ཟླ་7ཚེས་3ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་སྲིད་གཞུང་གི་རྒྱུན་ལས་ཚོགས་འདུ་ཐེངས་བཅུ་གཅིག་པ་གཙོ་སྐྱོང་དང་སྐོང་ཚོགས་གནང་ནས་འབྲེལ་ཡོད་ལས་རིགས་ཀྱི “ལོ་ལྔ་ཚན་བཅུ་གཉིས་པའི ”འཆར་འགོད་ལ་གྲོས་ཞིབ་གནང་བ་རེད། ཚོགས་འདུའི་ཐོག་ལས་རིགས་ཁག་ལ “ལོ་ལྔ་ཚན་བཅུ་གཉིས་པའི ”རིང་གི་འཆར་འགོད་མགྱོགས་མྱུར་བཟོས་ནས་བཏོན་ཏེ “ལོ་ལྔ་ཚན་བཅུ་གཉིས་པའི ”རིང་གི་ལྗོངས་ཡོངས་ཀྱི་དཔལ་འབྱོར་མཆོང་སྐྱོད་ལྟ་བུའི་འཕེལ་རྒྱས་དང་སྤྱི་ཚོགས་ཡུན་རིང་བདེ་འཁོད་ལ་སྐུལ་མ་ཧུར་ཐག་གཏོང་དགོས་པའི་ནན་བཤད་གནང་བ་རེད།

    པད་མ་འཕྲིན་ལས་ཀྱིས་ཚོགས་འདུའི་ཐོག་འདི་ལོ་ནི “ལོ་ལྔ་ཚན་བཅུ་གཉིས་པའི ”འཆར་འགོད་སྔ་འཛིན་ཕྱི་གཏོད་ཀྱི་གལ་ཆེའི་ལོ་ཞིག་ཡིན་པས་རང་རེའི་ཏང་གིས་ཚོགས་ཆེན་བཅོ་བརྒྱད་པ་འཚོག་རྒྱུ་ཡིན་སྟབས་འདི་ལོའི་སྒྱུར་བཅོས་དང་། འཕེལ་རྒྱས། བརྟན་ལྷིང་བཅས་ཀྱི་ལས་དོན་ཁག་ཡག་པོ་སྒྲུབ་པའི་དོན་སྙིང་ཧ་ཅང་གལ་ཆེན་པོ་ལྡན་ཡོད། ན་ནིང་ཟླ་7པའི་ཚེས་6ཉིན་རྒྱལ་སྲིད་སྤྱི་ཁྱབ་ཁང་གིས་བོད་ཀྱི “ལོ་ལྔ་ཚན་བཅུ་གཉིས་པའི ”རིང་གི་གཙོ་གནད་རྣམ་གྲངས་འཆར་འགོད་ལ་ཆོག་མཆན་དངོས་སུ་སྤྲད་དེ་རང་ལྗོངས་ཀྱི “ལོ་ལྔ་ཚན་བཅུ་གཉིས་པའི ”རིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་སྒུལ་ཤུགས་སྤྲད་ཡོད། རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་ཁག་དང་ལྷག་དོན་དུ “ལོ་ལྔ་ཚན་བཅུ་གཉིས་པའི ”འཆར་འགོད་བཟོས་མ་ཚར་བའི་སྡེ་ཚན་གྱིས་ཚན་རིག་དང་མཐུན་པའི་འཕེལ་རྒྱས་བརྗོད་བྱ་གཙོ་བོར་བྱེད་པ་དང་དཔལ་འབྱོར་འཕེལ་རྒྱས་གཏོང་སྟངས་བསྒྱུར་མགྱོགས་སུ་གཏོང་བའི་བརྗོད་དོན་གཙོ་རྐང་དུ་བྱས་ཏེ་རང་སྐྱོང་ལྗོངས་ཀྱི་ཏང་གི་འཐུས་མི་ཚོགས་ཆེན་ཐེངས་བརྒྱད་པའི་འཐབ་ཇུས་བཀོད་སྒྲིག་ལ་གཞིགས་ནས་འཕེལ་རྒྱས་ཀྱི་གོ་སྐབས་གཅེས་སྤྲས་དང “བརྟན་པོའི་ཁྲོད་མྱུར་པོ་ཡོང་བ་བྱེད་པའི ”ལས་ཀའི་སྤྱིའི་བླང་བྱ་ཁོང་དུ་ནན་པོ་ཆུད་པ་བྱེད་པ་དང་། དུས་ཚོད་དམ་འཛིན། སྟོབས་ཤུགས་སྒྲིག་འཛུགས་བཅས་ཀྱིས་ལས་རིགས་དེ་གའི “ལོ་ལྔ་ཚན་བཅུ་གཉིས་པའི ”འཆར་འགོད་མགྱོགས་མྱུར་བཟོས་ནས་བཏོན་ཏེ་ལས་རིགས་ལེགས་ལ་མྱུར་བའི་སྒོ་ནས་འཕེལ་རྒྱས་ཆེན་པོ་ཡོང་རྒྱུར་མཛུབ་ཁྲིད་བྱེད་པ་དང་། གཙོ་གནད་རྣམ་གྲངས་འཛུགས་སྐྲུན་ལ་དམ་འཛིན་ཏན་ཏིག་བྱས་ཏེ་ཧྲུའུ་ཅི་ཁྲེན་ཆོན་གོས་བཏོན་གནང་བའི “དུས་འགོར་དམ་འཛིན་དང་། སྡེ་ཚན་ཁག་དང་མཐུན་སྦྱོར་བྱེད་པའི་ལས་དོན་ལ་དམ་འཛིན། འཛུགས་སྐྲུན་ལ་དམ་འཛིན། དོ་དམ་ལ་དམ་འཛིན། ཁོར་ཡུག་ལ་དམ་འཛིན ”བཅས་ཀྱི་བླང་བྱ་གཞིར་བཟུང་རྣམ་གྲངས་ལ་ཞིབ་དཔྱད་དང་རིགས་པས་ཁུངས་སྐྱེལ་ཡག་པོ་བྱས་ཏེ་དུས་འགོའི་ལས་དོན་ཏན་ཏིག་ངང་ཡག་པོ་སྒྲུབ་ཐོག་རྒྱལ་ཁབ་འབྲེལ་ཡོད་སྡེ་ཚན་དང་འབྲེལ་བ་དང་མཐུན་སྦྱོར་དང་སྙན་ཞུ་འབུལ་རྒྱུར་སྔར་བས་ཤུགས་སྣོན་བརྒྱབ་སྟེ་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་ཐོག་གཏན་འཁེལ་བྱས་པའི་སྲིད་ཇུས་ཀྱི་བྱ་ཐབས་ཁག་དང “ལོ་ལྔ་ཚན་བཅུ་གཉིས་པའི ”འཆར་འགོད་ཀྱི་རྣམ་གྲངས་མ་དངུལ་དམིགས་སར་འབྱོར་བ་བྱས་ནས་ལོ་འདིའི་ནང་རྣམ་གྲངས་དེ་བས་མང་བ་ལས་འགོ་བཙུགས་ནས་འཛུགས་སྐྲུན་ཐུབ་པ་བྱེད་པ། བོད་སྐྱོར་ཞིང་ཆེན་དང་གྲོང་ཁྱེར་དང་ཀྲུང་དབྱང་རྐང་འཛིན་ཁེ་ལས་དང་འབྲེལ་མཐུད་དང་མཐུན་སྦྱོར་བྱས་ཏེ་བོད་སྐྱོར་མ་དངུལ་དང་རྣམ་གྲངས་དོན་འཁྱོལ་ནུས་ལྡན་ཡོང་བའི་འགན་ལེན་བྱས་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཕུལ་བྱུང་གྲུབ་འབྲས་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་སྐོང་ཚོགས་བྱ་རྒྱུར་བསུ་བ་ཞུ་རྒྱུའི་རེ་བ་ཡོད་ཅེས་ནན་བཤད་གནང་བ་རེད། ཚོགས་འདུའི་ཐོག་ད་དུང་དོན་དག་གཞན་ཞིབ་འཇུག་བྱས་པ་རེད།