ཟླ་6ཚེས་14ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ལྗོངས་ཏང་ཨུད་ཏང་འཛུགས་སྐྱོང་ལས་དོན་འགོ་ཁྲིད་ཚོགས་ཆུང་གི་ཙུའུ་ཀྲང་ཧའོ་ཕུང་སྔ་རྗེས་སུ་རང་སྐྱོང་ལྗོངས་སྤྱི་བདེ་ཐིང་ལས་བྱེད་པ་རྒན་གྲས་ཀྱི་བྱེད་སྒོའི་ལྟེ་གནས་དང་རང་སྐྱོང་ལྗོངས་དབུལ་སྐྱོར་གསར་སྤེལ་གཞུང་དོན་ཁང་དུ་ཕེབས་ནས་རང་ལྗོངས་ཀྱི་ལས་བྲལ་དང་ལས་འཁྱུར་ལས་བྱེད་པའི་ཏང་ཀྲི་པུའི་རྩ་འཛུགས་དང་འཚོ་བའི་བྱེད་སྒོ་སྤེལ་ཚུལ་དང་ལྗོངས་ཐད་གཏོགས་ལས་ཁུངས་ཀྱི་ཏང་འཛུགས་ལས་དོན་གནས་ཚུལ་སྐོར་བརྟག་ཞིབ་གནང་བ་རེད།
ཁོང་གིས་ལྗོངས་ཐད་གཏོགས་ལས་ཁུངས་ཀྱི་རིམ་ཁག་ཏང་རྩ་འཛུགས་ཀྱིས་ཏང་འཛུགས་སྐྱོང་གི་ཚན་རིག་ཅན་གྱི་ཆུ་ཚད་མཐོ་རུ་བཏང་ནས་རང་ལྗོངས་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཆེད་དུ་འགྱུར་མེད་སྟོབས་ལྡན་གྱི་རྩ་འཛུགས་ཀྱི་འགན་སྲུང་བྱེད་དགོས་ཞེས་ནན་བཤད་གནང་བ་རེད།
ཧའོ་ཕུང་གིས་ལྗོངས་ཐད་གཏོགས་ལས་ཁུངས་ཀྱིས་ཀྲུང་དབྱང་དང་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་ལ་དམ་པོར་བསྟུན་པ་དང་། ལྟེ་བར་ཞབས་འདེགས་ཞུ་བ་དང་དཔུང་ཁག་འཛུགས་སྐྱོང་གི་ལས་འགན་ཆེན་པོ་གཉིས་ཁོང་དུ་ནན་པོ་ཆུད་པ་བྱེད་པ། གཞི་རིམ་རྩ་འཛུགས་འཛུགས་སྐྱོང་ལོར་སྐུལ་འདེད་ཏན་ཏིག་གཏོང་བ་དང་སྔོན་གཏོད་ལེགས་བརྩོན་དང་རྨང་བརྟན་དམངས་ཕན་གྱི་བྱེད་སྒོ་དམ་འཛིན་བྱེད་གཞིར་བརྩི་བ། དམངས་ཆེད་དང་། དངོས་སྒྲུབ། སྤྱོད་གཙང་བཅས་ཀྱི་སྲིད་གཞུང་འཛུགས་སྐྱོང་བྱེད་རྒྱུ་དམིགས་ཡུལ་དུ་བྱེད་པ། ཏང་ཡོན་ལས་བྱེད་པའི་ཏང་གཤིས་སྦྱོང་བརྡར་ལ་ཤུགས་སྣོན་རྒྱག་པ་དང་ལས་ཁུངས་ཀྱི་སྤྱོད་ཚུལ་ལེགས་སུ་གཏོང་རྒྱུ་དེ་གཙོ་གནད་དུ་བྱེད་པ། སྣེ་ཁྲིད་དེ “བོད་སྐྱོད་པ་རྒན་གྲས་ཀྱི་སྙིང་སྟོབས ”དར་སྤེལ་གཏོང་བ་དང་ལག་ལེན་བྱ་རྒྱུ་འགག་རྩར་བརྩི་བ། ལས་ཁུངས་ཏང་འཛུགས་སྐྱོང་གི་ལས་དོན་གྱི་སྒྲིག་གཞི་དང་ལམ་སྲོལ་རྒྱུན་ཆད་མེད་པར་འཐུས་སྒོ་ཚང་དུ་གཏོང་བ། ལས་ཁུངས་ཀྱི་བསམ་བློ་ཆབ་སྲིད་འཛུགས་སྐྱོང་དང་། ཏང་ཡོན་དཔུང་ཁག་འཛུགས་སྐྱོང་། ཏང་དོན་ལས་བྱེད་པའི་དཔུང་ཁག་འཛུགས་སྐྱོང་བཅས་རྒྱུན་ཆད་མེད་པར་ཤུགས་སྣོན་རྒྱག་པ། ལས་ཁུངས་ཏང་འཛུགས་སྐྱོང་གི་ལས་དོན་གྱི་གོ་དོན་དང་བྱེད་སྟངས་ཕུན་སུམ་ཚོགས་སུ་གཏོང་བ་དང་གསར་གཏོད་བྱེད་པའི་ཐད་ཤུགས་སྣོན་རྒྱག་པ། མི་རིགས་མཐུན་སྒྲིལ་གྱི་སློབ་གསོར་མངོན་གསལ་དོད་པོས་ཤུགས་སྣོན་རྒྱག་པ། ལས་ཁུངས་ཀྱི་ལས་བཟོ་དང་ལས་བྲལ་དང་ལས་འཁྱུར་ངལ་གསོ་རྒྱག་མཁན་ཏང་ཡོན་ལས་བྱེད་པར་ཞབས་འདེགས་ཞུ་བ་དང་དོ་དམ་བྱ་རྒྱུ་གཅིག་གྱུར་ཐོག་འཆར་འགོད་དང་དམ་འཛིན་ཡག་པོ་བྱེད་པ། ལས་ཁུངས་ཏང་འཛུགས་སྐྱོང་གི་ལས་དོན་གྱི་ཆུ་ཚད་སྔར་བས་མཐོ་རུ་གཏོང་བ་བཅས་བྱས་ཏེ་ཕུལ་དུ་བྱུང་བའི་གྲུབ་འབྲས་ཀྱི་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་པའི་བླང་བྱ་བཏོན་པ་རེད།