ཉེ་ཆར་རྒྱལ་ཡོངས་ཀྱི་སྤྱི་བདེའི་ཁོངས་གཏོགས་ཀྱི་དཔའ་བོ་དཔེ་བཟང་གི་བྱས་རྗེས་འཇོག་མཁན་མཉམ་སྡེབ་ལ་གཟེངས་བསྟོད་བྱེད་པའི་ཚོགས་ཆེན་ནང་ཞུགས་མཁན་རང་ལྗོངས་ཀྱི་འཐུས་མི་རྣམས་གཟི་བརྗིད་ངང་ཕྱིར་ལོག་བྱས་ཤིང་། ཚེས་21ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་གིས་ལྷ་སར་འཐུས་མི་ཡོངས་ལ་བྱམས་བརྩེའི་ངང་མཇལ་འཕྲད་གནང་བ་དང་འབྲེལ་ཁོང་ཚོ་དང་བཞུགས་མོལ་ཡང་གནང་བ་རེད།

    རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཏེང་ཞའོ་ཀང་གིས་བཞུགས་མོལ་ཚོགས་འདུ་གཙོ་སྐྱོང་གནང་བ་དང་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་ཏུང་ཡུན་ཧུའུ་ཚོགས་འདུར་ཕེབས་པ་རེད།

    ཧའོ་ཕུང་གིས་དང་ཐོག་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་རྒྱལ་ཁབ་རིམ་པའི་གཟེངས་བསྟོད་ཐོབ་མཁན་རང་ལྗོངས་ཀྱི་སྤྱི་བདེའི་དཔའ་བོ་དཔེ་བཟང་དང་བྱས་རྗེས་འཇོག་མཁན་མཉམ་སྡེབ་ལ་སྤྲོ་སེམས་འཁོལ་བའི་རྟེན་འབྲེལ་དང་འབྲེལ་བླ་ན་མེད་པའི་གུས་འདུད་ཞུས་པ་དང་དུས་ཡུན་རིང་པོའི་ནང་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་དང་སྤྱི་ཚོགས་བརྟན་ལྷིང་སྲུང་སྐྱོང་གི་འཐབ་ས་དང་པོར་དཀའ་སྤྱད་འབད་འཐབ་བྱེད་མཁན་རྒྱ་ཆེའི་སྤྱི་བདེའི་མི་དམངས་ཉེན་རྟོག་པ་དང་སྤྱི་བདེའི་ད་སྐུལ་དཔུང་སྡེའི་དཔོན་དམག་ལ་ལྷག་བསམ་ཟོལ་མེད་ངང་འཚམས་འདྲི་ཞུས་གནང་བ་རེད། ཁོང་གིས་ཉེ་བའི་ལོ་ཤས་རིང་ལྗོངས་ཏང་ཨུད་དང་སྲིད་གཞུང་གི་སྲ་ཞིང་བརྟན་པའི་འགོ་ཁྲིད་དང་སྤྱི་བདེ་པུའི་མཛུབ་ཁྲིད་ནུས་ལྡན་འོག་རང་ལྗོངས་ཀྱི་རྒྱ་ཆེའི་སྤྱི་བདེའི་མི་དམངས་ཉེན་རྟོག་པ་དང་སྤྱི་བདེའི་ད་སྐུལ་དཔུང་སྡེའི་དཔོན་དམག་གིས་ཐོག་མཐའ་བར་གསུམ་དུ་ཏང་དང་མི་དམངས་ཀྱི་ཁེ་ཕན་ཨང་དང་པོར་འཇོག་པ་དང་ཐོག་མཐའ་བར་གསུམ་དུ་སྤྱི་དོན་དུ་ཉེན་རྟོག་འཛུགས་པ་དང་དམངས་ཆེད་དུ་ཁྲིམས་འཛིན་རྒྱུ་མཐའ་འཁྱོངས་ཀྱིས “བོད་སྐྱོད་པ་རྒན་གྲས ”ཀྱི་སྙིང་སྟོབས་དར་སྤེལ་གང་ལེགས་གཏོང་བ་དང་སྲིད་ཁྲིམས་ཀྱི་ལས་བྱེད་ཉེན་རྟོག་པའི་ལྟེ་བའི་རིན་ཐང་ལྟ་བ་ལྷག་བསམ་རྣམ་དག་ངང་ལག་བསྟར་བྱས་ནས་ཉེན་རྟོག་པ་ཡོངས་སྐུལ་སློང་གིས་སྟོབས་ཤུགས་གང་ཡོད་འདོན་པ་དང་དཔའ་ངར་འབད་འབུངས་ཀྱིས་བསྟུད་མར་འབད་འཐབ་བྱས་ཏེ་རང་ལྗོངས་ཀྱི་བདེ་འཇགས་གནས་ཚུལ་མུ་མཐུད་ཡག་ཏུ་འགྲོ་བ་དང་ལྗོངས་ཡོངས་ཀྱི་སྤྱི་ཚོགས་ཞི་མཐུན་དང་བརྟན་ལྷིང་ཡོང་བར་སྐུལ་འདེད་གཏོང་ཆེད་སུབ་ཐབས་མེད་པའི་ལེགས་སྐྱེས་འབུལ་བ་དང་ཁྲག་དྲོན་དང་། ལུས་སྲོག རྔུལ་ཆུ་བཅས་ལ་བརྟེན་ནས་གངས་ལྗོངས་ས་མཐོར་མི་སེམས་འགུལ་བའི་དཔའ་བོའི་བསྟོད་གླུ་མང་པོ་བརྩམས་ནས་དཔའ་པོ་དཔེ་བཟང་དང་སྔོན་ཐོན་མཉམ་སྡེབ་འབོར་ཆེན་ཐོན་ཡོད། ད་ཐེངས་རང་ལྗོངས་ཀྱི་མི་དམངས་ཉེན་རྟོག་པ་16དང་མཉམ་སྡེབ་15ལ་རྒྱལ་ཁབ་རིམ་པའི་གཟེངས་བསྟོད་ཐོབ་པ་དང་ཀྲུང་དབྱང་འགོ་ཁྲིད་བློ་མཐུན་གྱིས་མཇལ་འཕྲད་གནང་བས་རང་ལྗོངས་ཀྱི་སྤྱི་བདེའི་ཁོངས་གཏོགས་ལ་གཟི་བརྗིད་བརྩོན་ལེན་དང་མིག་དཔེ་བཏོད་ཡོད། ལག་ལེན་དངོས་ཀྱི་ཐོག་ནས་རང་ལྗོངས་ཀྱི་སྤྱི་བདེའི་དཔུང་ཁག་ནི་གཞུང་དྲང་བློ་ཐུབ་དང་འཐབ་འཛིང་བྱེད་ཐུབ་པའི་དཔུང་ཁག་དང་གཞུང་སེམས་དྲང་ཞིང་བློ་སྟོབས་ཆེ་བ་དང་དཔའ་བོ་གྲངས་མེད་ཐོན་པའི་དཔུང་ཁག་ཅིག་ཡིན་པ་དང་རང་ལྗོངས་ཀྱི་འཕེལ་རྒྱས་ལ་ཞབས་འདེགས་ཞུ་བ་དང་སྤྱི་ཚོགས་བརྟན་ལྷིང་སྲུང་སྐྱོང་བྱེད་མཁན “གསེར་གྱི་ཕུབ ”ངོ་གནོང་མི་དགོས་པ་ཞིག་ཡིན་པ་ར་འཕྲོད་བྱུང་ཡོད་ཅེས་གསུངས་པ་རེད།

    རང་ལྗོངས་ཀྱི་སྤྱི་བདེའི་ལས་དོན་དང་སྤྱི་བདེའི་དཔུང་ཁག་འཛུགས་སྐྱོང་ལ་སྔར་བས་ཤུགས་སྣོན་རྒྱག་པའི་ཐད་ཧའོ་ཕུང་གིས་གཅིག་ནས་ཆབ་སྲིད་ཀྱི་ལས་འགན་ཨང་དང་པོར་འཇོག་པ་དང་བློ་དཀར་སེམས་དཀར་ངང་ལས་འགན་སྒྲུབ་དགོས། ད་ཐེངས་ཀྱི་གཟེངས་བསྟོད་ཚོགས་འདུ་དེ་འགོ་འཛུགས་ས་གསར་པ་ཞིག་ཏུ་བརྩིས་ནས “གུང་ཁྲན་ཏང་གི་སྲིད་སྐྱོང་གནས་བབ་བརྟན་དུ་གཏོང་བ་དང་། རྒྱལ་ཁབ་ཀྱི་ཡུན་རིང་བདེ་འཁོད་སྲུང་སྐྱོང་བྱེད་པ། མི་དམངས་བདེ་སྡོད་ལས་བརྩོན་ཡོང་བ་འགན་ལེན་བྱེད་པ ”བཅས་ཆབ་སྲིད་དང་སྤྱི་ཚོགས་ཀྱི་འགན་འཁྲི་ཆེན་པོ་གསུམ་དེ་བས་ལེགས་པའི་ངང་འཁུར་ནས་སྤྱི་ཡོངས་ནས་མཉམ་འབྲེལ་འགོག་སྲུང་བྱེད་ཤུགས་ཆེ་རུ་གཏོང་བ་དང་རང་འགུལ་ངང་བཅོས་སྐྱོང་གཏིང་ཟབ་བྱས་ཏེ་བོད་འདི་ཉིད་ཞི་མཐུན་དང་བརྟན་ལྷིང་ཡོང་བའི་ཕུལ་བྱུང་གྲུབ་འབྲས་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས། གཉིས་ནས་དཔའ་བོ་དཔེ་བཟང་གི་བྱས་རྗེས་སློབ་སྦྱོང་དང་དྲིལ་བསྒྲགས་ཤུགས་ཆེན་བྱེད་པ་དང་རང་ངོས་འཛུགས་སྐྱོང་ལ་སྐུལ་འདེད་ཤུགས་ཆེན་གཏོང་དགོས། དཔའ་བོ་དཔེ་བཟང་གི་སྔོན་ཐོན་བྱས་རྗེས་ལ་སློབ་སྦྱོང་དང་དྲིལ་བསྒྲགས་ཤུགས་ཆེན་བྱེད་པ་དང་བྱས་རྗེས་འཇོག་མཁན་མཉམ་སྡེབ་ཀྱི་ཉམས་མྱོང་དང་བྱེད་སྟངས་ཕྱོགས་སྡོམ་ནན་ཏན་བྱ་རྒྱུ་གཞི་འཛིན་སར་བྱས་ནས་དེང་སྐབས་སྤེལ་བཞིན་ཡོད་པའི་སྲིད་ཁྲིམས་ལས་བྱེད་ཉེན་རྟོག་པའི་ལྟེ་བའི་རིན་ཐང་ལྟ་བའི་སློབ་གསོའི་ལག་ལེན་བྱེད་སྒོ་དང་ལས་གནས་དམག་སྦྱོང་ཆེ་མོའི་བྱེད་སྒོ་དང་ཟུང་འབྲེལ་དམ་ཟབ་བྱས་ཏེ་སྤྱི་བདེའི་དཔུང་ཁག་གི་རང་ངོས་འཛུགས་སྐྱོང་ལ་རྒྱུན་འཁྱོངས་ལྷོད་མེད་ངང་དམ་འཛིན་བྱས་ཏེ་ཆབ་སྲིད་ཀྱི་གོ་རྟོགས་མཐོ་བ་དང་། ལས་སྒོ་བྱང་ཆུབ་པ། སྒྲིག་ཁྲིམས་ནན་པོ་སྲུང་བ། སྤྱོད་ཚུལ་བཟང་བ་བཅས་ཀྱི་སྤྱི་བདེའི་དཔུང་ཁག་ཅིག་ཧུར་ཐག་སྐྲུན་དགོས། གསུམ་ནས་བློ་ཁོག་ཆེན་པོས་སྒྱུར་བཅོས་གསར་གཏོད་བྱ་རྒྱུ་མཐའ་འཁྱོངས་བྱས་ཏེ་སྤྱི་བདེའི་ལས་ཀའི་ཆུ་ཚད་མཐོ་རུ་གཏོང་དགོས། སྤྱི་ཚོགས་དོ་དམ་ལ་ཤུགས་སྣོན་རྒྱག་པ་དང་གསར་གཏོད་བྱེད་པའི་བསམ་ཕྱོགས་གསར་པ་དང་། བྱེད་ཐབས་གསར་པ། བྱ་ཐབས་གསར་པ་བཅས་འཚོལ་ཞིབ་ཧུར་ཐག་བྱེད་པ་དང་མི་གཙོ་བོར་འཛིན་པ་དང་སྔོན་དུ་ཞབས་འདེགས་ཞུ་བའི་འདུ་ཤེས་སྔར་བས་བརྟན་དུ་བཏང་སྟེ་དུས་རབས་ཀྱི་བླང་བྱ་དང་འཚམ་པ་དང་བོད་ཀྱི་གནས་ཚུལ་དང་མཐུན་པའི་སྤྱི་བདེ་ལས་ཁུངས་ཀྱི་སྤྱི་ཚོགས་དོ་དམ་གསར་གཏོད་བྱེད་པའི་ལམ་བུའི་ཐོག་སྐྱོད་དགོས་ཞེས་བླང་བྱ་བཏོན་གནང་བ་རེད།

    ཟླ་5ཚེས་20ཉིན་རང་ལྗོངས་ཀྱི་སྤྱི་བདེའི་དཔའ་བོ་དཔེ་བཟང་འཐུས་མི་ཚོགས་པ་གནམ་གྲུར་བསྡད་ནས་བོད་དུ་ཕྱིར་ལོག་བྱས་པ་དང་ལྗོངས་ཏང་ཨུད་སྲིད་ཁྲིམས་ཨུ་ཡོན་ལྷན་ཁང་དང་ལྗོངས་སྤྱི་བདེ་ཐིང་གི་འབྲེལ་ཡོད་འགན་འཁུར་བློ་མཐུན་གྱིས་གནམ་ཐང་དུ་བསུ་བར་ཕེབས་པ་རེད།