ཚེས་23ཉིན་གྱི་སྔ་དྲོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཝུའུ་དབྱིང་ཅེས་རང་སྐྱོང་ལྗོངས་མི་དམངས་སྲིད་གཞུང་གི་རྒྱུན་ལས་ཚོགས་འདུ་ཐེངས་བདུན་པ་གཙོ་སྐྱོང་གནང་ནས 《ས་གཤིས་གནོད་འཚེ་འགོག་བཅོས་ལས་དོན་ལ་ཤུགས་སྣོན་རྒྱག་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གི་གཏན་འབེབས་ལག་བསྟར་དོན་འཁྱོལ་བྱ་རྒྱུའི་བོད་རང་སྐྱོང་ལྗོངས་མི་དམངས་སྲིད་གཞུང་གི་ལག་བསྟར་བསམ་འཆར 》ལ་ཞིབ་འཇུག་དང་གྲོས་ཞིབ་བྱས་པ་རེད།
ཚོགས་འདུའི་ཐོག་ས་གཤིས་གནོད་འཚེ་འགོག་བཅོས་ལས་དོན་དེ་རྒྱ་ཆེའི་མི་དམངས་མང་ཚོགས་ཀྱི་ལུས་སྲོག་དང་རྒྱུ་ནོར་བདེ་འཇགས་དང་། དཔལ་འབྱོར་དང་སྤྱི་ཚོགས་འཕེལ་རྒྱས་དང་བརྟན་ལྷིང་གི་ཁྱོན་ཡོངས་དང་འབྲེལ་བ་ཡོད། རང་ལྗོངས་ཀྱི་ས་གཤིས་གནོད་འཚེ་འགོག་བཅོས་ལས་ཀ་བྱེད་འགོ་འཛུགས་ཕྱི་ཙམ་དང་། དོ་དམ་ལམ་སྲོལ་འཐུས་ཚང་མེད་པ། དོ་དམ་དཔུང་ཁག་འཐུས་ཚང་མེད་པ་བཅས་ཀྱིས་རྐྱེན་པས་ས་གཤིས་གནོད་འཚེ་འགོག་བཅོས་ལས་དོན་གཏིང་ཟབ་སྤེལ་བར་ཐད་ཀར་ཤུགས་རྐྱེན་ཐེབས་པའི་ངོས་འཛིན་བྱེད་ཀྱི་ཡོད།
ཚོགས་འདུའི་ཐོག་རིམ་ཁག་སྲིད་གཞུང་དང་འབྲེལ་ཡོད་སྡེ་ཚན་གྱིས་དཔལ་འབྱོར་དང་སྤྱི་ཚོགས་ལེགས་ལ་མྱུར་བའི་འཕེལ་རྒྱས་ལ་ཞབས་འདེགས་ཞུ་བ་དང་། སྤྱི་ཚོགས་ཞི་མཐུན་དང་བརྟན་ལྷིང་འགན་ལེན་བྱ་རྒྱུ་དམིགས་ཡུལ་དུ་འཛིན་པ་དང་ས་གཤིས་གནོད་འཚེ་འགོག་བཅོས་ལས་དོན་ལ་ཤུགས་སྣོན་རྒྱག་པའི་གལ་ཆེའི་རང་བཞིན་ལ་ངོས་འཛིན་གང་ལེགས་བྱས་ཏེ་ས་གཤིས་གནོད་འཚེ་འགོག་བཅོས་ལས་དོན་ལ་ཚད་མཐོའི་མཐོང་ཆེན་གྱིས་འགན་འཁྲི་དོན་འཁྱོལ་བྱེད་པ་དང་། སྒྲིག་གཞི་དང་། ལམ་ལུགས་འཐུས་ཚང་དུ་གཏོང་བ། རྨང་གཞི་བརྟན་པོ་འདིང་བ་བཅས་ཀྱི་ཐོག་ནས་ས་གཤིས་གནོད་འཚེའི་བརྟག་ཞིབ་དང་གདེང་འཇོག་མ་ལག་དང་། ལྟ་ཞིབ་ཚད་ལེན་དང་སྔོན་ཚུད་ཀྱི་ཉེན་བརྡ་གཏོང་བའི་མ་ལག ཕྱོགས་བསྡུས་འགོག་བཅོས་མ་ལག་དང་འཕྲལ་སྡོམ་མ་ལག་བཅས་འཛུགས་སྐྱོང་བྱེད་པར་ཤུགས་སྣོན་ཏན་ཏིག་བརྒྱབ་སྟེ་ས་གཤིས་གནོད་འཚེ་འགོག་པ་དང་ཆུང་དུ་གཏོང་བའི་ནུས་པ་ཆེ་རུ་གཏོང་དགོས་པའི་བླང་བྱ་བཏོན་པ་རེད།
ཝུའུ་དབྱིང་ཅེས་ཚོགས་འདུའི་ཐོག 《ས་གཤིས་གནོད་འཚེ་འགོག་བཅོས་ལས་དོན་ལ་ཤུགས་སྣོན་རྒྱག་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གི་གཏན་འབེབས 》དེ་ཐོག་ནས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ས་གཤིས་གནོད་འཚེ་འགོག་བཅོས་ལས་དོན་ལ་ཚད་མཐོའི་མཐོང་ཆེན་གནང་ལུགས་དང་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་ཐུགས་ཁུར་གནང་ལུགས་མཚོན་པ་དེ་ནི་ང་ཚོས་དུས་སྐབས་གསར་པར་ས་གཤིས་གནོད་འཚེ་འགོག་བཅོས་ལས་དོན་ཡག་པོ་བསྒྲུབ་རྒྱུའི་བྱ་སྤྱོད་ཀྱི་ཕྱོགས་སྟོན་ཞིག་རེད། རིམ་ཁག་སྲིད་གཞུང་དང་འབྲེལ་ཡོད་སྡེ་ཚན་གྱིས་གེགས་འགོག་གེགས་སེལ་ལས་དོན་གྱི་སྒྲིག་འཛུགས་འགོ་ཁྲིད་དང་མཐུན་སྦྱོར་མཉམ་འགུལ་ལ་སྔར་བས་ཤུགས་སྣོན་རྒྱག་པ་དང་རང་ལྗོངས་ཀྱི་ས་གཤིས་གནོད་འཚེ་འགོག་བཅོས་ལས་དོན་ལ་སྔར་བས་ཤུགས་སྣོན་བརྒྱབ་ནས་ཇུས་གཞི་དེ་བས་ཞིབ་ཚགས་པ་བཟོ་བ་དང་ལས་དོན་དེ་བས་ཞིབ་ཚགས་པ་བསྒྲུབས་ཏེ་ཚད་མཐོ་ཤོས་ཀྱི་ཐོག་ནས་ས་གཤིས་གནོད་འཚེ་ལས་མི་སྣ་ཤི་རྨས་དང་རྒྱུ་ནོར་གྱོང་གུན་ཕོག་རྒྱུ་གཡོལ་ཐབས་བྱེད་པ་དང་ཉུང་དུ་གང་ཐུབ་གཏོང་དགོས་ཞེས་ནན་བཤད་གནང་བ་རེད། ཚོགས་འདུའི་ཐོག 《ས་གཤིས་གནོད་འཚེ་འགོག་བཅོས་ལས་དོན་ལ་ཤུགས་སྣོན་རྒྱག་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གི་གཏན་འབེབས་ལག་བསྟར་དོན་འཁྱོལ་བྱ་རྒྱུའི་བོད་རང་སྐྱོང་ལྗོངས་མི་དམངས་སྲིད་གཞུང་གི་ལག་བསྟར་བསམ་འཆར 》ལ་གྲོས་ཞིབ་བྱས་ནས་རྩ་དོན་ཐོག་གྲོས་འཆམ་ཡང་བྱས་པ་རེད།