ས་ག་ཟླ་བའི་ཆོས་ལུགས་བྱེད་སྒོའི་རིང་ལྗོངས་ཡོངས་དང་ལྷག་པར་དུ་ལྷ་ས་གྲོང་ཁྱེར་གྱི་སྤྱི་ཚོགས་ཞི་མཐུན་དང་བརྟན་ལྷིང་ཡོང་རྒྱུ་འགན་ལེན་བྱ་ཕྱིར་ཉིན་ཤས་བསྟུད་མར་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་གིས་སྔ་རྗེས་སུ་ཚོགས་འདུ་སྐོང་ཚོགས་ཐེངས་མང་གནང་བ་དང་འབྲེལ་ས་གནས་ས་ཐོག་ཏུ་ཕེབས་ནས་བརྟན་ལྷིང་སྲུང་སྐྱོང་གི་འབྲེལ་ཡོད་བྱ་ཐབས་དོན་འཁྱོལ་བྱེད་ཚུལ་ལ་ལྟ་སྐུལ་དང་ཞིབ་བཤེར་ཡང་གནང་བ་རེད། ཁོང་གིས་ལྗོངས་ཡོངས་ཀྱི་རིམ་ཁག་ཏང་སྲིད་རྩ་འཛུགས་དང་ཕྱོགས་ཁག་གི་མཉམ་ཟོན་དང་བདེ་འཇགས་སྲུང་སྐྱོབ་སྟོབས་ཤུགས་ཀྱིས་བརྟན་ལྷིང་སྲུང་སྐྱོང་གི་བྱ་ཐབས་སྔར་བས་ཤུགས་ཆེར་བཏང་སྟེ་རྒྱུན་གཏན་གྱི་ཆོས་ལུགས་བྱེད་སྒོ་བདེ་འཇགས་དང་གོ་རིམ་ལྡན་པའི་ངང་སྤེལ་རྒྱུ་འགན་ལེན་དང་། བོད་ཀྱི་སྤྱི་ཚོགས་ཞི་མཐུན་དང་བརྟན་ལྷིང་ཡོང་རྒྱུ་འགན་ལེན་བྱེད་དགོས་ཞེས་ནན་བཤད་གནང་བ་རེད།
རང་སྐྱོང་ལྗོངས་ཀྱི་འགོ་ཁྲིད་མགོན་པོ་བཀྲ་ཤིས་དང་། ཆེ་དགྲ་ལྷ། ཏུང་ཡུན་ཧུའུ་བཅས་ཚོགས་འདུར་ཞུགས་པའམ་ཡང་ན་ཞིབ་བཤེར་ལ་ཕེབས་རོགས་ཞུས་པ་རེད།
རང་སྐྱོང་ལྗོངས་ཀྱི་བརྟན་ལྷིང་སྲུང་སྐྱོང་ལས་དོན་བཀོད་འདོམས་པུའི་ཆེད་དོན་ཚོགས་འདུ་དང་དེ་བཞིན་ལྗོངས་ཡོངས་ཀྱི་བརྟན་ལྷིང་སྲུང་སྐྱོང་བཪྙན་འཕྲིན་ཚོགས་འདུ་ཁག་སོ་སོ་གཙོ་སྐྱོང་གནང་སྐབས་ཧའོ་ཕུང་གིས་ས་ག་ཟླ་བའི་ཆོས་ལུགས་བྱེད་སྒོའི་རིང་བརྟན་ལྷིང་སྲུང་སྐྱོང་ལས་དོན་སླར་ཡང་བཀོད་སྒྲིག་གནང་ཞིང་། ཁོང་གིས་དེང་སྐབས་རང་ལྗོངས་འདི་ཉིད་དཔལ་འབྱོར་མགྱོགས་མྱུར་འཕེལ་རྒྱས་དང་། སྤྱི་ཚོགས་རྒྱུན་བསྲིང་བརྟན་ལྷིང་། མི་དམངས་བདེ་སྡོད་ལས་བརྩོན་བཅས་ཡིན་ཡང་ཞི་མཐུན་མིན་པ་དང་བརྟན་ལྷིང་མིན་པའི་རྒྱུ་རྐྱེན་སྔར་བཞིན་གནས་པ་དང་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་དང་སྤྱི་ཚོགས་བརྟན་ལྷིང་སྲུང་སྐྱོང་བྱེད་པའི་དུས་བབ་སྔར་བཞིན་ཛ་དྲག་ཆེ་ལ་ཪྙོག་འཛིང་ཆེན་པོའང་ཡོད། ལོ་གཅིག་དུས་གཅིག་གི་ས་ག་ཟླ་བའི་ཆོས་ལུགས་བྱེད་སྒོ་སྤེལ་བཞིན་ཡོད་པར་བརྟེན་དེང་སྐབས་ཀྱི་བརྟན་ལྷིང་སྲུང་སྐྱོང་ལས་དོན་ཏན་ཏིག་ངང་ཡག་པོ་སྒྲུབ་པ་དང་རྒྱུན་གཏན་གྱི་ཆོས་ལུགས་བྱེད་སྒོའི་གོ་རིམ་ཁྲིམས་ལྟར་སྲུང་སྐྱོང་བྱ་རྒྱུ་དེ་ཏང་གི་ཆོས་དད་རང་མོས་ཀྱི་སྲིད་ཇུས་སྒོ་ཀུན་ནས་ལག་བསྟར་དོན་འཁྱོལ་བྱེད་པའི་ལྡོག་མེད་ཀྱི་བླང་བྱ་ཡིན་ལ་ཡུལ་སྐོར་བ་མང་བའི་དུས་སུ་སྤྱི་ཚོགས་ཀྱི་སྤྱི་པའི་བདེ་འཇགས་འགན་ལེན་བྱེད་པ་དང་། མི་དམངས་མང་ཚོགས་ཀྱི་ཁེ་ཕན་སྲུང་སྐྱོང་བྱེད་པ། བོད་ཀྱི་གཟུགས་བཪྙན་བཟང་པོ་གཏོད་པ་བཅས་ཀྱི་ཕྱི་རོལ་ཡུལ་གྱི་བླང་བྱའང་རེད། རིམ་ཁག་ཏང་སྲིད་རྩ་འཛུགས་དང་འབྲེལ་ཡོད་སྡེ་ཚན་གྱིས་ངེས་པར་དུ་ཚད་མཐོའི་མཐོང་ཆེན་དང་བཀོད་སྒྲིག་ཞིབ་ཚགས་བྱས་ནས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་གཏན་འཁེལ་བའི་བཀོད་སྒྲིག་དང་ཧྲུའུ་ཅི་ཁྲེན་ཆོན་གོའི་གལ་ཆེའི་མཆན་འགོད་མཛུབ་སྟོན་ལག་ལེན་མཐའ་གཅིག་ཏུ་བསྟར་ནས་སྔ་ས་ནས་དམ་འཛིན་དང་། ཆུང་ས་ནས་དམ་འཛིན། མགྱོགས་མྱུར་དམ་འཛིན། དམ་འཛིན་ཡག་པོ་བཅས་བྱ་རྒྱུར་གཞི་ཚུགས་ཏེ་གཙོ་གནད་མངོན་གསལ་དུ་འཇོག་པ་དང་གཅིག་གྱུར་འཆར་འགོད་ངང་དེང་སྐབས་ཀྱི་བརྟན་ལྷིང་སྲུང་སྐྱོང་གི་ལས་དོན་ཁག་ལ་སྐུལ་འདེད་བཏང་ཐོག་ས་ག་ཟླ་བའི་ཆོས་ལུགས་བྱེད་སྒོ་བདེ་འཇགས་ཡིན་ལ་གོ་རིམ་ཡང་ལྡན་པའི་ངང་སྤེལ་རྒྱུ་འགན་ལེན་དང་ལྗོངས་ཡོངས་ཀྱི་སྤྱི་ཚོགས་ཞི་མཐུན་དང་བརྟན་ལྷིང་ཡོང་རྒྱུའི་འགན་ལེན་བྱེད་དགོས་ཞེས་ནན་བཤད་གནང་བ་རེད།
ཧའོ་ཕུང་གིས་རིམ་ཁག་འགོ་ཁྲིད་ལས་བྱེད་པས་བརྟན་ལྷིང་ནི་མཐའ་དག་ལས་ལྷག་པ་ཡིན་པའི་བསམ་བློ་བརྟན་པོ་བཙུགས་ནས་འགན་འཁྲི་ལེགས་གྲུབ་དང་སྔོན་དུ་དཔེ་སྟོན་གྱིས་སྔོན་དུ་གཏན་འཁེལ་བྱས་པའི་བརྟན་ལྷིང་སྲུང་སྐྱོང་གི་བྱ་ཐབས་ཁག་བློ་ཐག་ཆོད་པོའི་ངང་དོན་དངོས་སུ་འཁྱོལ་བ་བྱེད་དགོས། ས་ཁུལ་དང་གྲོང་ཁྱེར་ཁག་དང་། སྡེ་ཚན་ཁག རིམ་ཁག་སྲིད་ཁྲིམས་ལས་ཁུངས། ལས་འགན་སྒྲུབ་མཁན་དཔུང་སྡེ། གྲོང་ཚོ་དང་དགོན་སྡེར་བཅའ་སྡོད་སྟོབས་ཤུགས། གཞི་རིམ་གྱི་བདེ་འཇགས་སྲུང་སྐྱོབ་རྩ་འཛུགས་བཅས་ཀྱིས་ངེས་པར་དུ་ཁོངས་མི་ཚང་མར་ལས་གནས་སུ་ཡོད་པ་བྱས་ཐོག་འགན་འཁྲི་ལེགས་སྒྲུབ་བྱས་ཏེ་ལས་རེས་ལམ་ལུགས་དང་ལས་རེས་སྣེ་ཁྲིད་ལམ་ལུགས་ནན་པོ་བཟོ་བ་དང་། མཉམ་ཟོན་དང་བདེ་འཇགས་སྲུང་སྐྱོབ་ཀྱི་བྱ་ཐབས་ཤུགས་ཆེར་གཏོང་བ། འཕྲལ་སྡོམ་ངང་ཐོལ་བྱུང་དོན་རྐྱེན་ཐག་གཅོད་བྱེད་པའི་གྲ་སྒྲིག་ཡག་པོ་བཅས་བྱས་ནས་དགྲ་ཡའི་ཕྱོགས་གཏོགས་ལ་གོ་སྐབས་གཏན་ནས་མི་སྤྲོད་པ་དང་ཁ་ཕྲལ་པས་རང་ལྗོངས་ཀྱི་བརྟན་ལྷིང་དང་མཐུན་སྒྲིལ་གྱི་རྣམ་པ་ཧ་ཅང་ཡག་པོ་དེར་གཏོར་བཤིག་གཏན་ནས་གཏོང་དུ་འཇུག་མི་ཆོག་པའི་བླང་བྱ་བཏོན་གནང་བ་རེད།
ལྷ་ས་གྲོང་ཁྱེར་སྤྱི་བདེ་ཅུས་ཀྱི་110བཀོད་འདོམས་ལྟེ་གནས་དང་ལྷ་ས་གྲོང་ཁྱེར་གྱི་བརྟན་ལྷང་སྲུང་སྐྱོང་འཐབ་ས་དང་པོའི་བཀོད་འདོམས་པུའུ་རུ་གཟིགས་ཞིབ་གནང་སྐབས་ཧའོ་ཕུང་གིས་ལས་འགན་སྒྲུབ་མཁན་མི་དམངས་ཉེན་རྟོག་པ་དང་ལས་དོན་མི་སྣ་ཡོངས་ལ་བྱམས་བརྩེའི་ངང་གཟིགས་པ་དང་འཚམས་འདྲི་གནང་ཞིང་། ཁོང་གིས་སྤྱི་བདེའི་མི་དམངས་ཉེན་རྟོག་པ་ཡོངས་ཀྱིས་དེང་སྐབས་ཀྱི་བརྟན་ལྷིང་སྲུང་སྐྱོང་ཡག་པོ་བྱ་རྒྱུའི་དོན་སྙིང་གལ་ཆེན་ངོས་འཛིན་གང་ལེགས་ཀྱིས་ཏང་དང་མི་དམངས་ཀྱི་བྱ་གཞག་ལ་ཚད་མཐོའི་འགན་ཁུར་བའི་རྣམ་འགྱུར་གྱི་ཐོག་ནས་དཀའ་སྡུག་ལ་མི་འཛེམས་པ་དང་བསྟུད་མར་དམག་འཐབ་བྱེད་པའི་སྤྱོད་ཚུལ་དར་སྤེལ་གཏོང་བ་དང་གྲོང་ཁྱེར་དྲ་བ་ཅན་དུ་དོ་དམ་བྱེད་པའི་ལེགས་ཆ་འདོན་སྤེལ་གང་ལེགས་བྱས་ནས་དུས་དང་རྣམ་པ་ཀུན་ཏུ་འཕྲལ་སྡོམ་ཐག་གཅོད་ཀྱི་གྲ་སྒྲིག་ཡག་པོ་བྱེད་པ་དང་། ཉེན་བརྡ་དང་ལེན་དང་ཐག་གཅོད་བྱེད་པའི་ལས་ཕྱོད་རྒྱུན་ཆད་མེད་པར་ཆེ་རུ་གཏོང་བ། འགལ་བ་དང་མི་མངོན་པའི་རྐྱེན་ངན་བར་འདུམ་དང་ཐག་གཅོད་ཡག་པོ་བྱེད་པ། དམངས་ལ་སྟབས་བདེ་དང་ཁེ་ཕན་སྐྲུན་པའི་ཞབས་འདེགས་ཡག་པོ་ཞུ་བ། ཉེས་གསོག་ལ་རྡུང་རྡེག་གཏོང་བ་དང་། མི་དམངས་ལ་ཞབས་འདེགས་ཞུ་བ། རྒྱལ་ཁབ་ཀྱི་བདེ་འཇགས་དང་སྤྱི་ཚོགས་བརྟན་ལྷིང་སྲུང་སྐྱོང་བྱེད་པ་བཅས་ཀྱི་ལས་དོན་ཁག་ཏན་ཏིག་ངང་ཡག་པོ་སྒྲུབ་པ་བཅས་ཀྱི་ཐོག་ནས་ཏང་དང་སྲིད་གཞུང་གི་མངགས་བཅོལ་གལ་ཆེན་དང་དེ་བཞིན་མི་རིགས་ཁག་གི་མི་དམངས་ཀྱི་རེ་སྒུག་ཆུད་ཟོས་སུ་མི་གཏོང་བར་དུས་བདེའི་བོད་ལྗོངས་སྐྲུན་ཕྱིར་སྟོབས་ཤུགས་ལེགས་སྐྱེས་སུ་འབུལ་དགོས་ཞེས་ནན་བཤད་གནང་བ་རེད།
ཧའོ་ཕུང་དང་བཅས་པས་ད་དུང་དུས་ཚོད་མི་འདྲ་བར་གཙུག་ལག་ཁང་ཐང་ཆེན་དང་། བར་སྐོར། ཕོ་བྲང་པོ་ཏ་ལའི་ཐང་ཆེན་སོགས་སུ་ཕེབས་ཏེ་ས་གནས་ས་ཐོག་ཏུ་བདེ་འཇགས་དང་མཉམ་ཟོན་ཐད་ཀྱི་འབྲེལ་ཡོད་བྱ་ཐབས་དོན་འཁྱོལ་བྱེད་ཚུལ་ལ་གཟིགས་ཞིབ་གནང་ཞིང་། ལས་འགན་སྒྲུབ་མཁན་མི་དམངས་ཉེན་རྟོག་པ་ཚོས་བདེ་འཇགས་ཞིབ་བཤེར་སྒོ་བཟོས་པ་དང་འཚོལ་ཞིབ་ཐིག་ལེན་ཡོ་བྱད་སྤྱད་དེ་འགྲོ་འོང་བྱེད་མཁན་ལ་ཞིབ་བཤེར་ནན་པོ་བྱེད་ཀྱི་ཡོད་པ་གཟིགས་སྐབས་ཧའོ་ཕུང་གིས་ཁས་ལེན་གང་ལེགས་གནང་ཞིང་། ཁོང་གིས་ས་ག་ཟླ་བའི་ཆོས་ལུགས་བྱེད་སྒོ་སྤེལ་ཡུལ་དུ་དད་ལྡན་མང་ཚོགས་དང་རྒྱལ་ཁབ་ཕྱི་ནང་གི་ཡུལ་སྐོར་བ་མང་པོ་ཡོད། རྒྱལ་སྤྱིའི་ཐོག་ཀུན་སྤྱོད་ཀྱི་བྱེད་ཐབས་གཞིར་བཟུང་སྐད་གྲགས་ལྡན་པའི་ཡུལ་སྐོར་མཛེས་ལྗོངས་ཁུལ་དུ་བདེ་འཇགས་ཞིབ་བཤེར་བྱ་ཐབས་ཤུགས་ཆེར་གཏོང་རྒྱུ་དེ་སྤྱི་པའི་བདེ་འཇགས་ཀྱི་དོན་རྐྱེན་ཐོན་རྒྱུ་ནན་འགོག་དང་མི་དམངས་མང་ཚོགས་ཀྱི་ལུས་སྲོག་དང་རྒྱུ་ནོར་གྱི་བདེ་འཇགས་སྲུང་སྐྱོབ་བྱེད་པར་མེད་དུ་མི་རུང་བ་ཞིག་རེད། ལས་འགན་སྒྲུབ་མཁན་མི་དམངས་ཉེན་རྟོག་པ་ཡོངས་ཀྱིས་མི་དམངས་ལ་ཞབས་འདེགས་ཞུ་བ་དང་སྤྱི་ཚོགས་བརྟན་ལྷིང་སྲུང་སྐྱོང་བྱ་རྒྱུ་དེ་རང་གི་འགན་འཁྲི་ཞིག་ཏུ་བརྩིས་ཏེ་འགན་འཁུར་བསམ་པ་དང་འགན་འཁྲིའི་འདུ་ཤེས་སྔར་བས་བརྟན་པོ་འཛུགས་པ་དང་ཁྲིམས་ལྟར་ཞིབ་བཤེར་ནན་པོ་བྱས་ནས་བདེ་འཇགས་ཐད་ཀྱི་མི་མངོན་པའི་རྐྱེན་ངན་སེལ་བ་དང་མི་རྒྱུན་གོ་རིམ་ལྡན་པའི་ངང་ཁ་ཐོར་དུ་བཏང་སྟེ་འཚང་ཁ་རྒྱག་པ་དང་རྡོག་བརྫིས་ཐེབས་པའི་དོན་རྐྱེན་མི་ཐོན་པ་བྱེད་དགོས། ཡ་རབས་ངང་ལས་སྒྲུབ་དང་ཚད་ལྡན་ངང་ལས་སྒྲུབ་བྱ་རྒྱུ་མཐའ་འཁྱོངས་ཀྱིས་དད་ལྡན་མང་ཚོགས་དང་ཡུལ་སྐོར་བའི་བསམ་གཞིག་དང་རྒྱབ་སྐྱོར་ཐོབ་པ་བྱེད་པ་དང་ཚང་མས་རང་རྟོགས་དང་རང་འགུལ་ངང་བདེ་འཇགས་ཞིབ་བཤེར་དང་ལེན་བྱ་རྒྱུར་སློབ་གསོ་རྒྱག་པ་དང་སྣེ་ཁྲིད་བྱས་ཏེ་སྤྱི་པའི་བདེ་འཇགས་ཀྱི་སྒྲིག་ལམ་ཡག་པོ་ཞིག་ཐུན་མོང་ཐོག་སྲུང་སྐྱོང་བྱེད་དགོས་ཞེས་གསུངས་པ་རེད།
ད་ལོའི་ས་ག་ཟླ་བའི་ཆོས་ལུགས་བྱེད་སྒོ་སྤེལ་འགོ་ཚུགས་ཚུན་གཙུག་ལག་ཁང་དང་ཕོ་བྲང་པོ་ཏ་ལའི་ཐང་ཆེན་སོགས་སྐད་གྲགས་ལྡན་པའི་ཡུལ་སྐོར་མཛེས་ལྗོངས་ཁུལ་དུ་ཡུལ་སྐོར་བ་མང་ཡང་གོ་རིམ་ལྡན་པ་ཞིག་ཡོད་པ་དང་བར་སྐོར་དང་། རྩེ་སྐོར། གླིང་སྐོར་བཅས་སུ་དད་ལྡན་མང་ཚོགས་ཚོས་སྲོལ་རྒྱུན་གོམས་གཤིས་ལྟར་སངས་གཏོང་བ་དང་། སྐོར་བ་རྒྱག་པ། སྨོན་ལམ་འདེབས་པ་བཅས་བྱེད་ཀྱི་ཡོད། དམངས་ཕན་ཞབས་ཞུའི་ཉེན་རྟོག་ས་ཚིགས་དང་ལས་སྒྲུབ་དཔོན་དམག་གི་ཞབས་ཞུའི་ས་ཚིགས་ཁག་ཏུ་སྐོར་བ་རྒྱག་མཁན་མང་ཚོགས་མི་ཉུང་བ་ཞིག་དེར་ཆུ་འཐུང་བ་དང་ངལ་གསོ་རྒྱག་བཞིན་ཡོད་པས་གང་ས་གང་དུ་བརྟན་ལྷིང་འཆམ་མཐུན་གྱི་རྣམ་པས་ཁེངས་ཡོད་པ་རེད།