཀ་མཐོ་བའི་ཞིབ་བཤེར་སྙན་ཞུ་ཆགས་པ་བྱེད་པ། ཀྲུའུ་རེན་ཚོགས་འདུར་ཞིབ་འཇུག་དང་རང་སྐྱོང་ལྗོངས་མི་དམངས་འཐུས་ཚོགས་སྐབས་དགུ་པའི་རྒྱུན་ཨུད་ཀྱི་ཚོགས་འདུ་ཐེངས་སུམ་ཅུ་པས་གྲོས་ཞིབ་བྱ་རྒྱུར་འབུལ་རྒྱུའི་བླང་བྱ་བཏོན་པ་རེད། ཚོགས་འདུའི་ཐོག་ངོས་འཛིན་བྱས་དོན། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་བརྟག་ཞིབ་ཚོགས་ཆུང་གིས་རང་ལྗོངས་ཀྱི་གྲོང་ཁྱེར་གྱི་སྡེ་ཁུལ་གྲོང་ལྷན་འཛུགས་སྐྲུན་གྱི་གནས་ཚུལ་སྐོར་ཆེད་དོན་བརྟག་ཞིབ་སྙན་ཞུའི་ནང་མིག་སྔའི་རང་ལྗོངས་ཀྱི་གྲོང་ཁྱེར་གྱི་སྡེ་ཁུལ་གྲོང་ལྷན་འཛུགས་སྐྲུན་གྱི་བྱེད་ཐབས་གཙོ་བོ་དང་། ཕན་འབྲས། ཉམས་མྱོང་བཅས་ལ་དབྱེ་ཞིབ་གཏིང་ཟབ་བྱེད་པ་དང་། གནས་པའི་དཀའ་ངལ་དང་གནད་དོན་སྟོན་པ། དམིགས་སའི་རང་བཞིན་དང་བཀོལ་སྤྱོད་རང་བཞིན་ཧ་ཅང་ཆེ་བའི་བསམ་འཆར་དང་གྲོས་འགོ་འདོན་པ་བཅས་བྱས་ཡོད། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ནང་སྲིད་ཁྲིམས་འཛིན་ལས་དོན་ཨུ་ཡོན་ལྷན་ཁང་གིས་ཀྲུའུ་རེན་ཚོགས་འདུའི་བསམ་འཆར་ལ་གཞིགས་ནས་སྔར་བས་བཟོ་བཅོས་བརྒྱབ་རྗེས་རྒྱལ་ཡོངས་མི་དམངས་འཐུས་ཚོགས་ནང་སྲིད་ཁྲིམས་འཛིན་ཨུ་ཡོན་ལྷན་ཁང་ལ་སྙན་ཞུ་འབུལ་རྒྱུ་དང་ཡིག་ཐོག་ནས་རང་སྐྱོང་ལྗོངས་མི་དམངས་འཐུས་ཚོགས་སྐབས་དགུ་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་སུམ་ཅུ་པར་པར་འགྲེམས་བྱ་རྒྱུ་ཡིན་པ་རེད།

    ཚོགས་འདུའི་ཐོག་འཐུས་མིས་བཏོན་པའི་གྲོས་འགོ་དང་། སྐྱོན་བརྗོད། བསམ་འཆར་བཅས་གཉེར་བའི་ལས་དོན་ལ་སྔར་བས་སྐུལ་འདེད་གཏོང་ཆེད་ད་ཕན་ལོ་ལྔའི་རིང་གི་འཐུས་མིའི་གྲོས་འགོ་སྒྲུབ་ཚུལ་དང་ཟུང་འབྲེལ་བྱེད་པ་དང་། རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གཙོ་གནད་གནད་དོན་ལ་དམིགས་པ། གྲོས་འགོ་འགའ་ཞིག་བདམས་ནས་གཙོ་གནད་དུ་རྗེས་སྙེགས་ཞིབ་བཤེར་བྱེད་པ་བཅས་བྱ་རྒྱུ་དེ་འཐུས་མིའི་གྲོས་འགོ་དོན་འཁྱོལ་བྱས་ཚུལ་དམ་འཛིན་ཏན་ཏིག་བྱེད་པ་དང་མི་དམངས་མང་ཚོགས་ཀྱིས་དོ་ཁུར་བྱེད་པའི་གླེང་མང་བ་དང་དཀའ་གནད་ཀྱི་གནད་དོན་ནུས་ལྡན་ངང་ཐག་གཅོད་བྱ་རྒྱུར་སྐུལ་མ་གཏོང་རྒྱུར་དོན་སྙིང་གལ་ཆེན་ལྡན་ཡོད་པ་རེད། དེ་ནི་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ཀྱིས་ལས་དོན་དེ་སྤེལ་ཐེངས་དང་པོ་ཡིན་པས་གསར་གཏོད་རང་བཞིན་ངེས་ཅན་ཡོད་སྟབས་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ཀྱིས་མི་དོན་འདེམས་བསྐོའི་ལས་དོན་ཨུ་ཡོན་ལྷན་ཁང་གི་ཚབ་ཞུས་ནས་འབྲེལ་ཡོད་སྡེ་ཚན་དང་འབྲེལ་བ་དང་མཐུན་སྦྱོར་བྱ་རྒྱུར་ཤུགས་བརྒྱབ་ནས་རྗེས་སྙེགས་ཞིབ་བཤེར་གྱི་ཞིབ་ཕྲའི་སྒྲིག་འཛུགས་ལག་བསྟར་ལས་དོན་ནན་ཏན་ངང་བསྒྲུབ་རྒྱུ་ཡིན་པ་རེད།