ཧྲུའུ་ཅི་ཁྲེན་ཆོན་གོ་ཡིས་བོད་རང་སྐྱོང་ལྗོངས་སྒྲིག་ཨུད་སྐབས་བརྒྱད་པའི་ཚང་འཛོམས་ཚོགས་འདུ་ཐེངས་གཉིས་པའི་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་ནན་ཏན་བྱས་ཏེ་ཏང་གི་དྭངས་གཙང་རང་བཞིན་རྒྱུན་འཁྱོངས་བྱེད་པའི་ལས་དོན་ཁག་ཡག་པོ་སྒྲུབ་དགོས་པའི་བླང་བྱ་བཏོན་པ།
ཉིན་ཤས་གོང་རང་སྐྱོང་ལྗོངས་ཏང་ཨུད་རྩ་འཛུགས་པུའུ་ཡིས་བརྡ་ཐོ་བཏང་ནས་ས་ཁུལ་ཁག་དང་གྲོང་ཨུད་ཀྱི་རྩ་འཛུགས་པུའུ་དང་ལྗོངས་ཐད་གཏོགས་དང་ཀྲུང་དབྱང་ཐད་གཏོགས་ཀྱི་ཚན་པ་ཁག་གི་ཏང་ཙུའི (ཏང་ཨུད )སྲིད་དོན་དང་མི་དོན་སྡེ་ཚན་ལ་ཧྲུའུ་ཅི་ཁྲེན་ཆོན་གོ་ཡིས་རང་སྐྱོང་ལྗོངས་སྒྲིག་ཨུད་སྐབས་བརྒྱད་པའི་ཚང་འཛོམས་ཚོགས་འདུ་ཐེངས་གཉིས་པའི་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་ནན་ཏན་བྱས་ཏེ་ཏང་གི་དྭངས་གཙང་རང་བཞིན་རྒྱུན་འཁྱོངས་བྱེད་པའི་ལས་དོན་ཁག་ཡག་པོ་སྒྲུབ་དགོས་པའི་བླང་བྱ་བཏོན་པ་རེད།
བརྡ་ཐོའི་ནང་ཟླ་4ཚེས་17ཉིན་རང་སྐྱོང་ལྗོངས་སྒྲིག་ཨུད་སྐབས་བརྒྱད་པས་ཚང་འཛོམས་ཚོགས་འདུ་ཐེངས་གཉིས་པ་འཚོགས་པ་དང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་བློ་མཐུན་ཁྲེན་ཆོན་གོ་ཚོགས་འདུར་ཕེབས་པ་དང་འབྲེལ་གལ་ཆེའི་གསུང་བཤད་ཀྱང་གནང་ནས་ཏང་གི་དྭངས་གཙང་རང་བཞིན་རྒྱུན་འཁྱོངས་བྱེད་རྒྱུར་དམ་པོར་དམིགས་ནས་ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་གཏིང་ཟབ་སྤེལ་དགོས་པའི་ནན་བཤད་གནང་ཡོད་པས་རིམ་ཁག་རྩ་འཛུགས་སྡེ་ཚན་གྱིས་ངེས་པར་དུ་ཧྲུའུ་ཅི་ཁྲེན་ཆོན་གོའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་བྱ་རྒྱུ་དེ་གལ་ཆེའི་ཆབ་སྲིད་ཀྱི་ལས་འགན་ཞིག་ཏུ་བརྩིས་ནས་ཏང་གི་དྭངས་གཙང་རང་བཞིན་རྒྱུན་འཁྱོངས་བྱེད་པའི་གལ་ཆེའི་དོན་སྙིང་ལ་ངོས་འཛིན་གཏིང་ཟབ་ཐུབ་པ་དང་། ལས་འགན་ཁོང་དུ་གནད་ལ་འཁེལ་བ་དང་འགན་འཁྲི་ལྷག་བསམ་ཟོལ་མེད་ངང་བསྒྲུབས་ཏེ “དྭངས་གཙང་རང་བཞིན་ལྔའི ”བླང་བྱ་དེ་རྩ་འཛུགས་ལས་དོན་གྱི་ཕྱོགས་ཁག་ལ་ཕྱོགས་ཡོངས་ནས་དོན་འཁྱོལ་གྱིས་ཏང་གི་སྲིད་སྐྱོང་གནས་བབ་སྲ་བརྟན་གཏོང་ཆེད་སྲ་ཞིང་བརྟན་པའི་རྩ་འཛུགས་ཀྱི་འགན་ལེན་བྱས་ཏེ་གཟེངས་སུ་ཐོན་པའི་གྲུབ་འབྲས་ཀྱི་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་སྐོང་འཚོག་བྱ་རྒྱུར་བསུ་བ་ཞུ་དགོས་ཞེས་བསྟན་ཡོད་པ་རེད།
བརྡ་ཐོའི་ནང་ཆབ་སྲིད་ཀྱི་དྭངས་གཙང་རང་བཞིན་འགན་ལེན་གྱིས་ཆབ་སྲིད་ཀྱི་འགན་འཁྲི་སྔར་བས་ཆེ་རུ་གཏོང་དགོས་ཤིང་། ཆབ་སྲིད་ཀྱི་ལངས་ཕྱོགས་དང་ཆབ་སྲིད་ཀྱི་ཁ་ཕྱོགས་བརྟན་པོ་ཡོང་བ་བྱ་རྒྱུ་དེ་ཏང་ཡོན་ལས་བྱེད་པའི་བླང་བྱ་ཨང་དང་པོར་བརྩིས་ཏེ་བསམ་བློ་ཆབ་སྲིད་འཛུགས་སྐྱོང་ལ་ཤུགས་སྣོན་ཏན་ཏིག་རྒྱག་དགོས་པ་དང་།
བསམ་བློའི་དྭངས་གཙང་རང་བཞིན་འགན་ལེན་གྱིས་རིགས་པའི་གཞུང་ལུགས་ལ་བརྟེན་ནས་དྲག་ཆས་སྤྲོས་རྒྱུར་སྔར་བས་ཤུགས་སྣོན་རྒྱག་དགོས་ཤིང་། སློབ་སྦྱོང་རྣམ་པའི་ཏང་རྩ་འཛུགས་འཛུགས་སྐྱོང་བྱ་རྒྱུས་དམ་འཛིན་བྱེད་གཞིར་བྱེད་པ་དང་། རིམ་ཁག་ཏང་གི་སློབ་གྲྭ་དང་སྲིད་འཛིན་སློབ་གླིང་གིས་གཡུལ་ས་གཙོ་བོར་བྱེད་པ། གཞི་ཁྱོན་ཆེན་པོས་ལས་བྱེད་པ་གསོ་སྦྱོང་བྱ་རྒྱུས་གཞི་རྟེན་དུ་བྱེད་པ་བཅས་བྱས་ཏེ་རྒྱུན་བསྲིང་ལྷོད་མེད་ངང་སློབ་གསོ་དང་གསོ་སྦྱོང་ལ་དམ་འཛིན་གྱིས་ཏང་ཡོན་ལས་བྱེད་པས་ཐོག་མཐའ་བར་གསུམ་དུ “གཡོ་འགུལ་མི་གཏོང་བ ”གསུམ་མཐའ་འཁྱོངས་བྱེད་ཐུབ་པའི་འགན་ལེན་བྱེད་དགོས་པ།
དཔུང་ཁག་གི་དྭངས་གཙང་རང་བཞིན་འགན་ལེན་གྱིས་ལས་བྱེད་པར་དཔྱད་ཞིབ་གནད་ལ་འཁེལ་བ་བྱེད་པ་དང་ལེགས་འདེམས་བྱེད་དགོས་ཤིང་། གཅིག་ནས་ཁྲིད་ཕྱོགས་གཏོད་དགོས་པ་སྟེ། ཕྱོགས་བཞི་མཚམས་བརྒྱད་དང་སྤྱོད་ཡོན་གཉིས་ལྡན་གྱི་མི་ཁོ་ན་བསྐོ་གཞག་བྱེད་པའི་རྩ་དོན་མཐའ་འཁྱོངས་བྱེད་པ་དང་སྤྱོད་ཡོན་གཉིས་ལྡན་དང་ཀུན་སྤྱོད་སྔོན་ལ་དམ་འཛིན་བྱེད་པའི་ཚད་གཞི་མཐའ་འཁྱོངས་བྱས་ནས་གངས་ལྗོངས་ས་མཐོར་རྩ་བ་ཚུགས་པ་དང་མི་རིགས་ཁག་གི་མི་དམངས་ལ་ལེགས་སྐྱེས་འབུལ་བའི་ཁྲིད་ཕྱོགས་གཏོད་པ་དང་། ལས་ཀ་ཡག་པོ་སྒྲུབ་པ་དང་མ་སྒྲུབ་པའི་བར་ཁྱད་པར་ཡོད་པའི་ཁྲིད་ཕྱོགས་གཏོད་པ། གཞི་རིམ་ལ་སྣང་ཆེན་བྱེད་པའི་ཁྲིད་ཕྱོགས་གཏོད་པ་བཅས་བྱས་ཏེ་ལས་བྱེད་པ་འདེམས་བསྐོ་དང་བེད་སྤྱོད་བྱེད་པའི་ལས་དོན་ཏན་ཏིག་ངང་ཡག་པོ་སྒྲུབ་དགོས་པ། ཆབ་སྲིད་ཀྱི་ཚད་གཞི་མངོན་གསལ་དོད་པོ་ཡོང་བ་བྱས་ཏེ་ལས་བྱེད་པ་འདེམས་བསྐོ་ཡག་པོ་བྱེད་པ་དང་བེད་སྤྱོད་ཡག་པོ་བྱེད་པའི་ཁར་ཚད་གཞི་མཐོ་ལ་སྤུས་ཚད་ལེགས་པའི་སྒོ་ནས་མི་དམངས་འཐུས་ཚོགས་དང་། སྲིད་གཞུང་། སྲིད་གྲོས་བཅས་ཀྱི་འགོ་ཁྲིད་ཚན་ཁག་སྐབས་བརྗེའི་ལས་དོན་ཡག་པོ་བསྒྲུབས་ནས་ཚན་ཁག་གི་ཁོངས་མི་ཏང་དང་མི་དམངས་དང་སེམས་པ་གཅིག་མཐུན་ཡོང་བའི་འགན་ལེན་བྱེད་དགོས་པ་དང་། གཉིས་ནས་དཔྱད་ཞིབ་ལ་སྣང་ཆེན་བྱས་ནས་རང་སོ་སོའི་དོན་དངོས་ལ་ཟུང་འབྲེལ་གྱིས་ལས་བྱེད་པའི་དཔྱད་ཞིབ་གདེང་འཇོག་མ་ལག་སྔར་བས་འཐུས་སྒོ་ཚང་དུ་གཏོང་དགོས་པ་སྟེ། ལས་བྱེད་པའི་ཕྱིར་འཐེན་ལམ་སྲོལ་དང་ཚད་དང་མི་མཐུན་པ་དང་ལས་སྒོ་མི་འཕེར་བའི་ལས་བྱེད་པ་ལེགས་སྒྲིག་བྱེད་པའི་བྱེད་ཐབས་འཚོལ་ཞིབ་དང་བཙུགས་ཏེ་ལས་བྱེད་པ་གོ་གནས་སྤར་ཆོག་པ་ལས་གོ་གནས་ཕབ་མི་ཆོག་པ་དང་ཡར་ཡོང་ཆོག་པ་ལས་མར་བསྐྱོད་མི་རུང་བའི་གནད་དོན་ཐག་གཅོད་བྱེད་དགོས་པ། གསུམ་ནས་དར་སྲོལ་བཟང་པོ་ཡོང་བ་བྱེད་དགོས་པ་སྟེ། གཞུང་དྲང་ཚུལ་མཐུན་མཐའ་འཁྱོངས་ཀྱིས་གཏན་འབེབས་ལྟར་བྱ་བ་ནན་པོ་སྒྲུབ་པ་དང་། སྲིད་ཇུས་ལྟར་བྱ་བ་སྒྲུབ་པ། གོ་རིམ་ལྟར་བྱ་བ་སྒྲུབ་པ་བཅས་བྱེད་པ་དང་། ལས་བྱེད་པའི་ལྟ་ཞིབ་དང་། མང་ཚོགས་ཀྱི་ལྟ་ཞིབ། གླེང་ཕྱོགས་ཀྱི་ལྟ་ཞིབ་བཅས་ལ་ཤུགས་སྣོན་བརྒྱབ་སྟེ་ཆེས་བློ་ཐག་ཆོད་པའི་རྣམ་འགྱུར་དང་ཆེས་ནུས་ལྡན་གྱི་བྱེད་ཐབས་ཀྱི་ཐོག་ནས་དར་སྲོལ་བཟང་པོ་དང་སྒྲིག་ཁྲིམས་ནན་པོ་ཡོང་བ་བྱས་ཏེ་ཚུལ་མིན་གྱི་སྤྱོད་ཚུལ་ལ “བཟོད་སྒོམ་གཏན་ནས་མི་བྱེད་པའི ”བྱེད་ཐབས་སྤྱད་དེ་མི་འདེམས་བསྐོ་དང་མི་སྤྱོད་ཐད་ཀྱི་ཀུན་གྱི་ཡིད་ཆེས་ཐོབ་ཚད་སྔར་བས་ཆེ་རུ་གཏོང་དགོས་པ།
རྩ་འཛུགས་ཀྱི་དྭངས་གཙང་རང་བཞིན་འགན་ལེན་གྱིས་གཞི་རིམ་གྱི་རྨང་གཞི་སྔར་བས་བརྟན་དུ་གཏོང་དགོས་ཤིང་། གཅིག་ནས་གཞི་རིམ་རྩ་འཛུགས་སྟོབས་དང་ལྡན་པ་ཞིག་འཛུགས་སྐྱོང་བྱེད་དགོས་པ་སྟེ། སྔོན་གཏོད་ལེགས་བརྩོན་དང་རྨང་བརྟན་དམངས་ཕན་གྱི་བྱེད་སྒོ་གཏིང་ཟབ་ཏུ་གཏོང་རྒྱུས་ནུས་ལྡན་གྱི་གཞི་རྟེན་དང་དམ་འཛིན་བྱེད་གཞིར་བྱས་ཏེ་གཞི་རིམ་རྩ་འཛུགས་འཛུགས་སྐྱོང་ལོའི་བྱེད་སྒོ་ཏན་ཏིག་སྤེལ་ནས “གཅིག་ལྔའི ”བླང་བྱ་ལྟར་ཏང་ཀྲི་པུའུ་འཛུགས་སྐྱོང་ལ་ཤུགས་སྣོན་གྱིས་ཏང་ཀྲི་པུའུ་ཚང་མར་ཡར་རྒྱས་གསར་པ་དང་ཤུགས་སྣོན་གསར་པ་ཐེབས་པ་བྱེད་དགོས་པ་དང་། དད་སེམས་བརྟན་སྲུང་དང་། ལེགས་སྐྱེས་ལ་སྣང་ཆེན། འཇོན་ཐང་ལྡན་པ། ཀུན་སྤྱོད་ལ་སྣང་ཆེན་བཅས་བྱེད་དགོས་པའི་བླང་བྱ་ལྟར་ཏང་ཀྲི་པུའི་ཧྲུའུ་ཅི་ལེགས་འདེམས་བྱེད་པ། “གཞི་རིམ་རྩ་འཛུགས་འཛུགས་སྐྱོང་ལ་ཤུགས་སྣོན་རྒྱག་པ་དང་ཏང་རྩ་འཛུགས་ཀྱི་ཧྲུའུ་ཅི་ཡག་པོ་བྱེད་རྒྱུས ”བརྗོད་བྱ་གཙོ་བོར་བྱས་ཏེ་གཞི་རིམ་ཏང་རྩ་འཛུགས་ཀྱི་ཧྲུའུ་ཅི་ཚང་མར་རེས་མོས་ཀྱིས་གསོ་སྦྱོང་ཐེངས་རེ་བྱེད་དགོས་པ། གཉིས་ནས་ཏང་ཡོན་དཔུང་ཁག་དྭངས་གཙང་ཡོང་བ་བྱས་ཏེ་ཏང་ཡོན་ནང་འཇུག་པའི་འགག་སྒོ་ནན་སྲུང་གིས་ཏང་ནང་ཞུགས་པའི་བསམ་པའི་ཀུན་སློང་ལ་དབྱེ་ཞིབ་ནན་ཏན་བྱེད་པ་དང་ཚད་གཞི་དང་གོ་རིམ་སྟངས་འཛིན་ནན་པོ་བྱས་ནས་གཅིག་ཆ་རྐྱེན་འཛོམས་ཚེ་དེ་འཕེལ་རྒྱས་བཏང་སྟེ་ཏང་ཡོན་གྱི་སྤུས་ཚད་འགན་ལེན་བྱེད་དགོས་པ། ཏང་ཡོན་གྱི་ཐོན་སྒོ་ཤར་བགྲོད་ཐུབ་པ་བྱས་ཏེ་སློབ་གསོ་ཡང་ཡང་བཏང་རུང་སྔར་བཞིན་སྔ་འགྱོད་ཕྱི་འདོམས་མི་བྱེད་མཁན་ལ་ཏང་གི་སྒྲིག་སྲོལ་དང་ཏང་ནང་ཁུལ་གྱི་ཁྲིམས་སྲོལ་གཞན་ལྟར་ཐག་གཅོད་ནན་པོ་བྱེད་དགོས་པ། གསུམ་ནས་ཏང་ཡོན་གྱི་དོ་དམ་ལ་ཤུགས་སྣོན་རྒྱག་དགོས་པ་སྟེ་ཏང་ཡོན་གྱི་རྒྱུན་ལྡན་བྱེད་སྒོའི་དོ་དམ་ལ་ཤུགས་སྣོན་རྒྱག་པ་དང་ཏང་ཡོན་གྱི་ཏང་གཤིས་ལ་དུས་བཅད་ནང་དབྱེ་ཞིབ་བྱེད་པ་དང་དམངས་གཙོར་བརྟེན་ནས་ཏང་ཡོན་ལ་དཔྱད་མོལ་བྱེད་པ་སོགས་ཀྱི་ལམ་ལུགས་འཐུས་ཚང་དུ་བཏང་ནས་ཏང་ཡོན་གྱི་བསམ་བློ་དང་གཏམ་སྤྱོད་དེ་རྩ་འཛུགས་ཀྱི་ལྟ་ཞིབ་ནུས་ལྡན་གྱི་ཁྱབ་ཁོངས་ནང་བཅུག་སྟེ་བསམ་བློ་དང་ཀུན་སྤྱོད་སྡུག་ཏུ་འགྲོ་བ་དང་། རྩ་འཛུགས་ཀྱི་སྒྲིག་ལམ་ཉམས་ཞན་དུ་འགྲོ་བ། ཀུན་སྤྱོད་ཀྱི་དཔེ་སྟོན་ནུས་པ་ཤོར་འགྲོ་བ་བཅས་སྔོན་འགོག་བྱེད་དགོས་པ། “བདུན་གཅིག ”གཟེངས་བསྟོད་དང་ཟུང་འབྲེལ་གྱིས་སྔོན་ཐོན་གཞི་རིམ་ཏང་རྩ་འཛུགས་དང་ཕུལ་བྱུང་གུང་ཁྲན་ཏང་ཡོན་ཁག་གཅིག་བཏོད་དེ་སྔོན་ཐོན་གྱི་དཔེ་མཚོན་དང་བྱས་རྗེས་དྲིལ་བསྒྲགས་ཤུགས་ཆེན་བྱེད་དགོས་པ།
ཀུན་སྤྱོད་དྭངས་གཙང་ཡོང་རྒྱུ་འགན་ལེན་གྱིས་སློབ་གསོ་དང་དོ་དམ་ལ་སྔར་བས་ཤུགས་སྣོན་རྒྱག་དགོས་ཤིང་། གཅིག་ནས་སློབ་སྦྱོང་ལ་དམ་འཛིན་བྱེད་དགོས་པ་སྟེ། ཏང་གི་དམིགས་ཡུལ་དང་། མང་ཚོགས་ཀྱི་ལམ་ཕྱོགས། “བོད་སྐྱོད་པ་རྒན་གྲས་ཀྱི་སྙིང་སྟོབས ”བཅས་ཀྱི་སློབ་གསོར་ཤུགས་སྣོན་བརྒྱབ་སྟེ་ཏང་ཡོན་ལས་བྱེད་པ་ཚོས་ཆེས་རྒྱ་ཆེའི་མི་དམངས་ཀྱི་རྩ་བའི་ཁེ་ཕན་མངོན་འགྱུར་དང་། སྲུང་སྐྱོང་། འཕེལ་རྒྱས་བཅས་ཡག་པོ་བྱེད་རྒྱུ་དེ་ནི་དྭངས་གཙང་རང་བཞིན་ལ་ཞིབ་བཤེར་བྱེད་པའི་རྡོ་ཀ་ཤུ་ཁ་ལྟ་བུར་བརྩིས་ཏེ་མི་རྩ་བར་འཛིན་པ་དང་དམངས་དོན་དུ་སྲིད་སྐྱོང་བའི་བསམ་བློ་བརྟན་པོར་བཙུགས་ནས་མང་ཚོགས་ལ་བཅངས་པའི་བརྩེ་དུང་ཟབ་ཏུ་གཏོང་བ་དང་མང་ཚོགས་ཀྱི་ལས་དོན་ཡག་པོ་སྒྲུབ་པའི་རང་རྟོགས་རང་བཞིན་དང་རང་འགུལ་རང་བཞིན་ཆེ་རུ་གཏོང་རྒྱུར་ཁྲིད་སྟོན་བྱེད་དགོས་པ་དང་། གཉིས་ནས་ལྟ་སྐུལ་ལ་དམ་འཛིན་བྱེད་དགོས་པ་སྟེ། སྐབས་བརྗེའི་ལས་དོན་གྱིས་གཙོ་གནད་དུ་བྱས་ཏེ་ལས་བྱེད་པ་འདེམས་བསྐོ་དང་བེད་སྤྱོད་བྱེད་པའི་ལས་དོན་ལ་ལྟ་ཞིབ་བྱེད་ཤུགས་ཆེ་རུ་གཏོང་བ་དང་། སྐབས་བརྗེས་རྗེས་ཀྱི་འགོ་ཁྲིད་ཚན་ཁག་གི་བསམ་བློ་དང་ཆབ་སྲིད་འཛུགས་སྐྱོང་གིས་གཙོ་གནད་དུ་བྱས་ཏེ་ཚན་ཁག་གི་ཁོངས་མིས་དམངས་གཙོ་གཅིག་སྡུད་ལམ་ལུགས་ལག་བསྟར་དོན་འཁྱོལ་དང་སྐྱོན་བརྗོད་དང་རང་སྐྱོན་རང་བཅོས་བྱེད་པ་སོགས་ཀྱི་གནས་ཚུལ་ལ་ལྟ་སྐུལ་བྱ་རྒྱུར་ཤུགས་སྣོན་རྒྱག་པ། ཏང་སྲིད་ཀྱི་ལས་འགན་གཙོ་བོ་འཁུར་མཁན་གཙོ་གནད་དུ་བྱས་ཏེ་ཏང་ཡོན་ལས་བྱེད་པས་ཏང་གི་ཆབ་སྲིད་སྒྲིག་ལམ་དང་། རྩ་འཛུགས་ཀྱི་སྒྲིག་ལམ། དཔལ་འབྱོར་ལས་དོན་གྱི་སྒྲིག་ལམ། མང་ཚོགས་ལས་དོན་གྱི་སྒྲིག་ལམ་བཅས་ལ་བརྩི་སྲུང་ཞུ་ཚུལ་ལ་ལྟ་སྐུལ་བྱེད་རྒྱུར་ཤུགས་སྣོན་རྒྱག་དགོས་པ། གསུམ་ནས་དོན་འཁྱོལ་ལ་དམ་འཛིན་བྱེད་དགོས་པ་སྟེ། ལྗོངས་ཏང་ཨུད་དང་སྲིད་གཞུང་གི་མིག་སྔའི་ལས་ཀའི་བཀོད་སྒྲིག་གལ་ཆེན་ལག་བསྟར་བྱ་རྒྱུར་དམིགས་ཏེ་སྒྲིག་བཤེར་ལྟ་ཞིབ་སྡེ་ཚན་དང་མཉམ་དུ་ལྟ་སྐུལ་ཞིབ་བཤེར་བྱེད་ཤུགས་ཆེ་རུ་བཏང་ནས་ཏང་ཡོན་ལས་བྱེད་པས་དམ་པ་དོན་གཉེར་དང་དོན་འཁྱོལ་ལ་དམ་འཛིན་ནན་པོ་བྱ་རྒྱུར་སྐུལ་འདེད་ཀྱིས་ཁ་བཤད་ལག་བསྟར་དང་། ལག་ལེན་བྱེད་པ་དོན་ཐོག་ཏུ་འཁྱོལ་བ། དོན་འཁྱོལ་བྱེད་པ་ལེགས་པོ་སྒྲུབ་པ་བཅས་ཀྱི་སྤྱོད་ཚུལ་བཟང་པོ་ཞིག་ཆགས་པ་བྱེད་དགོས་པ།
རང་ངོས་ཀྱི་དྭངས་གཙང་རང་བཞིན་འགན་ལེན་གྱིས་ཉམས་སད་ཐེག་ཐུབ་པའི་དཔུང་ཁག་ཅིག་སྔར་བས་གཏོད་དགོས་ཤིང་། “གཅིག་བསུ་གཉིས་བརྩོན ”གྱིས་བརྗོད་བྱ་གཙོ་བོར་བྱས་ཏེ “ཏང་གཤིས་ལ་སྣང་ཆེན་དང་། ཀུན་སྤྱོད་ལ་སྣང་ཆེན། མིག་དཔེ་སྟོན་པ ”བཅས་ཀྱི་བྱེད་སྒོ་གཏིང་ཟབ་སྤེལ་ཏེ་ཆབ་སྲིད་ཐད་ཀྱི་དྭངས་གཙང་དང་། བསམ་བློའི་ཐད་ཀྱི་དྭངས་གཙང་། ཏང་གཤིས་ཐད་ཀྱི་དྭངས་གཙང་། རྩ་འཛུགས་ཐད་ཀྱི་དྭངས་གཙང་། སྤྱོད་ཚུལ་ཐད་ཀྱི་དྭངས་གཙང་བཅས་ཀྱི་རྩ་འཛུགས་ལས་དོན་གྱི་ལས་བྱེད་པའི་དཔུང་ཁག་ཅིག་འཛུགས་སྐྱོང་ཧུར་ཐག་བྱེད་དགོས་པ་དང་། དེའང་གཅིག་ནས་ཏང་གཤིས་ཀྱི་བློ་སྦྱོང་ལ་ཤུགས་སྣོན་རྒྱག་པའི་ཁྲོད་དྭངས་གཙང་རང་བཞིན་རྒྱུན་འཁྱོངས་བྱས་ཏེ་ཏང་གི་སློབ་ཚན་ཁྲིད་པ་དང་དབྱང་ཧྲན་ཀྲོའུ་དང་། ལི་ལིན་སེན། ཚེ་རིང་སོགས་སྔོན་ཐོན་དཔེ་མཚོན་ལ་སློབ་སྦྱོང་བྱེད་པའི་བྱེད་སྒོ་སྤེལ་ཏེ་རྩ་འཛུགས་ལས་དོན་ལས་བྱེད་པ་ཚོས་བསམ་བློའི་བྱང་ཚད་མཐོ་རུ་གཏོང་བ་དང་ཏང་གཤིས་ཀྱི་འདུ་ཤེས་དང་། ཆབ་སྲིད་ཀྱི་འདུ་ཤེས། ཁྱོན་ཡོངས་ཀྱི་འདུ་ཤེས། འགན་འཁྲིའི་འདུ་ཤེས་བཅས་ཆེ་རུ་བཏང་སྟེ་དྭངས་གཙང་རང་བཞིན་གྱི་བླང་བྱ་དེ་བྱ་སྤྱོད་ཐོག་འཁྱོལ་བ་བྱེད་པའི་སློབ་གསོ་དང་ཁྲིད་སྟོན་བྱེད་དགོས་པ། གཉིས་ནས་སྤྱོད་ཚུལ་ལེགས་སུ་གཏོང་བའི་ཁྲོད་དྭངས་གཙང་རང་བཞིན་རྒྱུན་འཁྱོངས་ཀྱིས་རྩ་འཛུགས་ལས་དོན་གྱི་ལས་བྱེད་པ་ཚོར་དམིགས་ཡུལ་བློ་ལ་བརྟན་པོར་བཅངས་ཏེ་འཕེལ་རྒྱས་དང་བརྟན་ལྷིང་ལ་ཞབས་འདེགས་ཞུ་བ་དང་། ཏང་ཡོན་ལས་བྱེད་པར་ཞབས་འདེགས་ཞུ་བ། མི་རིགས་ཁག་གི་མང་ཚོགས་ལ་ཞབས་འདེགས་ཞུ་བ་བཅས་ལས་འགན་ཨང་དང་པོར་བརྩིས་ཏེ་རྩ་འཛུགས་པུའུ་ཀྲང་གཞི་རིམ་དུ་བསྐྱོད་པའི་བྱེད་སྒོ་གཏིང་ཟབ་ཏུ་གཏོང་བ་དང་། རྩ་འཛུགས་ལས་དོན་ལས་བྱེད་པས་ཏང་ཡོན་དང་ཤེས་ལྡན་མི་སྣར་ཐད་ཀར་འབྲེལ་བ་བྱེད་པ་དང་ཞབས་འདེགས་ཞུ་བའི་ལམ་ལུགས་འཛུགས་པ། གཞི་རིམ་གྱི་འབྲེལ་གཏུག་ས་ཚིགས་དང་དངོས་སྡོད་ཞིབ་འཇུག་ལམ་ལུགས་འཐུས་སྒོ་ཚང་དུ་གཏོང་བ། རྩ་འཛུགས་ལས་དོན་གྱི་ལས་བྱེད་པ་གཞི་རིམ་དུ་བསྐྱོད་རྒྱུར་སྐུལ་འདེད་གཏོང་བ་བཅས་བྱས་ཏེ་ལས་དོན་གཞི་རིམ་དུ་དོན་འཁྱོལ་བྱེད་པ་དང་གཞི་རིམ་དུ་ཕན་པ་དངོས་ཐོབ་པ་བྱེད་དགོས་པའི་སློབ་གསོ་གཏོང་དགོས་པ། གསུམ་ནས་སྒྲིག་ཁྲིམས་ནན་པོ་ཡོང་བ་བྱེད་པའི་ཁྲོད་དྭངས་གཙང་རང་བཞིན་རྒྱུན་འཁྱོངས་ཀྱིས “ནན་པོ་གསུམ ”གྱི་བླང་བྱ་དོན་འཁྱོལ་བྱེད་པ་དང་། “གཏན་འགོག་བཅུ ”དང “བཀག་རྒྱ་ཁག་ལྔ ”སོགས་སྒྲིག་ཁྲིམས་ཀྱི་གཏན་འབེབས་དོན་འཁྱོལ་ནན་ཏན་བྱས་ཏེ་སྒྲིག་ཁྲིམས་སློབ་གསོ་དང་ལྷག་པར་དུ་ཉེན་ཟོན་སློབ་གསོ་གཏོང་ཤུགས་སྔར་བས་ཆེ་རུ་བཏང་ནས་རྩ་འཛུགས་ལས་དོན་ལས་བྱེད་པ་ཚོས་གཞུང་དྲང་ཚུལ་མཐུན་དང་སྤྱོད་གཙང་གཞུང་དྲང་གི་གཟུགས་བཪྙན་བཟང་པོར་སྲུང་སྐྱོང་བྱེད་རྒྱུའི་ཁྲིད་སྟོན་བྱེད་དགོས་པ། རིམ་ཁག་རྩ་འཛུགས་སྡེ་ཚན་གྱི་འགན་འཁུར་བློ་མཐུན་གྱིས་རང་དཔེ་གཞན་སྟོན་ངང་ཏང་གི་དྭངས་གཙང་རང་བཞིན་རྒྱུན་འཁྱོངས་བྱེད་པའི་སྲུང་སྐྱོང་པ་བློ་བརྟན་འགྱུར་མེད་གཅིག་དང་དཔེ་སྟོན་སྣེ་ཁྲིད་པ་གཅིག་བྱེད་དགོས་པའི་བླང་བྱ་བཏོན་ཡོད་པ་རེད།
འགན་འཁུར་རྩོམ་སྒྲིག་པ། admin
བོད་ལྗོངས་ཉིན་རེའི་ཚགས་པར་གྱི་པར་དབང་རང་བདག་ཡིན་པས་གན་རྒྱ་དང་དབང་ཆ་སྤྲད་མེད་ཚེ་དྲ་ཐོག་ནས་ཕབ་མི་ཆོག
སྡོད་གནས། བོད་རང་སྐྱོང་ལྗོངས་ལྷ་ས་གྲོང་ཁྱེར་རྡོ་སེང་གེ་ལམ་སྒོ་ཨང་༣༦ སྦྲག་ཨང། ༨༥༠༠༠༠ ཁ་པར། ༠༨༩༡-༦༣༣༡༠༨༩ བརྙན་སྐྱེལ། ༠༨༩༡-༦༣༣༡༠༨༩
བཟོ་མཁན་ལས་ཁུངས། ཀྲུང་གོའི་བོད་ཀྱི་གསར་འགྱུར་དྲ་ཚུགས།
ཐོ་བདག་ཨང་། བོད་ICPཐོ་ཨང་༠༩༠༠༠༧༣༣