ཟླ་7ཚེས་12ཉིན་གྱི་ཕྱི་དྲོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཝུའུ་དབྱིང་ཅེས་ལྷ་སར་རྒྱལ་ཁབ་རླུང་འཕྲིན་གློག་བཪྙན་བཪྙན་འཕྲིན་སྤྱི་ཁྱབ་ཅུས་ཀྱི་ཅུས་ཀྲང་གཞོན་པ་ཀྲང་ཕི་མིན་གྱིས་སྣེ་ཁྲིད་གནང་བའི་རྒྱལ་ཁབ་རླུང་འཕྲིན་གློག་བཪྙན་བཪྙན་འཕྲིན་སྤྱི་ཁྱབ་ཅུས་ཀྱི་བརྟག་ཞིབ་ཚོགས་ཆུང་བཅས་པ་དང་མཛའ་བརྩེའི་ངང་མཇལ་འཛོམས་གནང་བ་རེད།
རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་རྡོ་ཐོགས་མཇལ་འཛོམས་གནང་སྐབས་ལྷན་དུ་ཕེབས་ཡོད་པ་རེད།
ཝུའུ་དབྱིང་ཅེས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ཧྲུའུ་ཅི་ཁྲེན་ཆོན་གོ་དང་ཀྲུའུ་ཞི་པད་མ་འཕྲིན་ལས་རྣམ་གཉིས་ཀྱི་ཚབ་ཞུས་ཏེ་ཀྲང་ཕི་མིན་བཅས་པ་བོད་དུ་ཕེབས་པར་དགའ་བསུ་ཞུས་པ་རེད། རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་ངོ་སྤྲོད་མདོར་བསྡུས་གནང་རྗེས་ཝུའུ་དབྱིང་ཅེས་གྲོལ་མ་ཐག་པའི་ལྗོངས་ཏང་ཨུད་སྐབས་བརྒྱད་པའི་ཚང་འཛོམས་གྲོས་ཚོགས་ཐེངས་གཉིས་པའི་ཐོག 《སྤྱི་ཁྱབ་ཧྲུའུ་ཅི་ཧུའུ་ཅིན་ཐའོ་ཡི “མུ་མཐུད་ཤུགས་སྣོན་རྒྱག་དགོས་པ་ལྔའི ”མཛུབ་སྟོན་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱས་ཏེ་ཕུལ་བྱུང་གི་གྲུབ་འབྲས་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་རྒྱུའི་སྐོར་གྱི་ཀྲུང་གུང་བོད་རང་སྐྱོང་ལྗོངས་ཨུ་ཡོན་ལྷན་ཁང་གི་གྲོས་ཆོད 》ལ་གྲོས་ཞིབ་བྱས་ནས་གྲོས་འཆམ་བྱུང་བ་རེད། ང་ཚོས་བློ་མཐུན་ཧུའུ་ཅིན་ཐའོ་ཡིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གིས་གསལ་བཏོན་གནང་བའི་བོད་སྐྱོང་ཐབས་ཇུས་ལ་གཞིགས་ཏེ་ཚན་རིག་དང་མཐུན་པའི་གོང་འཕེལ་ལྟ་བ་ལག་བསྟར་དོན་འཁྱོལ་གཏིང་ཟབ་བྱས་ནས་བོད་ཀྱི་རླུང་འཕྲིན་དང་བཪྙན་འཕྲིན་བྱ་གཞག་སླར་ཡང་སྐས་རིམ་གསར་པ་ཞིག་ཏུ་སླེབས་རྒྱུར་ཁྱོན་ཡོངས་ནས་སྐུལ་འདེད་གཏོང་དགོས་ཞེས་གསུངས་པ་རེད། རྒྱལ་ཁབ་རླུང་འཕྲིན་གློག་བཪྙན་བཪྙན་འཕྲིན་སྤྱི་ཁྱབ་ཅུས་ཀྱིས་སྔ་རྒྱུན་བཞིན་བོད་ཀྱི་རླུང་འཕྲིན་དང་། གློག་བཪྙན། བཪྙན་འཕྲིན་བཅས་བྱ་གཞག་གོང་འཕེལ་འགྲོ་རྒྱུར་ཐུགས་ཁུར་དང་རྒྱབ་སྐྱོར་གནང་ནས་རླུང་འཕྲིན་དང་བཪྙན་འཕྲིན་དེ་ཏང་གི་བྱེད་ཕྱོགས་དང་སྲིད་ཇུས་དྲིལ་བསྒྲགས་བྱེད་པ་དང་། མང་ཚོགས་ཀྱི་འཚོ་བ་དང་ཉེ་བཅར་བྱེད་པ། མང་ཚོགས་ཀྱི་བསམ་འདུན་མཚོན་པར་བྱེད་པ་བཅས་ཀྱི་གཞི་རྟེན་ནུས་ལྡན་ཞིག་ཆགས་པ་བྱས་ནས་མི་རིགས་ཁག་གི་མི་དམངས་ཀྱིས་གངས་ལྗོངས་ས་མཐོར་མཛེས་སྡུག་ལྡན་ལ་བདེ་སྐྱིད་ལྡན་པའི་འཚོ་བ་སྐྱེལ་བའི་སྤྲོ་སེམས་འཕེལ་བ་བྱ་རྒྱུར་དེ་བས་སྐུལ་འདེད་བཏང་སྟེ་མི་རིགས་ཁག་གི་མི་དམངས་ཀྱིས་འབད་འབུངས་ཡར་བརྩོན་དང་། མེས་རྒྱལ་གཅིག་གྱུར་དང་མི་རིགས་མཐུན་སྒྲིལ་སྲུང་སྐྱོང་། ཁ་ཕྲལ་ལ་ངོ་རྒོལ་བཅས་ཀྱི་ཁྲིད་སྟོན་བྱས་ནས་དེ་བས་མཛེས་སྡུག་ལྡན་པའི་སྤྱི་ཚོགས་རིང་ལུགས་ཀྱི་བོད་གསར་འཛུགས་སྐྲུན་བྱས་ཏེ་ཕུལ་བྱུང་གི་གྲུབ་འབྲས་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་རྒྱུའི་རེ་བ་བཏོན་གནང་བ་རེད།
ཀྲང་ཕི་མིན་གྱིས་རྒྱལ་ཁབ་རླུང་འཕྲིན་གློག་བཪྙན་བཪྙན་འཕྲིན་སྤྱི་ཁྱབ་ཅུས་ཀྱི་ཚབ་ཞུས་ཏེ་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཐོག་མཐའ་བར་གསུམ་དུ་རླུང་འཕྲིན་གློག་བཪྙན་བཪྙན་འཕྲིན་བྱ་གཞག་ལ་མཐོང་ཆེན་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཤིང་། ཁོང་གིས་རྒྱལ་ཁབ་རླུང་འཕྲིན་གློག་བཪྙན་བཪྙན་འཕྲིན་སྤྱི་ཁྱབ་ཅུས་ཀྱིས་བོད་ཀྱི་རླུང་འཕྲིན་གློག་བཪྙན་བཪྙན་འཕྲིན་ལས་དོན་ལ་སྔར་བས་རྒྱབ་སྐྱོར་དང་སེམས་ཁུར་ཤུགས་ཆེན་བྱ་རྒྱུ་ཡིན་ཞེས་གསུངས་པ་དང་ཁོང་གིས་རང་སྐྱོང་ལྗོངས་ཀྱི་རིམ་ཁག་རླུང་འཕྲིན་གློག་བཪྙན་བཪྙན་འཕྲིན་སྡེ་ཚན་གྱིས་དེང་སྐབས་ཐོབ་པར་དཀའ་བའི་ལོ་རྒྱུས་རང་བཞིན་གྱི་འཕེལ་རྒྱས་གོ་སྐབས་དམ་བཟུང་བྱེད་པ་དང། བསམ་བློའི་འདུ་ཤེས་ལེགས་སུ་གཏོང་བ། སྒྲིག་གཞི་དང་ལམ་སྲོལ་གསར་གཏོད་བཅས་བྱས་ནས་བོད་ཀྱི་རླུང་འཕྲིན་གློག་བཪྙན་བཪྙན་འཕྲིན་བྱ་གཞག་འཕེལ་རྒྱས་དེ་བས་ཆེ་བ་ཡོང་རྒྱུར་སྐུལ་འདེད་གཏོང་རྒྱུའི་རེ་བ་བཏོན་གནང་བ་རེད།