ཟླ་5ཚེས་31ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་སྲིད་གཞུང་གི་རྒྱུན་ལས་ཚོགས་འདུ་ཐེངས་དགུ་པ་གཙོ་སྐྱོང་གནང་ནས་འཚོགས་ཏེ་ཞིང་ལས་འཕྲུལ་ཆས་ཅན་འཕེལ་རྒྱས་མགྱོགས་པོ་གཏོང་རྒྱུའི་སྲིད་ཇུས་དང་བྱ་ཐབས་ཁག་ཞིབ་འཇུག་བྱས་ནས་བཟོས་པ་རེད།
ཚོགས་འདུའི་ཐོག 《ཞིང་ལས་འཕྲུལ་ཆས་ཅན་དང་ཞིང་འཕྲུལ་བཟོ་ལས་ལེགས་ལ་མྱུར་བའི་སྒོ་ནས་འཕེལ་རྒྱས་གཏོང་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གི་བསམ་འཆར 》གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱེད་པ་དང་། རང་ལྗོངས་ཀྱི་ཞིང་ལས་འཕྲུལ་ཆས་ཅན་གྱི་འཕེལ་རྒྱས་ལ་སྐུལ་འདེད་མགྱོགས་པོ་གཏོང་བ། ཞིང་འབྲོག་མང་ཚོགས་ཀྱི་ཐོན་སྐྱེད་དང་འཚོ་བའི་ཆ་རྐྱེན་ལེགས་སུ་གཏོང་བ། ཞིང་ལས་ཕྱོགས་བསྡུས་ཅན་གྱི་ཐོན་སྐྱེད་ནུས་པ་སྔར་བས་ཆེ་རུ་གཏོང་བ། ཞིང་ལས་དེང་རབས་ཅན་གྱི་འཛུགས་སྐྲུན་ལ་སྐུལ་འདེད་གཏོང་བ་བཅས་ཀྱི་ཆེད་དུ 《ཞིང་ལས་འཕྲུལ་ཆས་ཅན་འཕེལ་རྒྱས་མགྱོགས་པོ་གཏོང་རྒྱུའི་སྐོར་གྱི་བོད་རང་སྐྱོང་ལྗོངས་མི་དམངས་སྲིད་གཞུང་གི་བསམ་འཆར 》བཏོན་པ་དང་རང་ལྗོངས་འདི་ཉིད་སླད་ཕྱིན་དུས་ཡུན་རིང་པོ་ཞིག་ནང་ཞིང་ལས་འཕྲུལ་ཆས་ཅན་འཕེལ་རྒྱས་གཏོང་རྒྱུར་འདེགས་སྐྱོར་མཁོ་འདོན་གྱི་སྲིད་ཇུས་དང་བྱ་ཐབས་བཟོས་པ་དེ་ནི་ཧ་ཅང་དགོས་ངེས་ཤིག་རེད་ཅེས་བསྟན་ཡོད་པ་རེད།
ཚོགས་འདུའི་ཐོག་ཞིང་ལས་འཕྲུལ་ཆས་ཅན་འཕེལ་རྒྱས་གཏོང་རྒྱུའི་ལས་འགན་གཙོ་བོ་ནི་ཞིང་ལས་ཐོན་སྐྱེད་འཕྲུལ་ཆས་ཅན་གྱི་ཆུ་ཚད་ཁྱོན་ཡོངས་ནས་མཐོ་རུ་གཏོང་བ་དང་། ཞིང་འཕྲུལ་དང་ཞིང་ལས་ལག་རྩལ་མཐུན་སྦྱོར་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ། ཞིང་འཕྲུལ་སྤྱི་ཚོགས་ཅན་གྱི་ཞབས་ཞུའི་ནུས་པ་འཛུགས་སྐྱོང་ལ་སྔར་བས་ཤུགས་སྣོན་རྒྱག་པ། ཞིང་འཕྲུལ་ཅན་གྱི་དཔེ་སྟོན་ཁུལ་འཛུགས་སྐྱོང་ལ་སྐུལ་འདེད་གཏིང་ཟབ་གཏོང་བ། ཞིང་འཕྲུལ་སྒྲིག་ཆས་ཀྱི་གྲུབ་ཆ་ལེགས་སྒྲིག་དང་རིམ་སྤོར་བྱ་རྒྱུར་མུ་མཐུད་སྐུལ་འདེད་གཏོང་བ་བཅས་བྱས་ནས་ཞིང་འཕྲུལ་གྱི་བདེ་འཇགས་དང་། བེད་སྤྱོད། ལྟ་སྐུལ། དོ་དམ་བཅས་ལ་ཤུགས་སྣོན་རྒྱག་དགོས་པ་ཁ་གསལ་བཏོན་ཡོད་པ་རེད།
ཚོགས་འདུའི་ཐོག་ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་ལ་ཡུལ་བབ་དང་བསྟུན་པ་དང་། རིགས་དབྱེའི་མཛུབ་ཁྲིད་བྱེད་པ། གཙོ་གནད་མངོན་གསལ་དོད་པོ་ཡོང་བ་བྱེད་པ། གཅིག་གྱུར་འཆར་འགོད་དང་སྤྱི་ཡོངས་ལ་ལྟ་རྟོག་བྱེད་པ། ཁྲོམ་ར་གཙོ་ཁྲིད་དུ་བྱེད་པ། སྲིད་གཞུང་གིས་རོགས་སྐྱོར་བྱེད་པ། ནུས་པས་ལྕོགས་ཚོད་སྒྲུབ་པ། དངོས་ཕན་དོན་གཉེར་བྱེད་པ་བཅས་འཕེལ་རྒྱས་ཀྱི་རྩ་དོན་ལ་གཞིགས་ནས་རྩ་འཛུགས་ཀྱི་འགོ་ཁྲིད་ལ་ཤུགས་སྣོན་རྒྱག་པ་དང་། ནོར་སྲིད་ཀྱི་རོགས་སྐྱོར་བྱེད་ཤུགས་ཆེ་རུ་གཏོང་བ། ཞིང་འཕྲུལ་དོ་དམ་མ་ལག་འཛུགས་པ་དང་འཐུས་ཚང་དུ་གཏོང་བ། དངུལ་རྩའི་ཞབས་ཞུ་ཤུགས་ཆེར་དང་ལེགས་སུ་གཏོང་བ། ཞིང་འཕྲུལ་ཅན་གྱི་རྨང་གཞིའི་སྒྲིག་བཀོད་འཛུགས་སྐྲུན་ཤུགས་ཆེན་བཅས་བྱས་ནས་རང་ལྗོངས་ཀྱི་སྲོལ་རྒྱུན་ཞིང་ལས་དེ་དེང་རབས་ཞིང་ལས་ལ་སྒྱུར་རྒྱུར་སྐུལ་འདེད་ཧུར་ཐག་གཏོང་དགོས་པའི་བླང་བྱ་བཏོན་པ་རེད།
ཚོགས་འདུའི་ཐོག 《ཞིང་ལས་འཕྲུལ་ཆས་ཅན་འཕེལ་རྒྱས་མགྱོགས་པོ་གཏོང་རྒྱུའི་སྐོར་གྱི་བོད་རང་སྐྱོང་ལྗོངས་མི་དམངས་སྲིད་གཞུང་གི་བསམ་འཆར 》ལ་གྲོས་ཞིབ་བྱས་པ་དང་འབྲེལ་རྩ་བའི་ཆ་ནས་གྲོས་འཆམ་ཡང་བྱུང་ནས་དེ་བཟོ་བཅོས་རྒྱག་པ་དང་འཐུས་ཚང་དུ་བཏང་རྗེས་གཤམ་སྤྲོད་བྱ་རྒྱུའི་གཏན་འབེབས་བྱས་པ་རེད།
ཚོགས་འདུའི་ཐོག་ད་དུང་དོན་ཚན་གཞན་དག་ལའང་ཞིབ་འཇུག་བྱས་པ་རེད།