བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཟླ་6ཚེས་19ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བའི་ཀྲུང་དབྱང་གི་ཞིབ་བཤེར་ཚོགས་ཆུང་བཅུ་པ་དང་བཞུགས་མོལ་གནང་ནས་རང་ལྗོངས་ཀྱིས་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བའི་ཀྲུང་དབྱང་གི་འཐབ་ཇུས་བཀོད་སྒྲིག་ལག་བསྟར་དོན་འཁྱོལ་བྱ་ཚུལ་སྙན་སེང་ཞུས་ཤིང་། ཞིབ་བཤེར་ཚོགས་ཆུང་གི་བསམ་འཆར་ཉན་པ་དང་གོམ་སྟབས་རྗེས་མའི་ལས་དོན་ལ་ཞིབ་འཇུག་དང་བཀོད་སྒྲིག་བྱས་པ་རེད།

    རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་བདེ་འཇགས་ལྟ་སྐུལ་དོ་དམ་སྤྱི་ཁྱབ་ཅུས་སུ་བཅའ་སྡོད་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་སྒྲིག་བཤེར་ཚོགས་ཆུང་གི་ཙུའུ་ཀྲང་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བའི་ཀྲུང་དབྱང་གི་ཞིབ་བཤེར་ཚོགས་ཆུང་བཅུ་པའི་ཙུའུ་ཀྲང་ཀྲའོ་ཧུའེ་ལིང་གིས་ཚོགས་འདུའི་ཐོག་གསུང་བཤད་གནང་བ་རེད།

    རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ཧྲུའུ་ཅི་ཅིན་ཧྲུའུ་པོ་ཡིས་ཚོགས་འདུ་གཙོ་སྐྱོང་གནང་བ་དང་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཆིན་དབྱི་ཀྲི་ཡིས་ཚོགས་འདུའི་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ཏེ་རང་ལྗོངས་ཀྱིས་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བའི་ཀྲུང་དབྱང་གི་གལ་ཆེའི་འཐབ་ཇུས་ལག་བསྟར་དོན་འཁྱོལ་བྱ་ཚུལ་སྙན་སེང་ཞུས་པ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཀུང་ཕུའུ་ཀོང་དང་། རང་སྐྱོང་ལྗོངས་སྲིད་གཞུང་ཏང་ཙུའི་ཁོངས་མི་འཕེལ་སྒྱུར་ཨུ་ལྷན་གྱི་ཀྲུའུ་རེན་ཅིན་ཧྲེ་ཤུན། རང་སྐྱོང་ལྗོངས་སྲིད་གཞུང་ཏང་ཙུའི་ཁོངས་མི་དྲུང་ཆེ་ཀའོ་དབྱང་བཅས་ཚོགས་འདུར་ཕེབས་ཡོད་པ་རེད།

    པད་མ་འཕྲིན་ལས་ཀྱིས་དུས་ཡུན་རིང་པོའི་ནང་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐུགས་ཁུར་རྒྱབ་སྐྱོར་དང་དེ་བཞིན་ཁ་གཏད་རོགས་སྐྱོར་གྱི་སྤུན་ཟླའི་ཞིང་ཆེན་དང་། གྲོང་ཁྱེར། ཀྲུང་དབྱང་གི་རྐང་འཛིན་ཁེ་ལས་གཙོ་བོ་བཅས་ཀྱི་སྒེར་སེམས་མེད་པའི་རོགས་སྐྱོར་འོག་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ལྗོངས་ཡོངས་ཀྱི་མི་རིགས་ཁག་གི་མི་དམངས་མཐུན་སྒྲིལ་དང་སྣེ་ཁྲིད་ཀྱིས་ཚན་རིག་དང་མཐུན་པའི་གོང་འཕེལ་ལྟ་བ་ལག་བསྟར་དོན་འཁྱོལ་གཏིང་ཟབ་བྱེད་པ་དང་། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་ལག་བསྟར་དོན་འཁྱོལ་བྱེད་པ། ཀྲུང་གོའི་ཁྱད་ཆོས་དང་བོད་ཀྱི་དམིགས་བསལ་ཁྱད་ཆོས་ལྡན་པའི་འཕེལ་རྒྱས་ཀྱི་ལམ་བུའི་ཐོག་བསྐྱོད་རྒྱུ་མཐའ་འཁྱོངས་བྱེད་པ། ཚན་རིག་དང་མཐུན་པའི་གོང་འཕེལ་དང་མཆོང་སྐྱོད་ལྟ་བུའི་འཕེལ་རྒྱས་ལ་སྐུལ་འདེད་གཏོང་རྒྱུ་བརྗོད་བྱ་གཙོ་བོར་བྱ་རྒྱུ་མཐའ་འཁྱོངས་བྱེད་པ། དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བའི་གཙོ་གནད་ལ་བརྟེན་ནས་མ་འཇོག་དང་འཛད་སྤྱོད་གཉིས་ཀར་ཡར་སྐུལ་བྱས་ཏེ་མ་འཇོག་གི་མངོན་མེད་ཁོར་ཡུག་ལེགས་སུ་གཏོང་རྒྱུའི་ཐད་མ་དངུལ་གཏོང་རྒྱུར་སྣང་ཆེན་བྱེད་པ། ཁྱད་ལྡན་ལེགས་ཆའི་ཐོན་ལས་སྐྱེད་སྲིང་ཤུགས་ཆེན་བྱེད་པ། སྤྱི་དབང་མིན་པའི་ལམ་ལུགས་ཀྱི་དཔལ་འབྱོར་སྟོབས་ཆེར་གཏོང་བ། དམངས་འཚོ་ལེགས་བཅོས་དང་དཔལ་འབྱོར་འཕེལ་རྒྱས་མཐུན་སྦྱོར་ཡོང་རྒྱུར་སྣང་ཆེན་བྱེད་པ། སྣོད་བཅུད་ཁོར་ཡུག་སྲུང་སྐྱོང་དང་འཛུགས་སྐྲུན་བྱ་རྒྱུར་ཚད་མཐོའི་མཐོང་ཆེན་བྱེད་པ་བཅས་བྱས་ནས “ལོ་ལྔ་ཚན་བཅུ་གཅིག་པའི ”འཆར་འགོད་ཀྱི་ལས་འགན་ཕུན་སུམ་ཚོགས་པོའི་ངང་ལེགས་སྒྲུབ་བྱུང་བ་དང “ལོ་ལྔ་ཚན་བཅུ་གཉིས་པའི ”འཆར་འགོད་ཀྱི་ལས་འགོ་ཡག་པོ་བརྩམས་ཐུབ་ནས་སླད་ཕྱིན་གྱི་དུས་སྐབས་ཅིག་རིང་རང་ལྗོངས་ཀྱིས་ཚན་རིག་དང་མཐུན་པའི་གོང་འཕེལ་དང་མཆོང་སྐྱོད་ལྟ་བུའི་འཕེལ་རྒྱས་ལ་སྔར་བས་སྐུལ་མ་གཏོང་བ་དང་དཔལ་འབྱོར་འཕེལ་རྒྱས་གཏོང་སྟངས་སྔར་བས་སྒྱུར་མགྱོགས་སུ་གཏོང་ཆེད་རྨང་གཞི་བཟང་པོ་ཞིག་བཏིངས་ཡོད་ཅེས་གསུངས་པ་རེད།

    པད་མ་འཕྲིན་ལས་ཀྱིས་ད་རེས་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བའི་ཀྲུང་དབྱང་གི་ཞིབ་བཤེར་ཚོགས་ཆུང་བོད་དུ་ལས་དོན་ལ་ཞིབ་བཤེར་མཛུབ་ཁྲིད་གནང་བར་ཕེབས་པ་དེས་རང་ལྗོངས་ཀྱིས་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བའི་ཀྲུང་དབྱང་གི་འཐབ་ཇུས་བཀོད་སྒྲིག་ལག་བསྟར་དོན་འཁྱོལ་བྱ་རྒྱུའི་ཐད་རྩ་ཆེའི་བསམ་འཆར་བཏོན་གནང་ཡོད། རང་སྐྱོང་ལྗོངས་ཀྱིས་དེ་གོ་སྐབས་སུ་བྱས་ཏེ་བོད་ཀྱི་ཚན་རིག་དང་མཐུན་པའི་གོང་འཕེལ་དང་མཆོང་སྐྱོད་ལྟ་བུའི་འཕེལ་རྒྱས་ལ་སྐུལ་མ་བཏང་ནས་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་རྒྱུ་དེ་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་ལག་བསྟར་དོན་འཁྱོལ་དང་ཀྲུང་དབྱང་གི་སྤྱི་ཁོག་སྙོམས་སྒྲིག་གི་འཐབ་ཇུས་བཀོད་སྒྲིག་དང་ཟུང་འབྲེལ་དང་། ཀ་རྟེན་ལྟ་བུའི་ཐོན་ལས་འཕེལ་རྒྱས་སྟོབས་ཆེར་གཏོང་བ་དང་གལ་ཆེའི་འཐབ་ཇུས་ཀྱི་འདེགས་སྐྱོར་ཐོན་ལས་སྐྱེད་སྲིང་བྱེད་པ་དང་ཟུང་འབྲེལ། དམངས་འཚོ་འགན་ལེན་དང་ལེགས་སུ་གཏོང་བ་དང་ཟུང་འབྲེལ། སྣོད་བཅུད་ཀྱི་བདེ་འཇགས་སྲུང་ཡོལ་གལ་ཆེན་བསྐྲུན་རྒྱུ་དང་ཟུང་འབྲེལ་བཅས་བྱས་ཏེ་ཚན་རིག་དང་མཐུན་པའི་ལམ་བུའི་ཐོག་མཆོང་སྐྱོད་ལྟ་བུའི་འཕེལ་རྒྱས་ལ་སྐུལ་འདེད་གཏོང་བ་དང་སྤྱི་ཚོགས་ཞི་མཐུན་ཡོང་རིང་ཡུན་རིང་བདེ་འཁོད་ཡོང་རྒྱུར་སྐུལ་མ་བཏང་ནས་སྤྱི་འབོར་དང་སྤུས་ཚད་མཐོར་གཏོང་ཕན་ཚུན་གཅིག་གྱུར་ཡོང་བ་བྱེད་ཐུབ་པ་དང་། མ་འཇོག་དང་། འཛད་སྤྱོད། ཕྱིར་གཏོང་ནང་འདྲེན་བཅས་ཕན་ཚུན་མཐུན་སྦྱོར་ཡོང་རྒྱུར་སྐུལ་མ་གཏོང་བ། ཐོན་ལས་དང་པོ་དང་། གཉིས་པ། གསུམ་པ་བཅས་ཕན་ཚུན་མཐུན་སྦྱོར་ཡོང་རྒྱུར་སྐུལ་མ་གཏོང་བ། ཐོན་ཁུངས་ཀྱི་ནུས་རྒྱུ་གྲོན་ཆུང་དང་སྣོད་བཅུད་བཟང་པོར་སྐུལ་མ་གཏོང་བ། ངལ་རྩོལ་པའི་བྱང་ཚད་མཐོ་རུ་གཏོང་བ། ལས་ཞུགས་གང་ལེགས་ཐུབ་རྒྱུར་སྐུལ་མ་གཏོང་བ་བཅས་བྱེད་དགོས་ཞེས་གསུངས་པ་རེད།

    པད་མ་འཕྲིན་ལས་ཀྱིས་བོད་ལྗོངས་ནི་རང་རྒྱལ་གྱི་རྒྱལ་ཁབ་ཀྱི་བདེ་འཇགས་སྲུང་ཡོལ་གལ་ཆེན་ཞིག་དང་། སྣོད་བཅུད་བདེ་འཇགས་སྲུང་ཡོལ་གལ་ཆེན་ཞིག འཐབ་ཇུས་ཐོན་ཁུངས་གྲབས་གསོག་རྟེན་གཞི་གལ་ཆེན་ཞིག ས་མཐོའི་ཁྱད་ལྡན་ཞིང་ལས་ཐོན་ཟོག་རྟེན་གཞི་གལ་ཆེན་ཞིག ཀྲུང་ཧྭ་མི་རིགས་ཀྱི་ཁྱད་ལྡན་རིག་གནས་སྲུང་སྐྱོང་བྱ་ཡུལ་གལ་ཆེན་ཞིག འཛམ་གླིང་གི་ཡུལ་སྐོར་བྱ་ཡུལ་གལ་ཆེན་ཞིག་བཅས་རེད། “མཆོང་སྐྱོད་ལྟ་བུའི་འཕེལ་རྒྱས་མེད་ཚེ་བོད་ལྗོངས་འདི་ཉིད་རྒྱལ་ཡོངས་འཕེལ་རྒྱས་གོམ་སྟབས་ཀྱི་རྗེས་སུ་སྙེག་མི་ཐུབ་པ་དང་ཚན་རིག་དང་མཐུན་པའི་གོང་འཕེལ་མེད་ཚེ་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་རྒྱུན་སྲིང་བྱེད་དཀའ ”ཞེས་པའི་སྤྱི་ཁྱབ་ཧྲུའུ་ཅི་ཧུའུ་ཅིན་ཐའོ་ཡི་གལ་ཆེའི་མཛུབ་སྟོན་དེ་རང་སྐྱོང་ལྗོངས་ཀྱིས་སློབ་སྦྱོང་དང་ལག་བསྟར་ནན་ཏན་བྱས་ཏེ་གོ་སྐབས་བཟང་པོ་དམ་འཛིན་དང་། ཐོན་ཁུངས་ཀྱི་ལེགས་ཆ་མངོན་གསལ་དོད་པ། འཕེལ་རྒྱས་ཀྱི་སྤུས་ཚད་ལ་སྣང་ཆེན་བཅས་བྱས་ནས་དུས་སྐབས་གསར་པའི་བོད་ཀྱི་ལས་དོན་སྐོར་གྱི་ཀྲུང་དབྱང་གི་མཛུབ་ཁྲིད་དགོངས་པ་སྔར་བས་མཐའ་འཁྱོངས་བྱེད་པ་དང་ཚན་རིག་དང་མཐུན་པའི་གོང་འཕེལ་ལྟ་བ་ལག་བསྟར་དོན་འཁྱོལ་གཏིང་ཟབ་བྱས་ནས་དམངས་འཚོ་ལེགས་སུ་གཏོང་རྒྱུ་འགོ་འཛུགས་ས་དང་དོན་ལ་དམིགས་སར་བྱེད་པ་དང་། མི་རིགས་མཐུན་སྒྲིལ་ཡོང་རྒྱུ་འགན་ལེན་བྱས་ཏེ་ཀྲུང་དབྱང་གི་ཐུགས་ཁུར་དང་། རྒྱལ་ཡོངས་ཀྱི་རྒྱབ་སྐྱོར། བོད་ཀྱི་མི་རིགས་ཁག་གི་མི་དམངས་ཀྱི་དཀའ་སྤྱད་འབད་བརྩོན་བཅས་ཕན་ཚུན་ཟུང་འབྲེལ་བྱ་རྒྱུ་མཐའ་འཁྱོངས་ཀྱིས་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བའི་ཀྲུང་དབྱང་གི་ཐབས་ཇུས་བཀོད་སྒྲིག་གཞིར་བཟུང་ཏང་ཀྲུང་དབྱང་གི་སྲ་ཞིང་བརྟན་པའི་འགོ་ཁྲིད་འོག་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་བའི་ལས་འགན་སྒྲུབ་སེམས་དང་དགོས་གཏུགས་ཀྱི་བསམ་པ་སྔར་བས་ཤུགས་ཆེར་བཏང་ཐོག་2020ལོར་སླེབས་སྐབས་རྒྱལ་ཡོངས་དང་མཉམ་དུ་འབྱོར་འབྲིང་སྤྱི་ཚོགས་སྒོ་ཀུན་ནས་འཛུགས་སྐྲུན་བྱེད་པའི་བརྗིད་ཆེའི་དམིགས་ཚད་ལ་དམིགས་པ་དང་ཞིང་འབྲོག་པ་མི་རེའི་ཆ་སྙོམས་ཡོང་འབབ་ཁེ་གཙང་དང་གཞི་རྩའི་སྤྱི་པའི་ཞབས་ཞུའི་ནུས་པའི “གཅིག་མངོན་གསལ་དོད་པོས་ཆུང་དུ་གཏོང་བ ”དང་། “གཅིག་མངོན་གསལ་དོད་པོས་གོང་མཐོར་གཏོང་བ ”“ཉེ་བཅར་གཉིས ”བཅས་ཀྱི་ལྡོག་མེད་ཀྱི་ལས་འགན་ལ་དམིགས་ནས “བརྟན་པོའི་ཁྲོད་བརྩོན་ལེན་མགྱོགས་པོ་བྱེད་པའི ”སྤྱིའི་བླང་བྱ་གཞིར་བཟུང་དཔལ་འབྱོར་འཕར་བའི་སྤྱི་འབོར་ཟམ་མི་ཆད་པར་མཐོ་རུ་བཏང་ཐོག་དངོས་ཚན་དཔལ་འབྱོར་སྟོབས་ཆེར་གཏོང་བ་དང་། འཐབ་ཇུས་ཀྱི་འདེགས་སྐྱོར་ཐོན་ལས་སྐྱེད་སྲིང་བྱེད་པ། མ་འཇོག་གི་གཞི་ཁྱོན་སྲ་བརྟན་དང་རྒྱ་ཆེར་གཏོང་བ་བཅས་བྱས་ཏེ་ཚན་རྩལ་ལ་བརྟེན་ནས་བྱ་གཞག་གསར་གཏོད་བྱེད་པའི་ཡར་སྐུལ་མཐའ་འཁྱོངས་དང་ས་ཁོངས་དཔལ་འབྱོར་མཐུན་སྦྱོར་དང་འཕེལ་རྒྱལ་ལ་སྐུལ་མ་བཏང་ནས་སྣོད་བཅུད་ཁོར་ཡུག་ལ་སྲུང་སྐྱོང་སྔོན་ལ་བྱ་རྒྱུ་མཐའ་འཁྱོངས་ཀྱིས་བསམ་བློར་བཅིངས་འགྲོལ་དང་གསར་འབྱེད་གསར་གཏོད་བྱས་ནས་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་བཏང་བ་བརྒྱུད་བོད་ཀྱི་དཔལ་འབྱོར་དང་སྤྱི་ཚོགས་ལེགས་ལ་མྱུར་བའི་སྒོ་ནས་འཕེལ་རྒྱས་ཡོང་བ་བྱས་ཏེ་བསམ་པའི་ཉམས་འགྱུར་གསར་པ་དང་འཕེལ་རྒྱས་ཀྱི་གྲུབ་འབྲས་དེ་བས་ཆེ་བའི་སྒོ་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་སྐོང་ཚོགས་བྱ་རྒྱུར་བསུ་བ་ཞུ་དགོས་པའི་ནན་བཤད་གནང་བ་རེད།

    ཚོགས་འདུའི་ཐོག་ཀྲའོ་ཧུའེ་ལིང་གིས་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བའི་ཀྲུང་དབྱང་གི་ཞིབ་བཤེར་ཚོགས་ཆུང་བཅུ་པའི་ཚབ་ཞུས་ཏེ། རང་ལྗོངས་སུ་ཞིབ་བཤེར་ཚོགས་ཆུང་གི་ཞིབ་བཤེར་བྱས་འབྲས་བརྡ་ཁྱབ་བཏང་སྟེ་རང་ལྗོངས་ཀྱི་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་བཏང་བའི་ལས་ཀར་གདེང་འཇོག་གང་ལེགས་གནང་བ་དང་འབྲེལ་རང་ལྗོངས་སུ་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བའི་ཀྲུང་དབྱང་གི་ཐབས་ཇུས་བཀོད་སྒྲིག་སྔར་བས་ལག་ལེན་བསྟར་རྒྱུར་བསམ་འཆར་དང་གྲོས་འགོའང་བཏོན་གནང་ཞིང་། ཁོང་གིས་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་རྒྱུ་དང་། བོད་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཡོང་བར་རྒྱབ་སྐྱོར་བྱ་རྒྱུ། “གལ་ཆེར་འཛིན་དགོས་པ་བདུན ”བཅས་སྐོར་གྱི་ཀྲུང་དབྱང་གི་ཐབས་ཇུས་ལག་བསྟར་དོན་འཁྱོལ་བྱ་རྒྱུར་མཐོང་ཆེན་གནང་ཡོད། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་ལྟར་ཚན་རིག་དང་མཐུན་པའི་འཕེལ་རྒྱས་ཀྱི་དམིགས་ཚད་ཁ་གསལ་ཡིན་པ་དང་། བསམ་ཕྱོགས་གསལ་པོ་ཡོད་པ། སྲིད་ཇུས་གལ་ཆེན་ཚགས་ཚུད་པ་བཅས་ཡོད་ཁར་ལྷག་པར་དུ་ཁྲེན་ཆོན་གོས་དབུ་ཁྲིད་པའི་ལྗོངས་ཏང་ཨུད་ཀྱི་འགོ་ཁྲིད་ཚན་ཁག་སྐབས་གསར་པས་བོད་ཀྱི་དོན་དངོས་དང་བསྟུན་ཏེ་བསམ་བློར་བཅིངས་འགྲོལ་གཏོང་བ་དང་། དངོས་ཐོག་བདེན་འཚོལ་བྱེད་པ། བསམ་ཕྱོགས་དང་བྱ་ཐབས་གསར་པ་འདོན་པ་བཅས་ཀྱི་སྒོ་ནས་ཕན་ནུས་ཐོན་པའི་བྱ་ཐབས་གལ་ཆེན་རབ་དང་རིམ་པ་བཏོན་ཡོད། ཕྱོགས་གཅིག་ནས་འཕེལ་རྒྱས་ལ་དམ་འཛིན་བྱེད་པ་དང་། ཕྱོགས་གཞན་ཞིག་ནས་བརྟན་ལྷིང་ཡོང་བ་བྱེད་པ། འཕེལ་རྒྱས་ཁྲོད་འཕེལ་རྒྱས་གཏོང་སྟངས་བསྒྱུར་རྒྱུར་སྐུལ་མ་གཏོང་བ་དང་འཕེལ་རྒྱས་གཏོང་སྟངས་སྒྱུར་བའི་ཁྲོད་འཕེལ་རྒྱས་དོན་གཉེར་བྱེད་པའི་ཐོག་ནས་བོད་ཀྱི་སྒྱུར་འཕེལ་བརྟན་གསུམ་གྱི་བྱ་གཞག་ཁག་ཚང་མ་འཕེལ་རྒྱས་འགྲོ་རྒྱུར་སྐུལ་མ་ནུས་ལྡན་ཐེབས་ཡོད། བོད་རང་སྐྱོང་ལྗོངས་ཀྱིས་ཕྱིན་འབྱུང་ངོས་འཛིན་སྔར་བས་མཐོ་རུ་བཏང་སྟེ་ཚན་རིག་དང་མཐུན་པའི་འཕེལ་རྒྱས་ཀྱི་ཆུ་ཚད་ཐོག་སླེབས་པར་བྱེད་པ་དང་། གྲུབ་ཆ་སྔར་བས་བཟང་སྒྲིག་བྱས་ཏེ་བརྟན་པོའི་ཁྲོད་འཕེལ་རྒྱས་མགྱོགས་སུ་གཏོང་བ། དམངས་འཚོར་སྔར་བས་དོ་ཁུར་བྱས་ཏེ་དམངས་ཕྱུག་མཐའ་དར་ཡོང་བར་རྨང་གཞི་འདིང་བ། ལྟ་སྐུལ་དོ་དམ་ལ་སྔར་བས་ཤུགས་སྣོན་བརྒྱབ་ནས་ཁུར་མཉམ་ལེན་དང་དོན་སྤྱི་སྒྲུབ་ཐོག་འཕེལ་རྒྱས་ལ་སྐུལ་མ་གཏོང་བ། བརྟག་དཔྱད་ཞིབ་འཇུག་ལ་མུ་མཐུད་ཤུགས་སྣོན་བརྒྱབ་ནས་བོད་ཀྱི་དོན་དངོས་དང་བསྟུན་ཏེ་ལས་ཀའི་ཁྲོད་ལྷགས་པའི་གནད་དོན་དུས་ཐོག་ཏུ་ཐག་གཅོད་ཡོང་བ་བཅས་བྱེད་དགོས་པའི་ཐུགས་རེ་གནང་བ་མ་ཟད། ཞིབ་བཤེར་ཚོགས་ཆུང་དང་བཅས་པ་ཕྱིར་ལོག་རྗེས་ད་རེས་ཀྱི་ཞིབ་བཤེར་གནས་ཚུལ་དང་རང་སྐྱོང་ལྗོངས་ཀྱི་བསམ་འཆར་དང་གྲོས་འགོ་རྣམས་མགྱོགས་མྱུར་ཕྱིར་ལྡོག་བྱས་ཏེ་བོད་ཀྱི་དཔལ་འབྱོར་དང་སྤྱི་ཚོགས་མཆོང་སྐྱོད་ལྟ་བུའི་འཕེལ་རྒྱས་ཡོང་བར་མཉམ་དུ་སྐུལ་མ་གཏོང་རྒྱུ་ཡིན་ཞེས་གསུངས་པ་རེད།

    ཚོགས་འདུའི་ཐོག་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བའི་རང་སྐྱོང་ལྗོངས་ཀྱི་ལྟ་སྐུལ་ཞིབ་བཤེར་ལས་ཀའི་འགོ་ཁྲིད་ཚོགས་ཆུང་དང་། ལྗོངས་འཕེལ་སྒྱུར་ཨུ་ལྷན། ཆུ་བེད་ཐིང་། གྲོང་ཁྱེར་དང་གྲོང་གསེབ་ཀྱི་སྡོད་ཁང་འཛུགས་སྐྲུན་ཐིང་། ཁོར་ཡུག་སྲུང་སྐྱོང་ཐིང་། རྒྱལ་ཁབ་ས་ཆ་ཐོན་ཁུངས་ཐིང་བཅས་ཀྱི་འགན་འཁུར་བློ་མཐུན་གྱིས་རང་ལྗོངས་སུ་ཀྲུང་དབྱང་གི་དགོངས་དོན་ལག་བསྟར་དོན་འཁྱོལ་བྱས་ཚུལ་དང་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་བཏང་བའི་འབྲེལ་ཡོད་གནས་ཚུལ་སྙན་སེང་ཞུས་པ་རེད།

    རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་གྱི་འགན་འཁུར་བློ་མཐུན་ཡང་ཚོགས་འདུར་ཞུགས་ཡོད།