ཉེ་ཆར་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ནག་ཆུ་ས་ཁུལ་འབྲི་རུ་དང་། སྦྲ་ཆེན། སོག་རྫོང་། ནག་ཆུ་རྫོང་བཅས་སུ་ཕེབས་ནས་རང་སྐྱོང་ལྗོངས་སྔོན་གཏོད་ལེགས་བརྩོན་དང་རྨང་བརྟན་དམངས་ཕན་བྱེད་སྒོའི་གྲོང་ཚོར་བཅའ་སྡོད་ལས་དོན་རུ་ཁག་གི་རུ་མི་དང་གཞི་རིམ་གྱི་ལས་བྱེད་པ་དང་མང་ཚོགས་ལ་བྱམས་བརྩེའི་ངང་གཟིགས་པ་དང་དགོན་སྡེའི་དོ་དམ་ཨུ་ཡོན་ལྷན་ཁང་གི་ལས་དོན་སྤེལ་ཚུལ་ཤེས་རྟོགས་ཞིབ་ཕྲ་གནང་བ་རེད། འདི་ནི་པད་མ་འཕྲིན་ལས་དང་བཅས་པས་འབྲི་རུ་རྫོང་ཤག་ཆུ་གྲོང་རྡལ་ལྟེ་བའི་སློབ་ཆུང་དུ་བརྟག་ཞིབ་གནང་བའི་གནས་ཚུལ་ཡིན་པ།

    ཉེ་དུས་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ནག་ཆུ་ས་ཁུལ་གྱི་འབྲི་རུ་དང་། སྦྲ་ཆེན། སོག་རྫོང་། ནག་ཆུ་རྫོང་བཅས་སུ་ཕེབས་ནས་རང་སྐྱོང་ལྗོངས་ཀྱི་སྔོན་གཏོད་ལེགས་བརྩོན་དང་། རྨང་གཞི་བརྟན་གཏོང་། དམངས་ལ་ཕན་འདོགས་པ་བཅས་ཀྱི་བྱེད་སྒོའི་གྲོང་ཚོར་བཅའ་སྡོད་ལས་དོན་རུ་ཁག་གི་རུ་མི་དང་གཞི་རིམ་ལས་བྱེད་མང་ཚོགས་ཚོར་བྱམས་བརྩེའི་ངང་གཟིགས་པ་དང་དགོན་པའི་དོ་དམ་ཨུ་ལྷན་གྱི་ལས་དོན་སྤེལ་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་གཞི་རིམ་རྩ་འཛུགས་འཛུགས་སྐྱོང་གི་ནུས་པ་དང་ཆུ་ཚད་ཟམ་མི་ཆད་པར་མཐོ་རུ་གཏོང་བ་དང་ཞི་མཐུན་བརྟན་ལྷིང་གི་སྤྱི་ཚོགས་རྨང་གཞི་བརྟན་དུ་གཏོང་དགོས་པའི་ནན་བཤད་གནང་བ་རེད།

    རང་སྐྱོང་ལྗོངས་སྲིད་གཞུང་ཏང་ཙུའི་ཁོངས་མི་ལྗོངས་འཕེལ་སྒྱུར་ཨུ་ཡོན་ལྷན་ཁང་གི་ཀྲུའུ་རེན་ཅིན་ཧྲེ་ཤུན་དང་རང་སྐྱོང་ལྗོངས་སྲིད་གཞུང་ཏང་ཙུའི་ཁོངས་མི་དྲུང་ཆེ་ཀའོ་དབྱང་རྣམ་གཉིས་རྟོག་ཞིབ་གནང་སྐབས་ལྷན་དུ་ཕེབས་ཡོད་པ་རེད།

    པད་མ་འཕྲིན་ལས་དང་བཅས་པས་དང་ཐོག་འབྲི་རུ་རྫོང་ཟླ་ཐང་ཤང་ཐང་སྔོ་གྲོང་ཚོར་བཅའ་སྡོད་ལས་དོན་རུ་ཁག་གི་ལས་དོན་སྤེལ་ཚུལ་མཁྱེན་རྟོགས་ཞིབ་ཕྲ་གནང་བ་མ་ཟད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་པ་དང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་ཡི་ཚབ་ཞུས་ནས་རང་སྐྱོང་ལྗོངས་ཀྱི་སྔོན་གཏོད་ལེགས་བརྩོན་དང་། རྨང་གཞི་བརྟན་གཏོང་། དམངས་ལ་ཕན་འདོགས་པ་བཅས་ཀྱི་གྲོང་ཚོར་བཅའ་སྡོད་ལས་དོན་རུ་ཁག་གི་རུ་མིར་གཟིགས་པ་དང་འཚམས་འདྲི་གནང་བ་རེད། རང་སྐྱོང་ལྗོངས་ཀྱི་སྔོན་གཏོད་ལེགས་བརྩོན་དང་། རྨང་གཞི་བརྟན་གཏོང་། དམངས་ལ་ཕན་འདོགས་པ་བཅས་ཀྱི་བྱེད་སྒོའི་ཟླ་ཐང་ཤང་ཐང་སྔོ་གྲོང་ཚོར་བཅའ་སྡོད་ལས་དོན་རུ་ཁག་གི་བསྟན་འཛིན་པད་སྒྲོན་གྱིས་ལས་དོན་རུ་ཁག་གྲོང་ཚོར་བཅའ་སྡོད་བྱས་རྗེས་གྲོང་ཚོ་དང་དུད་ཚང་དུ་བསྐྱོད་དེ་གྲོང་ཚོའི་གནས་ཚུལ་དང་དམངས་ཀྱི་འདོད་བློ་ཤེས་རྟོགས་ཞིབ་ཕྲ་བྱས་ནས་གྲོང་མི་མི་སྒེར་གྱི་ཡིག་ཚགས་བཟོས་པ་ཡིན། གོམ་སྟབས་རྗེས་མར་ལས་དོན་རུ་ཁག་གིས་གྲོང་ཚོ་ཨུ་ལྷན་ཚན་ཁག་དང་གྲོང་མི་ཚོ་དང་མཉམ་དུ་ཐང་སྔོ་གྲོང་ཚོའི་འཕེལ་རྒྱས་ཀྱི་ཇུས་གཞི་ཆེན་པོར་གྲོས་མོལ་བྱས་ཏེ་ཞིང་འབྲོག་མང་ཚོགས་ཀྱི་འབབ་འཕར་གྱི་ལམ་བུ་རྒྱ་ཆེར་གཏོང་རྩིས་ཡོད་པ་ཀྲུའུ་ཞིར་ཞུས་པ་དང་པད་མ་འཕྲིན་ལས་ཀྱིས་གསན་རྗེས་དགྱེས་ཚོར་ཆེན་པོ་བྱུང་ནས་ཁོང་གིས་སྔོན་གཏོད་ལེགས་བརྩོན་དང་། རྨང་གཞི་བརྟན་གཏོང་། དམངས་ལ་ཕན་འདོགས་པ་བཅས་ཀྱི་བྱེད་སྒོ་སྤེལ་ཚུན་ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས་ཚད་མཐོའི་མཐོང་ཆེན་བྱས་པ་དང་། དང་ལེན་ཧུར་ཐག་ཞུས་པ། བྱ་སྤྱོད་མྱུར་པོ་སྤེལ་བ་བཅས་བྱས་ཏེ་གྲོང་ཚོར་བཅའ་སྡོད་ལས་དོན་རུ་ཁག་གིས་མང་ཚོགས་དང་མཉམ་ཟ་མཉམ་སྡོད་དང་། མཉམ་དུ་སློབ་སྦྱོང་བྱེད་པ། མཉམ་དུ་ངལ་རྩོལ་བཅས་བྱས་ནས་ཐུན་མོང་ཐོག་འཕེལ་རྒྱས་དོན་གཉེར་དང་ལས་དོན་ཏན་ཏིག་སྤེལ་བར་མང་ཚོགས་ཀྱི་དགའ་བསུ་ཐོབ་ཡོད་ཅེས་གསུངས་པ་རེད། ཁོང་གིས་གྲོང་ཚོར་བཅའ་སྡོད་ལས་དོན་རུ་ཁག་ཁག་གིས་དམངས་ཀྱི་ཆེད་དུ་དོན་དངོས་སྒྲུབ་པ་དང་། བྱ་བཟང་སྒྲུབ་པ། དཀའ་གནད་སེལ་བ་བཅས་བྱས་ཏེ་ས་གནས་ཁག་གི་དོན་དངོས་དང་ཟུང་འབྲེལ་གྱིས་ཁྱད་ལྡན་དང་ལེགས་ཆ་འདོན་སྤེལ་གྱིས་གྲོང་ཚོ་རིམ་པའི་དཔལ་འབྱོར་མཉམ་ལས་རྩ་འཛུགས་གཏོད་དེ་ཞིང་འབྲོག་མང་ཚོགས་ཀྱི་ཐོན་སྐྱེད་དང་འཚོ་བའི་ཆུ་ཚད་ཟམ་མི་ཆད་པར་མཐོ་རུ་བཏང་ནས་ཏང་དང་སྲིད་གཞུང་གི་དྲོ་སྐྱིད་རྒྱ་ཆེའི་མི་དམངས་མང་ཚོགས་ཀྱི་སེམས་སུ་ཚོར་བ་བྱེད་དགོས་པའི་ཐུགས་རེ་གནང་བ་རེད།

    ར་ཁྱིམ་དགོན་དང་སྤ་ཚང་དགོན་དུ་པད་མ་འཕྲིན་ལས་ཀྱིས་རྒྱལ་གཅེས་ཆོས་གཅེས་ཀྱི་དགེ་འདུན་པ་དང་དགོན་པ་དོ་དམ་ཨུ་ལྷན་གྱི་ལས་བྱེད་པ་ཚོར་གཟིགས་པ་དང་འཚམས་འདྲི་གནང་བ་མ་ཟད་དགོན་སྡེའི་རིག་དངོས་སྲུང་སྐྱོང་དང “དགོན་སྡེར་ཡོད་པ་དགུ ”སོགས་ལས་དོན་སྤེལ་ཚུལ་དང་གྲྭ་དམངས་ཀྱི་འཚོ་བའི་གནས་ཚུལ་མཁྱེན་རྟོགས་ཞིབ་ཕྲ་གནང་བ་རེད།

    སྤ་ཚང་དགོན་པའི་དོ་དམ་ཨུ་ལྷན་གྱི་འགན་འཁུར་བས་ན་ནིང་ནས་བཟུང་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་རྒྱ་ཆེའི་གྲྭ་བཙུན་ལ་དོ་ཁུར་བྱེད་པའི་སྲིད་ཇུས་དང་བྱ་ཐབས་རབ་དང་རིམ་པ་བཏོན་པར་གྲྭ་བཙུན་གྱི་དགའ་བསུ་དང་བརྩི་བཀུར་གཏིང་ཟབ་ཐོབ་ཡོད། མིག་སྔར་སྤ་ཚང་དགོན་དུ “དགོན་སྡེར་ཡོད་པ་དགུ ”སོགས་ཀྱི་ལས་དོན་གོ་རིམ་ལྡན་པའི་ངང་སྤེལ་བཞིན་ཡོད་པ་དང་རླུང་འཕྲིན་དང་བཪྙན་འཕྲིན་ཚང་མར་ཁྱབ་ཐུབ་པ་བྱུང་ཡོད་ལ་ལྷག་དོན་དུ་རྒན་གསོ་དང་སྨན་བཅོས་འགན་བཅོལ་གྱི་སྲིད་ཇུས་མི་སེམས་སུ་ཟུག་ཐུབ་པ་བྱུང་ནས་གྲྭ་བཙུན་ཚང་མར་དངོས་ཕན་ཏན་ཏིག་ཐོབ་པས་ཚང་མས་རྒྱལ་གཅེས་ཆོས་གཅེས་ཀྱི་སྔོན་ཐོན་གྲྭ་བཙུན་བྱ་རྒྱུའི་བརྩོན་ལེན་བྱེད་བཞིན་ཡོད་ཅེས་ངོ་སྤྲོད་བྱས་པ་རེད།

    པད་མ་འཕྲིན་ལས་ཀྱིས་ཆོས་དད་རང་མོས་ནི་ཏང་གི་ཆོས་ལུགས་ལས་དོན་གྱི་སྔ་ཕྱི་བར་གསུམ་གྱི་བྱེད་ཕྱོགས་ཤིག་ཡིན་པས་དགོན་སྡེའི་དོ་དམ་ལ་ཤུགས་སྣོན་དང་གསར་གཏོད་དང་དགོན་སྡེའི་སྤྱི་པའི་ཞབས་ཞུ་ལེགས་སུ་བཏང་ནས་རྒྱ་ཆེའི་རྒྱལ་གཅེས་ཆོས་གཅེས་ཀྱི་གྲྭ་བཙུན་ཚོར་རྒས་དུས་གསོ་མཁན་ཡོད་པ་དང་ན་དུས་སྨན་བཅོས་ཐུབ་པ་བྱ་རྒྱུ་དེ་ནི་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཏང་གི་ཆོས་ལུགས་ལས་དོན་གྱི་གཞི་རྩའི་བྱེད་ཕྱོགས་དང་རྒྱལ་ཁབ་ཀྱིས་ཆོས་ལུགས་ལས་དོན་ལ་དོ་དམ་བྱེད་པའི་བཅའ་ཁྲིམས་དང་ཁྲིམས་སྲོལ་ལག་བསྟར་དོན་འཁྱོལ་སྒོ་ཀུན་ནས་བྱེད་པའི་ཞིབ་ཕྲའི་བྱ་སྤྱོད་ཅིག་རེད། མིག་སྔར་ང་ཚོས་བོད་བརྒྱུད་ནང་བསྟན་གྱི་དགོན་སྡེའི་ནང་བཅའ་ཁྲིམས་དྲིལ་བསྒྲགས་ཀྱི་བརྗོད་བྱ་གཙོ་བོའི་སློབ་གསོའི་བྱེད་སྒོ་སྤེལ་བ་དེ་ནི་བོད་བརྒྱུད་ནང་བསྟན་གྱི་གྲུབ་མཐའ་ཁག་གི་བསྟན་དོན་གྱི་རྩ་བའི་སྙིང་པོ་ལེན་པ་དང་མདོར་བསྡུས་བྱས་པ་ཞིག་ཡིན་ལ་ཆོས་ལུགས་ལ་དད་པ་བྱེད་མཁན་དང་ལྷག་དོན་དུ་དགོན་སྡེའི་གྲྭ་བཙུན་ཚོ་སྤྱི་ཚོགས་དང་འཚམས་པ་བྱེད་ཐུབ་པའི་གཞི་རྩའི་བླང་བྱ་ཞིག་ཀྱང་རེད་ཅེས་གསུངས་པ་རེད། དགོན་པ་དོ་དམ་ཨུ་ལྷན་གྱི་ལས་བྱེད་ཚོས་རྒྱ་ཆེའི་གྲྭ་དམངས་ཀྱི་སྣེ་ཧུར་ཐག་འཁྲིད་དེ་ཁྲིམས་ལུགས་དྲིལ་བསྒྲགས་ཀྱི་བརྗོད་བྱ་གཙོ་བོའི་སློབ་གསོར་དམ་པོར་དམིགས་ནས་ཡིན་མིན་བརྡར་ཤ་གཅོད་པ་དང་། ཧེ་བག་འཚོལ་བ། ཁ་ཕྱོགས་གསལ་སྟོན་བཅས་ཀྱི་སྒོ་ནས་ཆོས་ལུགས་ལས་དོན་པ་དང་སྤྱི་དམངས་དཀྱུས་མ་ཞིག་ཡིན་པའི་ངོས་ནས་གཞི་རྩའི་འོས་འགན་གཅིག་གྱུར་བྱས་ཏེ་རང་རྟོགས་ངང་བོད་བརྒྱུད་ནང་བསྟན་གྱི་ཕུལ་བྱུང་སྲོལ་རྒྱུན་དར་སྤེལ་གཏོང་བ་དང་། རང་རྟོགས་ངང་ཏཱ་ལའི་རུ་ཚོགས་དང་དབྱེ་མཚམས་གསལ་པོ་འབྱེད་པ། རང་རྟོགས་ངང་རྒྱལ་གཅེས་ཁྲིམས་སྲུང་གི་སྔོན་ཐོན་གྲྭ་བཙུན་བཅས་བྱས་ནས་དགོན་སྡེ་རྒྱུན་མཐུད་བརྟན་ལྷིང་གི་ཕུགས་ཕན་ལམ་སྲོལ་འཛུགས་པ་དང་བོད་བརྒྱུད་ནང་བསྟན་གྱི་རྒྱུན་ལྡན་གྱི་སྒྲིག་ལམ་ལ་སྲུང་བརྩི་ཞུས་ནས་ལྗོངས་ཡོངས་ཀྱི་དགོན་སྡེའི་ཞི་མཐུན་བརྟན་ལྷིང་འགན་ལེན་བྱེད་དགོས་པའི་ཐུགས་རེ་གནང་བ་རེད།

    པད་མ་འཕྲིན་ལས་དང་བཅས་པས་ད་དུང་འབྲི་རུ་རྫོང་ཤག་ཆུ་གྲོང་རྡལ་ལྟེ་བའི་སློབ་ཆུང་དང་། སྦྲ་ཆེན་སློབ་འབྲིང་། སོག་རྫོང་རོང་པོ་གྲོང་རྡལ་ལྟེ་བའི་སློབ་ཆུང་བཅས་སུ་ཕེབས་ནས་སློབ་གྲྭའི་རྨང་གཞིའི་སྒྲིག་བཀོད་འཛུགས་སྐྲུན་དང་། དགེ་རྒན་དཔུང་ཁག སློབ་མ་སློབ་གྲྭར་ཞུགས་ཚད་སོགས་ཀྱི་གནས་ཚུལ་ལ་རྟོག་ཞིབ་གནང་ཞིང་། ཁོང་གིས་རིམ་ཁག་སྡེ་ཚན་གྱིས་སློབ་གསོའི་ལས་དོན་ལ་ཚད་མཐོའི་མཐོང་ཆེན་བྱས་ནས་སློབ་གསོའི་སློབ་ཁྲིད་ཀྱི་ཆུ་ཚད་ཟམ་མི་ཆད་པར་མཐོ་རུ་བཏང་ཐོག་དགེ་རྒན་དཔུང་ཁག་འཛུགས་སྐྱོང་ལ་ཤུགས་སྣོན་ཏན་ཏིག་བརྒྱབ་ནས་མ་དངུལ་གཏོང་ཤུགས་ཆེ་རུ་གཏོང་བ་དང་སློབ་གཉེར་ཆ་རྐྱེན་ལེགས་སུ་བཏང་ནས་སྤྱི་ཚོགས་ཡོངས་སུ་དགེ་རྒན་ལ་བརྩི་བཀུར་དང་སློབ་གསོར་མཐོང་ཆེན་བྱེད་པའི་རྣམ་པ་བཟང་པོ་ཞིག་ཐོན་པ་དང་སློབ་གསོའི་བྱ་གཞག་འཕེལ་རྒྱས་ལ་མཐོང་ཆེན་དང་། ཐུགས་ཁུར། རྒྱབ་སྐྱོར་བཅས་བྱེད་པའི་རྣམ་པ་བཟང་པོ་ཞིག་ཐོན་དགོས་པའི་ནན་བཤད་གནང་བ་རེད། འབྲི་རུ་རྫོང་ཟླ་ཐང་ཤང་འཕྲོད་བསྟེན་ཁང་དང་། སྦྲ་ཆེན་རྫོང་མི་དམངས་སྨན་ཁང་། སོག་རྫོང་རོང་པོ་གྲོང་རྡལ་འཕྲོད་བསྟེན་ཁང་སོགས་སུ་རྟོག་ཞིབ་གནང་སྐབས་པད་མ་འཕྲིན་ལས་ཀྱིས་འབྲེལ་ཡོད་སྡེ་ཚན་ཁག་ལ་གཞི་རིམ་གྱི་སྨན་བཅོས་སྒྲིག་བཀོད་ཐད་མ་དངུལ་གཏོང་ཤུགས་ཆེ་རུ་གཏོང་བ་དང་གྲོང་གསེབ་ཀྱི་གཞི་རིམ་སྨན་དོན་མི་སྣ་གསོ་སྦྱོང་བྱེད་ཤུགས་ཆེ་རུ་བཏང་ནས་ཞིང་འབྲོག་མང་ཚོགས་ཚོར་རང་ཁྱིམ་གྱི་སྒོ་འགྲམ་ནས་སྟབས་བདེ་ལ་སྤུས་དག་པའི་གཞི་རྩའི་སྨན་བཅོས་ཞབས་ཞུ་ཐོབ་པའི་འགན་ལེན་བྱེད་དགོས་པའི་བླང་བྱ་བཏོན་གནང་བ་རེད།

    རྟོག་ཞིབ་གནང་རིང་པད་མ་འཕྲིན་ལས་ཀྱིས་མིག་སྔར་རང་ལྗོངས་འདི་ཉིད་དབྱར་རྩྭ་དགུན་འབུ་ཉོ་ཚོང་བྱེད་པའི་དུས་སུ་སླེབས་ཡོད་པས་དབྱར་རྩྭ་དགུན་འབུ་འཐུ་མཁན་མང་དུ་འགྲོ་བ་དང་བསྟུན་ནས་དབྱར་རྩྭ་དགུན་འབུ་ཉོ་ཚོང་བྱེད་མཁན་ཡང་མང་དུ་འགྲོ་བཞིན་ཡོད་སྟབས་དོ་དམ་གྱི་ལས་འགན་ཡང་ལྕི་པོ་ཡོད་པ་རེད། འབྲེལ་ཡོད་སྡེ་ཚན་གྱིས་ངེས་པར་དུ་ཞིང་འབྲོག་ཁུལ་གྱི་དཔལ་འབྱོར་འཕེལ་རྒྱས་དང་སྤྱི་ཚོགས་བརྟན་ལྷིང་ལ་ཞབས་འདེགས་ཞུ་རྒྱུ་དེ་ལས་འགན་དུ་བརྩིས་ནས་ཚད་ལྡན་དང་གོ་རིམ་ལྡན་པ་དང་བརྟན་ལྷིང་ཞི་མཐུན་གྱི་དབྱར་རྩྭ་དགུན་འབུ་འཐུ་བའི་དོ་དམ་གྱི་ཕུགས་ཕན་ལམ་སྲོལ་འཛུགས་པ་དང་། དབྱར་རྩྭ་དགུན་འབུའི་ཁྲོམ་རའི་ལྟ་སྐུལ་དོ་དམ་ལ་ཤུགས་སྣོན་བརྒྱབ་ནས་དབྱར་རྩྭ་དགུན་འབུ་ཉོ་ཚོང་ཚད་ལྡན་བཟོ་བ། དྲིལ་བསྒྲགས་སློབ་གསོའི་ལས་དོན་ཡག་པོ་སྤེལ་ཞིང་། མང་ཚོགས་ཀྱི་སྣེ་ཧུར་ཐག་འཁྲིད་དེ་ཁྲིམས་ལྟར་འཐུ་བ་དང་ཉོ་ཚོང་བྱས་ཐོག་དབྱར་རྩྭ་དགུན་འབུ་འཐུ་བ་དང་ཉོ་ཚོང་བྱེད་རིང་གི་སྒྲིག་འཛུགས་དང་དོ་དམ་ལས་དོན་ཡག་པོ་སྤེལ་ཞིང་། དབྱར་རྩྭ་དགུན་འབུ་འཐུ་བ་དང་ཉོ་ཚོང་བྱེད་རིང་གི་སྤྱི་ཚོགས་ཀྱི་སྒྲིག་ལམ་འགན་ལེན་བྱེད་པ་དང་། ཞིང་འབྲོག་མང་ཚོགས་ཀྱི་ཁྲིམས་མཐུན་ཁེ་དབང་ལ་སྲུང་སྐྱོང་ཐུབ་པའི་འགན་ལེན་བྱེད་པ། དབྱར་རྩྭ་དགུན་འབུ་འཐུ་བ་དང་ཉོ་ཚོང་བྱེད་རིང་གི་སྤྱི་ཚོགས་ཀྱི་དུས་བབ་བརྟན་ལྷིང་འགན་ལེན་བྱེད་པ་བཅས་ཀྱི་ཐད་དེ་བས་ནན་བཤད་གནང་བ་རེད།

    པད་མ་འཕྲིན་ལས་དང་བཅས་པས་ད་དུང་ནག་ཆུ་གྲོང་རྡལ་གྱི་ལམ་བཞི་མདོ་ཁའི་དམངས་ཕན་ཉེན་རྟོག་ཞབས་ཞུའི་ས་ཚིགས་དང་། ཀྲེ་ཅང་ཁུལ་ཆུང་། ཀྲེ་ཅང་སློབ་འབྲིང་གི་ལས་གྲྭ་འཛུགས་སྐྲུན་བྱས་ཚུལ་བཅས་ལ་རྟོག་ཞིབ་ཀྱང་གནང་བ་རེད།

    རང་སྐྱོང་ལྗོངས་དང་ནག་ཆུ་ས་ཁུལ་གྱི་འབྲེལ་ཡོད་འགན་འཁུར་བ་རྟོག་ཞིབ་གནང་སྐབས་ལྷན་དུ་ཕེབས་ཡོད་པ་རེད།