ཟླ་7 ཚེས་10ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་ཐེན་ཅིན་གྲོང་ཁྱེར་གྱི་ཧྲི་ཀྲང་གཞོན་པ་ཀྲང་ཅུན་ཧྥང་གིས་ཚོགས་གཙོ་གནང་བའི་ཐེན་ཅིན་གྲོང་ཁྱེར་གྱི་སྐུ་ཚབ་ཚོགས་པ་བཅས་པ་དང་མཇལ་འཛོམས་གནང་བ་རེད།
རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་བློ་བཟང་རྒྱལ་མཚན་དང་དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་གི་སྤྱི་ཁྱབ་རུ་དཔོན་ཀུའོ་དབྱི་ལི་རྣམ་གཉིས་མཇལ་འཛོམས་གནང་སྐབས་ལྷན་དུ་ཕེབས་ཡོད་པ་རེད།
ཁྲེན་ཆོན་གོས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་དེ་བཞིན་མི་རིགས་ཁག་གི་མི་དམངས་ཁྲི་300ཡི་ཚབ་ཞུས་ནས་ཐེན་ཅིན་གྲོང་ཁྱེར་གྱི་སྐུ་ཚབ་ཚོགས་པ་དང་བཅས་པ་བོད་ཀྱི་ལས་དོན་ལ་གཟིགས་ཞིབ་དང་མཛུབ་ཁྲིད་གནང་བར་ཕེབས་པར་དགའ་བསུ་ཞུས་གནང་བ་དང་ཧྲུའུ་ཅི་ཀྲང་ཀའོ་ལི་དང་ཧྲི་ཀྲང་ཧོང་ཤིན་གོ་དང་དེ་བཞིན་ཐེན་ཅིན་གྲོང་ཁྱེར་གྱིས་ཡུན་རིང་ནང་བོད་ཀྱི་ལས་དོན་ལ་མཐོང་ཆེན་དང་ཐུགས་ཁུར་གནང་བ་དང་འཇུངས་པ་མེད་པའི་རོགས་སྐྱོར་གནང་བར་ཐུགས་རྗེ་ཆེ་ཞུས་ཤིང་། ཁོང་གིས་ཐེན་ཅིན་གྲོང་ཁྱེར་གྱིས་བོད་དུ་ཁ་གཏད་རོགས་སྐྱོར་གྱི་ལས་དོན་སྒྲུབ་རིང་དོན་དངོས་དང་། བྱ་བཟང་། དོན་ཆེན་བཅས་མང་དག་སྒྲུབ་རོགས་བྱས་པ་བོད་མི་དམངས་ཀྱིས་ནམ་ཡང་བརྗེད་མི་སྲིད་ཅེས་གསུངས་པ་དང་འབྲེལ་ཐེན་ཅིན་གྲོང་ཁྱེར་གྱིས་བོད་དུ་ཁ་གཏད་རོགས་སྐྱོར་བྱ་ཤུགས་སྔར་བས་ཆེ་རུ་བཏང་སྟེ་བོད་ཀྱི་འཕེལ་རྒྱས་དང་བརྟན་ལྷིང་གི་བྱ་གཞག་ཁག་ལ་མུ་མཐུད་དོ་ཁུར་དང་རྒྱབ་སྐྱོར་གནང་རྒྱུའི་ཐུགས་རེ་གནང་བ་རེད།
ཀྲང་ཅུན་ཧྥང་གིས་ད་རེས་བོད་དུ་བརྟག་ཞིབ་བྱས་པའི་འབྲེལ་ཡོད་གནས་ཚུལ་ངོ་སྤྲོད་སྟབས་བདེ་ཞུས་ཤིང་། ཁོང་གིས་ཉིན་ཤས་ནང་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གཡུར་ཟའི་གྲུབ་འབྲས་ཐོབ་པ་མཐོང་བ་དང་། བོད་ཀྱི་མི་རིགས་ཁག་གི་མི་དམངས་བབ་ཆགས་པོ་ཡོད་པ་མྱོང་ཚོར་བྱུང་བ། གངས་ལྗོངས་ས་མཐོའི་མཛེས་སྡུག་ལྡན་པའི་ཡུལ་ལྗོངས་ཉམས་སུ་མྱོང་ཐུབ་པ་བཅས་བྱུང་ནས་སྐུལ་ལྕག་ཚད་མེད་ཐེབས་བྱུང་། ཁ་གཏད་བོད་སྐྱོར་ལས་དོན་ཡག་པོ་བསྒྲུབ་རྒྱུ་ནི་གཞན་ལ་དཀྲི་ཐབས་མེད་པའི་འགན་འཁྲི་ཞིག་ཡིན་པར་བརྟེན་ཐེན་ཅིན་གྲོང་ཁྱེར་གྱིས་ཏང་དང་རྒྱལ་ཁབ་ལས་དོན་གྱི་ཁྱོན་ཡོངས་ཀྱི་མཐོ་ཚད་ཐོག་ལངས་ཏེ་འགན་འཁྲི་འཁུར་སེམས་དང་ལས་འགན་སྒྲུབ་སེམས་སྔར་བས་ཆེ་རུ་བཏང་ནས་ཁ་གཏད་བོད་སྐྱོར་ལས་དོན་སྒྲུབ་ཤུགས་དེ་བས་ཆེ་རུ་བཏང་ཐོག་བོད་ཀྱི་དཔལ་འབྱོར་དང་སྤྱི་ཚོགས་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཆེད་འབུལ་འོས་པའི་ལེགས་སྐྱེས་ཕུལ་རྒྱུ་ཡིན་ཞེས་གསུངས་པ་རེད།