ཟླ་5ཚེས་23ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་ལྷ་སར་ལན་ཀྲོའུ་དམག་ཁུལ་ཁང་གི་ཆབ་སྲིད་ཨུ་ཡོན་ཧྲང་ཅང་དམག་དཔོན་ཆེ་མོ་ལི་ཁྲང་ཚའེ་དང་ཤིན་ཅང་དམག་ཁུལ་ཁང་གི་སི་ལིང་ཡོན་གཞོན་པ་ཧྲའོ་ཅང་དམག་དཔོན་ཆེ་མོ་ལའེ་ཚེ་དབྱི་བཅས་པ་དང་མཇལ་འཛོམས་གནང་བ་རེད།
ལྗོངས་ཏང་ཨུད་ཀྱི་རྒྱུན་ཨུ་བོད་དམག་ཁུལ་ཁང་གི་སི་ལིང་ཡོན་དབྱང་ཅིན་ཧྲན་དང་། བོད་དམག་ཁུལ་ཁང་གི་ཆབ་སྲིད་ཨུ་ཡོན་ལང་ཡིའུ་ལེའང་། ལྗོངས་ཏང་ཨུད་ཀྱི་རྒྱུན་ཨུ་སྒྲིག་ཨུད་ཀྱི་ཧྲུའུ་ཅི་ཅིན་ཧྲུའུ་པོ། ལྗོངས་ཏང་ཨུད་ཀྱི་རྒྱུན་ཨུ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཏེང་ཞའོ་ཀང་བཅས་མཇལ་འཛོམས་གནང་སྐབས་ལྷན་དུ་ཕེབས་ཡོད་པ་རེད།
པད་མ་འཕྲིན་ལས་ཀྱིས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་ཡི་ཚབ་ཞུས་ནས་ཧྲང་ཅང་དམག་དཔོན་ཆེ་མོ་ལི་ཁྲང་ཚའེ་དང་ཧྲའོ་ཅང་དམག་དཔོན་ཆེ་མོ་ལའེ་ཚེ་དབྱི་བཅས་པར་དགའ་བསུ་ཞུས་གནང་བ་དང་། ལན་ཀྲོའུ་དམག་ཁུལ་ཁང་དང་ཤིན་ཅང་དམག་ཁུལ་ཁང་གིས་བོད་དང་ལྷག་དོན་དུ་མངའ་རིས་ས་ཁུལ་གྱི་འཕེལ་རྒྱས་དང་བརྟན་ལྷིང་གི་བྱ་གཞག་ཁག་ལ་ཚད་མཐོའི་མཐོང་ཆེན་དང་སེམས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཤིང་། རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་སྐོར་ངོ་སྤྲོད་མདོར་བསྡུས་གནང་རྗེས་པད་མ་འཕྲིན་ལས་ཀྱིས་བོད་ནི་མེས་རྒྱལ་གྱི་རྒྱལ་ཁབ་ཀྱི་བདེ་འཇགས་སྲུང་ཡོལ་གལ་ཆེན་ཞིག་ཡིན་པ་དང་། དུས་ཡུན་རིང་པོའི་ནང་བོད་དུ་བཅའ་སྡོད་ལན་ཀྲོའུ་དམག་ཁུལ་ཁང་གི་དཔུང་སྡེས་ཐོག་མཐའ་བར་གསུམ་དུ་མི་དམངས་དམག་དཔུང་གིས་མི་དམངས་ལ་ཞབས་འདེགས་ཞུ་བའི་དམིགས་ཡུལ་མཐའ་འཁྱོངས་ཀྱིས “བོད་སྐྱོད་པ་རྒན་གྲས་ཀྱི་སྙིང་སྟོབས ”རྒྱུན་འཛིན་དང་དར་སྤེལ་བཏང་ཐོག་མང་ཚོགས་ལས་དོན་ཧུར་ཐག་སྤེལ་ཏེ་ས་གནས་འཛུགས་སྐྲུན་ལ་ནུས་ཤུགས་ཡོད་རྒུས་རྒྱབ་སྐྱོར་གནང་བ་དང་ལྷག་དོན་དུ་བརྟན་ལྷིང་སྲུང་སྐྱོང་དང་རང་བྱུང་གནོད་འཚེ་ཚབས་ཆེན་ལ་ཁ་གཏད་གཅོག་པའི་ཁྲོད་དཔའ་ངར་ཆེན་པོས་གདོང་ལེན་པ་བྱེད་པ་དང་སྤྲོ་བ་ཆེན་པོས་ལེགས་སྐྱེས་ཕུལ་ནས་བོད་ཀྱི་དཔལ་འབྱོར་འཕེལ་རྒྱས་དང་། དུས་བབ་བརྟན་ལྷིང་། སྤྱི་ཚོགས་ཡར་ཐོན། མི་རིགས་མཐུན་སྒྲིལ། མཐའ་སྲུང་སྲ་བརྟན་བཅས་ཆེད་མངོན་གསལ་དོད་པའི་ལེགས་སྐྱེས་ཕུལ་ཡོད་པས་ལན་ཀྲོའུ་དམག་ཁུལ་ཁང་གིས་བོད་ཀྱི་འཕེལ་རྒྱས་དང་བརྟན་ལྷིང་ལས་དོན་ལ་མུ་མཐུད་རྒྱབ་སྐྱོར་གནང་ནས་བོད་ཀྱི་མི་རིགས་ཁག་གི་མི་དམངས་ལ་བདེ་སྐྱིད་བསྐྲུན་རྒྱུའི་རེ་བ་ཡོད། རང་སྐྱོང་ལྗོངས་རིམ་ཁག་ཏང་ཨུད་དང་སྲིད་གཞུང་གིས་སྔར་རྒྱུན་བཞིན་བོད་དུ་བཅའ་སྡོད་ལན་ཀྲོའུ་དམག་ཁུལ་ཁང་གི་དཔུང་སྡེའི་ལས་དོན་ལ་རྒྱབ་སྐྱོར་དང་གཞོགས་འདེགས་བྱས་ནས་བཅའ་སྡོད་དང་སྦྱོང་བརྡར་ཐད་ཀྱི་དཀའ་ངལ་ཐག་གཅོད་བྱེད་རོགས་བྱས་ཏེ་གཉིས་བཀུར་མཉམ་གཏོད་དང་མཉམ་སྲུང་གི་བྱེད་སྒོ་ཐུན་མོང་ཐོག་སྤེལ་རྒྱུ་ཡིན། ལྗོངས་ཡོངས་ཀྱི་ཏང་སྲིད་དམག་ཉེན་དམངས་ཀྱིས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་བཏོན་པའི་བརྟན་ལྷིང་སྲུང་སྐྱོང་གི་བྱེད་ཐབས་ཁག་ལག་བསྟར་དོན་འཁྱོལ་གཏིང་ཟབ་ཀྱིས་དམ་འཛིན་སྔ་ཙམ་བྱེད་པ་དང་། ཆུང་ས་ནས་དམ་འཛིན་བྱེད་པ་། མགྱོགས་མྱུར་དམ་འཛིན་བྱེད་པ། དམ་འཛིན་ཡག་པོ་བྱེད་པ་བཅས་བྱ་རྒྱུ་མཐའ་འཁྱོངས་བྱས་ནས་བརྟན་ལྷིང་གི་རྩ་བ་བརྟན་གཏོང་དང་བརྟན་ལྷིང་གི་སྲུང་རགས་བརྟན་དུ་བཏང་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་ཁོར་ཡུག་ལེགས་པོ་ཞིག་གཏོད་རྒྱུ་ཡིན་ཞེས་གསུངས་པ་རེད།
ལི་ཁྲང་ཚའེ་ཡིས་རང་ལྗོངས་ཀྱི་རིམ་ཁག་ཏང་ཨུད་དང་སྲིད་གཞུང་གིས་དུས་ཡུན་རིང་པོའི་ནང་དཔུང་སྡེའི་འཛུགས་སྐྱོང་ཐད་སེམས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཤིང་། ཁོང་གིས་བོད་ནི་རང་རྒྱལ་གྱི་མཐའ་མཚམས་ཀྱི་མི་རིགས་ས་ཁུལ་གལ་ཆེན་ཞིག་ཡིན་པ་དང་། སྔར་ནས་བཟུང་དམག་བཀུར་ཁྱིམ་སྐྱོང་དང་སྲིད་བཀུར་དམངས་གཅེས་ཀྱི་གཟི་བརྗིད་སྲོལ་རྒྱུན་ལྡན་པ་དང་དམག་དམངས་དབར་གྱི་འབྲེལ་བ་འཆམ་མཐུན་ལྡན་པ་ཞིག་ཡོད། བོད་ཀྱི་འཕེལ་རྒྱས་དང་བརྟན་ལྷིང་ལ་སྲུང་སྐྱོང་བྱ་རྒྱུ་ནི་དམག་དཔུང་དང་ས་གནས་ཕྱོགས་གཉིས་ཀའི་ཐུན་མོང་གི་འགན་འཁྲི་ཞིག་ཡིན་པས་བོད་དུ་བཅའ་སྡོད་ལན་ཀྲོའུ་དམག་ཁུལ་ཁང་གི་དཔུང་སྡེས་ཏང་ཀྲུང་དབྱང་དང་ཀྲུང་དབྱང་དམག་ཨུད་ཀྱི་བཀོད་སྒྲིག་གཞིར་བཟུང་ཏང་གི་བཀོད་འདོམས་ལ་ཉན་པ་དང་། མི་དམངས་ལ་ཞབས་འདེགས་ཞུ་བ། དཔའ་ལྡན་འཐབ་མཁས་བཅས་ཀྱི་སྲོལ་རྒྱུན་བཟང་པོ་དར་སྤེལ་ཤུགས་ཆེན་གཏོང་བ་དང “བོད་སྐྱོད་པ་རྒན་གྲས་ཀྱི་སྙིང་སྟོབས ”དར་སྤེལ་ཤུགས་ཆེན་བཏང་ནས་དཔུང་སྡེ་འཛུགས་སྐྱོང་ཡག་པོ་བྱེད་པ་དང་མཐའ་མཚམས་ཡག་པོ་བསྲུངས་ཏེ་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རྒྱབ་སྐྱོར་ཧུར་ཐག་བྱས་ནས་དམག་སྲིད་དབར་དང་དམག་དམངས་དབར་གྱི་མཐུན་སྒྲིལ་གྱི་རྣམ་པ་བཟང་པོ་རྒྱུན་ཆད་མེད་པར་སྲ་བརྟན་དང་གོང་འཕེལ་བཏང་ནས་སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་དེ་བས་མཛེས་སྡུག་ལྡན་པ་ཞིག་ཏུ་འཛུགས་སྐྲུན་བྱེད་ངེས་ཡིན་ཞེས་གསུངས་པ་རེད།