ཟླ་6ཚེས་4ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་རང་སྐྱོང་ལྗོངས་བརྟན་ལྷིང་སྲུང་སྐྱོང་ལས་དོན་བཀོད་འདོམས་པུའི་སྤྱི་ཁྱབ་བཀོད་འདོམས་པ་ཧའོ་ཕུང་གིས་ས་གནས་ས་ཐོག་ཏུ་ལྷ་ས་གྲོང་ཁྱེར་གྱི་བརྟན་ལྷིང་སྲུང་སྐྱོང་ལས་དོན་ལ་ཞིབ་བཤེར་གནང་རྗེས་ས་ཁུལ་དང་གྲོང་ཁྱེར་ཁག་གི་འགན་འཁུར་བློ་མཐུན་གཙོ་བོ་དང་བཪྙན་འཕྲིན་འབྲེལ་མཐུད་ཀྱིས་ཉེ་དུས་ཀྱི་བརྟན་ལྷིང་སྲུང་སྐྱོང་ལས་དོན་ཡག་པོ་བསྒྲུབ་རྒྱུའི་སྐོར་གྱི་ཧྲུའུ་ཅི་ཁྲེན་ཆོན་གོའི་མཆན་བཀོད་མཛུབ་སྟོན་གལ་ཆེའི་དགོངས་དོན་བརྒྱུད་བསྒྲགས་དང་། ས་ཁུལ་དང་གྲོང་ཁྱེར་ཁག་གི་བརྟན་ལྷིང་སྲུང་སྐྱོང་བྱེད་ཐབས་དོན་འཁྱོལ་བྱེད་ཚུལ་ལ་ཞིབ་བཤེར་དང་ལྟ་སྐུལ་མཛུབ་ཁྲིད་གནང་བ་མ་ཟད་མིག་སྔའི་ལྗོངས་ཡོངས་ཀྱི་བརྟན་ལྷིང་སྲུང་སྐྱོང་ལས་དོན་ཡག་པོ་བསྒྲུབ་རྒྱུའི་སྐོར་ཡང་བསྐྱར་ནན་བཤད་དང་བཀོད་སྒྲིག་ཀྱང་གནང་བ་རེད།
རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷ་དང་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ཆབ་མདོ་ས་ཨུད་ཀྱི་ཧྲུའུ་ཅི་ནོར་བུ་དོན་གྲུབ་གཉིས་རང་གནས་སའི་ས་ཁུལ་དང་གྲོང་ཁྱེར་དུ་བཪྙན་འཕྲིན་འབྲེལ་མཐུད་ནང་སོ་སོར་ཞུགས་ཤིང་། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཏེང་ཞའོ་ཀང་ཡང་ཞུགས་པ་རེད།
ཧའོ་ཕུང་གིས་དང་ཐོག་བཪྙན་འཕྲིན་འབྲེལ་མཐུད་བརྒྱུད་ས་ཁུལ་དང་གྲོང་ཁྱེར་ཁག་གི་བརྟན་ལྷིང་སྲུང་སྐྱོང་བཀོད་འདོམས་པུའི་ལས་རེས་གནས་ཚུལ་ལ་ཞིབ་བཤེར་བྱས་ནས་ས་ཁུལ་དང་གྲོང་ཁྱེར་ཁག་གི་བརྟན་ལྷིང་སྲུང་སྐྱོང་ལས་དོན་གནས་ཚུལ་སྐོར་གྱི་སྙན་ཞུ་གསན་པ་དང་།
མིག་སྔར་རང་ལྗོངས་ཀྱི་ས་ཁུལ་དང་གྲོང་ཁྱེར་ཁག་གིས་ཉེ་དུས་ཀྱི་བརྟན་ལྷིང་སྲུང་སྐྱོང་ལས་དོན་ཡག་པོ་བསྒྲུབ་རྒྱུའི་སྐོར་གྱི་རང་སྐྱོང་ལྗོངས་ཏང་ཨུད་དང་སྲིད་གཞུང་དང་རང་སྐྱོང་ལྗོངས་བརྟན་ལྷིང་སྲུང་སྐྱོང་བཀོད་འདོམས་པུའི་བཀོད་སྒྲིག་བླང་བྱ་རབ་དང་རིམ་པ་ལག་བསྟར་དོན་འཁྱོལ་གཏིང་ཟབ་བྱེད་ཅིང་། ས་ཁུལ་ཁག་གི་དངོས་ཡོད་དང་ཟུང་འབྲེལ་དམ་ཟབ་བྱས་ཏེ་རིམ་པ་མང་བ་དང་། ཕྱོགས་མང་བ། གནད་ཁྱོན་ཟུང་འབྲེལ་བཅས་ཀྱི་བརྟན་ལྷིང་སྲུང་སྐྱོང་ལས་དོན་གྱི་མ་ལག་སྒོ་ཀུན་ནས་འཛུགས་བཞིན་ཡོད་པ་དང་། ལྷ་ས་གྲོང་ཁྱེར་གྱིས་ས་ག་ཟླ་བའི་ཆོས་ལུགས་བྱེད་སྒོ་སྤེལ་ཡུལ་དུ་མི་ཅུང་མང་པོ་ཡོད་པའི་གནས་ཚུལ་ལ་དམིགས་ནས་ནན་ཏན་ངང་ལས་དོན་གྱི་སྔོན་ཇུས་བཟོས་ཤིང་། ཞབས་ཞུ་དོ་དམ་གྱི་ལས་དོན་ཁག་ཡག་པོ་སྒྲུབ་པའི་ཁར་སྐོར་ལམ་གཙོ་བོ་ཁག་གི་འགྲིམ་འགྲུལ་ལམ་སྟོན་ལ་དུས་ཐོག་ཏུ་ཤུགས་སྣོན་བརྒྱབ་ནས་ས་གནས་ས་ཐོག་གི་སྒྲིག་ཁྲིམས་སྲུང་སྐྱོང་གིས་རྒྱུན་ལྡན་གྱི་ཆོས་ལུགས་བྱེད་སྒོ་གོ་རིམ་ལྡན་པའི་ངང་སྤེལ་རྒྱུ་འགན་ལེན་བྱེད་ཀྱི་ཡོད་པ་རེད།
ཧའོ་ཕུང་གིས་ས་ཁུལ་དང་གྲོང་ཁྱེར་ཁག་གི་བརྟན་ལྷིང་སྲུང་སྐྱོང་བྱེད་ཐབས་དོན་འཁྱོལ་བྱེད་ཚུལ་ལ་ཁས་ལེན་གང་ལེགས་གནང་བ་དང་འབྲེལ་རང་སྐྱོང་ལྗོངས་ཏང་ཨུད་དང་སྲིད་གཞུང་དང་རང་སྐྱོང་ལྗོངས་བརྟན་ལྷིང་སྲུང་སྐྱོང་བཀོད་འདོམས་པུའི་ཚབ་ཞུས་ཏེ་བརྟན་ལྷིང་སྲུང་སྐྱོང་གི་འཐབ་ཕྱོགས་དང་པོར་འབད་འཐབ་བྱེད་བཞིན་པའི་རིམ་ཁག་འགོ་ཁྲིད་ལས་བྱེད་པ་དང་། ལས་འགན་སྒྲུབ་མཁན་དཔུང་སྡེའི་དཔོན་དམག སྲིད་ཁྲིམས་ལས་བྱེད་པ་དང་ཉེན་རྟོག་པ། ལས་བྱེད་པ་དང་ལས་བཟོ། གྲོང་ཚོ་དང་དགོན་སྡེར་བཅའ་སྡོད་ལས་དོན་མི་སྣ་བཅས་ལ་བྱམས་བརྩེའི་འཚམས་འདྲི་གནང་བའི་ཁར་སྙིང་ཐག་པ་ནས་ཐུགས་རྗེ་ཆེ་ཡང་ཞུས་གནང་བ་རེད།
ཧའོ་ཕུང་གིས་རིམ་ཁག་འགོ་ཁྲིད་དང་ལས་བྱེད་པར་འགན་འཁྲི་དང་པོའི་འདུ་ཤེས་བརྟན་པོའི་ངང་ཆགས་པ་བྱས་ནས་འགན་འཁྲི་གཙང་སྒྲུབ་དང་། སྣེ་ཁྲིད་དེ་མིག་དཔེ་སྟོན་པ། ལྟ་སྐུལ་ཞིབ་བཤེར་བྱེད་པ། སྒྲིག་ཁྲིམས་ནན་པོར་སྲུང་བ་བཅས་བྱས་ཏེ་བཟོས་ཟིན་པའི་བརྟན་ལྷིང་སྲུང་སྐྱོང་གི་བྱེད་ཐབས་དང་འགན་འཁྲི་ཁག་དོན་འཁྱོལ་བྱེད་རྒྱུར་སྐུལ་འདེད་གཏོང་རྒྱུ་དང་། ས་ཁུལ་དང་གྲོང་ཁྱེར་ཁག་གི་སྡེ་ཚན་ཁག་དང་། རིམ་ཁག་སྲིད་ཁྲིམས་ལས་ཁུངས། ལས་འགན་སྒྲུབ་མཁན་དཔུང་སྡེ། གྲོང་ཚོ་དང་དགོན་སྡེར་བཅའ་སྡོད་སྟོབས་ཤུགས། གཞི་རིམ་བདེ་སྲུང་རྩ་འཛུགས་བཅས་ལ་ངེས་པར་དུ་ལས་དོན་མི་སྣ་ཚང་མ་སོ་སོའི་ལས་གནས་ཐོག་ཡོད་པ་དང་། ལས་འགན་ནན་པོ་སྒྲུབ་པ། ལས་རེས་དང་སྣེ་ཁྲིད་ལ་ཤུགས་སྣོན་རྒྱག་པ། མཉམ་འགོག་བདེ་སྲུང་ལམ་ལུགས་ལ་ཤུགས་སྣོན་རྒྱག་པ་བཅས་བྱས་ནས་འཕྲལ་སྡོམ་དང་ཐོལ་བྱུང་དོན་རྐྱེན་ཐག་གཅོད་བྱེད་པའི་གྲ་སྒྲིག་ཡག་པོ་བྱས་ཏེ་དགྲ་ཡའི་ཕྱོགས་གཏོགས་ལ་གོ་སྐབས་གཏན་ནས་མི་སྤྲོད་པ་དང་རང་ལྗོངས་ཀྱི་བརྟན་ལྷིང་ཞི་མཐུན་གྱི་དུས་བབ་ཡག་པོར་ཁ་ཕྲལ་བས་གཏོར་བཤིག་གཏན་ནས་གཏོང་དུ་མི་འཇུག་པར་ལྗོངས་ཡོངས་སུ་དོན་རྐྱེན་ཆེ་འབྲིང་ཆུང་གསུམ་གཅིག་ཀྱང་མི་ཐོན་པའི་འགན་ལེན་གྱིས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་ཆེད་ང་ཚོས་འབུལ་འོས་པའི་ལེགས་སྐྱེས་འབུལ་རྒྱུའི་བླང་བྱ་བཏོན་གནང་བ་རེད།
རང་སྐྱོང་ལྗོངས་ཀྱི་འགོ་ཁྲིད་ལི་ཀྲའོ་དང་། ཀྲང་ཧྲི་ཕིན། ཀུའོ་དབྱི་ལི། ཨོ་ལོ་བུ་ཆུང་། ཁྱུང་སྲས། ཝང་རུའེ་ལེན་བཅས་ཞུགས་ཡོད་པ་རེད།