བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་ཟླ་6ཚེས་11ཉིན་གནས་ཚུལ་འབྱོར་གསལ། ལྗོངས་ཡོངས་ཀྱི་གྲོང་ཚོའི (གྲོང་མི་ཨུ་ལྷན )ཏང་ཀྲི་པུའི་ཧྲུའུ་ཅི་ཕུལ་བྱུང་ཁྲོད་ནས་ཤང་གྲོང་གཞུང་ལས་པ་འདེམས་རྒྱུའི་ལས་དོན་སྐོར་གྱི་ལྗོངས་ཏང་ཨུད་ཀྱི་ཐབས་ཇུས་གལ་ཆེན་དང་ཧྲུའུ་ཅི་ཁྲེན་ཆོན་གོའི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་དོན་འཁྱོལ་བྱ་རྒྱུར་དམ་འཛིན་ཏན་ཏིག་བྱ་ཆེད་གོང་ཚེས་ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ལྗོངས་ཏང་ཨུད་ཏང་འཛུགས་སྐྱོང་ལས་དོན་འགོ་ཁྲིད་ཚོགས་ཆུང་གི་ཙུའུ་ཀྲང་ཧའོ་ཕུང་གིས་རང་སྐྱོང་ལྗོངས་ཏང་ཨུད་རྩ་འཛུགས་པུའུ (སྒྲིག་ཁོངས་གཞུང་དོན་ཁང )དང་དེ་བཞིན་ལྗོངས་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་དང་གཞུང་ལས་པའི་ཅུས་སོགས་འབྲེལ་ཡོད་སྡེ་ཚན་གྱི་འགན་འཁུར་བ་སྐོང་ཏེ་ཆེད་དོན་ཚོགས་འདུ་འཚོགས་ནས་འབྲེལ་ཡོད་ལས་དོན་ལ་ཞིབ་འཇུག་དང་བཀོད་སྒྲིག་གནང་ཞིང་། ཁོང་གིས་རང་ལྗོངས་ཀྱིས་གྲོང་ཚོའི (གྲོང་མི་ཨུ་ལྷན )ཏང་ཀྲི་པུའི་ཧྲུའུ་ཅི་ཕུལ་བྱུང་ཁྲོད་ནས་ཤང་གྲོང་གཞུང་ལས་པ་འདེམས་རྒྱུའི་ལས་དོན་ལ་ནུས་ཤུགས་ཡོད་རྒུས་སྐུལ་འདེད་བཏང་སྟེ་མཐུན་སྒྲིལ་དང་། དམངས་གཙོ། འབྱོར་ཕྱུག ཤེས་དཔལ། ཞི་མཐུན་བཅས་ཀྱི་སྤྱི་ཚོགས་རིང་ལུགས་ཀྱི་བོད་གསར་འཛུགས་སྐྲུན་བྱ་ཆེད་སྲ་ཞིང་བརྟན་པའི་རྩ་འཛུགས་ཀྱི་འགན་ལེན་བྱེད་དགོས་པའི་ནན་བཤད་གནང་བ་རེད།

    ལྗོངས་ཏང་ཨུད་ཀྱི་རྒྱུན་ཨུ་རྩ་འཛུགས་པུའི་པུའུ་ཀྲང་ལེའང་ཐེན་ཀེང་གིས་ཚོགས་འདུ་གཙོ་སྐྱོང་གནང་བ་རེད།

    འབྲེལ་ཡོད་སྡེ་ཚན་གྱི་འགན་ཁུར་བའི་གཏམ་བཤད་གསན་རྗེས་ཧའོ་ཕུང་གིས་ལྗོངས་ཏང་ཨུད་ཀྱིས་2012ལོ་ནས་བཟུང་ལོ་ལྟར་ལྗོངས་ཡོངས་ཀྱི་གྲོང་ཚོའི (གྲོང་མི་ཨུ་ལྷན )ཏང་ཀྲི་པུའི་ཧྲུའུ་ཅི་ཕུལ་བྱུང་ཁྲོད་ནས་ཤང་གྲོང་གཞུང་ལས་པ་ཁག་གཅིག་འདེམས་རྒྱུའི་གཏན་འབེབས་བྱས་པ་དེ་ནི་ལྗོངས་ཏང་ཨུད་ཀྱིས་ལོ་རྒྱུས་ཀྱི་ཉམས་མྱོང་ལ་ཕྱོགས་སྡོམ་དང་མིག་སྔའི་བོད་ཀྱི་འཕེལ་རྒྱས་དང་བརྟན་ལྷིང་གི་དུས་བབ་གསར་པ་དང་ལས་འགན་གསར་པའི་དགོས་མཁོར་གཞིགས་ནས་གྲོང་གསེབ་ཀྱི་གཞི་རིམ་ལས་བྱེད་པའི་དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་རྒྱུའི་སྐོར་གྱི་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཁྱོན་ཡོངས་ནས་ལག་བསྟར་དོན་འཁྱོལ་བྱེད་པའི་བྱ་སྤྱོད་དངོས་ཞིག་དང་། གྲོང་ཚོའི (གྲོང་མི་ཨུ་ལྷན )ལས་བྱེད་པའི་ལས་དོན་སྒྲུབ་པ་དང་བྱ་གཞག་གཏོད་པའི་ཧུར་སེམས་སྐོང་འཐེན་བྱ་རྒྱུར་དམིགས་པ་དང་། གཞི་རིམ་ལས་བྱེད་པའི་དཔུང་ཁག་གི་གྲུབ་ཆ་ལེགས་སུ་གཏོང་བ། མི་སྤྱོད་ཀྱི་ཁྲིད་སྟོན་བཟང་པོ་ཞིག་འཛུགས་པ། གཞི་རིམ་ལས་བྱེད་པར་ཐུགས་ཁུར་དང་གཅེས་སྐྱོང་བྱེད་པ་བཅས་ཀྱི་མཚོན་ཚུལ་གལ་ཆེན་ཞིག བོད་ཀྱི་དོན་དངོས་ལ་གཞི་ཚུགས་པ་དང “རང་འདེམས་བྱ་སྤྱོད ”ཡག་པོ་སྤེལ་བ་ཞིག གཞི་རིམ་རྩ་འཛུགས་འཛུགས་སྐྱོང་ལོའི་བྱེད་སྒོ་གཏིང་ཟབ་སྤེལ་བའི་ནུས་ལྡན་གྱི་དམ་འཛིན་བྱ་གཞི་ཞིག རྒྱུན་སྲིང་ལྷོད་མེད་ངང་དམ་འཛིན་བྱ་རྒྱུ་མཐའ་འཁྱོངས་བྱེད་པ་དང་ཕུགས་ཕན་ལམ་སྲོལ་བཙུགས་ནས་སྔོན་གཏོད་ལེགས་བརྩོན་གྱི་བྱེད་སྒོའི་གྲུབ་འབྲས་སྲ་བརྟན་དང་རྒྱ་ཆེར་གཏོང་བའི་ནུས་ལྡན་གྱི་བྱེད་ཐབས་ཤིག བོད་ཀྱི་ལས་དོན་གྱི་གཙོ་གནད་དང་དཀའ་གནད་ལ་དམ་པོར་དམིགས་པ་དང་ཞིང་འབྲོག་ཁུལ་གྱི་འཕེལ་རྒྱས་དང་བརྟན་ལྷིང་གི་རྨང་གཞི་བརྟན་དུ་བཏང་ནས་སྤྱི་ཚོགས་རིང་ལུགས་ཀྱི་གྲོང་གསེབ་གསར་པ་འཛུགས་སྐྲུན་བྱ་རྒྱུར་སྐུལ་འདེད་གཏོང་བའི་གཞི་རྟེན་བཟང་པོ་ཞིག་བཅས་ཡིན། ལས་དོན་དེ་ཡག་པོ་བསྒྲུབ་རྒྱུའི་ཐད་ལྗོངས་ཏང་ཨུད་ཀྱིས་ཚད་མཐོའི་མཐོང་ཆེན་གནང་ཁར་ཧྲུའུ་ཅི་ཁྲེན་ཆོན་གོས་མཆན་བཀོད་མཛུབ་སྟོན་གལ་ཆེན་གནང་བ་དང་བླང་བྱ་ཁ་གསལ་བཏོན་གནང་ཡོད་ཅེས་གསུངས་པ་རེད།

    ཧའོ་ཕུང་གིས་ལྗོངས་ཡོངས་ཀྱི་རིམ་ཁག་ཏང་ཨུད་དང་དེ་བཞིན་རྩ་འཛུགས་སྡེ་ཚན་གྱིས་གྲོང་ཚོའི (གྲོང་མི་ཨུ་ལྷན )ཏང་ཀྲི་པུའི་ཧྲུའུ་ཅི་ཕུལ་བྱུང་ཁྲོད་ནས་ཤང་གྲོང་གཞུང་ལས་པ་འདེམས་རྒྱུའི་ལས་དོན་ལ་ཚད་མཐོའི་མཐོང་ཆེན་བྱས་ཏེ་འགོ་ཁྲིད་ལ་ཤུགས་སྣོན་ཏན་ཏིག་རྒྱག་པ་དང་། ཞིབ་འཇུག་དང་བཀོད་སྒྲིག་ཞིབ་ཚགས་བྱེད་པ། ལག་བསྟར་ཇུས་གཞི་བཟོ་བ། སྒྲིག་འཛུགས་དང་ལག་བསྟར་ཚགས་ཚུད་པོ་བྱེད་པ་བཅས་བྱས་ཏེ་ལས་དོན་དེ་འཆར་གཞི་གཞིར་བཟུང་བདེ་བླག་ངང་སྐུལ་འདེད་གཏོང་རྒྱུ་འགན་ལེན་བྱེད་དགོས་པ་སྟེ། གཅིག་ནས་ཚད་གཞི་མཐའ་འཁྱོངས་བྱས་ཏེ་ཁྲིད་སྟོན་བཟང་པོ་ཞིག་ཆགས་པ་བྱེད་དགོས་ཤིང་། སྤྱོད་ཡོན་གཉིས་ལྡན་དང་ཀུན་སྤྱོད་སྔོན་འགྲོ་བྱེད་པའི་མི་སྤྱོད་ཀྱི་ཚད་གཞི་མཐའ་འཁྱོངས་དང་བོད་ཀྱི་དོན་དངོས་ནས་འགོ་འཛུགས་པ་དང་ཆབ་སྲིད་ཀྱི་འགག་སྒོ་ཡག་པོ་སྲུང་རྒྱུ་མཐའ་འཁྱོངས་བྱས་ཏེ་འདེམས་རྒྱུའི་ལས་བྱེད་པར་ལས་ཀའི་འཇོན་ཐང་ཡོད་པ་དང་། སྤྱོད་ཚུལ་ལེགས་པ། དངོས་ཡོད་གྲུབ་འབྲས་མངོན་གསལ་དོད་པ་བཅས་ཡོང་བ་བྱས་ཏེ་མིག་དཔེའི་དཔེ་སྟོན་ནུས་པ་དངོས་འབྲེལ་འདོན་ཐུབ་རྒྱུ་འགན་ལེན་བྱེད་དགོས་པ་དང་། གཉིས་ནས་གོ་རིམ་ནན་པོ་ཡོང་བ་བྱས་ཏེ་དར་སྲོལ་བཟང་པོ་ཞིག་ཆགས་པ་བྱེད་དགོས་ཤིང་། ཏང་དང་མི་དམངས་ཀྱི་བྱ་གཞག་ལ་འགན་འཁུར་བ་དང་གཞི་རིམ་ལས་བྱེད་པར་འགན་འཁུར་བའི་རྣམ་འགྱུར་གྱི་ཐོག་ནས་ཡོང་བསྒྲགས་དང་། འདྲ་མཉམ། འགྲན་རྩོལ། ལེགས་འདེམས་བཅས་ཀྱི་རྩ་དོན་མཐའ་འཁྱོངས་བྱེད་པ་དང་དམངས་གཙོའི་འོས་སྦྱོར་དང་། རྩ་འཛུགས་ཀྱི་ལྟ་ཞིབ། ཡོང་བསྒྲགས། བསྡུ་སྤྱོད་དང་ལས་བགོས་རྒྱག་པ་སོགས་ཀྱི་གོ་རིམ་ལ་གཞིགས་ནས་ལག་བསྟར་བྱས་པ་དང་འབྲེལ་བརྒྱུད་རིམ་ཧྲིལ་པོར་ལྟ་སྐུལ་བྱ་རྒྱུར་ཤུགས་སྣོན་རྒྱག་པ་དང་ལས་དོན་དེར་སྐུལ་འདེད་གཏོང་བའི་སྤྱོད་ཚུལ་ནན་པོའི་ཐོག་ནས་སྤྱི་ཚོགས་ཡོངས་སུ་ཡོངས་བསྒྲགས་རྒྱུགས་བསྡུ་སོགས་ཀྱི་ལས་ཀའི་དར་སྲོལ་བཟང་པོ་ཞིག་ཆགས་པ་བྱེད་དགོས་པ། གསུམ་ནས་དངོས་འཛིན་མྱུར་སྒྲུབ་བྱས་ཏེ་ཕན་འབྲས་བཟང་པོ་ཐོན་པ་བྱེད་དགོས་ཤིང་། ལྗོངས་ཏང་ཨུད་རྩ་འཛུགས་པུའུ་སོགས་འབྲེལ་ཡོད་སྡེ་ཚན་གྱིས་ལག་བསྟར་ཇུས་གཞི་འཐུས་སྒོ་ཚང་དུ་གཏོང་རྒྱུར་དམ་འཛིན་ནན་པོ་བྱེད་པ་དང་སྐུལ་སློང་དང་བཀོད་སྒྲིག་ཚོགས་འདུ་མགྱོགས་མྱུར་འཚོགས་ནས་འབྲེལ་ཡོད་ལས་དོན་ཐད་བཀོད་སྒྲིག་ཞིབ་ཕྲ་བྱེད་པ་དང་འབྲེལ་ཡོད་སྡེ་ཚན་གྱིས་གཞོགས་འདེགས་དམ་ཟབ་བྱེད་པ་དང་དམིགས་བསལ་གྱི་བྱ་བ་དམིགས་བསལ་ངང་བསྒྲུབ་རྒྱུ་མཐའ་འཁྱོངས་བྱས་ཏེ་ལྟ་སྐུལ་ལས་དོན་གཏིང་ཟབ་སྤེལ་བ་དང་ལས་དོན་ལ་ནུས་ལྡན་ངང་སྐུལ་འདེད་བཏང་ནས་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་ཁྱོན་ཡོངས་ནས་ལག་བསྟར་དོན་འཁྱོལ་ཐུབ་རྒྱུ་འགན་ལེན་བྱེད་དགོས་པ། བཞི་ནས་ལས་དོན་གསར་གཏོད་བྱས་ཏེ་ལམ་སྲོལ་བཟང་པོ་ཞིག་ཆགས་པ་བྱེད་དགོས་ཤིང་། ལས་ཀ་བྱེད་རིང་ཕྱོགས་སྡོམ་བྱ་རྒྱུ་མཐའ་འཁྱོངས་བྱེད་པ་དང་ལག་ལེན་དངོས་ནང་ལས་དོན་སྒྲུབ་སྟངས་རྒྱུན་ཆད་མེད་པར་འཐུས་སྒོ་ཚང་དུ་གཏོང་བ་དང་གསར་གཏོད་བྱས་ཏེ་ལོ་ལྟར་མི་སྣ་ཁག་གཅིག་འདེམས་པ་དང་། ཁག་གཅིག་གྲ་སྒྲིག་བྱེད་པ། ཁག་གཅིག་གསོ་སྐྱོང་བྱེད་པ་བཅས་བྱས་ཏེ་གཞི་རིམ་གྱི་འཐབ་ས་དང་པོ་ནས་ཏང་སྲིད་ལས་བྱེད་པ་གསོ་སྐྱོང་དང་འདེམས་པའི་ཕུགས་ཕན་ལམ་སྲོལ་ཞིག་རིམ་བཞིན་འཛུགས་རྒྱུ་འགན་ལེན་བྱེད་པ་དང་། ལས་དོན་ཁྲོད་ཀྱི་ཉམས་མྱོང་དང་བྱེད་ཐབས་བཟང་པོ་རྒྱ་ཁྱབ་ངང་དྲིལ་བསྒྲགས་དང་ཁྱབ་གདལ་ཤུགས་ཆེན་བཏང་སྟེ་བྱ་བཟང་ཏན་ཏིག་ངང་སྒྲུབ་པ་དང་བྱ་བ་དངོས་ཡག་པོ་སྒྲུབ་པའི་གླེང་ཕྱོགས་ཀྱི་ཁོར་ཡུག་བཟང་པོ་ཞིག་གཏོད་དགོས་པ་བཅས་ཀྱི་ནན་བཤད་གནང་བ་རེད།