སྲིད་གྲོས་བོད་རང་སྐྱོང་ལྗོངས་ཨུ་ཡོན་ལྷན་ཁང་གི་སྐབས་དགུ་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་ཉི་ཤུ་པའི་གྲོས་རིམ་ཁག་ཕུན་སུམ་ཚོགས་པོའི་ངང་ལེགས་གྲུབ་བྱུང་རྗེས་ཚེས་24ཉིན་གྱི་ཕྱི་དྲོ་ལྷ་སར་གྲོལ་བ་རེད།
རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་། ལྗོངས་སྲིད་གྲོས་ཀྱི་ཏང་ཙུའུ་ཡི་ཧྲུའུ་ཅི། ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ། ལྗོངས་ཏང་ཨུད་འཐབ་ཕྱོགས་གཅིག་གྱུར་པུའི་པུའུ་ཀྲང་བཅས་ཡིན་པའི་མགོན་པོ་བཀྲ་ཤིས་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་དང་རང་སྐྱོང་ལྗོངས་སྲིད་གྲོས་ཀྱི་ཏང་ཙུའུ་ཡི་ཧྲུའུ་ཅི་གཞོན་པ་ཀྲུའུ་ཞི་གཞོན་པ་པ་སངས་དོན་གྲུབ་ཀྱིས་ཚོགས་འདུ་གཙོ་སྐྱོང་གནང་བ་རེད།
རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་ཅིན་དབྱི་མིང་དང་། ཆའོ་ཡོན་ཀྲུང་། ཚེ་སྨོན་གླིང་བསྟན་འཛིན་འཕྲིན་ལས། པད་མ་ཚེ་དབང་། ལིའུ་ཆིང་ཧུའེ། བློ་བཟང་རྡོ་རྗེ། བསོད་ནམས་སྒྲོལ་མ། དབྱངས་ཅན། རྫོང་ལོ་བྱམས་པ་མཁས་གྲུབ་བཅས་ཚོགས་འདུར་ཞུགས་ཡོད་པ་རེད།
མགོན་པོ་བཀྲ་ཤིས་ཀྱིས་ཐོག་མཐའ་བར་གསུམ་དུ་མཆོང་སྐྱོད་ལྟ་བུའི་འཕེལ་རྒྱས་ལ་སྐུལ་འདེད་གཏོང་རྒྱུ་དེ་སྲིད་གྲོས་ཀྱི་ལས་འགན་ཨང་དང་པོར་བརྩིས་ནས་བློ་གྲོས་ལྡན་པའི་ཐབས་དང་གོ་ཆོད་པའི་ཇུས་བཏོན་ཏེ་གྲོས་མོལ་སྲིད་གླེང་གི་གྲུབ་འབྲས་བསྒྱུར་རྒྱུར་སྐུལ་འདེད་གཏོང་རྒྱུར་སྣང་ཆེན་དང་སྲིད་གྲོས་ཀྱི་གྲོས་གཞི་བདག་སྤྲོད་དང་དོན་འཁྱོལ་བྱ་རྒྱུར་དམ་འཛིན་ནན་པོ་བྱས་ཏེ་གྲོས་གཞི་བདག་སྤྲོད་བྱེད་པའི་སྤུས་ཚད་དང་དོན་འཁྱོལ་གྱི་ཕན་འབྲས་རྒྱུན་ཆད་མེད་པར་མཐོ་རུ་གཏོང་བ་དང་། ཐོག་མཐའ་བར་གསུམ་དུ་དམངས་འཚོ་འགན་ལེན་དང་ལེགས་སུ་གཏོང་རྒྱུ་དེ་སྲིད་གྲོས་ལས་འགན་གྱི་གཞི་རྩའི་འགོ་ཚུགས་ས་དང་དོན་ལ་བབས་སར་བརྩིས་ནས་དམངས་འཚོ་མུ་མཐུད་ལེགས་སུ་གཏོང་བ་དང་དུས་བབ་གསར་པའི་འོག་མང་ཚོགས་ཀྱི་ལས་དོན་དང་དེ་བཞིན་མི་རིགས་ཁག་གི་མང་ཚོགས་རྣམས་གོ་རིམ་ལྡན་པའི་ངང་ཆབ་སྲིད་ནང་ཞུགས་རྒྱུར་སྐུལ་འདེད་ཧུར་ཐག་གཏོང་བ། ཐོག་མཐའ་བར་གསུམ་དུ་སྣོད་བཅུད་འཛུགས་སྐྱོང་ལ་སྐུལ་འདེད་གཏོང་བ་དང་བོད་ཀྱི་སྣོད་བཅུད་མ་ལག་འཁོར་རྒྱུག་ཡག་པོ་མངོན་འགྱུར་བྱ་རྒྱུ་དེ་སྲིད་གྲོས་ལས་འགན་གྱི་ཤུགས་རྒྱག་ས་གལ་ཆེར་བརྩིས་ནས་ས་མཐོའི་སྣོད་བཅུད་ཀྱི་བདེ་འཇགས་སྲུང་ཡོལ་ཞིག་སྐྲུན་ཆེད་ལེགས་སྐྱེས་གསར་པ་འབུལ་བ། ཐོག་མཐའ་བར་གསུམ་དུ་བརྟན་ལྷིང་སྲུང་སྐྱོང་དང་། མཐུན་སྒྲིལ་ལ་ཤུགས་སྣོན་རྒྱག་པ། ཞི་མཐུན་ལ་སྐུལ་མ་གཏོང་བ་བཅས་སྲིད་གྲོས་ལས་འགན་གྱི་གལ་ཆེན་ནང་གི་འགངས་ཆེན་དུ་བརྩིས་ནས “གསུམ་མི་ཐོན་པ ”མངོན་འགྱུར་ཡོང་ཆེད་ལྗོངས་ཡོངས་སྒོ་ཀུན་ནས་བརྟན་ལྷིང་དང་མུ་མཐུད་བརྟན་ལྷིང་ཡོང་རྒྱུ་འགན་ལེན་བྱེད་ཆེད་ཇུས་ཤུགས་འདོན་དགོས། ཐོག་མཐའ་བར་གསུམ་དུ་རང་ལྗོངས་ཀྱི་རིག་གནས་འཕེལ་རྒྱས་ཆེན་པོ་དར་རྒྱས་ཆེན་པོ་ཡོང་རྒྱུར་སྐུལ་འདེད་གཏོང་རྒྱུ་དེ་སྲིད་གྲོས་ཀྱི་ལས་འགན་གལ་ཆེན་ཞིག་ཏུ་བརྩིས་ནས “རྒྱལ་གཅེས་དང་། མཐུན་སྒྲིལ། ཞི་མཐུན། འཕེལ་རྒྱས། ཤེས་དཔལ ”བཅས་བརྗོད་དོན་གཙོ་བོར་བྱེད་པའི་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སྒོ་ཀུན་ནས་ལག་ལེན་བསྟར་ནས “བོད་སྐྱོད་པ་རྒན་གྲས་ཀྱི་སྙིང་སྟོབས ”རྒྱུན་འཛིན་དང་དར་སྤེལ་ཤུགས་ཆེན་གཏོང་བ་དང་རང་འགུལ་ངང་ཇུས་བཟང་བཏོན་ནས་རིག་གནས་སྒྱུར་བཅོས་དང་འཕེལ་རྒྱས་ལ་སྐུལ་འདེད་བཏང་ཐོག་རང་ལྗོངས་ཀྱི་སྲིད་གྲོས་ཀྱིས་རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་རྒྱུར་ཞབས་འདེགས་ཞུ་བའི་རྣམ་པ་བཟང་པོ་གཏོད་པ་བཅས་བྱས་ཏེ་ཕུལ་བྱུང་གི་གྲུབ་འབྲས་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་སྐོང་ཚོགས་བྱ་རྒྱུར་བསུ་བ་ཞུ་དགོས་པའི་བླང་བྱ་བཏོན་གནང་བ་རེད།