ཟླ་5ཚེས་16ཉིན་པད་མ་འཕྲིན་ལས་ཀྱིས་ཆབ་མདོ་ས་ཁུལ་སྨན་རྩིས་ཁང་གི་སྨན་བཅོས་རྨང་གཞིའི་སྒྲིག་བཀོད་དང་བོད་སྨན་ཞིབ་འཇུག་དང་གསར་སྤེལ་སོགས་ལ་གཟིགས་ཞིབ་གནང་བའི་གནས་ཚུལ་ཡིན་པ།

    ཟླ་5ཚེས་12ནས་18ཉིན་བར་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་ཡི་ཚབ་ཞུས་ཏེ་ཆབ་མདོའི་མི་རིགས་ཁག་གི་མི་དམངས་ལ་བརྩེ་སེམས་ཟབ་མོ་འཆང་བཞིན་དུ་ཆབ་མདོ་ས་ཁུལ་གྱི་དཔལ་འབར་དང་། ལྷོ་རོང་། དཔའ་ཤོད། བྲག་གཡབ། རི་བོ་ཆེ། སྟེང་ཆེན། ཆབ་མདོ་སོགས་རྫོང་གི་ཤང་གྲོང་སུམ་ཅུ་ཙམ་ལ་བསྐྱོད་དེ་ཆབ་མདོ་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང “ལོ་ལྔ་ཚན་བཅུ་གཉིས་པ ”འགོ་འཛུགས་པའི་ལས་དོན་སྤེལ་ཚུལ་དང་། ཞིང་འབྲོག་པའི་ཐོན་སྐྱེད་དང་འཚོ་བའི་གནས་ཚུལ། སྤྱི་ཚོགས་བརྟན་ལྷིང་སྲུང་སྐྱོང་བྱ་ཚུལ་སོགས་ཐད་ས་གནས་ས་ཐོག་ཏུ་རྟོག་ཞིབ་གནང་བ་མ་ཟད་ཆབ་མདོ་ས་ཨུད་དང་སྲིད་འཛིན་ཀུང་ཧྲུའུ་དང་བཞུགས་མོལ་ཡང་གནང་བ་རེད།

    ལྗོངས་ཏང་ཨུད་ཀྱི་རྒྱུན་ཨུ་ཆབ་མདོ་ས་ཨུད་ཀྱི་ཧྲུའུ་ཅི་ནོར་བུ་དོན་གྲུབ་སོགས་རྟོག་ཞིབ་གནང་སྐབས་ལྷན་དུ་ཕེབས་པ་རེད།

    ལོ་རྒྱུས་ཀྱི་དུས་སྐབས་གསར་པར་ཇི་ལྟར་བྱས་ཏེ་ཆབ་མདོ་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གོམ་སྟབས་མགྱོགས་སུ་བཏང་ནས་སྤྱི་ཚོགས་ཞི་མཐུན་བརྟན་ལྷིང་སྲུང་སྐྱོང་དང་། དམངས་འཚོ་ལེགས་སུ་ཧུར་ཐག་གཏོང་བ། སྤྱི་པའི་ཞབས་ཞུའི་ཆུ་ཚད་མཐོ་རུ་གཏོང་བ་བཅས་བྱས་ཐོག་ཞིང་འབྲོག་མང་ཚོགས་ཀྱི་ཡོང་འབབ་ཟམ་མི་ཆད་པར་མཐོ་རུ་བཏང་ནས་འཕེལ་རྒྱས་དང་ཡར་ཐོན་ལས་བྱུང་བའི་དངོས་ཕན་ལོངས་སུ་ཏན་ཏིག་སྤྱོད་ཐུབ་པ་བྱ་རྒྱུ་དེ་ནི་ལྗོངས་ཏང་ཨུད་དང་སྲིད་གཞུང་གིས་ཐུགས་ཁུར་གནང་བའི་གཙོ་གནད་ལས་དོན་ཞིག་ཡིན་ལ་པད་མ་འཕྲིན་ལས་ཀྱིས་བརྟག་ཞིབ་གནང་རྒྱུའི་ནང་དོན་གལ་ཆེན་ཞིག་ཀྱང་རེད། པད་མ་འཕྲིན་ལས་ཀྱིས་དཔལ་འབར་རྫོང་དུ་རྟོག་ཞིབ་དང་བརྟག་ཞིབ་གནང་སྐབས་ཞིང་འབྲོག་པའི་ཡོང་འབབ་མང་དུ་བཏང་ནས་2020ལོར་སླེབས་སྐབས་རྒྱལ་ཡོངས་དང་མཉམ་དུ་འབྱོར་འབྲིང་སྤྱི་ཚོགས་སྒོ་ཀུན་ནས་འཛུགས་སྐྲུན་ཐུབ་པའི་འགན་ལེན་བྱས་ཏེ་ཞིང་འབྲོག་ཁུལ་གྱི་རྨང་གཞིའི་སྒྲིག་བཀོད་འཛུགས་སྐྲུན་ལ་མགྱོགས་མྱུར་སྐུལ་མ་གཏོང་བ་དང་ལྷག་དོན་དུ་འགྲིམ་འགྲུལ་འཛུགས་སྐྲུན་བྱ་རྒྱུ་དེ་ནི་ཁ་ཚ་དགོས་གཏུགས་ཤིག་རེད། དཔལ་འབར་རྫོང་ས་སྟེང་ཤང་གི་རྔུལ་ཆུ་ཟམ་པ་བསྐྲུན་རྒྱུ་དེ་ནི་རྒྱལ་མོ་རྔུལ་ཆུའི་ཁ་སྤྲོད་དུ་གནས་པའི་མི་སེར་ཚོས་རེ་སྒུག་ཡུན་རིང་བྱས་པ་ཞིག་ཡིན་པ་དང་རྣམ་གྲངས་དེ་མགྱོགས་མྱུར་ལས་འགོ་བཙུགས་ཏེ་དེ་གའི་མང་ཚོགས་རྣམས་མགྱོགས་ཙམ་རི་ཁུག་ནས་ཐོན་ཏེ་ཕྱུག་འགྱུར་གྱི་ལམ་བུ་འཚོལ་ཐུབ་པ་བྱེད་དགོས་ཞེས་དམིགས་བསལ་དུ་ནན་བཤད་གནང་བ་རེད།

    པད་མ་འཕྲིན་ལས་ཀྱིས་ལྷོ་རོང་རྫོང་གི་རྩམ་པ་ལས་སྣོན་བཟོ་གྲྭ་དང་བྲག་གཡབ་རྫོང་དཀྱིལ་ཐང་གྲོང་རྡལ་དཔལ་འབྱོར་ནགས་ཤིང་རྟེན་གཞིའི་ཐོན་སྐྱེད་ལ་གཟིགས་པ་དང་། ཕན་ནུས་བཀའ་འདྲི་གནང་བ། གསར་གཏོད་སྐོར་གླེང་གནང་བ་བཅས་བྱས་ཏེ་ཆབ་མདོ་ས་ཁུལ་གྱི་དཔལ་འབྱོར་འཕར་སྟངས་བསྒྱུར་མགྱོགས་སུ་གཏོང་བ་དང་ཁྱད་ལྡན་ལེགས་ཆའི་ཐོན་ལས་འཕེལ་རྒྱས་ལ་སྐུལ་མ་གཏོང་རྒྱུའི་ཐད་ཐུགས་རེ་ཟབ་མོ་གནང་ཞིང་། ཁོང་གིས་སི་ཁྲོན་དང་། ཡུན་ནན། མཚོ་སྔོན་བཅས་དང་འབྲེལ་བའི་ས་བབ་ཀྱི་ལེགས་ཆ་འདོན་སྤེལ་བྱས་ནས་ཁྲེང་ཏུའུ་དང་ཁྲུང་ཆིང་གི་དཔལ་འབྱོར་ཡུག་ཁུལ་དང་བོད་དབུས་རྒྱུད་ཀྱི་དཔལ་འབྱོར་ཡུག་ཁུལ་འབྲེལ་ཐུབ་པ་བྱས་ཐོག་ཐོན་ཁུངས་ལུགས་མཐུན་ངང་གསར་སྤེལ་བྱེད་པ་དང་། ལེགས་ལྡན་ཁྱད་ལྡན་ཐོན་ལས་འཕེལ་རྒྱས་གཏོང་བ། ཡུལ་སྐོར་སྤུས་རྟགས་རྩེ་གྲ་གཏོད་པ་བཅས་བྱས་ཏེ་བོད་ཤར་རྒྱུད་ཀྱི་དཔལ་འབྱོར་སྟོབས་ཆེའི་ཁུལ་ཧུར་ཐག་བསྐྲུན་དགོས་ཞེས་བསྟན་གནང་བ་རེད།

    དམངས་འཚོ་འགན་ལེན་དང་ལེགས་སུ་གཏོང་བར་འཕེལ་རྒྱས་ནི་འགག་རྩ་དང་སློབ་གསོ་ནི་གཞི་རྩ་ཡིན།

    པད་མ་འཕྲིན་ལས་ཀྱིས་རྟག་ཏུ་ཐུགས་ཁྲལ་གནང་བའི་གནད་དོན་གཉིས་ཏེ། གཅིག་ནས་དམངས་འཚོ་འགན་ལེན་དང་ལེགས་སུ་གཏོང་རྒྱུ་དང་དམངས་སེམས་གཅིག་ཏུ་བསྡུ་རྒྱུ་དང་གཉིས་ནས་མི་རབས་རྗེས་མར་ཐུགས་ཁུར་བྱས་ནས་ཤུལ་འཛིན་མཁན་ཡོད་པ་བྱ་རྒྱུ་དེ་རེད། པད་མ་འཕྲིན་ལས་ཀྱིས་རྒྱལ་ཡོངས་དང་མཉམ་དུ་འབྱོར་འབྲིང་སྤྱི་ཚོགས་སྒོ་ཀུན་ནས་འཛུགས་སྐྲུན་བྱེད་པའི་ནང་བསྐྱོད་པར་ཤེས་ཡོན་ལྡན་པ་དང་། རིག་གནས་ཡོད་པ། ལག་རྩལ་ཤེས་པ། གཉེར་སྐྱོང་མཁས་པ་བཅས་ཀྱི་སྤྱི་ཚོགས་རིང་ལུགས་ཀྱི་ཞིང་འབྲོག་པ་གསར་པ་མང་དག་ཅིག་གིས་ཡོང་འབབ་མང་དུ་གཏོང་བ་དང་ཐོན་སྐྱེད་ལ་སྐུལ་མ་གཏོང་དགོས་ཀྱི་ཡོད། རྟོག་ཞིབ་གནང་རིང་ཁོང་གིས་ཆེད་མངགས་རྫོང་དང་ཤང་གི་སློབ་གྲྭ་ཁག་ཏུ་ཕེབས་ནས་སློབ་མའི་སློབ་སྦྱོང་དང་འཚོ་བའི་གནས་ཚུལ་ལ་གཟིགས་ཞིབ་གནང་བ་དང་དགེ་རྒན་ཚོ་དང་བྱམས་བརྩེའི་ངང་སྤེལ་རེས་གནང་ནས་སློབ་ཁྲིད་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་མ་ཟད་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་ཡི་ཚབ་ཞུས་ནས་དགེ་རྒན་ཚོས་དཀའ་སྤྱད་ཀྱིས་ལས་དོན་སྒྲུབ་པར་ཐུགས་རྗེ་ཆེ་ཞུས་གནང་བ་རེད།

    སྟེང་ཆེན་རྫོང་ཞེ་གཞུང་ཤང་ལྷ་མཐོང་གྲོང་གསར་ནི་ས་གཤིས་ཀྱི་གནོད་འཚེས་རྐྱེན་པས་གནས་སྤོ་བྱས་པའི་གྲོང་གསེབ་གསར་པ་འཛུགས་སྐྲུན་གྱི་དཔེ་སྟོན་ཁུལ་ཞིག་ཡིན་པ་དང་གྲོང་གསར་འཛུགས་སྐྲུན་བྱེད་སྐབས་དེ་གར་ལེ་ལག་ཚང་བའི་བུ་བཅོལ་ཁང་ཞིག་བསྐྲུན་པ་དེར་མཉེན་ཆས་དང་མཁྲེགས་ཆས་ཆ་ཚང་ཡོད་པ་གཟིགས་སྐབས་པད་མ་འཕྲིན་ལས་དགྱེས་ཚོར་ཧ་ཅང་ཆེན་པོ་བྱུང་ཞིང་། ཁོང་གིས་སློབ་ཞུགས་གོང་གི་སློབ་གསོ་ནི་རྒྱལ་དམངས་སློབ་གསོའི་མ་ལག་གི་གལ་ཆེའི་གྲུབ་ཆ་ཞིག་ཡིན་པ་དང་སློབ་ཞུགས་གོང་གི་སློབ་གསོ་ཡག་པོ་གཉེར་རྒྱུ་ནི་མང་ཚོགས་ཚོའི་རེ་སྒུག་ཞིག་ཡིན་ལ་སྲིད་གཞུང་གི་འགན་འཁྲི་ཞིག་དེ་བས་རེད། རིམ་པ་ཁག་དང་སྡེ་ཚན་ཁག་གིས་སློབ་ཞུགས་གོང་གི་སློབ་གསོ་འཕེལ་རྒྱས་གཏོང་རྒྱུ་དེ་གྲོང་ཁྱེར་དང་གྲོང་རྡལ་དང་གྲོང་གསེབ་གསར་པ་འཛུགས་སྐྲུན་གྱི་འཆར་འགོད་ནང་བཅུག་སྟེ་ཞིང་འབྲོག་ཁུལ་གྱི་སློབ་ཞུགས་གོང་གི་སྐད་རིགས་གཉིས་ཀྱི་བུ་བཅོལ་ཁང་འཛུགས་སྐྲུན་གྱི་ལས་གྲྭ་ལག་བསྟར་ཧུར་ཐག་བྱེད་དགོས་ཞེས་བསྟན་གནང་བ་རེད།

    པད་མ་འཕྲིན་ལས་དང་བཅས་པས་ད་དུང་དཔལ་འབར་རྫོང་དཔལ་འབར་གྲོང་རྡལ་འཕྲོད་བསྟེན་ཁང་དང་། ལྷོ་རོང་རྫོང་ཤོ་པ་མདོ་གྲོང་རྡལ་འཕྲོད་བསྟེན་ཁང་། ཆབ་མདོ་སྨན་རྩིས་ཁང་། ཆབ་མདོ་མི་དམངས་སྨན་ཁང་བཅས་སུ་ཕེབས་ནས་གཞི་རིམ་སྨན་ཁང་གི་སྒྲིག་ཆས་དང་། ནད་ཁྲི། སྨན་པའི་གྲངས་འབོར་སོགས་ཀྱི་ཐད་གཏིང་ཟབ་ལ་ཞིབ་ཅིང་ཕྲ་བའི་ངང་མཁྱེན་རྟོགས་གནང་ཞིང་། ཁོང་གིས་གཞི་རིམ་གྱི་སྨན་བཅོས་སྒྲིག་བཀོད་ལ་མ་དངུལ་གཏོང་ཤུགས་དང་གཞི་རིམ་གྱི་སྨན་དོན་མི་སྣ་གསོ་སྐྱོང་བྱེད་ཤུགས་རྒྱུན་ཆད་མེད་པར་ཆེ་རུ་གཏོང་བ་དང་བོད་ལུགས་གསོ་རིག་དང་བོད་སྨན་ཞིབ་འཇུག་གསར་སྤེལ་དང་ནད་ཐོག་སྨན་བཅོས་བྱེད་སྐབས་བེད་སྤྱོད་བྱེད་པའི་ནུས་པ་ཆེ་རུ་བཏང་སྟེ་སྦྲུམ་མ་སྨན་ཁང་དུ་བསྡད་ནས་མངལ་གྲོལ་ཚད་མཐོ་རུ་གཏོང་བ་དང་ཕྲུ་གུ་དམར་འབྱར་ཤི་ཚད་དང་ལྷན་སྐྱེས་ནད་དབང་པོ་སྐྱོན་ཅན་ཡིན་ཚད་དམའ་རུ་བཏང་ཐོག་རྒྱ་ཆེའི་མི་དམངས་མང་ཚོགས་ལ་སྤུས་ཚད་མཐོ་བའི་སྤྱི་པའི་སྨན་བཅོས་ཞབས་འདེགས་ཞུས་ནས་ཞིང་འབྲོག་མང་ཚོགས་ལ་ནད་གཞི་ཕོག་སྐབས་ཐག་ཉེ་སར་སྨན་བཅོས་ཐུབ་རྒྱུ་འགན་ལེན་བྱེད་དགོས་པའི་བླང་བྱ་བཏོན་གནང་བ་རེད།

    ལྷོ་རོང་རྫོང་ཀྲུང་ཡས་ཤང་རྒྱ་སྒོ་གྲོང་ཚོའི་བཀྲ་ཤིས་ཆོས་སྒྲོན་ནི་གྲུམ་བུ་ཚིགས་ཆེན་གྱི་ནད་པ་ཞིག་ཡིན་པ་དང་བཟའ་ཟླ་ཚེ་ལས་འདས་རྗེས་མ་སྨད་གཉིས་གཅིག་ལ་གཅིག་རྟེན་གྱིས་བསྡད་དེ་འཚོ་བ་ཧ་ཅང་སྐྱོ་པོ་ཡོད། པད་མ་འཕྲིན་ལས་དང་བཅས་པས་ཆེད་མངགས་ཁོང་གི་ཁྱིམ་དུ་ཕེབས་ནས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་དྲོ་སྐྱིད་མཚོན་པར་གནང་ཞིང་། པད་མ་འཕྲིན་ལས་ཀྱིས་ཉེ་འགྲམ་དུ་ཡོད་པའི་འགན་འཁུར་བ་ཚོར་ཆབ་མདོ་ནི་རྒྱལ་ཡོངས་ཀྱི་གྲུམ་བུ་ཚིགས་ཆེན་གྱི་ནད་ཐོན་མང་བའི་ས་ཁུལ་ཞིག་ཡིན་པས་ཆབ་མདོ་ས་ཁུལ་གྱིས་ངེས་པར་དུ་རྒྱལ་ཁབ་ཀྱི་རྒྱབ་སྐྱོར་བརྩོན་ལེན་ཧུར་ཐག་བྱེད་པ་དང་གྲུམ་བུ་ཚིགས་ཆེན་གྱི་ནད་གཞི་ཐོན་ཁུལ་བཅོས་སྒྲིག་ཟབ་མོ་བྱེད་པའི་རྣམ་གྲངས་དངོས་འབྲེལ་དོན་འཁྱོལ་བྱས་ཏེ་ནད་གཞིས་རྐྱེན་པས་དབུལ་པོ་ཆགས་པ་དང་ནད་གཞིས་རྐྱེན་པས་བསྐྱར་དུ་དབུལ་པོ་ཆགས་པའི་གནད་དོན་ཐག་གཅོད་ཡག་པོ་བྱེད་པ་དང་། སྣོད་བཅུད་གནས་སྤོའི་ལས་དོན་གོ་རིམ་ལྡན་པའི་ངང་སྤེལ་བ་དང་འདུས་སྡོད་ལས་དོན་ལ་སྐུལ་འདེད་བཏང་སྟེ “ལོ་ལྔ་ཚན་བཅུ་གཉིས་པའི ”རིང་གྲུམ་བུ་ཚིགས་ཆེན་གྱི་ནད་གཞི་ཐོན་ཁུལ་གྱི་མང་ཚོགས་གནས་སྤོའི་ལས་དོན་ལེགས་གྲུབ་ཡོང་རྒྱུར་བརྩོན་ལེན་བྱེད་དགོས་པའི་བཀའ་མངགས་གནང་བ་རེད།

    སྤྱི་ཚོགས་དོ་དམ་ཐད་དམངས་འཚོ་རྩ་བར་འཛིན་པ་དང་སྤྱི་པའི་ཁེ་ཕན་ཆེ་ཤོས་ཐོབ་རྒྱུ་སྲོག་ཤིང་དུ་བྱེད་དགོས་ཤིང་། ཇི་ལྟར་བྱས་ཏེ་སྤྱི་ཚོགས་དོ་དམ་ལ་ཤུགས་སྣོན་དང་གསར་གཏོད་བྱ་རྒྱུ་དེ་ནི་པད་མ་འཕྲིན་ལས་ཀྱིས་དོ་ཁུར་གནང་བའི་དོན་ཆེན་ཞིག་ཡིན། རྟོག་ཞིབ་དང་བརྟག་ཞིབ་གནང་སྐབས་པད་མ་འཕྲིན་ལས་ཀྱིས་སྔ་རྗེས་སུ་ཆབ་མདོ་གྲོང་རྡལ་ཁྲོམ་ཆེན་གཞུང་དམངས་ཕན་ཉེན་རྟོག་ཞབས་ཞུའི་ས་ཚིགས་དང་བདེ་ཆེན་ལྷུན་གྲུབ་དགོན་དང་། ལྕགས་ར་དགོན། ཤོ་མདོ་དགོན། བྱམས་པ་གླིང་དགོན། རི་བོ་ཆེ་དགོན། སྟེང་ཆེན་དགོན་སོགས་བོད་བརྒྱུད་ནང་བསྟན་གྱི་དགོན་སྡེར་ཕེབས་ནས་སྤྱི་ཚོགས་དོ་དམ་གྱི་གནས་ཚུལ་དང་དགོན་སྡེར “ཡོད་པ་དགུ ”སོགས་ཀྱི་ལས་དོན་སྤེལ་ཚུལ་མཁྱེན་རྟོགས་ཞིབ་ཕྲ་གནང་བ་མ་ཟད་དགོན་སྡེ་དོ་དམ་ཨུ་ལྷན་གྱི་ལས་བྱེད་པར་གཟིགས་པ་དང་འཚམས་འདྲི་གནང་བ་རེད།

    བྱམས་པ་གླིང་དགོན་དུ་རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་དམངས་གཙོ་དོ་དམ་ཨུ་ལྷན་གྱི་ཀྲུའུ་རེན་རྫོང་ལོ་བྱམས་པ་མཁས་གྲུབ་ཀྱིས་པད་མ་འཕྲིན་ལས་ལ་བྱམས་པ་གླིང་དགོན་དུ “འགན་བཅོལ་གཉིས་དང་མ་མཐའི་འཚོ་བའི་འགན་ལེན་གཅིག ”གི་ལས་དོན་གྱི་འཕེལ་རིམ་བདེ་བླག་ཡོད་ཅིང་། མིག་སྔར་དགོན་སྡེར “ཡོད་པ་དགུ ”གཞི་རྩའི་ཆ་ནས་མངོན་འགྱུར་བྱུང་སྟེ་རྒྱ་ཆེའི་དགེ་འདུན་པ་ཚོས་ཏང་དང་སྲིད་གཞུང་གི་དྲོ་སྐྱིད་གང་ལེགས་ཚོར་ནས “རྒྱལ་གཅེས་ཆོས་གཅེས་དང་། མཐུན་སྒྲིལ་ཡར་ཐོན། རྒྱལ་སྐྱོང་འགྲོ་ཕན ”བཅས་ཀྱི་དགེ་འདུན་པ་ཞིག་བྱེད་ཀྱི་ཡིན་ཞེས་འཚང་ཁ་ཤིག་ཤིག་ངང་ཤོད་ཀྱི་འདུག་ཅེས་ངོ་སྤྲོད་གནང་བ་རེད།

    པད་མ་འཕྲིན་ལས་ཀྱིས་རྒྱ་ཆེའི་གྲྭ་བཙུན་ཚོར་རྒྱལ་གཅེས་ཆོས་གཅེས་ཀྱི་བླ་མ་སྐྱེས་ཆེན་རྣམས་མིག་དཔེར་བྱས་ཏེ་དད་པ་རྩ་བར་བྱེད་པ་དང་ཚུལ་ཁྲིམས་གཞི་མར་བྱས་ཏེ་བློ་རྩེ་གཅིག་སྒྲིམ་གྱིས་ཐོས་བསམ་ལ་གཞོལ་ནས་ཤེས་རྒྱ་ཆེ་རུ་གཏོང་བ་དང་ཉམས་ལེན་ལ་ཤུགས་སྣོན་བརྒྱབ་ནས་བོད་བརྒྱུད་ནང་བསྟན་གྱི་རྒྱུན་གཏན་སྒྲིག་ལམ་སྲུང་སྐྱོང་ཧུར་ཐག་བྱེད་པ་དང་བོད་བརྒྱུད་ནང་བསྟན་དེ་སྤྱི་ཚོགས་རིང་ལུགས་སྤྱི་ཚོགས་དང་འཚམས་རྒྱུར་སྐུལ་འདེད་ཧུར་ཐག་བཏང་སྟེ་ལྗོངས་ཡོངས་ཀྱི་དགོན་སྡེ་ཞི་མཐུན་བརྟན་ལྷིང་ཡོང་རྒྱུ་འགན་ལེན་བྱེད་དགོས་པའི་ཐུགས་རེ་གནང་བ་རེད།

    ཆབ་མདོ་གྲོང་རྡལ་ཁྲོམ་ཆེན་གཞུང་དམངས་ཕན་ཉེན་རྟོག་ཞབས་ཞུའི་ས་ཚིགས་སུ་པད་མ་འཕྲིན་ལས་དང་བཅས་པས་མི་དམངས་ཉེན་རྟོག་པར་གཟིགས་པ་དང་འཚམས་འདྲི་གནང་བ་དང་དམངས་ཕན་ཉེན་རྟོག་ཞབས་ཞུའི་ས་ཚིགས་ཀྱི་ཉེན་རྟོག་པ་བཀོད་སྒྲིག་དང་གོ་མཚོན་དང་། ཉེན་དོན་མི་སྣའི་ལས་རེས་གནས་ཚུལ། ས་གནས་ས་ཐོག་ཏུ་ཉེན་དོན་ཐག་གཅོད་བྱེད་པའི་གོ་རིམ་སོགས་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་རྒྱ་ཆེའི་སྤྱི་བདེའི་མི་དམངས་ཉེན་རྟོག་པ་ཚོར་འགན་ནུས་ཆེན་པོ་གཉིས་ཡིན་པའི་དམངས་ཕན་དང་བརྟན་ལྷིང་སྲུང་སྐྱོང་ལ་དམ་པོར་དམིགས་ནས་ཁྲིམས་འཛིན་ནན་པོ་དང་ཡ་རབས་ངང་ལས་སྒྲུབ་བྱས་ཏེ་ཉེན་དོན་གྱི་ཆུ་ཚད་སྔར་བས་མཐོ་རུ་གཏོང་བ་དང་རང་ངོས་ཀྱི་བྱང་ཚད་མཐོ་རུ་བཏང་ནས་ཁྲོམ་ཆེན་གཞུང་དམངས་ཕན་ཉེན་རྟོག་ཞབས་ཞུའི་ས་ཚིགས་འདི་ཉིད་ཆབ་མདོའི་མཚོན་རྟགས་རང་བཞིན་གྱི་དམངས་ཕན་ཉེན་རྟོག་ཞབས་ཞུའི་ས་ཚིགས་ཤིག་ལ་འགྱུར་བ་བྱས་ཏེ་ཏང་དང་སྲིད་གཞུང་ཐུགས་བློ་བདེ་བ་དང་མི་དམངས་བློ་ཡིད་ཚིམ་པོ་ཡོང་བ་བྱེད་དགོས་པའི་ཐུགས་རེ་གནང་བ་རེད།

    ས་ཆ་གང་དུ་ཕེབས་རིམ་བཞིན་པད་མ་འཕྲིན་ལས་ཀྱིས་རྨང་བརྟན་དམངས་ཕན་བྱེད་སྒོའི་གྲོང་ཚོར་བཅའ་སྡོད་རང་སྐྱོང་ལྗོངས་ཀྱི་ལས་དོན་རུ་ཁག་ཁག་ཏུ་ཕེབས་ནས་རྨང་བརྟན་དམངས་ཕན་བྱེད་སྒོ་སྤེལ་ཚུལ་མཁྱེན་རྟོགས་ཞིབ་ཕྲ་གནང་བ་རེད།

    རྒྱ་ཆེའི་གྲོང་ཚོར་བཅའ་སྡོད་ལས་དོན་རུ་མི་རྣམས་ཀྱིས་མང་ཚོགས་དང་ལྷན་དུ་མཉམ་གནས་བྱས་ཏེ་བརྩེ་དུང་ཟབ་མོ་བྱུང་བ་དང་མི་དམངས་ཆེད་ཞབས་འདེགས་ཞུ་བའི་འཇོན་ཐང་ཆེ་རུ་ཟམ་མི་ཆད་པར་སོང་བས་རྒྱ་ཆེའི་མང་ཚོགས་ཀྱི་དགའ་བསུ་ཆེན་པོ་དང་སྙིང་དབུས་ནས་བརྩི་བཀུར་ཐོབ་པ་རེད། པད་མ་འཕྲིན་ལས་ཀྱིས་གཞི་རིམ་ནི་མཐའ་ཡས་པའི་ཞིང་ཁམས་ཤིག་ཡིན་ལ་ལས་བྱེད་པར་གསོ་སྐྱོང་དང་སྦྱོང་བརྡར་བྱེད་སའི་གར་སྟེགས་ཆེན་པོ་ཞིག་ཡིན། རྒྱ་ཆེའི་གྲོང་ཚོར་བཅའ་སྡོད་ལས་དོན་རུ་ཁག་གིས་བརྟག་ཞིབ་ལ་སྔར་བས་དོ་སྣང་དང་། སྙིང་སྟོབས་སྦྱོང་བརྡར། ནུས་རྩལ་ཆེར་གཏོང་། ཆུ་ཚད་མཐོར་གཏོང་བཅས་བྱ་རྒྱུའི་རེ་བ་ཡོད། འཕྲལ་ཕུགས་གཉིས་ཟུང་འབྲེལ་བྱ་རྒྱུ་མཐའ་འཁྱོངས་ཀྱིས་ཡུལ་དེ་གར་འཕེལ་རྒྱས་དང་བརྟན་ལྷིང་གི་ཕུགས་ཕན་ལམ་སྲོལ་སྐྲུན་རོགས་བྱེད་དགོས་པ་དང་། ཡུལ་དེ་གའི་མང་ཚོགས་དང་འདྲེས་པ་བྱས་ནས་མང་ཚོགས་ཀྱི་དོན་དག་དེ་རང་ཉིད་ཀྱི་དོན་དག་ཏུ་བརྩིས་ཏེ་སྒྲུབ་དགོས་པ། བྱེད་ཐབས་མང་ཙམ་དང་ཐབས་བཀོད་མང་ཙམ་བཏོན་ནས་མང་ཚོགས་ལ་ལས་གཏོད་ཕྱུག་འགྱུར་གྱི་ཐབས་ལམ་རྒྱ་ཆེར་སྣེ་ཁྲིད་ཀྱིས་ཞིང་འབྲོག་པའི་ཡོང་འབབ་ཐབས་བརྒྱ་ཇུས་སྟོང་གིས་འཕར་བ་བྱེད་དགོས་པ། མང་ཚོགས་ལ་སེམས་ཁྲལ་དང་དཀའ་ངལ་སེལ་རོགས་བྱས་ཏེ་ཏང་དང་སྲིད་གཞུང་གི་གསུང་སྒྲ་རྒྱ་ཆེའི་མང་ཚོགས་ཀྱི་སྙིང་དབུས་སུ་ཚོར་བར་བྱ་དགོས་ཞེས་བརྩེ་སེམས་ཟབ་མོའི་སྒོ་ནས་གསུངས།

    དྲག་ཆས་ཉེན་རྟོག་ཆབ་མདོ་ཉིང་ལག་རུ་ཁག་གི་དཔོན་དམག་དང་ཆབ་མདོའི་བརྟན་ལྷིང་སྲུང་སྐྱོང་ལ་རོགས་སྐྱོར་བྱེད་མཁན་དཔུང་ཁག་ལ་གཟིགས་པ་དང་འཚམས་འདྲི་གནང་སྐབས་པད་མ་འཕྲིན་ལས་ཀྱིས་ཆབ་མདོར་བཅའ་སྡོད་དང་། ཆབ་མདོར་རོགས་སྐྱོར་བྱེད་མཁན་དཔུང་སྡེ། དྲག་ཆས་ཉེན་རྟོག་དཔོན་དམག་དང་སྲིད་ཁྲིམས་ལས་བྱེད་ཉེན་རྟོག་བཅས་ཀྱིས་ཏང་གི་བཀོད་འདོམས་ལ་ཉན་པ་དང་། མི་དམངས་ལ་ཞབས་འདེགས་ཞུ་བ། དཔའ་ངར་ལྡན་པའི་ངང་འཐབ་འཛིང་བཅས་བྱེད་པའི་ཕུལ་བྱུང་སྲོལ་རྒྱུན་དར་སྤེལ་ཤུགས་ཆེན་གཏོང་བ་དང་། ཆབ་མདོ་ས་ཨུད་དང་སྲིད་འཛིན་ཀུང་ཧྲུའུ་ཡི་སྣེ་ཁྲིད་འོག་རང་སྐྱོང་ལྗོངས་ཀྱིས་སྤྲད་པའི་ལས་འགན་ཁག་ལེགས་སྒྲུབ་ཡག་པོ་བྱས་ཏེ་ཆབ་མདོའི་འཕེལ་རྒྱས་དང་བརྟན་ལྷིང་ཆེད་ལེགས་སྐྱེས་སྔར་བས་ཆེ་བ་འབུལ་དགོས་པའི་བླང་བྱ་བཏོན་གནང་བ་རེད།

    བརྟག་ཞིབ་གནང་རིང་པད་མ་འཕྲིན་ལས་དང་བཅས་པས་ད་དུང་ཆབ་མདོ་ས་ཨུད་དང་སྲིད་འཛིན་ཀུང་ཧྲུའུ་ཡི་བཞུགས་མོལ་ཚོགས་འདུའི་ཐོག་ལས་ཀའི་སྙན་སེང་གསན་པ་རེད། ཉེ་བའི་ལོ་ཤས་རིང་ཆབ་མདོ་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་ཐོབ་པའི་གྲུབ་འབྲས་ལ་ཁས་ལེན་གང་ལེགས་གནང་རྗེས་པད་མ་འཕྲིན་ལས་ཀྱིས་ཆབ་མདོའི་ལས་ཀའི་དངོས་ཡོད་དང་ཟུང་འབྲེལ་གྱིས་བླང་བྱ་དྲུག་བཏོན་གནང་བ་སྟེ། གཅིག་ནི་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་ཁྱོན་ཡོངས་ནས་ལག་བསྟར་དོན་འཁྱོལ་བྱེད་པར་སྐུལ་སྤེལ་ཏན་ཏིག་གཏོང་དགོས་པ་དང་། གཉིས་ནི་མཆོང་སྐྱོད་ལྟ་བུའི་འཕེལ་རྒྱས་ལ་སྐུལ་སྤེལ་ཏན་ཏིག་གཏོང་དགོས་པ།

    གསུམ་ནི་ཡུན་རིང་བདེ་འཁོད་ལ་སྐུལ་སྤེལ་ཏན་ཏིག་གཏོང་དགོས་པ། བཞི་ནི་དམངས་འཚོ་ལེགས་བཅོས་ལ་སྐུལ་སྤེལ་ཏན་ཏིག་གཏོང་དགོས་པ། ལྔ་ནི་སྣོད་བཅུད་འཛུགས་སྐྱོང་ལ་སྐུལ་སྤེལ་ཏན་ཏིག་གཏོང་དགོས་པ། དྲུག་ནི་ལས་བྱེད་པའི་དཔུང་ཁག་འཛུགས་སྐྱོང་ལ་སྐུལ་སྤེལ་ཏན་ཏིག་གཏོང་དགོས་པ་བཅས་རེད།

    བརྟག་ཞིབ་གནང་རིང་པད་མ་འཕྲིན་ལས་དང་བཅས་པས་དཀར་སྡེར་ལའི་ཕུག་ལམ་འདེམས་ཡུལ་དང་། དཔལ་འབར་རྫོང་གྲོང་ཁུལ་གྱི་ཆུ་ལོག་འགོག་རགས་འཛུགས་སྐྲུན་བྱེད་ཚུལ། བྲག་གཡབ་རྫོང་གི་རང་འབབ་ཆུ་ཀ་ལ་བཟོ་གྲྭ། གད་སྙིགས་སྦ་ཡུལ་སོགས་ལ་གཟིགས་ཞིབ་གནང་བ་མ་ཟད་ལམ་རྒྱུད་ཀྱི་ཏའོ་པན་བཟོ་པར་གཟིགས་པ་དང་འཚམས་འདྲིའང་གནང་བ་རེད།

    རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་དང་ཆབ་མདོ་ས་ཁུལ་གྱི་འགན་འཁུར་བློ་མཐུན་གཙོ་བོས་ཕེབས་རོགས་ཞུས་ཏེ་བརྟག་ཞིབ་གནང་བ་རེད།