ཟླ་6ཚེས་13ཉིན་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྲུང་གོ་ཚན་རིག་ཁང་མཚོ་བོད་ས་མཐོའི་ཞིབ་འཇུག་སུའོ་ལྷ་ས་པུའུ་ལ་ཚན་ཞིབ་ལས་དོན་སྤེལ་ཚུལ་ལ་རྟོག་ཞིབ་གནང་བར་ཕེབས་ཤིང་། འདི་ནི་པད་མ་འཕྲིན་ལས་ཀྱིས་ནུས་མང་གི་ཚོད་ལྟ་ཁང་དུ་རྡུལ་ཕྲན་ལག་རྩལ་ཡོ་བྱད་སྤྱོད་ཚུལ་མཁྱེན་རྟོགས་གནང་བཞིན་པའི་གནས་ཚུལ་ཡིན་པ།
ཚེས་13ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྲུང་གོ་ཚན་རིག་ཁང་མཚོ་བོད་ས་མཐོའི་ཞིབ་འཇུག་སུའོ་ལྷ་ས་པུའུ་ལ་རྟོག་ཞིབ་གནང་བར་ཕེབས་ནས་ཁོང་གིས་ཚན་ཞིབ་ལས་དོན་པར་མཚོ་བོད་ས་མཐོར་ཞིབ་འཇུག་བྱེད་པའི་ཆུ་ཚད་ཟམ་མི་ཆད་པར་མཐོ་རུ་བཏང་ནས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཞབས་འདེགས་ཞུ་དགོས་པའི་ཐུགས་རེ་གནང་བ་རེད།
རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་སྐལ་བཟང་ཚེ་རིང་དང་རང་སྐྱོང་ལྗོངས་སྲིད་གཞུང་གི་ཏང་ཙུའུ་ཡི་ཁོངས་མི་དྲུང་ཆེ་ཀའོ་དབྱང་རྟོག་ཞིབ་གནང་བར་ལྷན་དུ་ཕེབས་ཡོད་པ་རེད།
ཀྲུང་གོ་ཚན་རིག་ཁང་མཚོ་བོད་ས་མཐོའི་ཞིབ་འཇུག་སུའོ་ལྷ་ས་པུའུ་ལ་པད་མ་འཕྲིན་ལས་དང་བཅས་པས་མཐོ་གྲང་སྣོད་བཅུད་རིག་པ་དང་སྐྱེ་དངོས་ཀྱི་སྣ་མང་རང་བཞིན་གྱི་ཚོད་ལྟ་ཁང་དང་། སྐམ་ས་ཆེ་མོའི་གདོང་ཐུག་དང་ས་མཐོ་འབུར་དུ་ཐོན་པའི་ཚོད་ལྟ་ཁང་། འཁྱགས་སྙིང་གི་མ་དཔེའི་འཁྱགས་མཛོད་བཅས་ལ་སྔ་རྗེས་སུ་རྟོག་ཞིབ་གནང་བ་མ་ཟད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་དང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོའི་ཚབ་ཞུས་ནས་ཀྲུང་གོ་ཚན་རིག་ཁང་མཚོ་བོད་ས་མཐོའི་ཞིབ་འཇུག་སུའོ་ཡི་རྒྱ་ཆེའི་ཚན་ཞིབ་ལས་དོན་པས་རང་ལྗོངས་ཀྱི་འཕེལ་རྒྱས་ཆེད་ལེགས་སྐྱེས་ཕུལ་བར་ཐུགས་རྗེ་ཆེ་ཞུས་གནང་བ་རེད། ཀྲུང་གོ་ཚན་རིག་ཁང་གི་ཡོན་ཧྲི་མཚོ་བོད་ས་མཐོའི་ཞིབ་འཇུག་སུའོ་ཡི་སུའོ་ཀྲང་ཡའོ་ཐན་ཏུང་གི་ལས་དོན་སྙན་ཞུ་གསན་རྗེས་པད་མ་འཕྲིན་ལས་ཀྱིས་མཚོ་བོད་ས་མཐོའི་ཞིབ་འཇུག་སུའོ་ནི་ཀྲུང་གོ་ཚན་རིག་ཁང་གིས་རྒྱལ་ཁབ་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འཐབ་ཇུས་གལ་ཆེན་གྱི་དགོས་མཁོ་དང་རྒྱལ་སྤྱིའི་སྔོན་ཐོན་ཚན་རིག་འཕེལ་རྒྱས་འགྲོ་ཚུལ་ལ་གཞིགས་ཏེ་ཤེས་བྱ་གསར་གཏོད་འདུ་འགོད་ཀྱི་ཚན་རྩལ་བཀོད་སྒྲིག་ཁྲོད་བཙུགས་པའི་ཞིབ་འཇུག་སུའོ་ཞིག་རེད། ཞིབ་འཇུག་སུའོ་བཙུགས་ཚུན་རྒྱལ་ཁབ་ཀྱི་གཙོ་གནད་ཚན་རྩལ་འགག་སྒྲོལ་ལ་གཞོལ་ནས་ས་གཤིས་ཞིབ་འཇུག་ཚད་བརྒལ་དུ་བྱེད་པ་དང་རྒྱལ་ཡོངས་ཀྱི་མཚོ་བོད་ས་མཐོའི་ལེགས་ཆའི་ཞིབ་འཇུག་སྟོབས་ཤུགས་མཐུན་སྦྱོར་སྒྲིག་འཛུགས་བྱས་པ་དང་ཕྱོགས་མང་པོ་ནས་འགོ་བཙུགས་ཏེ་མཚོ་བོད་ས་མཐོར་ཞིབ་འཇུག་བྱས་པས་རྒྱལ་སྤྱིའི་མཚོ་བོད་ས་མཐོའི་ཚན་རིག་ཞིབ་འཇུག་ཁྱབ་ཁོངས་སུ་གྲུབ་འབྲས་ཆེན་པོ་ཐོབ་ཡོད་ཅེས་གསུངས་པ་རེད།
པད་མ་འཕྲིན་ལས་ཀྱིས་མཚོ་བོད་ས་མཐོའི་ཞིབ་འཇུག་སུའོ་ཡིས་ཀྲུང་གོ་ཚན་རིག་ཁང་དང་བོད་རང་སྐྱོང་ལྗོངས་ཀྱི་ཚན་རྩལ་མཉམ་ལས་འཐབ་ཇུས་ཀྱི་སྒྲོམ་གཞིའི་གྲོས་མཐུན་དགོངས་དོན་ལ་གཞིགས་ནས་བོད་དང་ཕྱོགས་མང་པོ་དང་རིམ་པ་མང་བའི་མཉམ་ལས་བྱས་ཏེ་རང་ལྗོངས་ཀྱི་ཚན་ཞིབ་ཆུ་ཚད་མཐོ་རུ་གཏོང་ཆེད་ཐབས་འདོན་ཇུས་འགོད་ཧུར་ཐག་བྱེད་དགོས་པ་དང་། “གྲུབ་འབྲས་ཐོབ་པ་དང་། ཤེས་ལྡན་མི་སྣ་ཐོན་པ། བསམ་ཕྱོགས་ཐོན་པ ”བཅས་ཀྱི་འཐབ་ཇུས་བཀོད་སྒྲིག་ལ་དམ་པོར་གཞིགས་ནས་ཆུ་ཚད་མཐོ་བའི་ཞིབ་འཇུག་གྲུབ་འབྲས་ཐོབ་པ་བྱས་ཏེ་ཕྱོགས་ཁག་གི་སྟོབས་ཤུགས་ལ་མཉམ་ལས་ཀྱི་རྨང་གཞི་འདིང་དགོས་པ། རྒྱལ་ཁབ་ཀྱི་ལས་འགན་ལེགས་སྒྲུབ་བྱེད་པའི་སྔོན་འགྲོའི་ཆ་རྐྱེན་འོག “ཚན་རྩལ་གྱི་བོད་སྐྱོར་དང་། ཤེས་བྱའི་བོད་སྐྱོར། ཤེས་ལྡན་པའི་བོད་སྐྱོར ”བཅས་ཀྱི་ལས་དོན་ལ་མུ་མཐུད་ཤུགས་སྣོན་བརྒྱབ་སྟེ་བོད་ཀྱི་དཔལ་འབྱོར་དང་སྤྱི་ཚོགས་མཆོང་སྐྱོད་ལྟ་བུའི་འཕེལ་རྒྱས་ཡོང་ཕྱིར་ཚན་རྩལ་གྱི་འདེགས་སྐྱོར་དང་ཤེས་ལྡན་པའི་འདེགས་སྐྱོར་བྱེད་དགོས་པ། རང་སྐྱོང་ལྗོངས་ཀྱིས་མཚོ་བོད་ས་མཐོའི་ཞིབ་འཇུག་སུའོ་ཡི་ལས་དོན་ཁག་ལ་སྔར་རྒྱུན་བཞིན་རྒྱབ་སྐྱོར་བྱེད་པ་དང་ནུས་ཤུགས་ཡོད་རྒུས་མཐུན་སྦྱོར་གཞོགས་འདེགས་གང་ལེགས་བྱས་ཏེ་རང་ལྗོངས་ཀྱི་ཚན་རྩལ་ཆུ་ཚད་དེ་སྐས་རིམ་གསར་པ་ཞིག་ཏུ་སླེབས་རྒྱུར་ཐུན་མོང་ཐོག་སྐུལ་འདེད་གཏོང་དགོས་པ་བཅས་ཀྱི་ཐུགས་རེ་གནང་བ་རེད།
རང་སྐྱོང་ལྗོངས་འབྲེལ་ཡོད་སྡེ་ཚན་གྱི་འགན་ཁུར་བློ་མཐུན་གྱིས་རྟོག་ཞིབ་ལ་ཕེབས་རོགས་ཞུས་པ་རེད།