བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཚེས་26ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་བྱམས་པ་ཕུན་ཚོགས་ཀྱིས་ལྷ་སར་ཝེ་གུང་ཀྲུང་དབྱང་ཨུ་ཡོན་ལའོ་ཅེ་ཞིང་ཆེན་ཨུ་ལྷན་གྱི་ཧྲུའུ་ཅི་རོན་ཡིའུ་ཝང་གིས་ཚོགས་གཙོ་གནང་བའི་ཝེ་ཐེ་ནམ་ནུབ་བྱང་ས་ཁུལ་གྱི་མཛུབ་ཁྲིད་ཨུ་ཡོན་ལྷན་ཁང་གི་སྐུ་ཚབ་ཚོཌ་པ་བཅས་དང་ཐུགས་བརྩེའི་ངང་མཇལ་འཛོམས་གནང་བ་རེད།

    བྱམས་པ་ཕུན་ཚོཌ་ཀྱིས་དང་ཐོག་རང་སྐྱོང་ལྗོངས་ཏང་ཨུད་ཀྱི་ཚབ་ཞུས་ཏེ་རོན་ཡིའུ་ཝང་དང་བཅས་པ་བོད་དུ་གཟིགས་སྐོར་དང་འཚམས་འདྲིར་ཕེབས་པར་དགའ་བསུ་ཞུས་པ་དང་འབྲེལ་རོན་ཡིའུ་ཝང་ལ་བཀས་བཀོད་རྒྱུད་འཛིན་ཞིང་བྲན་ལམ་ལུགས་ནས་དམངས་གཙོའི་བཅོས་སྒྱུར་བྱས་ཏེ་སྤྱི་ཚོགས་རིང་ལུགས་ཀྱི་འགྲོ་ལམ་ཐོག་བསྐྱོད་པའི་བར་གྱི་བོད་ཀྱི་ལོ་རྒྱུས་ཀྱི་འཕེལ་རིམ་དང་ད་ཕན་ལོ་ཤས་རིང་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་ཐོབ་པའི་མི་རྣམས་ཡིད་དབང་འཕྲོག་པའི་གྲུབ་འབྲས་ངོ་སྤྲོད་མདོར་བསྡུས་གནང་བ་རེད།

    བྱམས་པ་ཕུན་ཚོགས་ཀྱིས་1951ལོར་བོད་ལ་ཞི་བའི་བཅིངས་འགྲོལ་ཐོབ་ཡོད། ལོ་61རིང་ཏང་ཀྲུང་དབྱང་གི་ཐུགས་ཁུར་དང་རྒྱལ་ཡོངས་མི་དམངས་ཀྱི་རྒྱབ་སྐྱོར་འོག་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཁྱབ་ཁོངས་ཁག་ཚང་མར་ཀུན་གྱིས་དོ་སྣང་བྱེད་པའི་གྲུབ་འབྲས་ཐོབ་ཡོད། བོད་དུ “འགན་ལེན་གསུམ ”གྱི་སློབ་གསོའི་སྲིད་ཇུས་ལག་བསྟར་བྱས་པས་ཞིང་འབྲོག་པའི་ཁུར་པོ་ཡང་དུ་ཕྱིན་པ་དང་བུ་ཕྲུག་སློབ་གྲྭར་གཏོང་བའི་ཞིང་འབྲོག་པའི་ཧུར་བརྩོན་རང་བཞིན་སྐོང་འཐེན་ཐུབ་པ་དང་། རྒྱལ་ཡོངས་ནས་གྲོང་ཁྱེར་དང་གྲོང་རྡལ་གྱི་གྲོང་མིའི་སྨན་བཅོས་འགན་བཅོལ་ཁྱོན་ཡོངས་ལ་ཁྱབ་རྒྱུ་སྔོན་ལ་མངོན་འགྱུར་བྱུང་ནས་སྨན་ཡོན་མི་དགོས་པའི་སྨན་བཅོས་ཀྱིས་རྨང་གཞི་བྱས་པའི་ཞིང་འབྲོག་ཁུལ་གྱི་སྨན་བཅོས་ལམ་ལུགས་བཙུགས་ནས་ཞིང་འབྲོག་པའི་ནད་གཞི་ལྟ་དཀའ་བའི་གནད་དོན་ཐག་གཅོད་ནུས་ལྡན་ཐུབ་ཡོད། འདི་ལོ་བོད་ཀྱིས་སླར་ཡང་དབུལ་སྐྱོར་གསར་སྤེལ་བྱེད་ཤུགས་ཆེ་རུ་བཏང་སྟེ་དབུལ་སྐྱོར་ཚད་གཞི་གསར་པ་སྒོར་2300བར་ལེགས་སྒྲིག་བྱ་རྒྱུ་མ་ཟད་དུད་ཚང་ལ་རོགས་སྐྱོར་བྱེད་པའི་བྱ་ཐབས་ཁྱོན་ཡོངས་ནས་དོན་འཁྱོལ་བྱས་ནས་དུད་ཚང་ལ་རོགས་སྐྱོར་བྱེད་ཤུགས་ཆེ་རུ་གཏོང་རྒྱུ་དང་དམིགས་སའི་རང་བཞིན་གྱི་རོགས་སྐྱོར་བྱས་ཏེ་ཡོང་འབབ་དམའ་བའི་ཚོགས་སྤྱི་དབུལ་སྒྲོལ་ཕྱུག་འགྱུར་བྱེད་པ། བོད་ཀྱི་མི་དམངས་མང་ཚོགས་ཀྱི་ཆོས་དད་རང་མོས་ལ་བརྩི་བཀུར་ཐོབ་པ་དང་ཆོས་ལུགས་དང་རིག་གནས་བྱེད་སྒོ་ཁང་ལ་སྔར་བྱུང་མ་མྱོང་བའི་སྲུང་སྐྱོབ་ཐོབ་ཡོད། མ་གཞི་བོད་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ཡང་སྔར་བཞིན་འཕེལ་རྒྱས་འགྲོ་གོར་བའི་ས་ཁུལ་ཞིག་ཡིན། མིག་སྔར་བོད་ཀྱིས་དཔལ་འབྱོར་མཆོང་སྐྱོད་ལྟ་བུའི་འཕེལ་རྒྱས་འགྲོ་རྒྱུར་གཞོལ་ཏེ་2020ལོར་སླེབས་སྐབས་རྒྱལ་ཡོངས་ཀྱི་ཞིང་ཆེན་གཞན་དང་མཉམ་དུ་འབྱོར་འབྲིང་སྤྱི་ཚོགས་སྒོ་ཀུན་ནས་འཛུགས་སྐྲུན་བྱེད་པའི་བརྗིད་ཆེའི་དམིགས་ཚད་མངོན་འགྱུར་ཡོང་ཆེད་འབད་བརྩོན་བྱ་རྒྱུ་ཡིན་ཞེས་གསུངས་པ་རེད།

    བྱམས་པ་ཕུན་ཚོགས་ཀྱིས་ཀྲུང་ཝེ་འབྲེལ་བར་གདེང་འཇོག་གནང་བ་དང་འབྲེལ་ད་ཕན་ལོ་ཤས་རིང་ཝེ་ཐེ་ནམ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་ཐོབ་པའི་གྲུབ་འབྲས་ལ་བཀྲ་ཤིས་བདེ་ལེགས་ཞུས་གནང་ཞིང་། ཁོང་གིས་བོད་རང་སྐྱོང་ལྗོངས་ཀྱིས་ཀྲུང་ཝེའི་ཁྱོན་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བ་བརྟན་པོ་དང་སྐྱོན་བྲལ་ངང་འཕེལ་རྒྱས་འགྲོ་ཆེད་ལེགས་སྐྱེས་ཧུར་ཐག་འབུལ་འདོད་ཡོད་ཅེས་གསུངས་པ་རེད།

    རོན་ཡིའུ་ཝང་གིས་བྱམས་པ་ཕུན་ཚོགས་ཀྱིས་མཇལ་འཛོམས་གནང་བ་དང་བོད་ཀྱི་གནས་ཚུལ་ངོ་སྤྲོད་གནང་བར་ཐུགས་རྗེ་ཆེ་ཞུས་གནང་བ་དང་འབྲེལ་ད་ཐེངས་བོད་དུ་འཚམས་འདྲིར་ཡོང་དོན་གྱི་འབྲེལ་ཡོད་གནས་ཚུལ་ངོ་སྤྲོད་མདོར་བསྡུས་ཀྱང་གནང་བ་རེད། ཁོང་གིས་ང་ཚོས་བོད་ཀྱི་འགྱུར་ལྡོག་ཆེན་པོ་མིག་མཐོང་ལག་ཟིན་བྱུང་ཞིང་། བཀས་བཀོད་རྒྱུད་འཛིན་ཞིང་བྲན་ལམ་ལུགས་ནས་ཐད་ཀར་སྤྱི་ཚོགས་རིང་ལུགས་ཀྱི་འགྲོ་ལམ་ཐོག་བསྐྱོད་ཡོད། བོད་ལ་སྐྱེ་བོ་ཀུན་གྱིས་དོ་སྣང་བྱེད་པའི་གྲུབ་འབྲས་ཆེན་པོ་དེ་འདྲ་ཐོབ་པར་བྱེད་པའི་ནུས་པ་ཀྲུང་གོ་གུང་ཁྲན་ཏང་ཁོ་ནར་མ་གཏོགས་མེད་པའི་ཡིད་ཆེས་ཡོད་ལ་འབྱུང་འགྱུར་བོད་ཇེ་ལེགས་ཇེ་བཟང་དུ་འགྲོ་རྒྱུའི་ཡིད་ཆེས་ཀྱང་ཡོད། ང་ཚོ་རང་རྒྱལ་དུ་ལོག་རྗེས་ངེས་པར་དུ་བོད་དུ་མཐོང་ཐོས་མྱོང་གསུམ་བྱུང་བའི་གནས་ཚུལ་ཝེ་ཐེ་ནམ་མི་དམངས་ལ་ངོ་སྤྲོད་བྱས་ཏེ་ཝེ་ཐེ་ནམ་མི་དམངས་ཀྱིས་བོད་སྔར་ལས་ལྷག་པ་ཤེས་རྟོགས་ཡོང་བ་བྱ་རྒྱུ་ཡིན་ཞེས་གསུངས་པ་རེད།

    དེ་གོང་སྐུ་ཚབ་ཚོགས་པས་ལྷ་ས་གྲོང་ཁྱེར་སྣེའུ་ཁུལ་གསར་གྱི་བདེ་སྡོད་ལས་གྲྭར་ལྟ་སྐོར་དང་མང་ཚོགས་ཀྱི་ཁྱིམ་དུ་འཚམས་འདྲི་བྱས་པ་དང་འབྲེལ་རང་སྐྱོང་ལྗོངས་འཕེལ་སྒྱུར་ཨུ་ལྷན་དང་། དབུལ་སྐྱོར་གཞུང་དོན་ཁང་། མི་རིགས་ཆོས་ལུགས་ཨུ་ལྷན་བཅས་ཀྱི་འགན་འཁུར་བློ་མཐུན་དང་བཞུགས་མོལ་ཡང་བྱས་ཏེ་བོད་ཀྱི་དཔལ་འབྱོར་དང་སྤྱི་ཚོགས་འཕེལ་ཚུལ་ལ་ཁྱོན་ཡོངས་ནས་རྟོག་ཞིབ་དང་ཤེས་རྟོགས་ཀྱིས་ཁས་ལེན་དང་བསྔགས་བརྗོད་གང་ལེགས་བྱས་ཡོད།