ཚེས་22ཉིན་གྱི་སྔ་དྲོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཝུའུ་དབྱིང་ཅེས་རང་ལྗོངས་ཀྱི་2012ལོའི་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་འགོ་ཁྲིད་ཚོགས་ཆུང་གི་ཚོགས་འདུ་གཙོ་སྐྱོང་དང་སྐོང་ཚོགས་གནང་ཞིང་། ཁོང་གིས་མིག་སྔར་རང་ལྗོངས་ཀྱིས་མཁོ་འདོན་བྱས་པའི་ལས་ཞུགས་ལས་གནས་ཀྱིས་སྐྱེ་ཁུངས་བོད་ནས་ཡིན་པའི་སློབ་དུས་འདིར་སློབ་གྲྭ་ཐོན་རྒྱུ་ཡིན་པའི་མཐོ་སློབ་སློབ་ཐོན་སློབ་མ་ཚང་མ་ལས་ཞུགས་ཡོང་བ་དང་དེ་སྔོན་གྱི་མཐོ་སློབ་སློབ་ཐོན་སློབ་མ་རྩ་བའི་ཆ་ནས་ལས་ཞུགས་ཡོང་བའི་འགན་ལེན་རྦད་དེ་བྱེད་ཐུབ། རིམ་པ་ཁག་དང་སྡེ་ཚན་ཁག་གིས་བསམ་བློར་བཅིངས་འགྲོལ་དང་། འདུ་ཤེས་གསར་བརྗེས། ཉམས་མྱོང་ཕྱོགས་སྡོམ་བཅས་བྱས་ཏེ་ལས་དོན་ཁག་ཏན་ཏིག་ངང་ཡག་པོ་བསྒྲུབས་ནས་བོད་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཡོང་ཕྱིར་སྤྱི་ཚོགས་ཀྱི་ཁོར་ཡུག་ཡག་པོ་ཞིག་བཏོད་དགོས་ཞེས་ནན་བཤད་གནང་བ་རེད།

    ལྗོངས་ཡོངས་ཀྱི་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་ལ་ཐོབ་པའི་གྲུབ་འབྲས་མངོན་གསལ་དོད་པོར་ཁས་ལེན་གང་ལེགས་གནང་རྗེས་ཝུའུ་དབྱིང་ཅེས་རང་ལྗོངས་ཀྱི་སྒྱུར་འཕེལ་བརྟན་གསུམ་གྱི་ཁྱོན་ཡོངས་དང་འབྲེལ་བ་ཡོད་པ་དང་ཁྱིམ་ཚང་ཁྲི་སྟོང་མང་པོའི་བདེ་རྩར་ཐུག་པའི་ཁེ་ཕན་དང་འབྲེལ་བ་ཡོད་པའི་ལྗོངས་ཡོངས་ཀྱི་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་དེ་ནི་རང་ལྗོངས་ཀྱི་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་རྒྱུ་དང་། སྤྱི་ཚོགས་ཀྱི་དུས་བབ་བརྟན་ལྷིང་ལ་སྲུང་སྐྱོང་བྱ་རྒྱུ། ཞི་མཐུན་སྤྱི་ཚོགས་འཛུགས་གཏོད་བྱ་རྒྱུ་བཅས་ཀྱི་དོན་ཆེན་ཞིག་རེད། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཐོག་མཐའ་བར་གསུམ་དུ་ལྗོངས་ཡོངས་ཀྱི་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་ལ་མཐོང་ཆེན་གནང་བ་དང་ལྷག་པར་དུ་ཧྲུའུ་ཅི་ཁྲེན་ཆོན་གོ་བོད་དུ་ཕེབས་རྗེས་རང་ལྗོངས་ཀྱི་དོན་དངོས་གནས་ཚུལ་དང་ཟུང་འབྲེལ་གནང་སྟེ་སྐྱེ་ཁུངས་བོད་ནས་ཡིན་པའི་སློབ་དུས་འདིར་སློབ་གྲྭ་ཐོན་རྒྱུ་ཡིན་པའི་མཐོ་སློབ་སློབ་ཐོན་སློབ་མ་ཚང་མ་ལས་ཞུགས་ཡོང་བ་དང་དེ་སྔོན་གྱི་མཐོ་སློབ་སློབ་ཐོན་སློབ་མ་རྩ་བའི་ཆ་ནས་ལས་ཞུགས་ཡོང་བ་བྱེད་དགོས་པའི་བླང་བྱ་བཏོན་གནང་ཡོད། ཞིབ་ཕྲའི་ལས་དོན་ཁག་ཡག་པོ་བསྒྲུབ་རྒྱུའི་ཐད་ཧྲུའུ་ཅི་ཁྲེན་ཆོན་གོ་དང་ཀྲུའུ་ཞི་པད་མ་འཕྲིན་ལས་རྣམ་གཉིས་ཀྱིས་མཆན་འགོད་མཛུབ་སྟོན་གལ་ཆེན་ཐེངས་མང་གནང་བ་དང་འབྲེལ་སྐུ་ངོ་མས་ཕྱག་ཡིག་སྤྲིངས་ཏེ་བོད་སྐྱོར་ཞིང་ཆེན་དང་གྲོང་ཁྱེར་ཁག་དང་དེ་བཞིན་ཀྲུང་དབྱང་གི་བོད་སྐྱོར་ཁེ་ལས་ལ་སྐྱེ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མ་ནང་སར་ལས་ཞུགས་བྱེད་པར་བསྐྱོད་རྒྱུའི་གནད་དོན་ཐག་གཅོད་གནང་རོགས་ཞུས་ཡོད། བོད་སྐྱོར་ཞིང་ཆེན་དང་གྲོང་ཁྱེར་ཁག་དང་དེ་བཞིན་ཀྲུང་དབྱང་གི་བོད་སྐྱོར་ཁེ་ལས་ཀྱིས་ཆབ་སྲིད་ལ་སྣང་ཆེན་དང་སྤྱི་ཡོངས་ལ་བསྟུན་པའི་མཐོ་ཚད་ཀྱི་ཐོག་ནས་འབོད་སྐུལ་དང་ལེན་གནང་བ་དང་ཆབས་ཅིག་བྱ་སྤྱོད་མྱུར་དུ་སྤེལ་ཞིང་། ལྗོངས་ཡོངས་ཀྱི་མཐོ་སློབ་སློབ་ཐོན་སློབ་མར་ནང་སར་ལས་ཞུགས་བྱེད་པར་བསྐྱོད་རྒྱུའི་ཁྲིད་སྟོན་དང་བསྔགས་སྐུལ་བྱ་རྒྱུ་དེ་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་བྱེད་པའི་ལས་དོན་གལ་ཆེན་ཞིག་ལ་བརྩིས་ཏེ་དམ་འཛིན་གྱིས་གླ་ཕོགས་མཐོ་བའི་ལས་གནས་ཡག་པོ་འབོར་ཆེན་ཞིག་མཁོ་འདོན་གནང་བ་དང་ལྗོངས་ཡོངས་ཀྱི་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་ལ་རྒྱབ་སྐྱོར་ཤུགས་ཆེན་གནང་བ་དེ་ཐོག་ནས་ཀྲུང་དབྱང་དང་རང་སྐྱོང་ལྗོངས་དང་། བོད་སྐྱོར་ཞིང་ཆེན་དང་གྲོང་ཁྱེར། ཀྲུང་དབྱང་གི་བོད་སྐྱོར་ཁེ་ལས་བཅས་ཀྱིས་རང་ལྗོངས་ཀྱི་མཐོ་སློབ་སློབ་ཐོན་སློབ་མར་ཐུགས་ཁུར་དང་གཅེས་སྐྱོང་གནང་བ་གང་ལེགས་མཚོན་གྱི་ཡོད། བྱ་སྤྱོད་དེར་རྒྱ་ཆེའི་མང་ཚོགས་ཀྱི་བརྩི་བཀུར་རྒྱ་ཁྱབ་ཏུ་ཐོབ་པ་དང་ལྗོངས་ཡོངས་ཀྱི་མཐོ་སློབ་སློབ་ཐོན་སློབ་མས་དང་ལེན་མཐའ་གཅིག་ཏུ་ཞུས་ཡོད་ཅེས་བསྟན་གནང་བ་རེད།

    འདི་ལོའི་རང་ལྗོངས་ཀྱི་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་ཡག་པོ་སྤེལ་རྒྱུའི་སྐོར་གླེང་སྐབས་ཝུའུ་དབྱིང་ཅེས་རང་སྐྱོང་ལྗོངས་ཀྱི་རིམ་པ་ཁག་དང་སྡེ་ཚན་ཁག་ལ་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་གཞིར་བཟུང་དང་ལྗོངས་ཡོངས་ཀྱི་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་ཡག་པོ་བསྒྲུབ་རྒྱུའི་སྐོར་གྱི་ཧྲུའུ་ཅི་ཁྲེན་ཆོན་གོ་དང་ཀྲུའུ་ཞི་པད་མ་འཕྲིན་ལས་རྣམ་གཉིས་ཀྱི་མཛུབ་སྟོན་གལ་ཆེན་གྱི་དགོངས་དོན་གཞིར་བཟུང་ཉམས་མྱོང་ཕྱོགས་སྡོམ་བྱས་ནས་ལས་དོན་ཁག་ཡག་པོ་སྒྲུབ་དགོས་ཞེས་ནན་བཤད་གནང་བ་སྟེ། གཅིག་ནས་ལས་འདེམས་ལྟ་བའི་སློབ་གསོར་ཤུགས་སྣོན་བརྒྱབ་སྟེ་མཐོ་སློབ་སློབ་ཐོན་སློམ་མར་འདུ་ཤེས་གསར་བརྗེས་བྱ་རྒྱུ་དང་ཚུལ་མཐུན་ཡང་དག་དང་ཚན་རིག་ལུགས་མཐུན་གྱི་ལས་འདེམས་ལྟ་བ་འཛུགས་རྒྱུའི་ཁྲིད་སྟོན་ཏན་ཏིག་བྱེད་པ་དང་སྦྲགས་སློབ་མ་ཚོ་བོད་ནས་ཐོན་ཏེ་མིག་རྒྱང་རིང་དུ་གཏོང་བར་བསྐྱོད་རྒྱུའི་ཐད་རོགས་རམ་བྱས་ནས་འཁོར་རྒྱ་སྔར་བས་ཡངས་པོ་ཞིག་ནང་རང་ཉིད་ཀྱི་འཇོན་ཐང་ངོམས་དགོས་པ་དང་། གཉིས་ནས་ལས་ཞུགས་སྲིད་ཇུས་སྒྲོག་འགྲེལ་ཡག་པོ་བྱས་ཏེ་རྒྱ་ཆེའི་མང་ཚོགས་ཚོར་མཐོ་སློབ་སློབ་ཐོན་སློབ་མའི་ཁྲོམ་ར་ཅན་གྱི་ལས་ཞུགས་བྱ་རྒྱུ་དང་གཞི་རིམ་དུ་ལས་ཞུགས་བྱེད་པར་སྐྱོད་པའི་གཟིགས་སྐྱོང་སྲིད་ཇུས་རབ་དང་རིམ་པ་ཤེས་རྟོགས་བྱེད་བཅུག་པ་དང་འབྲེལ་སློབ་མ་ཚོར་བབ་དང་བསྟུན་ནས་ལས་ཞུགས་བྱ་རྒྱུ་དང་རང་ཚུགས་ཀྱིས་བྱ་གཞག་གསར་གཏོད་བྱ་རྒྱུའི་སྐུལ་མའང་གཏོང་དགོས། གསུམ་ནས་རྣམ་པ་སྣ་ཚོགས་བརྒྱུད་དྲིལ་བསྒྲགས་རྒྱ་ཆེན་པོ་དང་གཏིང་ཟབ་པོ་བྱས་ཏེ་མཐོ་སློབ་སློབ་ཐོན་སློབ་མ་དང་དེ་བཞིན་ཁྱིམ་བདག་ཚོར་མིག་སྔར་ལས་ཞུགས་ལས་གནས་འདང་ངེས་ཤིག་ཡོད་པ་དང་རང་སྐྱོང་ལྗོངས་ཏང་ཨུད་དང་སྲིད་གཞུང་དང་། བོད་སྐྱོར་ཞིང་ཆེན་དང་གྲོང་ཁྱེར་ཁག ཀྲུང་དབྱང་གི་བོད་སྐྱོར་ཁེ་ལས་བཅས་ཀྱིས་སློབ་ཐོན་སློབ་མར་ཐུགས་ཁུར་ཆེན་པོ་བྱེད་པ་ཤེས་རྟོགས་གཏིང་ཟབ་བྱེད་དུ་འཇུག་དགོས་པ་དང་། བོད་ཀྱི་གཞུང་ལས་པ་བསྡུ་བའི་ནང་གྲངས་ཉུང་མི་རིགས་ཀྱི་རྒྱུགས་སྤྲོད་པ་བསྡུས་པའི་བསྡུར་ཚད་མཐོ་བ་དང་ལྷག་པར་དུ་འདི་ལོའི་གཞུང་ལས་པ་བསྡུ་བའི་རྒྱུགས་ལེན་བརྡ་སྤྲོད་སྡེ་ཚན་ཁག་གི་ཡིག་རྒྱུགས་ལོན་པའི་མི་གྲངས་ནང་གྲངས་ཉུང་མི་རིགས་ཀྱིས་81.57%བཟུང་བ་དྲིལ་བསྒྲགས་ཤུགས་ཆེན་བྱས་ནས་མི་རིགས་ས་ཁོངས་རང་སྐྱོང་ལམ་ལུགས་དེ་རང་ལྗོངས་སུ་རྒྱ་ཁྱབ་གཏིང་ཟབ་ཀྱི་སྒོ་ནས་ལག་བསྟར་བྱུང་བ་གང་ལེགས་མངོན་པར་བྱེད་དགོས། བཞི་ནས “འདྲ་མཉམ་དང་། གཞུང་དྲང་། ཡོངས་བསྒྲགས ”བཅས་ཀྱི་རྩ་དོན་གཞིར་བཟུང་བ་དང་། སྒྲིག་ཁྲིམས་སྒྲིག་ལམ་གཞིར་བཟུང་བྱ་བ་སྒྲུབ་པ། སྒྲིག་སྲོལ་གཞིར་བཟུང་བྱ་བ་སྒྲུབ་པ་བཅས་ཀྱི་ཐོག་ནས་གཞུང་ལས་པ་བསྡུ་བའི་ལས་དོན་གྱི་གསལ་ཚད་སྔར་བས་མཐོ་རུ་གཏོང་དགོས། འབྲེལ་ཡོད་སྡེ་ཚན་གྱིས་ལྟ་སྐུལ་ཞིབ་བཤེར་བྱ་རྒྱུར་ཤུགས་སྣོན་བརྒྱབ་ནས་རྣམ་པ་སྣ་ཚོགས་ཀྱི་ཚུལ་མིན་སྤྱོད་ཚུལ་ཐོན་རྒྱུ་གཏན་འགོག་བྱེད་དགོས། ལྔ་ནས་དོན་འཁྱོལ་ཧུར་ཐག་བྱེད་པ་དང་ད་ཡོད་ཀྱི་ལས་ཞུགས་སྲིད་ཇུས་འཐུས་སྒོ་ཚང་དུ་བཏང་སྟེ་མི་རྣམས་ཀྱི་བློ་ལ་བབ་པ་དང་དམངས་ཀྱི་འདུན་པ་སྐོང་བའི་བྱ་བ་བཟང་པོ་དང་བྱ་བ་དངོས་དེ་ལེགས་པར་བསྒྲུབས་ནས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་། མཐོ་སློབ་སློབ་ཐོན་སློབ་མ་དང་ཁྱིམ་བདག སྤྱི་ཚོགས་ཡོངས་བཅས་བློ་བདེ་ཡིད་ཚིམ་ཡོང་བ་བྱེད་པ་དང་ཆབས་ཅིག་གྲུབ་འབྲས་གཟེངས་སུ་ཐོན་པའི་སྒོ་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་པ་བཅས་རེད།