བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། དུས་ཡུན་ཟླ་བ་གཅིག་གི “ས་ག་ཟླ་བའི ”ཆོས་ལུགས་བྱེད་སྒོ་ཟླ་6ཚེས་19ཉིན་བདེ་བླག་ངང་མཇུག་འགྲིལ་བ་རེད། ཚེས་19ཉིན་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་རང་སྐྱོང་ལྗོངས་བརྟན་ལྷིང་སྲུང་སྐྱོང་ལས་དོན་བཀོད་འདོམས་པུའི་སྤྱི་ཁྱབ་བཀོད་འདོམས་པ་ཧའོ་ཕུང་གིས་བརྟན་ལྷིང་སྲུང་སྐྱོང་བཀོད་འདོམས་པུའི་ཚོགས་འདུ་འཚོགས་ནས་ཉེ་དུས་རང་སྐྱོང་ལྗོངས་ཀྱི་བརྟན་ལྷིང་སྲུང་སྐྱོང་ལས་དོན་ལ་ཕྱོགས་སྡོམ་དང་ཕྱིར་དྲན་བྱས་ཏེ་དུས་མཚམས་རྗེས་མའི་བརྟན་ལྷིང་སྲུང་སྐྱོང་ལས་དོན་བཀོད་སྒྲིག་གནང་བ་དང་འབྲེལ་ས་གནས་ས་ཐོག་ཏུ་ལྷ་ས་གྲོང་ཁྱེར་གྱི་གཙོ་གནད་ས་ཁོངས་ཀྱི་བདེ་འཇགས་སྔོན་འགོག་བྱ་ཐབས་དོན་འཁྱོལ་བྱས་ཚུལ་ལ་ཞིབ་བཤེར་གནང་ཞིང་། ཁོང་གིས་ལྗོངས་ཡོངས་ཀྱི་རིམ་ཁག་ཏང་སྲིད་རྩ་འཛུགས་དང་ཕྱོགས་ཁག་གི་བརྟན་ལྷིང་སྲུང་སྐྱོང་སྟོབས་ཤུགས་ཀྱིས་ཐོག་མཐའ་བར་གསུམ་དུ་བརྟན་ལྷིང་ནི་ཐམས་ཅད་ལས་ལྷག་པའི་བསམ་བློ་མཐའ་འཁྱོངས་བྱ་རྒྱུར་གཡོ་འགུལ་མ་ཐེབས་པ་བྱས་ནས་བརྟན་ལྷིང་སྲུང་སྐྱོང་ལས་དོན་ཁག་ལ་སྐུལ་འདེད་ཏན་ཏིག་བཏང་སྟེ་སྤྱི་ཚོགས་ཞི་མཐུན་བརྟན་ལྷིང་ལ་ནུས་ཤུགས་ཡོད་རྒུས་སྲུང་སྐྱོང་བྱེད་དགོས་པའི་ནན་བཤད་གནང་བ་རེད།

    རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷ་དང་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཏེང་ཞའོ་ཀང་གིས་ཕེབས་རོགས་ཞུས་པ་རེད།

    འདི་ལོའི “ས་ག་ཟླ་བའི ”ཆོས་ལུགས་བྱེད་སྒོ་སྤེལ་ཚུན་བར་སྐོར་དང་། རྩེ་སྐོར། གླིང་སྐོར་ལམ་སོགས་སུ་བསང་གི་དུ་བ་ལང་ལོང་དུ་འཕྱུར་བ་དང་མི་ཧ་ཅང་མང་པོ་ཡོད་ཅིང་། དད་ལྡན་མང་ཚོགས་ཚོས་སྲོལ་རྒྱུན་གྱི་གོམས་གཤིས་ལྟར་སྐོར་བ་རྒྱག་པ་དང་སྨོན་ལམ་འདེབས་ཀྱི་ཡོད་པ་རེད། དུས་ཡུན་ཟླ་བ་གཅིག་གི་དུས་ཚོད་ནང་སྐོར་བ་རྒྱག་པའི་ལམ་བར་དུ་དམངས་ཕན་ཉེས་རྟོག་ཞབས་ཞུ་ས་ཚིགས་དང་ལས་སྒྲུབ་དཔོན་དམག་ཞབས་ཞུ་ས་ཚིགས་ཀྱིས་དད་ལྡན་མང་ཚོགས་ལ་ངལ་གསོ་རྒྱག་ས་དང་། རིན་མེད་ཆུ། སྨན་བཅོས་ཞབས་ཞུ་བཅས་མཁོ་འདོན་བྱས་པ་དང་འགྲིམ་འགྲུལ་དོ་དམ་སྡེ་ཚན་གྱིས་ཀྱང་མི་ཚོགས་དང་རླངས་འཁོར་འདུས་སྡོད་ཆེ་བའི་སྐོར་ལམ་གྱི་ལམ་ཁར་བདེ་འཇགས་སྐུད་པ་འཁྲིད་དེ་མི་ཚོགས་འཕྲལ་དུ་བཤངས་ནས་སྐོར་བ་རྒྱག་མཁན་མང་ཚོགས་ཀྱི་བདེ་འཇགས་འགན་སྲུང་བྱས་ཐོག “ས་ག་ཟླ་བའི ”ཆོས་ལུགས་བྱེད་སྒོ་བདེ་འཇགས་དང་གོ་རིམ་ལྡན་པའི་སྒོ་ནས་སྤེལ་རྒྱུར་འགན་ལེན་བྱུང་བས་དད་ལྡན་མང་ཚོགས་ཀྱི་གདེང་འཇོག་ཡག་པོ་ཐོབ་པ་རེད།

    ཚེས་19ཉིན་གྱི་སྔ་དྲོ་ཧའོ་ཕུང་གིས་རང་སྐྱོང་ལྗོངས་བརྟན་ལྷིང་སྲུང་སྐྱོང་བཀོད་འདོམས་པུའི་ཚོགས་འདུ་གཙོ་སྐྱོང་གནང་ཞིང་། ཁོང་གིས་ཉེ་དུས་རང་སྐྱོང་ལྗོངས་ཏང་ཨུད་ཀྱི་སྲ་ཞིང་བརྟན་པའི་འགོ་ཁྲིད་འོག་ལྗོངས་ཡོངས་ཀྱི་ཏང་སྲིད་དམག་ཉེན་དམངས་བཅས་ཀྱི་བསམ་བློ་ཚད་མཐོའི་གཅིག་གྱུར་བྱུང་བ་དང་བྱ་སྤྱོད་མཐུན་སྦྱོར་གཅིག་གྱུར་བྱུང་ནས “ས་ག་ཟླ་བའི ”ཆོས་ལུགས་བྱེད་སྒོའི་བདེ་སྲུང་ལས་དོན་ཁག་ཕུན་སུམ་ཚོགས་པོས་ལེགས་གྲུབ་བྱུང་ནས་ལྗོངས་ཡོངས་ཀྱི་སྤྱི་ཚོགས་ཞི་མཐུན་བརྟན་ལྷིང་ལ་སྲུང་སྐྱོང་ནུས་ལྡན་བྱས་ཡོད། གྲུབ་འབྲས་དེ་དག་ཐོབ་པ་ནི་བོད་ཀྱི་ལས་དོན་སྐོར་གྱི་ཀྲུང་དབྱང་གི་མཛུབ་ཁྲིད་བསམ་བློ་མི་སེམས་སུ་ཟུག་པ་དང་མི་རིགས་ཁག་གི་མང་ཚོགས་ཀྱི་སེམས་པ་ཏང་དང་མེས་རྒྱལ་ལ་ཕྱོགས་པ་ལས་བྱུང་བ་ཞིག་དང་ལྗོངས་ཏང་ཨུད་ཀྱི་བརྟན་ལྷིང་སྲུང་སྐྱོང་ལས་དོན་གྱི་བྱ་ཐབས་ཁག་གནད་ལ་འཁེལ་བ་དང་ལྗོངས་ཡོངས་ཀྱི་གོང་འོག་ཚང་མས་ཕྱར་བ་གྲུ་འདེགས་དང་ཐུན་མོང་ཐོག་བདེ་འཇགས་སྲུང་སྐྱོང་བྱས་པ་ལས་བྱུང་བ་ཞིག་རེད་ཅེས་བསྟན་གནང་བ་དང་ཁོང་གིས་དེང་སྐབས་རང་ལྗོངས་ཀྱི་སྤྱི་ཚོགས་ཀྱི་དུས་བབ་སྤྱི་ཡོངས་ནས་བརྟན་པོ་ཡོད་མོད། འོན་ཀྱང་སྔར་བཞིན་ཪྙོག་འཛིང་ཆེ་ལ་ཛ་དྲག་པའི་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་དུས་བབ་ཁྲོད་ཐོག་མཐའ་བར་གསུམ་དུ་ཚད་མཐོའི་དོགས་ཟོན་བྱེད་དགོས་པ་དང་དུས་དང་རྣམ་པ་ཀུན་དུ་བརྟན་ལྷིང་སྲུང་སྐྱོང་གི་རྩ་བ་དེ་དམ་པོར་འཛིན་ནས་ཏང་དང་མི་དམངས་ཀྱི་བྱ་གཞག་ལ་ཚད་མཐོའི་འགན་འཁུར་བའི་རྣམ་འགྱུར་གྱི་ཐོག་ནས་བརྟན་ལྷིང་ནི་ཐམས་ཅད་ལས་ལྷག་པའི་བསམ་བློ་མཐའ་འཁྱོངས་བྱ་རྒྱུར་གཡོ་འགུལ་མི་ཐེབས་པ་བྱས་ནས་རང་སྐྱོང་ལྗོངས་ཏང་ཨུད་ཀྱི་སྔོན་གཏན་འཁེལ་བའི་བཀོད་སྒྲིག་གཞིར་བཟུང་ཉེ་དུས་བརྟན་ལྷིང་སྲུང་སྐྱོང་ལས་དོན་ཡག་པོ་བསྒྲུབ་རྒྱུའི་སྐོར་གྱི་ཧྲུའུ་ཅི་ཁྲེན་ཆོན་གོའི་མཆན་འགོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་ཀྱིས་གཙོ་གནད་མངོན་གསལ་དོད་པོ་ཡོང་བ་བྱེད་པ་དང་དོན་འཁྱོལ་དམ་འཛིན་བྱས་ཏེ་བརྟན་ལྷིང་སྲུང་སྐྱོང་གི་ལས་དོན་ཁག་ཏན་ཏིག་ངང་བསྒྲུབས་ནས་བོད་ཀྱི་ཞི་མཐུན་བརྟན་ལྷིང་གི་ཕུལ་བྱུང་གྲུབ་འབྲས་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་པའི་ནན་བཤད་གནང་བ་རེད།

    ཚེས་19ཉིན་གྱི་དགོང་མོ་ཧའོ་ཕུང་དང་བཅས་པས་ཆར་པར་མ་འཛེམས་པར་གཙུག་ལག་ཁང་གི་ཐང་ཆེན་དང་པོ་ཏ་ལའི་ཐང་ཆེན་སོགས་སུ་ཕེབས་ཏེ་བདེ་འཇགས་དོགས་ཟོན་དང་འབྲེལ་བའི་བྱ་ཐབས་དོན་འཁྱོལ་བྱས་ཚུལ་ལ་ཞིབ་བཤེར་དང་མཛུབ་ཁྲིད་གནང་ཐོག་མཉམ་འགོག་མི་སྣར་བྱམས་བརྩེའི་ངང་གཟིགས་ནས་རྒྱབ་ཕྱོགས་མཁོ་སྒྲུབ་འགན་ལེན་གྱི་ལས་ཀ་གནད་ལ་འཁེལ་ཡོད་མེད་མཁྱེན་རྟོགས་གནང་བ་རེད། ཁོང་གིས་རང་སྐྱོང་ལྗོངས་ཏང་ཨུད་དང་བརྟན་ལྷིང་སྲུང་སྐྱོང་བཀོད་འདོམས་པུའི་ཚབ་གནང་ནས་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུས་པ་དང་སྦྲགས་བླ་ན་མེད་པའི་གུས་འདུད་ཀྱང་ཞུས་པ་རེད།

    ཧའོ་ཕུང་དང་བཅས་པ་ད་དུང་ཉང་བྲན་ལམ་དང་གླིང་སྐོར་ལམ་གྱི་ལམ་མདོར་ཕེབས་ནས་ལྷ་ས་གྲོང་ཁྱེར་གྱི་དམངས་ཕན་ཤར་བགྲོད་ལས་གྲྭ་འཛུགས་སྐྲུན་བྱེད་ཚུལ་ལ་གཟིགས་ཞིབ་གནང་བ་རེད། འབྲེལ་ཡོད་འགན་འཁུར་བས་ལམ་མདོ་འདི་གྲོང་ཁྱེར་གྱི་ལྟེ་བར་གནས་ཡོད་པས་མི་དང་རླངས་འཁོར་འགྲོ་འོང་མང་བའི་དབང་གིས་རྒྱུན་དུ་འགྲིམ་འགྲུལ་འགག་པ་དང་བདེ་འཇགས་ཀྱི་མི་མངོན་པའི་རྐྱེན་ངན་མངོན་གསལ་དོད་ཙམ་ཡོད། འདིར་མི་བགྲོད་སྤྲིན་ཟམ་བསྐྲུན་ན་མི་དང་འཁོར་རིགས་ལོགས་སུ་འགྲོ་ཐུབ་ནས་གྲོང་ཁྱེར་གྱི་སྤྱི་པའི་འགྲིམ་འགྲུལ་གྱི་གནོན་ཤུགས་ཆུང་དུ་འགྲོ་རྒྱུ་རེད་ཅེས་པའི་ངོ་སྤྲོད་གསན་རྗེས་ཧའོ་ཕུང་ཐུགས་ཡིད་ཚིམས་བཞིན་དུ་ཁོང་གིས་དམངས་ཕན་མི་བགྲོད་སྤྲིན་ཟམ་བསྐྲུན་པ་ལས་གྲོང་མི་དང་འགྲུལ་པ་འགྲོ་འོང་བྱེད་པར་སྔར་བས་སྟབས་བདེ་རུ་འགྲོ་རྒྱུ་དང་ཆོས་དད་མང་ཚོགས་ཚོ་སྐོར་བར་འགྲོ་སྐབས་བདེ་འཇགས་དང་སྟབས་བདེ་ཡོང་གི་རེད། ལྷ་ས་གྲོང་ཁྱེར་གྱི་འགྲིམ་འགྲུལ་ཁོར་ཡུག་ལེགས་སུ་གཏོང་བའི་བྱ་ཐབས་ནུས་ལྡན་ཞིག་ཡིན་པ་མ་ཟད་ཏང་གི་ཆོས་དད་རང་མོས་ཀྱི་སྲིད་ཇུས་ལག་བསྟར་དོན་འཁྱོལ་གྱི་ཞིབ་ཕྲའི་བྱ་སྤྱོད་ཅིག་ཀྱང་རེད་ཅེས་དང་མཇུག་ཏུ་ཁོང་གིས་འཛུགས་སྐྲུན་ཚན་པ་དང་ཨར་ལས་ཚན་པ་དང་དེ་བཞིན་ལྟ་སྐུལ་དོ་དམ་ཚན་པ་བཅས་ཀྱིས་དོ་དམ་ནན་པོ་དང་ཨར་ལས་ཞིབ་ཚགས་བྱེད་དགོས་པ་དང་འཛུགས་སྐྲུན་བྱེད་སྐབས་བོད་ལུགས་ཀྱི་སྲོལ་རྒྱུན་ཉམས་འགྱུར་དོད་པོ་ཡོང་བ་བྱས་ཐོག་ཕོ་བྲང་པོ་ཏ་ལའི་མཛེས་ལྗོངས་ཁུལ་གྱི་ཁྱད་ཆོས་དང་གཅིག་གྱུར་ཡོང་བ་བྱས་ཏེ་དམངས་སེམས་འདུ་འགོད་དེ་ཉིད་འཛུགས་སྐྲུན་ལེགས་པོ་བྱས་ནས་མི་རིགས་ཁག་གི་མི་དམངས་བློ་ཡིད་ཚིམ་པ་བྱེད་དགོས་པའི་བླང་བྱ་བཏོན་གནང་བ་རེད།

    རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་དང་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་གི་མངགས་བཅོལ་ལྟར་ཚེས་19ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཏེང་ཞའོ་ཀང་གིས་ལྗོངས་ཡོངས་ཀྱི་བརྟན་ལྷིང་སྲུང་སྐྱོང་གི་བཪྙན་འཕྲིན་ཚོགས་འདུ་གཙོ་སྐྱོང་གནང་ནས་དུས་མཚམས་རྗེས་མའི་བརྟན་ལྷིང་སྲུང་སྐྱོང་གི་ལས་དོན་བཀོད་སྒྲིག་གནང་བ་རེད། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ཆབ་མདོ་ས་ཨུད་ཀྱི་ཧྲུའུ་ཅི་ནོར་དུ་དོན་གྲུབ་ཆབ་མདོའི་ཡན་ལག་ཚོགས་རར་ཕེབས་ཡོད་པ་རེད། ས་ཁུལ (གྲོང་ཁྱེར )བདུན་གྱི་ཉེ་དུས་ཀྱི་བརྟན་ལྷིང་སྲུང་སྐྱོང་གི་ལས་དོན་སྤེལ་ཚུལ་གྱི་སྙན་ཞུ་གསན་རྗེས་ཏེང་ཞའོ་ཀང་གིས་རིམ་པ་ཁག་གི་ཏང་སྲིད་རྩ་འཛུགས་དང་ཕྱོགས་ཁག་གི་བརྟན་ལྷིང་སྲུང་སྐྱོང་སྟོབས་ཤུགས་ཀྱིས་ཧྲུའུ་ཅི་ཁྲེན་ཆོན་གོའི་གལ་ཆེའི་མཆན་འགོད་མཛུབ་སྟོན་གྱི་དགོངས་དོན་དང་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་གི་བླང་བྱར་གཞིགས་ཏེ་ཐོག་མཐའ་བར་གསུམ་དུ་ཚད་མཐོའི་ཉེན་ཟོན་བྱེད་དགོས་པ་དང་ཚད་མཐོའི་དོགས་ཟོན་བྱས་ཏེ་རུབ་འཛོམས་ཟིང་སློང་དང་ཐལ་སྤྱོད་དོན་རྐྱེན་དང་དེ་བཞིན་གཏུམ་སྤྱོད་འཇིགས་སྐུལ་གྱི་གཏོར་བཤིག་བྱེད་སྤྱོད་བཀག་འགོག་ནན་པོ་བྱ་རྒྱུ་གཙོ་གནད་དུ་འཛིན་པ་དང་ཁོངས་གཏོགས་ཁུལ་དོ་དམ་ནན་པོ་བྱེད་པ་དང་མི་མངོན་པའི་རྐྱེན་ངན་མི་ལུས་པ་འགན་ལེན་བྱེད་པའི་རྩ་དོན་ལ་གཞིགས་ཏེ་ལྗོངས་ཡོངས་ཀྱི་གོང་འོག་ཚང་མའི་སྟོབས་ཤུགས་ཁག་སྐུལ་སློང་བྱས་ནས་བརྟན་ལྷིང་སྲུང་སྐྱོང་གི་ཟངས་གྱང་ལྕགས་རྩིག་ཅིག་བསྐྲུན་དགོས། དམིགས་གཏད་རང་བཞིན་གྱི་ཞིབ་བཤེར་བྱ་ཐབས་དོན་འཁྱོལ་ནན་པོ་བྱས་ཏེ་བརྟན་ལྷིང་སྲུང་སྐྱོང་གི་སྲུབས་ཁ་དང་། གྲིབ་ཆ། སྟོང་ཆ་བཅས་སྔོན་འགོག་དང་ཚོད་འཛིན་ཧུར་ཐག་ཐུབ་པ་བྱེད་དགོས། སྤྱི་ཚོགས་ཀྱི་སྤྱི་པའི་བདེ་འཇགས་དོ་དམ་བྱ་ཤུགས་རྒྱུན་ཆད་མེད་པར་ཆེ་རུ་གཏོང་དགོས་པ་དང་ལྷག་པར་དུ་གཞུང་ལམ་འགྲིམ་འགྲུལ་དང་མེ་ཟོན་དང་ཐོན་སྐྱེད་བདེ་འཇགས་ལ་ལྟ་ཞིབ་དོ་དམ་བྱེད་དགོས། སྤྱི་ཚོགས་བརྟན་ལྷིང་གི་ཉེན་ཁ་དཔྱད་དཔོག་ཧུར་ཐག་བྱས་ཏེ་མི་མངོན་པའི་རྐྱེན་ངན་མེད་པར་ཏན་ཏིག་བཟོ་དགོས། སྔར་བས་སྒྲིག་ཁྲིམས་ནན་པོ་དང་འགན་འཁྲི་ཁ་གསལ་བཟོས་ཏེ་ལྟ་ཞིབ་ཁྲིད་སྟོན་བྱེད་ཤུགས་ཆེ་རུ་དང་བྱ་དགའ་དང་ཆད་གཅོད་ནན་པོ་བྱས་ནས་བརྟན་ལྷིང་སྲུང་སྐྱོང་གི་བྱ་ཐབས་ཁག་གནད་ལ་འཁེལ་བའི་སྒོ་ནས་དོན་ཐོག་ཏུ་འཁྱོལ་རྒྱུ་འགན་ལེན་བྱེད་དགོས་པའི་ནན་བཤད་གནང་བ་རེད།