ཟླ་7ཚེས་4ཉིན་གྱི་སྔ་དྲོ་ལྗོངས་བརྟན་ལྷིང་སྲུང་སྐྱོང་བཀོད་འདོམས་པུས་ཆེད་དོན་ཚོགས་འདུ་འཚོགས་ནས་ཉེ་དུས་ཀྱི་བརྟན་ལྷིང་སྲུང་སྐྱོང་ལས་དོན་བཀོད་སྒྲིག་བྱས་པ་རེད།
ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། ལྗོངས་བརྟན་ལྷིང་སྲུང་སྐྱོང་བཀོད་འདོམས་པུའི་རྒྱུན་ལས་བཀོད་འདོམས་པ་གཞོན་པ་བཅས་ཡིན་པའི་བློ་བཟང་རྒྱལ་མཚན་གྱིས་ཚོགས་འདུ་གཙོ་སྐྱོང་གནང་བ་དང་སྦྲགས་གསུང་བཤད་ཀྱང་གནང་བ་དང་། ལྗོངས་ཏང་ཨུད་ཀྱི་རྒྱུན་ཨུ་དང་། ལྷ་ས་གྲོང་ཨུད་ཀྱི་ཧྲུའུ་ཅི། ལྗོངས་བརྟན་ལྷིང་སྲུང་སྐྱོང་བཀོད་འདོམས་པུའི་བཀོད་འདོམས་པ་གཞོན་པ་བཅས་ཡིན་པའི་ཆེ་དགྲ་ལྷ་ཚོགས་འདུར་ཕེབས་ཡོད་པ་རེད།
འབྲེལ་ཡོད་སྡེ་ཚན་གྱི་སྙན་ཞུ་གསན་རྗེས་བློ་བཟང་རྒྱལ་མཚན་གྱིས་རང་ལྗོངས་ཀྱི་འཛུགས་སྐྲུན་ལས་དོན་ཁག་དང་ཡོངས་བསྒྲགས་རྒྱུགས་བསྡུའི་ལས་དོན་ཁྱོན་ཡོངས་ནས་སྤེལ་འགོ་ཚུགས་པ་དང་། དབྱར་རྩྭ་དགུན་འབུ་ཉོ་ཚོང་བྱེད་མང་ཤོས་ཀྱི་དུས་ཤར་འགོ་ཚུགས་པ། དབྱར་དུས་སུ་ཡུལ་སྐོར་དུ་ཡོང་མཁན་མང་ཤོས་ཀྱི་དུས་ཚིགས་ཤར་འགོ་ཚུགས་པ་བཅས་དང་སྦྲགས་རང་ལྗོངས་སུ་ཁེ་ཕན་གྱི་འགལ་ཟླ་ཐོན་མང་ཤོས་དང་མི་འབོར་འགྲོ་རྒྱུག་བྱེད་མང་ཤོས་ཀྱི་དུས་ཚིགས་ཤར་ནས་སྤྱི་པའི་བདེ་འཇགས་ལ་སྲུང་སྐྱོང་བྱ་རྒྱུ་དང་། སྤྱི་ཚོགས་དོ་དམ་ལ་ཤུགས་སྣོན་རྒྱག་རྒྱུ། སྤྱི་ཚོགས་བརྟན་ལྷིང་ལ་འགན་ལེན་བྱ་རྒྱུ་བཅས་ཀྱི་ལས་འགན་སྔར་བས་ལྕི་རུ་སོང་ཡོད་ཅེས་བསྟན་གནང་བ་རེད།
བློ་བཟང་རྒྱལ་མཚན་གྱིས་མིག་སྔའི་རང་ལྗོངས་སུ་བརྟན་ལྷིང་གི་གནོན་ཤུགས་ཧ་ཅང་ཆེ་བ་དང་དུས་བབ་སྔར་བཞིན་ཛ་དྲག་པོ་ཡོད། དེས་ན་རིམ་ཁག་བརྟན་ལྷིང་སྲུང་སྐྱོང་ཚན་ཁག་དང་ཕྱོགས་ཁག་གི་བརྟན་ལྷིང་སྲུང་སྐྱོང་སྟོབས་ཤུགས་ཀྱིས་ཉེ་ཆར་ཀྲུང་དབྱང་འགོ་ཁྲིད་བློ་མཐུན་གྱིས་གནང་བའི་གལ་ཆེའི་མཆན་འགོད་མཛུབ་སྟོན་རབ་དང་རིམ་པ་དང་ཧྲུའུ་ཅི་ཁྲེན་ཆོན་གོ་དང་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་རྣམ་གཉིས་ཀྱིས་གནང་བའི་གསུང་བཤད་གལ་ཆེན་གྱི་དགོངས་དོན་ལག་བསྟར་དོན་འཁྱོལ་མཐའ་གཅིག་ཏུ་བྱེད་པ་དང་ཆབས་ཅིག་ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་ཉི་ཤུ་པ་དང་ལྗོངས་བརྟན་ལྷིང་སྲུང་སྐྱོང་བཀོད་འདོམས་པུའི་ཚང་འཛོམས་གྲོས་ཚོགས་ཐེངས་བཅུ་གཅིག་པའི་བཀོད་སྒྲིག་དང་བླང་བྱ་གཞིར་བཟུང་སྔར་བས་སྟོབས་ཤུགས་གཅིག་ཏུ་སྒྲིལ་བ་དང་། བྱེད་ཤུགས་ཆེ་རུ་གཏོང་བ། བྱེད་ཐབས་དོན་འཁྱོལ་བྱེད་པ། འགན་འཁྲི་ནན་དུ་གཏོང་བ་བཅས་ཀྱི་ཐོག་ནས་སྤྱི་ཚོགས་ཞི་མཐུན་བརྟན་ལྷིང་ཡོང་རྒྱུ་ནུས་ཤུགས་ཡོད་རྒུས་འགན་ལེན་བྱེད་དགོས་ཞེས་ནན་བཤད་གནང་བ་རེད།
བློ་བཟང་རྒྱལ་མཚན་གྱིས་རིམ་ཁག་བརྟན་ལྷིང་སྲུང་སྐྱོང་ཚན་ཁག་དང་བརྟན་ལྷིང་སྲུང་སྐྱོང་སྟོབས་ཤུགས་ཁག་གིས་སྔོན་འགོག་ནན་ཏན་བྱེད་པའི་འདུ་ཤེས་བརྟན་པོ་འཛུགས་པ་དང་། ལྷོད་གཡེང་དང་སྒྱིད་ལུག་ལེ་ལོའི་བསམ་བློ་མཐའ་གཅིག་ཏུ་ཁྱད་བསད་བྱེད་པ། ཐོག་མཐའ་བར་གསུམ་དུ་གཟབ་ནན་ཆེ་བ་དང་དགྲ་ཆེན་ཐོན་གྲབས་ཡོད་པ་ལྟ་བུའི་དམག་གྲབས་ཨང་བསར་བྱེད་པའི་རྣམ་པ་རྒྱུན་འཁྱོངས་བཅས་ཀྱི་ཐོག་ནས་སྔོན་འགོག་ནན་ཏན་དང་འཕྱུགས་པ་གཏན་ནས་མེད་པ་བྱེད་དགོས་པ་དང་། སྔོན་འགོག་ཚོད་འཛིན་གྱི་བྱ་ཐབས་ཁག་དོན་འཁྱོལ་ནན་ཏན་བྱས་ཏེ་གཙོ་གནད་དུ་གྱུར་པའི་གནས་ཀྱི་དོ་དམ་ཚོད་འཛིན་ལ་ཤུགས་སྣོན་རྒྱག་པ་དང་ལྷག་པར་དུ་མི་འདུ་ཚོགས་ཆེ་ས་དང་ཡུལ་སྐོར་གནས་གཙོ་བོའི་བདེ་འཇགས་ཞིབ་བཤེར་གྱི་བྱ་ཐབས་དོན་འཁྱོལ་ནན་པོ་བྱས་ནས་ཐོལ་བྱུང་དོན་རྐྱེན་འཕྲལ་སྡོམ་གྱི་གྲ་སྒྲིག་ཡག་པོ་བྱེད་པ་དང་ཐོལ་བྱུང་དོན་རྐྱེན་ཐག་གཅོད་བྱེད་པའི་སྔོན་ཇུས་ཞིབ་ཚགས་དང་འཐུས་ཚང་དུ་གཏོང་དགོས་པ། རྡུང་རྡེག་བཅོས་སྒྲིག་གི་ཆེད་དོན་བྱ་སྤྱོད་སྤེལ་བའི་ཕན་ཡོད་གོ་སྐབས་དམ་འཛིན་ལེགས་པོ་བྱས་ཏེ་སྤྱི་ཚོགས་བདེ་འཇགས་ཕྱོགས་བསྡུས་བཅོས་སྐྱོང་ལ་སྐུལ་འདེད་གཏིང་ཟབ་གཏོང་བ་དང་། ཕྱོགས་མིའི་ཞབས་ཞུ་དང་དོ་དམ་ལ་ཤུགས་སྣོན་ཏན་ཏིག་རྒྱག་པ། ཁྲིམས་འགལ་རྩ་འཛུགས་དང་། ནག་ཚོགས་སྟོབས་ཤུགས། རུས་རྒྱུད་སྟོབས་ཤུགས། ཪྙིང་གསོའི་སྟོབས་ཤུགས་བཅས་ལ་རྡུང་རྡེག་ནན་པོ་གཏོང་བ། སྤྱི་ཚོགས་ཀྱི་བརྟན་ལྷིང་ལ་ཤུགས་རྐྱེན་བཟོ་བའི་མངོན་མེད་རྐྱེན་ངན་ཐག་གཅོད་ནུས་ལྡན་བྱེད་པ། ཏཱ་ལའི་རུ་ཚོགས་ཀྱིས་ལྗོངས་ནང་ཁུལ་དུ་ཁ་ཕྲལ་གཏོར་བཤིག་གི་བྱེད་སྤྱོད་སྤེལ་བའི་ཐོན་ཁུངས་དང་། རྨང་གཞི། ཆ་རྐྱེན་སོགས་མེད་པར་བཟོ་བ་བཅས་ཀྱི་ཐོག་ནས་སྤྱི་ཚོགས་ཀྱི་ཁོར་ཡུག་ལེགས་སུ་གཏོང་བ་དང་བརྟན་ལྷིང་སྲུང་སྐྱོང་གི་རྨང་གཞི་བརྟན་པོ་འཛུགས་དགོས་པ། བརྟན་ལྷིང་སྲུང་སྐྱོང་གི་འགན་འཁྲི་དོན་འཁྱོལ་ནན་ཏན་བྱས་ཏེ་སྔོན་འགོག་ཚོད་འཛིན་གྱི་བྱ་ཐབས་ཁག་སླར་ཡང་བཀོད་འདོམས་དང་། སླར་ཡང་ཞིབ་བཤེར། སླར་ཡང་དོན་འཁྱོལ་བྱེད་པ་དང་། སྒྲིག་ཁྲིམས་ནན་པོའི་ཐོག་ནས་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ཁག་ཇི་མ་ཇི་བཞིན་གཞི་རིམ་དང་། འཐབ་ས་དང་པོ། མི་ཐོག་བཅས་ལ་དོན་འཁྱོལ་བྱས་ནས “མི་ཐོན་པ་གསུམ ”གྱི་དམིགས་ཚད་བསྒྲུབ་དགོས་པ། བརྟན་ལྷིང་སྲུང་སྐྱོང་གི་སྒྲིག་ཁྲིམས་ནན་པོ་སྲུང་བ་དང་འགན་འཁྲི་བདའ་འདེད་ནན་པོ་གཏོང་བ་དང་། ལས་གནས་མི་སྲུང་བ་དང་། འགན་འཁྲི་མི་འཁུར་བ། འགན་ཤོར་ལས་འཛོལ་བྱུང་བ། ལས་ཀ་དོན་ཐོག་ཏུ་མི་འཁྱོལ་བ། བྱ་ཐབས་གནད་ལ་མི་འཁེལ་བ་སོགས་བརྟན་ལྷིང་སྲུང་སྐྱོང་ཐད་ལྷག་པའི་གནད་དོན་ཐག་གཅོད་ནན་པོ་བྱས་ཏེ་གཟེངས་སུ་ཐོན་པའི་གྲུབ་འབྲས་ཀྱི་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་པའི་བླང་བྱ་བཏོན་པ་རེད།