འདི་ནི་ཧའོ་ཕུང་གིས་ལྕགས་པོ་རི་དམངས་ཕན་སྟབས་བདེའི་ཉེན་རྟོག་ས་ཚིགས་སུ་ལས་འགན་སྒྲུབ་མཁན་མི་དམངས་ཉེན་རྟོག་པ་དང་བྱམས་བརྩེའི་ངང་ཕྱག་གཏོང་བའི་གནས་ཚུལ་ཡིན་པ།
ས་ག་ཟླ་བ་སླེབས་གྲབས་ཡོད་པའི་ཚེས་19ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་ཆེད་མངགས་ལྷ་ས་གྲོང་ཁྱེར་ལྕགས་པོ་རི་དང་། གླིང་སྐོར་ཤར་ལམ། གཙུག་ལག་ཁང་ཐང་ཆེན་སོགས་སུ་ཕེབས་ནས་དམངས་ཕན་ཞབས་ཞུ་དང་། བརྟན་ལྷིང་སྲུང་སྐྱོང་དང་བདེ་འཇགས་ལས་དོན་སྤེལ་ཚུལ་ལ་རྟོག་ཞིབ་དང་མཁྱེན་རྟོགས་གནང་བ་རེད། ཁོང་གིས་རིམ་ཁག་སྤྱི་བདེ་ལས་ཁུངས་དང་ལས་འགན་སྒྲུབ་མཁན་དཔུང་སྡེས་ལས་ཀའི་སྔོན་ཇུས་ཤུགས་ཆེར་གཏོང་བ་དང་། ལས་ཀའི་བྱེད་ཐབས་ཞིབ་ཚགས་སུ་གཏོང་བ། ཞབས་ཞུར་སྣེ་ཁྲིད་དང་བདེ་འཇགས་དོ་དམ་ལ་ཤུགས་སྣོན་རྒྱག་པ་བཅས་བྱས་ཏེ་རྒྱུན་ལྡན་གྱི་ཆོས་ལུགས་བྱེད་སྒོ་བདེ་བླག་དང་གོ་རིམ་ལྡན་པའི་ངང་སྤེལ་ཐོག་སྤྱི་ཚོགས་ཞི་མཐུན་དང་བརྟན་ལྷིང་ལ་ནུས་ཤུགས་ཡོད་རྒུས་སྲུང་སྐྱོང་བྱེད་དགོས་པའི་ནན་བཤད་གནང་བ་རེད།
ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷ་དང་ལྗོངས་ཏང་ཨུད་ཀྱི་རྒྱུན་ཨུ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཏེང་ཞའོ་ཀང་གིས་རྟོག་ཞིབ་ལ་ཕེབས་རོགས་ཞུས་པ་རེད།
ཧའོ་ཕུང་དང་བཅས་པ་དང་ཐོག་ལྕགས་པོ་རིར་ཕེབས་ནས་ཆོས་དད་མང་ཚོགས་ཁག་གཅིག་དང་བྱམས་བརྩེའི་ངང་གླེང་མོལ་གནང་ཞིང་། ཧའོ་ཕུང་གིས་སྐོར་ལམ་ཁག་གཅིག་ཏུ་འགྲོ་སྐྱོད་སྟབས་མི་བདེ་བའི་གནད་དོན་ཡོད་པ་མཁྱེན་རྟོགས་བྱུང་རྗེས་འཕྲལ་མ་ཉིད་དུ་རང་སྐྱོང་ལྗོངས་དང་ལྷ་ས་གྲོང་ཁྱེར་གྱི་འབྲེལ་ཡོད་སྡེ་ཚན་ལ་གང་མགྱོགས་མཐུན་སྦྱོར་ངང་ཐག་གཅོད་བྱེད་དགོས་པའི་བླང་བྱ་བཏོན་གནང་བ་རེད། ལྕགས་པོ་རིའི་དམངས་ཕན་ཉེན་རྟོག་ཞབས་ཞུའི་ས་ཚིགས་སུ་ཉི་ཡོལ་དང་། རྐུབ་སྟེགས། གསོ་རླུང་། ཁྲག་ཤེད་བརྟག་ཆས་སོགས་དམངས་ཕན་སྒྲིག་བཀོད་སྒྲིག་སྦྱོར་བྱས་པ་གཟིགས་སྐབས་དེའི་ཐད་ཁས་ལེན་གང་ལེགས་གནང་བ་རེད། ཁོང་གིས་མི་དམངས་ཉེན་རྟོག་པ་ཚང་མས་དུས་དང་རྣམ་པ་ཀུན་དུ་མི་དམངས་ལ་ཞབས་འདེགས་ཞུ་རྒྱུའི་དམིགས་ཡུལ་བློ་ལ་བརྟན་པོར་ངེས་ཏེ་ས་ག་ཟླ་བའི་ཆོས་ལུགས་བྱེད་སྒོ་སྤེལ་ཡུལ་དུ་མི་ཅུང་མང་བ་ཡོད་པའི་གནས་ཚུལ་ལ་དམིགས་ནས་ལས་ཀའི་སྔོན་ཇུས་ནན་ཏན་བཟོས་ཐོག་ཞབས་ཞུ་དང་དོ་དམ་ལས་དོན་ཁག་ཏན་ཏིག་ངང་ཡག་པོ་བསྒྲུབ་ནས་དུས་ཐོག་ཏུ་སྐོར་ལམ་གཙོ་བོར་ལམ་སྟོན་སློབ་ཁྲིད་བྱ་རྒྱུར་ཤུགས་སྣོན་རྒྱག་པ་དང་ས་གནས་ས་ཐོག་གི་སྒྲིག་ལམ་སྲུང་སྐྱོང་བྱས་ཐོག་ཚང་ཁ་རྒྱག་པ་དང་། རྡོག་རྫིས་གཏོང་བ། མེ་སྐྱོན་སོགས་ཀྱི་སྤྱི་པའི་བདེ་འཇགས་ལས་འཛོལ་མི་ཐོན་པ་བྱས་ཏེ་རྒྱུན་ལྡན་གྱི་ཆོས་ལུགས་བྱེད་སྒོ་གོ་རིམ་ལྡན་པའི་ངང་སྤེལ་རྒྱུ་འགན་ལེན་གྱིས་དད་ལྡན་མང་ཚོགས་ཀྱི་དགོས་མཁོ་སྐོང་དགོས་ཞེས་གསུངས་པ་རེད།
ཉེན་རྟོག་ཞབས་ཞུའི་ས་ཚིགས་ཀྱི་ཐོལ་བྱུང་དོན་རྐྱེན་ཐག་གཅོད་བྱེད་པའི་འཕྲལ་སྒྲུབ་ནུས་པར་ཞིབ་བཤེར་བྱེད་ཆེད་ཧའོ་ཕུང་གིས་ཉེན་རྟོག་ཞབས་ཞུའི་ས་ཚིགས་དེའི་ལས་སྒྲུབ་དཔོན་དམག་ཚོར་སྐབས་ཕྲལ་དཔུང་རོགས་ཞུ་རྒྱུའི་བརྡ་བཏང་ཞིང་། སྐར་མ་ཁ་ཤས་སོང་རྗེས་ལུས་ཡོངས་དྲག་ཆས་སྤྲས་པའི་དྲག་ཆས་ཉེན་རྟོག་དཔོན་དམག་20དེར་རྒྱུགས་ཡོང་བ་རེད། ཧའོ་ཕུང་གིས་ལས་སྒྲུབ་དཔོན་དམག་ཚོའི་མགྱོགས་ཕྱོད་ནུས་པ་དང་དེ་བཞིན་བསམ་པའི་ཉམས་འགྱུར་བཟང་པོར་ཁས་ལེན་གང་ལེགས་གནང་བ་དང་ཁོང་གིས་དཔོན་དམག་ཡོངས་ལ་སྤྱོད་ཚུལ་བཟང་པོ་མུ་མཐུད་རྒྱུན་འཁྱོངས་བྱས་ཏེ་དམངས་ཕན་ཞབས་ཞུ་དང་བརྟན་ལྷིང་སྲུང་སྐྱོང་གི་ཐོལ་བྱུང་དོན་རྐྱེན་ཐག་གཅོད་བྱ་རྒྱུ་ལས་འགན་གཙོ་བོར་བརྩིས་ནས་སྔར་བས་དོགས་ཟོན་ཆེར་སྐྱེད་ཀྱིས་ཐོག་མཐའ་བར་གསུམ་དུ་འབོད་མ་ཐག་ཡོང་བ་དང་། སླེབས་རྗེས་འཐབ་ནུས་པ། འཐབ་པར་རྒྱལ་ཁ་ཐོབ་པ་བཅས་བྱེད་ཐུབ་པ་བྱས་ནས་རིགས་ཁག་གི་ཐོལ་བྱུང་རྫ་དྲག་གནས་ཚུལ་ལ་ཁ་གཏད་ནུས་ལྡན་གཅོག་ཐོག་མི་དམངས་ཀྱི་ལུས་སྲོག་དང་རྒྱུ་ནོར་བདེ་འཇགས་ལ་སྲུང་སྐྱོང་མཐའ་གཅིག་ཏུ་བྱེད་དགོས་ཞེས་གསུངས་པ་རེད།
གླིང་སྐོར་ཤར་ལམ་སྐྱིད་རས་སྡེ་ཁུལ་དུ་ཧའོ་ཕུང་གིས་ལྷ་ས་གྲོང་ཁྱེར་སྤྱི་བདེ་ཅུས་དམིགས་བསལ་ཉེན་རྟོག་ཉིང་ལག་རུ་ཁག་གི་ལས་སྒྲུབ་མི་དམངས་ཉེན་རྟོག་པར་གཟིགས་པ་དང་གོ་ཚོན་སྤྱོད་པའི་གནས་ཚུལ་དང་ཐོལ་བྱུང་དོན་རྐྱེན་ཐག་གཅོད་ནང་སྦྱོང་ལ་གཟིགས་ཞིབ་གནང་བ་རེད། ཧའོ་ཕུང་གིས་མིག་སྔར་རང་ལྗོངས་ཀྱི་སྤྱི་ཚོགས་དུས་བབ་རྒྱུན་མཐུད་བརྟན་ལྷིང་ཡོད་མོད། འོན་ཀྱང་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་དུས་བབ་སྔར་བཞིན་ཪྙོག་འཛིང་དང་ཛ་དྲག་པོ་ཡོད། ས་ག་ཟླ་བའི་ཆོས་ལུགས་བྱེད་སྒོའི་རིང་མི་དམངས་ཉེན་རྟོག་ཡོངས་ཀྱིས་ཐོག་མཐའ་བར་གསུམ་དུ་བརྟན་ལྷིང་སྲུང་སྐྱོང་གི་རྩ་བ་དེ་དམ་པོར་བཟུང་ནས་ལས་མི་ཡོངས་ལ་དྲག་ཆས་སྤྲད་དེ་གྲ་སྒྲིག་ཨང་གསར་བྱས་ནས་ཐོལ་བྱུང་དོན་རྐྱེན་དང་དྲག་ཤུགས་འཇིགས་སྐུལ་བྱེད་སྤྱོད་སྔོན་འགོག་ནན་པོ་བྱེད་པ་དང་། འཕྲལ་སྒྲུབ་སྔོན་ཇུས་འཐུས་སྒོ་ཚང་དུ་གཏོང་བ། ཐོལ་བྱུང་དོན་རྐྱེན་གྱི་ཐག་གཅོད་ཆུ་ཚད་མཐོ་རུ་གཏོང་བ། དགྲ་བོ་མ་འགུལ་གོང་ནས་བྱ་སྤྱོད་སྤེལ་བ་དང་མ་བྱུང་སྔོན་འགོག་བཅས་བྱས་ཏེ་ཚད་མཐོའི་དམག་འཐབ་དོགས་ཟོན་དང་བྱང་ཚད་མཐོ་བའི་འཇོན་ཐང་ལ་བརྟེན་ནས་ཁ་ཕྲལ་གྱི་བྱེད་སྤྱོད་མཐའ་དག་ཐལ་བའི་རྡུལ་དུ་བརླགས་ཏེ་ལྗོངས་ཡོངས་ཀྱི་ཞི་མཐུན་བརྟན་ལྷིང་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་དགོས་ཞེས་གསུངས་པ་རེད།
ཧའོ་ཕུང་དང་བཅས་པ་གཙུག་ལག་ཁང་ཐང་ཆེན་དུ་ཕེབས་ཏེ་རང་སྐྱོང་ལྗོངས་ཏང་ཨུད་ཀྱི་ཚབ་ཞུས་ནས་འཐབ་ཕྱོགས་དང་པོར་དཀའ་སྤྱད་ལས་སྒྲུབ་བྱེད་མཁན་སྤྱི་བདེ་མི་དམངས་ཉེན་རྟོག་དང་དྲག་ཆས་ཉེན་རྟོག་དཔོན་དམག་ཚོར་བྱམས་བརྩེའི་འཚམས་འདྲི་གནང་བ་དང་ཁོང་ཚོས་དུས་ཡུན་རིང་པོའི་ནང་འཁུར་བསམ་རྣམ་དག་དང་སྐད་གྲགས་མེད་པར་ལེགས་སྐྱེས་ཕུལ་བར་བླ་ན་མེད་པའི་གུས་འདུད་ཞུས་གནང་བ་རེད། བློ་གཅིག་སེམས་གཅིག་གིས་མི་དམངས་ལ་ཞབས་ཞུ་བྱ་རྒྱུ་ནི་མི་དམངས་ཉེན་རྟོག་པ་དང་མི་དམངས་བུ་ཕྲུག་དམག་གི་འགན་འཁྲི་དང་ལས་འགན་ཞིག་ཡིན། མི་རིགས་ཁག་གི་མང་ཚོགས་དུས་བདེ་ཡོད་པ་དང་ངོ་གདོང་ནས་འཛུམས་དམངས་ཕྱུར་བ་མཐོང་སྐབས་དཀའ་སྡུག་ཇི་ལྟར་ཆེ་ཡང་བྱེད་རིན་ཡོད་པ་ཞིག་རེད་ཞེས་ཚང་མས་གཅིག་རྗེས་གཉིས་མཐུད་ངང་བཤད། ཧའོ་ཕུང་གིས་གསན་རྗེས་ཐུགས་བློ་ཚིམ་པོ་བྱུང་ནས་ཁོང་གིས་ལས་སྒྲུབ་འདུ་ཤེས་དང་། འགན་འཁྲིའི་འདུ་ཤེས། ཞབས་ཞུའི་འདུ་ཤེས་བཅས་སྔར་བས་ཆེ་རུ་བཏང་སྟེ་སྤྱི་ཚོགས་བདེ་འཇགས་དོ་དམ་ལ་ཤུགས་སྣོན་རྒྱག་པ་དང་ཁྲིམས་འགལ་ཉེས་གསོག་བྱེད་སྤྱོད་མཐའ་དག་ལ་རྡུང་རྡེག་ཚ་ནན་གཏོང་བ་དང་འབྲེལ་རང་ངོས་ཀྱི་ཚད་ལྡན་ཁྲིམས་སྐྱོང་དང་ཤེས་དཔལ་ལས་སྒྲུབ་བརྒྱུད་བོད་ཀྱི་མི་དམངས་ཉེན་རྟོག་པ་དང་དྲག་ཆས་དཔོན་དམག་གི་གཟུགས་བཪྙན་བཟང་པོ་གང་ལེགས་མངོན་པ་བྱེད་དགོས་ཞེས་ནན་བཤད་གནང་བ་རེད།
ཧའོ་ཕུང་དང་བཅས་པ་ད་དུང་གཙུག་ལག་ཁང་དུ་ཕེབས་ནས་ཆོས་འཇལ་དུ་ཡོང་མཁན་མང་ཚོགས་བསུ་བའི་འབྲེལ་ཡོད་གྲ་སྒྲིག་ལས་ཀའི་གནས་ཚུལ་ལ་གཟིགས་ཞིབ་གནང་བ་རེད།