ཟླ་6ཚེས་8ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་བྱམས་པ་ཕུན་ཚོགས་འབྲས་སྤུངས་དང་སེ་ར་དགོན་ལ་ཕེབས་ནས་དེར་བཅའ་སྡོད་དགོན་པའི་ལས་དོན་ཚོགས་ཆུང་དང་། དོ་དམ་ཨུ་ལྷན་གྱི་ལས་བྱེད་པ། སྤྱི་བདེའི་ཉེན་རྟོག་པ། མེ་ཟོན་འཐབ་འཛིང་པ། ལས་རེས་སྒྲུབ་མཁན་དཔོན་དམག་བཅས་ལ་བྱམས་བརྩེའི་ངང་གཟིགས་ཤིང་། འདི་ནི་བྱམས་པ་ཕུན་ཚོགས་ཀྱིས་སེ་ར་དགོན་པར་སྤྱི་བདེའི་ཉེན་རྟོག་ལས་བྱེད་པར་གཟིགས་པའི་གནས་ཚུལ་ཡིན་པ།

    ཚེས་8ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་བྱམས་པ་ཕུན་ཚོགས་འབྲས་སྤུངས་དང་སེ་ར་དགོན་དུ་ཕེབས་ཏེ་རང་སྐྱོང་ལྗོངས་ཏང་ཨུད་དང་རང་སྐྱོང་ལྗོངས་མི་དམངས་འཐུས་ཚོགས་དང་ཧྲུའུ་ཅི་ཁྲེན་ཆོན་གོའི་ཚབ་ཞུས་ནས་དགོན་སྡེའི་བཅའ་སྡོད་ལས་དོན་ཚོགས་ཆུང་དང་དོ་དམ་ཨུ་ལྷན་གྱི་ལས་བྱེད་པ་དང་། སྤྱི་བདེ་ལས་བྱེད་ཉེན་རྟོག་པ། མེ་ཟོན་འཐབ་འཛིང་པ། ལས་རེས་སྒྲུབ་མཁན་དཔོན་དམག་བཅས་ལ་བྱམས་བརྩེའི་ངང་གཟིགས་པ་དང་འཚམས་འདྲི་གནང་བ་རེད།

    རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་སེ་ར་དགོན་དུ་བཅའ་སྡོད་ལས་དོན་ཚོགས་ཆུང་གི་ཙུའུ་ཀྲང་ཉི་མ་ཚེ་རིང་དང་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་འབྲས་སྤུངས་དགོན་དུ་བཅའ་སྡོད་ལས་དོན་ཚོགས་ཆུང་གི་ཙུའུ་ཀྲང་རྡོ་རྗེ་ཚེ་རིང་གིས་དགོན་སྡེར་བཅའ་སྡོད་ལས་ཀའི་གནས་ཚུལ་སོ་སོར་སྙན་སེང་ཞུས་པ་རེད། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་འབྲས་སྤུངས་དགོན་དུ་བཅའ་སྡོད་ལས་དོན་ཚོགས་ཆུང་གི་ཙུའུ་ཀྲང་གཞོན་པ་ཝུའུ་ཅིན་ཧུའེ་དང་རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་སེ་ར་དགོན་དུ་བཅའ་སྡོད་ལས་དོན་ཚོགས་ཆུང་གི་ཙུའུ་ཀྲང་གཞོན་པ་ལིའུ་ཆིང་ཧུའེ་ཡིས་སྙན་ཞུའི་ཚོགས་འདུ་སོ་སོར་གཙོ་སྐྱོང་གནང་བ། རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་། རང་སྐྱོང་ལྗོངས་མི་རིགས་ཆོས་ལུགས་ལས་དོན་ཨུ་ལྷན་གྱི་ཀྲུའུ་རེན། འབྲས་སྤུངས་དགོན་སྡེར་བཅའ་སྡོད་ལས་དོན་ཚོགས་ཆུང་གི་ཙུའུ་ཀྲང་གཞོན་པ་བཅས་ཡིན་པའི་བློ་བཟང་འགྱུར་མེད་ཀྱིས་ཕེབས་རོགས་ཞུས་པ་རེད།

    བྱམས་པ་ཕུན་ཚོགས་དང་བཅས་པས་སྔ་རྗེས་སུ་དགོན་སྡེའི་ཚོམས་ཆེན་དང་། དགོན་སྡེའི་དཔེ་དེབ་ཁང་། དགོན་སྡེའི་གཡས་གཡོན་གྱི་ཁོར་ཡུག་བཅས་ལ་གཟིགས་ཞིབ་གནང་བ་དང་འབྲེལ་དགོན་སྡེར་བཅའ་སྡོད་ལས་དོན་ཚོགས་ཆུང་གི་ལས་བྱེད་པ་དང་དོ་དམ་ཨུ་ལྷན་གྱི་ཁོངས་མི་ཁག་དང་སོ་སོར་བྱམས་བརྩེའི་ངང་བཞུགས་མོལ་གནང་བ་རེད།

    བཞུགས་མོལ་གནང་རིང་བྱམས་པ་ཕུན་ཚོགས་ཀྱིས་འབྲས་སྤུངས་དགོན་དང་སེ་ར་དགོན་གྱི་བཅའ་སྡོད་ལས་དོན་ལ་ཐོབ་པའི་གྲུབ་འབྲས་ཁས་ལེན་གང་ལེགས་གནང་ཞིང་། ཁོང་གིས་ལོ་4ཚུན་འབྲས་སྤུངས་དགོན་དང་སེ་ར་དགོན་གྱི་བཅའ་སྡོད་ལས་དོན་ཚོགས་ཆུང་གིས་ཀྲུང་དབྱང་དང་རང་སྐྱོང་ལྗོངས་ཀྱི་སྤྱིའི་བཀོད་སྒྲིག་དང་བླང་བྱ་གཞིར་བཟུང་དགོན་སྡེའི་རྒྱུན་ལྡན་གྱི་ཆོས་ལུགས་བྱེད་སྒོ་སྲུང་སྐྱོང་དང་། དགེ་འདུན་པ་དང་རྒྱ་ཆེའི་ཆོས་དད་མང་ཚོགས་ཀྱི་རྩ་བའི་ཁེ་ཕན་སྲུང་སྐྱོང་བྱ་རྒྱུ་ནས་འགོ་བཙུགས་ཏེ་ཁྲིམས་ལུགས་དྲིལ་བསྒྲགས་སློབ་གསོ་གཏིང་ཟབ་སྤེལ་བ་དང་། ཁྲིམས་ལྟར་དགོན་སྡེའི་དོ་དམ་ལ་ཤུགས་སྣོན་རྒྱག་པ། སྒྲིག་སྲོལ་ལམ་ལུགས་འཐུས་སྒོ་ཚང་དུ་གཏོང་བ་བཅས་བྱས་ཏེ་དུས་བདེ་ཞི་མཐུན་གྱི་དགོན་སྡེ་གཏོད་པ་དང་རྒྱལ་གཅེས་ཁྲིམས་སྲུང་གི་སྔོན་ཐོན་གྲྭ་བཙུན་དཔྱད་འདེམས་བྱེད་པའི་བྱེད་སྒོ་དང་བླ་མ་སྐྱེས་ཆེན་རིམ་བྱུང་གི “རྒྱལ་གཅེས་ཆོས་གཅེས་དང་། སྒྲིག་བཀུར་ཁྲིམས་སྲུང་། སྡིག་སྤོང་དགེ་སྒྲུབ། ཞི་མཐུན་གོང་བཀུར། ཞི་བདེར་རེ་སྨོན ”བཅས་བརྗོད་བྱ་གཙོ་བོར་བྱས་པའི་ཁྲིམས་ལུགས་དྲིལ་བསྒྲགས་སློབ་གསོའི་བྱེད་སྒོ་སོགས་དང་ཟུང་འབྲེལ་དམ་ཟབ་བྱས་ནས་རྒྱ་ཆེའི་གྲྭ་དམངས་ཀྱིས་རྒྱལ་གཅེས་ཆོས་གཅེས་དང་། རྒྱལ་སྐྱོང་འགྲོ་ཕན། སྡོམ་ཁྲིམས་སྲུང་བ། ཐོས་བསམ་ལ་གཞོལ་བ་བཅས་བྱ་རྒྱུར་སློབ་གསོ་དང་ཁྲིད་སྟོན་བྱས་པ་རེད། ལས་དོན་ཚོགས་ཆུང་གིས་དཀའ་ཚེགས་ཆེ་བ་དང་ཞིབ་ཚགས་པའི་ལས་དོན་སྤེལ་བ་བརྒྱུད་དགོན་སྡེའི་རྒྱུན་མཐུད་བརྟན་ལྷིང་གི་ཕུགས་ཕན་ལམ་སྲོལ་རགས་ཙམ་ཆགས་ནས་དགེ་འདུན་པ་ཚོའི་རླབས་ཆེན་མེས་རྒྱལ་ལ་མོས་སེམས་དང་གཏོགས་སེམས་སྔར་བས་ཆེ་རུ་ཕྱིན་ཏེ་བོད་བརྒྱུད་ནང་བསྟན་གྱི་རྒྱུན་ལྡན་སྒྲིག་ལམ་སྲུང་སྐྱོང་ནུས་ལྡན་ཐུབ་ཡོད་ཅེས་གསུངས་པ་རེད། བྱམས་པ་ཕུན་ཚོགས་ཀྱིས་དགོན་སྡེའི་ལས་དོན་ཡག་པོ་སྒྲུབ་ཕྱིན་བོད་བརྒྱུད་ནང་བསྟན་གྱི་རྒྱུན་ལྡན་སྒྲིག་ལམ་སྲུང་སྐྱོང་ནུས་ལྡན་ཐུབ་ལ་རྒྱ་ཆེའི་གྲྭ་བཙུན་དང་དད་ལྡན་མང་ཚོགས་ཏང་དང་སྲིད་གཞུང་ལ་སེམས་པ་ཕྱོགས་ཤུགས་ཆེ་རུ་ཏན་ཏིག་འགྲོ་ཐུབ། མིག་སྔར་རང་ལྗོངས་ཀྱི་སྤྱི་ཚོགས་དུས་བབ་སྤྱིའི་ཆར་བརྟན་ལྷིང་ཡོད་མོད། འོན་ཀྱང་བརྟན་ལྷིང་མེད་པའི་རྒྱུ་རྐྱེན་སྔར་བཞིན་གནས་ཡོད་པ་དང་ལྷག་དོན་དུ་ཏང་གི་ཚོགས་ཆེན་བཅོ་བརྒྱད་པ་འཚོག་ཉེར་ཡོད་པ་དང་བསྟུན་ནས་ཏཱ་ལའི་རུ་ཚོགས་དང་ནུབ་ཕྱོགས་དགྲ་ཡའི་ཕྱོགས་གཏོགས་ཀྱིས་ཆོས་ལུགས་དང་འགྲོ་བ་མིའི་ཐོབ་ཐང་ཟེར་བ་སོགས་ལ་ཁ་གཡར་ཏེ་མུ་མཐུད་ང་ཚོར་དཀའ་གནད་བཟོ་བ་དང་ཇུས་ངན་སྣ་ཚོགས་བཤམས་ཏེ་དོན་རྐྱེན་སློང་གི་ཡོད། དགོན་སྡེར་བཅའ་སྡོད་ལས་དོན་ཚོགས་ཆུང་གིས་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་ཡུན་རིང་རང་བཞིན་དང་། ཪྙོག་འཛིང་རང་བཞིན། རྣོ་ངར་རང་བཞིན་བཅས་ལ་ངོས་འཛིན་གཏིང་ཟབ་བྱས་ཏེ་ད་ཡོད་ཀྱི་ལས་ཀའི་རྨང་གཞིའི་ཐོག་ཉམས་མྱོང་ཕྱོགས་སྡོམ་དང་གྲུབ་འབྲས་དར་སྤེལ་བཏང་ནས་དགོན་སྡེའི་དོ་དམ་གྱི་ཕུགས་ཕན་ལམ་སྲོལ་འཛུགས་རྒྱུར་སྔར་བས་སྐུལ་འདེད་གཏོང་བ་དང་ལས་དོན་ཁག་མུ་མཐུད་དམ་འཛིན་ཡག་པོ་བྱས་ཏེ་མེས་རྒྱལ་གཅིག་གྱུར་སྲུང་སྐྱོང་དང་མི་རིགས་ཁ་ཕྲལ་གཏོང་བར་ངོ་རྒོལ། རང་ལྗོངས་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་བ་བཅས་ཀྱི་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་དགོས་ཞེས་ནན་བཤད་གནང་བ་རེད།