བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། རྒྱལ་ཡོངས་ཀྱི་མཐོ་རྒྱུགས་དེ་ཟླ་6ཚེས་7ཉིན་ལྷ་སར་དངོས་སུ་གཏོང་འགོ་ཚུགས་པ་དང་རང་ལྗོངས་ཀྱི་ས་ཁུལ (གྲོང་ཁྱེར )ཁག་གི་རྒྱུགས་སྤྲོད་སློབ་མ་19008ཀྱིས་ཕུགས་བསམ་དང་འདུན་པ་ཆེན་པོ་འཆང་བཞིན་དུ་རྒྱུགས་ཁུལ་ཁག་ལ་འདུ་འཛོམས་ཀྱིས་མཐོ་རྒྱུགས་ནང་ཞུགས།

    ཕྱི་དྲོ་རང་སྐྱོང་ལྗོངས་ཏང་ཨུད་དང་སྲིད་གཞུང་དང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་རྒྱ་ཆེའི་ཡིག་རྒྱུགས་སྤྲོད་མཁན་སློབ་མ་ཚོར་རེ་བ་ཚད་མེད་དང་ཐུགས་ཁུར་ཟབ་མོ་གནང་ལུགས་མཚོན་པར་བྱེད་ཆེད་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་སྔ་རྗེས་སུ་ལྷ་ས་གྲོང་ཁྱེར་དམའ་རིམ་སློབ་འབྲིང་དང་པོའི་ཡིག་རྒྱུགས་ཁུལ་གྱི་ལྟ་སྐུལ་ཚོད་འཛིན་ཁང་དང་རང་སྐྱོང་ལྗོངས་རྒྱལ་ཁབ་སློབ་གསོ་རྒྱུགས་སྤྲོད་ལས་དོན་བཀོད་འདོམས་ལྟེ་གནས་སུ་ཕེབས་ནས་དྲ་བ་བརྒྱུད་ལྷོ་ཁ་ས་ཁུལ་དང་བོད་ལྗོངས་གོར་མོ་གཞུང་དོན་ཁང་གི་རྒྱུགས་ཤོག་གསང་སྲུང་ཁང་དང་། ལྷ་ས་གྲོང་ཁྱེར་དང་། ཆབ་མདོ། ནག་ཆུ། གཞིས་རྩེ། ལྷོ་ཁ། ཉིང་ཁྲི། མངའ་རིས་བཅས་ས་ཁུལ་དང་དེ་བཞིན་བོད་ལྗོངས་མི་རིགས་སློབ་གླིང་དང་བོད་ལྗོངས་གོར་མོ་གཞུང་དོན་ཁང་སོགས་ཡིག་རྒྱུགས་གཏོང་ཁུལ་ཁག་གཅིག་གི་ཡིག་རྒྱུགས་འགོ་ཚུགས་པའི་གནས་ཚུལ་ལ་སྐོར་ཞིབ་གནང་བ་དང་རང་ལྗོངས་ཀྱི་མཐོ་རྒྱུགས་ལས་དོན་ལ་ཞིབ་བཤེར་མཛུབ་ཁྲིད་གནང་བ་དང་འབྲེལ་བཪྙན་ཤེལ་བརྒྱུད་ལྗོངས་ཡོངས་ཀྱི་ས་ཁུལ (གྲོང་ཁྱེར )ཁག་གི་སློབ་གསོའི་རྒྱུགས་སྤྲོད་ལས་དོན་བཀོད་འདོམས་ལྟེ་གནས་ལ་བླང་བྱ་བཏོན་གནང་བ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་མོང་ཏེ་ལི་དང་རང་སྐྱོང་ལྗོངས་སྲིད་གཞུང་ཏང་ཙུའི་ཁོངས་མི་དྲུང་ཆེ་ཀའོ་དབྱང་གཉིས་ཀྱིས་མཉམ་དུ་སྐོར་ཞིབ་གནང་བ་རེད། རང་སྐྱོང་ལྗོངས་སློབ་གསོ་རྒྱུགས་སྤྲོད་ཁང་གི་འགན་ཁུར་བློ་མཐུན་གྱིས་ཞུས་པའི་རང་ལྗོངས་ཀྱི་2012ལོའི་མཐོ་རྒྱུགས་ལས་དོན་གྱི་སྙན་སེང་གསན་རྗེས་པད་མ་འཕྲིན་ལས་ཀྱིས་མཐོ་རྒྱུགས་ནི་མི་དམངས་མང་ཚོགས་ཀྱི་འཚོ་བའི་ཁྲོད་ཀྱི་དོན་ཆེན་ཞིག་ཡིན་པས་མཐོ་རྒྱུགས་ལས་དོན་ཡག་པོ་བསྒྲུབ་རྒྱུ་དེ་སྤྱི་ཚོགས་ཀྱི་ཞི་མཐུན་བརྟན་ལྷིང་དང་འབྲེལ་བ་ཡོད་ལ་རྒྱལ་ཁབ་ཀྱིས་ཤེས་ལྡན་མི་སྣ་འདེམས་པ་དང་སློབ་གསོའི་བྱ་གཞག་ཚན་རིག་དང་མཐུན་པའི་ངང་འཕེལ་རྒྱས་འགྲོ་རྒྱུ་དང་ཡང་འབྲེལ་བ་ཡོད།

    རང་སྐྱོང་ལྗོངས་ཏང་ཨུད་དང་སྲིད་གཞུང་གིས་སྤྱིར་བཏང་མཐོ་རིམ་སློབ་གྲྭའི་སློབ་བསྡུའི་ཡིག་རྒྱུགས་ལས་དོན་ལ་ཚད་མཐོའི་མཐོང་ཆེན་བྱས་ཏེ་འགོ་ཁྲིད་གཙོ་བོ་དང་ལས་བགོས་འགོ་ཁྲིད་ཀྱིས་ཆེད་མངགས་འདི་ལོའི་སློབ་བསྡུའི་ཡིག་རྒྱུགས་ལས་དོན་ཡག་པོ་བསྒྲུབ་རྒྱུའི་ཐད་གལ་ཆེའི་མཆན་བཀོད་མཛུབ་སྟོན་གནང་ཡོད། ལྗོངས་ཡོངས་ཀྱི་ས་ཁུལ་ཁག་དང་སྡེ་ཚན་ཁག་གིས་མཐོ་རྒྱུགས་ཀྱི་སྒྲིག་འཛུགས་ལག་བསྟར་དང་ཡིག་རྒྱུགས་བདེ་འཇགས་ལས་དོན་ལ་ཚད་མཐོའི་མཐོང་ཆེན་བྱས་ནས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་འབྲེལ་ཡོད་མཛུབ་སྟོན་དགོངས་དོན་ལག་བསྟར་ནན་ཏན་བྱས་ཏེ “ཡོངས་བསྒྲགས་དང་། བདེ་འཇགས། གཞུང་དྲང་། དྲང་གཞག ཚད་ལྡན། བརྟན་པོ ”བཅས་ཀྱི་རྩ་དོན་ལྟར་ཡིག་རྒྱུགས་ཀྱི་སྒྲིག་ལམ་ནན་པོ་ཡོང་བ་བྱེད་པ་དང་། བདེ་འཇགས་གསང་སྲུང་གི་ལས་དོན་ཡག་པོ་སྒྲུབ་པ། མཐོ་རྒྱུགས་ཀྱི་ཟུར་བཅོལ་ལམ་ལུགས་ལག་ལེན་ནན་པོ་བསྟར་བ། མཐོ་རྒྱུགས་ཀྱི་སྒྲིག་འཛུགས་ལག་བསྟར་གྱི་བརྒྱུད་རིམ་ནན་པོ་དང་ཚད་ལྡན་ཡོང་བ་བྱེད་པ། མཐོ་རྒྱུགས་ཀྱི་ལས་ཀའི་འགན་འཁྲི་བདའ་འདེད་གཏོང་བའི་ལམ་ལུགས་དང་ཆ་འཕྲིན་སྙན་ཞུའི་ལམ་ལུགས་དོན་འཁྱོལ་ནན་ཏན་བྱེད་པ། འཕྲལ་སྡོམ་ལས་དོན་གྱི་སྔོན་བཀོད་འཆར་གཞི་འཐུས་སྒོ་ཚང་དུ་གཏོང་བ། སློབ་བསྡུའི་ཡིག་རྒྱུགས་བརྒྱུད་རིམ་གྱི་ལྟ་ཞིབ་དང་ཞིབ་བཤེར་ལ་ཤུགས་སྣོན་རྒྱག་པ་བཅས་བྱས་ཏེ་ལྗོངས་ཡོངས་ཀྱི་རྒྱ་ཆེའི་རྒྱུགས་སྤྲོད་སློབ་མར་བདེ་འཇགས་དང་། ཞི་མཐུན། གོ་རིམ་ལྡན་པ། གཞུང་དྲང་བཅས་ཀྱི་ཡིག་རྒྱུགས་ཁོར་ཡུག་ཅིག་བཏོད་དེ་མཐོ་རིམ་སློབ་གྲྭའི་སློབ་བསྡུའི་རྒྱུགས་སྤྲོད་ལས་དོན་བརྟན་པོ་དང་གོ་རིམ་ལྡན་པའི་ངང་སྤེལ་རྒྱུའི་འགན་ལེན་བྱེད་དགོས་ཞེས་མཛུབ་སྟོན་གནང་བ་དང་། པད་མ་འཕྲིན་ལས་ཀྱིས་ད་དུང་ལྗོངས་ཡོངས་ཀྱི་རྒྱ་ཆེའི་རྒྱུགས་སྤྲོད་སློབ་མར་རྒྱུགས་སྤྲོད་ཀྱི་གྲུབ་འབྲས་བཟང་པོ་ཐོབ་པར་བྱས་ནས་རང་ཉིད་ཀྱི་ཕུགས་བསམ་ཆེན་པོ་མངོན་འགྱུར་ཡོང་བ་བྱེད་དགོས་པའི་ཐུགས་རེ་གནང་བ་རེད།

    ཤེས་རྟོགས་བྱུང་བར་གཞིགས་ན། 2012ལོར་ལྗོངས་ཡོངས་སུ་མི་19008ཀྱིས་མཐོ་རྒྱུགས་ནང་ཞུགས་རྒྱུའི་མིང་ཐོ་བཀོད་པ་དེའི་ནང་སྤྱིར་བཏང་གི་རྒྱུགས་སྤྲོད་སློབ་མ་16341དང་ཁ་གཏད་མཐོ་རིམ་ལས་རིགས་སློབ་གྲྭ་སོགས་རྒྱུགས་སྤྲོད་སློབ་མ་གཞན་དག་2667ཡོད་པ་དང་། སྤྱིར་བཏང་གི་རྒྱུགས་སྤྲོད་སློབ་མའི་ཁྲོད་གྲངས་ཉུང་མི་རིགས་ཀྱི་རྒྱུགས་སྤྲོད་སློབ་མ་14531དང་རྒྱ་རིགས་ཀྱི་རྒྱུགས་སྤྲོད་སློབ་མ་1810ཡོད་པ། རིག་གནས་ལོ་རྒྱུས་རིགས་ཀྱི་རྒྱུགས་སྤྲོད་སློབ་མ་7987དང་རང་བྱུང་རིག་པ་དང་བཟོ་སྐྲུན་རིག་པའི་རིགས་ཀྱི་རྒྱུགས་སྤྲོད་སློབ་མ་8354ཡོད་པ་རེད།

    རང་སྐྱོང་ལྗོངས་དང་དེ་བཞིན་ལྷ་ས་གྲོང་ཁྱེར་གྱི་འབྲེལ་ཡོད་འགན་འཁུར་བློ་མཐུན་མཉམ་དུ་ཕེབས་ཡོད་པ་རེད།