ཟླ་4ཚེས་20ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་ལྷ་ས་གྲོང་ཁྱེར་དམངས་ཕན་ཉེན་རྟོག་ཞབས་ཞུའི་ས་ཚིགས་སུ་བརྟག་ཞིབ་གནང་བར་ཕེབས་ཤིང་། འདི་ནི་ཁྲེན་ཆོན་གོས་ལྷ་ས་གྲོང་ཁྱེར་བདེ་སྐྱིད་ལྷོ་ལམ་དུ་གནས་པའི་དམངས་ཕན་ཉེན་རྟོག་ཞབས་ཞུའི་ས་ཚིགས་སུ་ལས་བྱ་བྱེད་བཞིན་པའི་དཔོན་དམག་ལ་བྱམས་བརྩེའི་འཚམས་འདྲི་གནང་བའི་གནས་ཚུལ་ཡིན་པ།

    ལྷ་ས་གྲོང་ཁྱེར་དམངས་ཕན་ཉེན་རྟོག་ཞབས་ཞུའི་ས་ཚིགས་བེད་སྤྱོད་བྱས་ཏེ་ཟླ་བ་ལྔ་ལྷག་ཙམ་རིང་འགན་ནུས་ཁག་ཆ་ཚང་བ་ཞིག་ཡོད་དམ། འཁོར་སྐྱོར་གྱི་ཕན་འབྲས་གང་འདྲ་ཡོད་དམ། སྤྱི་བདེའི་ལས་བྱེད་པ་དང་ཉེན་རྟོག་པའི་རྩ་བ་ཡིན་པའི་བརྟན་ལྷིང་དེ་དམ་པོར་འཛིན་ཡོད་དམ་མེད། ལྷོད་གཡེང་དང་སུན་སྣང་གི་སྣང་ཚུལ་ཡོད་དམ་མེད་ཅེས་པའི་གནད་དོན་དེ་དག་ལ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་ཐུགས་ཁུར་ཧ་ཅང་ཆེན་པོ་གནང་གི་ཡོད། ཚེས་20ཉིན་གྱི་སྔ་དྲོ་དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་གི་བྱེད་སྒོའི་ནང་ཞུགས་རྗེས་ཁྲེན་ཆོན་གོས་སྐབས་འཕྲལ་དགོངས་པ་བཞེས་ཏེ་ལྷ་ས་གྲོང་ཁྱེར་གྱི་དམངས་ཕན་ཉེན་རྟོག་ཞབས་ཞུའི་ས་ཚིགས་ལ་སྐབས་བསྟུན་ཞིབ་བཤེར་གནང་བ་རེད།

    རང་སྐྱོང་ལྗོངས་ཀྱི་འགོ་ཁྲིད་ཧའོ་ཕུང་དང་། ལང་ཡིའུ་ལེའང་། ཆེ་དགྲ་ལྷ། ཏེང་ཞའོ་ཀང་། ཏུང་ཡུན་ཧུའུ། རྡོ་རྗེ་ཚེ་རིང་། ཀུའོ་དབྱི་ལི། ཀའོ་དབན་ཧའེ། ཁྱུང་སྲས་སོགས་ཀྱིས་མཉམ་དུ་ཟུར་འཐེན་ཞིབ་བཤེར་གནང་ཡོད།

    ཁྲེན་ཆོན་གོ་སྐུ་ངོ་མའི་བཀོད་འདོམས་འོག་རླངས་འཁོར་འབྲིང་གྲས་ཤིག་དང་ཐོག་བདེ་སྐྱིད་ལྷོ་ལམ་གྱི་དམངས་ཕན་ཉེན་རྟོག་ཞབས་ཞུའི་ས་ཚིགས་སུ་བཏང་བ་དང་ཁྲེན་ཆོན་གོ་དང་བཅས་པ་ཐད་ཀར་ཉེན་རྟོག་ཞབས་ཞུའི་ས་ཚིགས་ནང་ཕེབས་པས་ལས་རེས་མི་དམངས་ཉེན་རྟོག་པ་བསོད་ནམས་མཚོ་མོ་འཕྲལ་དུ་ལངས་ནས་བསུ་བ་ཞུས། ཁྲེན་ཆོན་གོས་ཁ་རི་ཁ་ཐུག་ངང་ཁྱེད་ཚོའི་པན་གཅིག་ལ་མི་ག་ཚོད་ཡོད་དམ། ད་ལྟའི་བདེ་འཇགས་ཀྱི་གནས་ཚུལ་དང་ཉེན་རྟོག་ཞབས་ཞུའི་ས་ཚིགས་བེད་སྤྱོད་གཏོང་མ་ཐག་དང་བསྡུར་ན་འགྱུར་ལྡོག་གང་ཞིག་བྱུང་འདུག་གམ་ཞེས་དྲིས་གནང་བ་རེད། བསོད་ནམས་མཚོ་མོས་ང་ཚོ་པན་རེར་ཧ་ལམ་མི་བཅུ་ཙམ་ཡོད། མི་གཉིས་ཀྱིས་ས་ཚིགས་ནང་ལས་རེས་བྱེད་པ་ཕུད་གཞན་དག་རྣམས་ཀྱིས་སྐོར་གཡེང་གི་འགན་འཁུར་གྱི་ཡོད། ད་ལྟ་བདེ་འཇགས་ཀྱི་གནས་ཚུལ་མངོན་གསལ་དོད་པོས་ལེགས་སུ་ཕྱིན་པ་དང་ཉེན་བརྡ་ཞུ་ཚད་དང་བདེ་འཇགས་སྐོར་གྱི་གྱོད་གཞི་མངོན་གསལ་དོད་པོས་ཉུང་དུ་ཕྱིན་འདུག་ཅེས་ལན་འདེབས་བཞིན་པའི་སྐབས་ས་ཚིགས་ཀྱི་ཀྲན་ཀྲང་ཀྲོའུ་ཝུའེ་ཝུའུ་ཡིས་ལས་བྱེད་པ་དང་ཉེན་རྟོག་པ་འཁྲིད་དེ་སྐོར་གཡེང་ལས་འགན་བསྒྲུབས་ནས་ཉེན་རྟོག་ཞབས་ཞུའི་ས་ཚིགས་སུ་ཕྱིར་ལོག་བྱས་ཡོད། ཚང་མའི་སྙིང་སྟོབས་རབ་ཏུ་འཕེལ་བ་དང་གོ་མཚོན་ཆ་ཚང་བ་ཡོད་པ་གཟིགས་སྐབས་ཁྲེན་ཆོན་གོ་དགྱེས་ཚོར་ཧ་ཅང་ཆེན་པོ་བྱུང་ཞིང་། ཁོང་གིས་བློ་མཐུན་རྣམས་ཀྱིས་ལྗོངས་ཡོངས་ཀྱི་ཞི་མཐུན་བརྟན་ལྷིང་ཆེད་ཉིན་མཚན་དབྱེར་མེད་དང་རང་ཉིད་གཏིང་བརྗེད་ཀྱིས་ལས་དོན་སྒྲུབ་པར་དཀའ་སྡུག་ཧ་ཅང་ཆེ་བ་ཞིག་ཡོད། ངས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ཏེ་རྣམ་པ་ལྷན་རྒྱས་དང་ལྗོངས་ཡོངས་ཀྱི་བཅིངས་འགྲོལ་དམག་གི་དཔོན་དམག་དང་། དྲག་ཆས་ཉེན་རྟོག་དཔུང་སྡེ། སྤྱི་བདེའི་ད་སྐུལ་དཔུང་སྡེ། སྲིད་ཁྲིམས་ལས་བྱེད་པ་དང་ཉེན་རྟོག་བཅས་ཡོངས་ལ་སྙིང་དབུས་ནས་ཐུགས་རྗེ་ཆེ་དང་བླ་ན་མེད་པའི་གུས་འདུད་ཞུ་རྒྱུ་ཡིན་ཞེས་གསུངས་པ་དང་ཆབས་ཅིག་བློ་མཐུན་རྣམ་པས་ངལ་དུབ་ལ་མི་སྐྲག་པ་དང་བསྟུད་མར་དམག་འཐབ་བྱེད་པའི་སྲོལ་རྒྱུན་བཟང་པོ་དར་སྤེལ་གཏོང་བ་དང་མུ་མཐུད་འགན་འཁྲི་གཙང་སྒྲུབ་དང་སྔོན་འགོག་དང་ཚོད་འཛིན་ནན་པོ་བྱས་ཏེ་བོད་རྒྱུན་བསྲིང་བརྟན་ལྷིང་ཡོང་ཆེད་སླར་ཡང་བྱས་རྗེས་གསར་པ་འཇོག་དགོས་པའི་ཐུགས་རེ་གནང་བ་རེད།

    ནོར་བུ་གླིང་ཁའི་དམངས་ཕན་ཉེན་རྟོག་ཞབས་ཞུའི་ས་ཚིགས་མདུན་དུ་སྐོར་གཡེང་རུ་ཁག་གི་རུ་མི་ཚོ་གྲ་སྒྲིག་ཨང་བསར་གྱིས་ཐོན་གྲབས་ཡོད་སྟབས་ཁྲེན་ཆོན་གོ་མགྱོགས་པོ་མདུན་དུ་ཕེབས་ནས་ཚང་མ་དང་རེ་རེ་བཞིན་ཕྱག་བཏང་གནང་སྟེ་འཚམས་འདྲི་ཞུས་པ་རེད། དམངས་ཕན་ཉེན་རྟོག་ཞབས་ཞུའི་ས་ཚིགས་ནང་ཁྲེན་ཆོན་གོས་ཞབས་ཞུའི་ཁྱབ་ཁུལ་དང་། ལས་རེས་བཀོད་སྒྲིག འཕྲལ་སྡོམ་སྔོན་ཇུས་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་ཞིང་། གྱང་སྟེང་དུ་གྲོང་མི་དང་ཡུལ་སྐོར་བས་ཕུལ་བའི་གོས་དར་བཀལ་ཡོད་པ་གཟིགས་ཏེ་ཁྲེན་ཆོན་གོས་དམངས་ཕན་ཉེན་རྟོག་ཞབས་ཞུའི་ས་ཚིགས་ཀྱི་འགན་ཁུར་བློ་མཐུན་ལ་གོས་དར་དེ་དག་ནི་མི་དམངས་མང་ཚོགས་ཀྱིས་ཁྱེད་ཚོར་ཁས་བླངས་པ་དང་སྐུལ་ལྕག་གཏོང་བ་ཞིག་ཡིན་ལ་ཁྱེད་ཚོར་སྐུལ་མ་གཏོང་བ་དང་རེ་བ་བཅོལ་བ་ཞིག་དེ་བས་ཡིན། བློ་མཐུན་རྣམ་པས་དམངས་ཕན་ཉེན་རྟོག་ཞབས་ཞུའི་ས་ཚིགས་ཀྱི་ལེགས་ཆ་དང་ནུས་པ་ལེགས་པར་བཏོན་ནས་ཁྲོམ་གཞུང་དུ་བསྐྱོད་པ་དང་། མང་ཚོགས་དང་འབྲེལ་འདྲིས་བྱེད་པ། གཞི་རིམ་དུ་རྩ་བ་འཛུགས་པ་བཅས་དང་། མང་ཚོགས་ཀྱི་བསམ་འཆར་ཉན་པ་དང་མང་ཚོགས་ཀྱི་དཀའ་ངལ་ཐག་གཅོད་བྱེད་པ། མང་ཚོགས་ཀྱི་བདེ་འཇགས་འགན་ལེན་བྱེད་པ། ལས་ཀར་རྒྱུན་ཆད་མེད་པར་ལེགས་བཅོས་གཏོང་བ་བཅས་བྱས་ཏེ་མི་རིགས་ཁག་གི་མང་ཚོགས་ཚོའི་བདེ་འཇགས་ཀྱི་ཚོར་བ་དང་བློ་ཡིད་ཚིམ་ཚད་ཕྱོགས་ཡོངས་ནས་མཐོ་རུ་གཏོང་བ་དང་མི་དམངས་ཀྱི་སྤྱི་བདེས་མི་དམངས་ལ་ཞབས་འདེགས་ཞུ་བའི་གཟུགས་བཪྙན་བཟང་པོ་དང་གཟེངས་སུ་ཐོན་པའི་ལས་རྗེས་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་པའི་ཐུགས་རེ་གནང་བ་རེད།

    ཞོལ་གྲོང་གསར་གྱི་དམངས་ཕན་ཉེན་རྟོག་ཞབས་ཞུའི་ས་ཚིགས་ནང་ཁྲེན་ཆོན་གོ་བཪྙན་ཤེལ་གྱི་ལྟ་སྐུལ་ཚོད་འཛིན་མ་ལག་མདུན་དུ་བཞུགས་ཏེ་དམངས་ཕན་ཉེན་རྟོག་ཞབས་ཞུའི་ས་ཚིགས་མཐའ་འཁོར་གྱི་གནས་ཚུལ་མཁྱེན་རྟོགས་གནང་ཞིང་། ལས་སྒྲུབ་མི་དམངས་ཉེན་རྟོག་པར་ཁོངས་གཏོགས་ཁུལ་ནང་ཐོལ་བྱུང་དོན་རྐྱེན་ཐོན་ན་ཁྱེད་ཚོ་དུས་ཚོད་གང་འདྲ་ཞིག་གི་ནང་དོན་རྐྱེན་ཐོན་ཡུལ་དུ་འབྱོར་ཐུབ་བམ་ཞེས་དཀའ་འདྲི་གནང་སྐབས་སྐར་མ་ལྔའི་ནང་ཚུན་དུ་འབྱོར་ཐུབ་ཅེས་ཞུས། སྒྲོག་ཙེའི་སྟེང་དུ་ཐོབ་ཐང་ལག་ཁྱེར་དབྱེ་འབྱེད་འཕྲུལ་ཆས་བཞག་ཡོད་པ་གཟིགས་སྐབས་ཁྲེན་ཆོན་གོས་ལས་སྒྲུབ་ཉེན་རྟོག་པར་དེ་རང་དུ་ཚོད་ལྟ་བྱེད་དུ་བཅུག་པ་རེད། མི་དམངས་ཉེན་རྟོག་པས་དབྱེ་འབྱེད་འཕྲུལ་ཆས་ཐོག་ཐོབ་ཐང་ལག་ཁྱེར་རེག་ཙམ་བྱས་པས་ཐོབ་ཐང་ལག་ཁྱེར་ཡོད་མཁན་གྱི་གཞི་རྩའི་ཆ་འཕྲིན་ཚང་མ་མྱུར་དུ་གསལ་ཡོད། ཁྲེན་ཆོན་གོས་དམངས་ཕན་ཉེན་རྟོག་་ཞབས་ཞུའི་ས་ཚིགས་ལ་ངེས་པར་དུ་སྒྲིག་ཆས་ཀྱི་ཚད་གཞི་རྒྱུན་ཆད་མེད་པར་མཐོ་རུ་བཏང་སྟེ་བདེ་འཇགས་འགན་ལེན་བྱེད་དགོས་ལ་མང་ཚོགས་ཚོ་སྟབས་བདེ་ཡོང་བའང་་བྱེད་དགོས་ཞེས་གསུངས་ཡོད། ཁྲེན་ཆོན་གོས་དེང་སྐབས་ལྗོངས་ཡོངས་ཀྱི་སྤྱི་ཚོགས་ཡོངས་ཞི་མཐུན་བརྟན་ལྷིང་ཡོད་པའི་དུས་བབ་བཟང་པོ་འདི་ལས་སླ་པོར་བྱུང་མེད་པས་གྲུབ་འབྲས་དར་སྤེལ་གཏོང་བ་དང་ཡང་འབད་བསྐྱར་འབད་ཀྱིས་བརྟན་ལྷིང་སྲུང་སྐྱོང་བྱེད་པའི་ལས་དོན་ཁག་སྔར་ལས་ཏན་ཏིག་དང་ཞིབ་ཚགས་ངང་ལེགས་པར་བསྒྲུབས་ནས་བོད་ཀྱི་སྤྱི་ཚོགས་ཡོངས་རྒྱུན་མཐུད་ཞི་མཐུན་བརྟན་ལྷིང་ཡོང་རྒྱུར་ནུས་ཤུགས་ཡོད་རྒུས་འགན་སྲུང་བྱས་ཏེ་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་ཁོར་ཡུག་བཟང་པོ་ཞིག་གཏོད་དགོས། གཅིག་ནས་དོགས་ཟོན་ཆེར་བསྐྱེད་ཀྱིས་བག་གཡེང་བསམ་བློ་དང་ལྷོད་གཡེང་སུན་སྣང་གི་སྣང་ཚུལ་མཐའ་གཅིག་ཏུ་བསལ་ནས་དོགས་ཟོན་ཆེར་བསྐྱེད་དང་རྒྱུན་དུ་དྲན་སྐུལ་བྱས་ཏེ་རྩ་བ་ཡིན་པའི་བརྟན་ལྷིང་དེ་དམ་འཛིན་ནན་ཐག་ཆོད་བྱེད་པ་དང་། བརྟན་ལྷིང་གི་བྱ་ཐབས་ལ་ཤུགས་སྣོན་ཆེས་ཆེར་རྒྱག་པ། བརྟན་ལྷིང་གི་འགོག་སྲུང་འཐབ་ཕྱོགས་བརྟན་ཐག་ཆོད་ཡོང་བ་བཟོ་བ། བརྟན་ལྷིང་གི་འགན་འཁྲི་དོན་འཁྱོལ་ནན་ཐག་ཆོད་བྱེད་པ་བཅས་བྱས་ནས་སྤྱི་ཚོགས་ཡོངས་རྒྱུན་མཐུད་ཞི་མཐུན་བརྟན་ལྷིང་ཡོང་བའི་དུས་བབ་བཟང་པོ་སྲ་བརྟན་གོང་འཕེལ་གཏོང་བ་དང་། གཉིས་ནས་རྒྱུན་བསྲིང་ལྷོད་མེད་ངང་ཡུན་རིང་དམག་འཐབ་བྱེད་པའི་བསམ་བློ་བཙུགས་ཏེ་བརྟན་ལྷིང་སྲུང་སྐྱོང་གི་འདུ་ཤེས་རྒྱུན་གཏན་ཅན་དང་། བརྟན་ལྷིང་སྲུང་སྐྱོང་གི་བྱ་ཐབས་རྒྱུན་གཏན་ཅན། བརྟན་ལྷིང་སྲུང་སྐྱོང་གི་འགན་འཁྲི་རྒྱུན་གཏན་ཅན། བརྟན་ལྷིང་སྲུང་སྐྱོང་གི་དམིགས་ཚད་རྒྱུན་གཏན་ཅན་བཅས་མཐའ་གཅིག་ཏུ་བྱེད་ཐུབ་པ་བྱེད་པ་དང་བརྟན་ལྷིང་སྲུང་སྐྱོང་གི་རྒྱུན་མཐུད་དམག་འཐབ་དང་འགག་སྒྲོལ་དམག་འཐབ་ལ་རྒྱལ་ཁ་མཐའ་གཅིག་ཏུ་ཐོབ་པ་བྱས་ཏེ་དགྲ་ཡའི་ཕྱོགས་གཏོགས་དང་ཏཱ་ལའི་་རུ་ཚོགས་ཀྱིས་བོད་ཀྱི་བརྟན་ལྷིང་ལ་གཏོར་བཤིག་གཏོང་བ་དང་རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བའི་ལྐོག་གཡོ་ཐལ་བའི་རྡུལ་དུ་མཐར་ཕྱིན་པ་བརླགས་ཏེ་གནད་དོན་ཆེན་པོ་མི་ཐོན་པ་བྱེད་དགོས་པ་དང་གནད་དོན་འབྲིང་བ་ཡང་མི་ཐོན་པ་བྱེད་དགོས་པ་དང་གནད་དོན་ཆུང་ངུ་ཡང་མི་ཐོན་པའི་བརྩོན་ལེན་བྱེད་པའི་དམིགས་ཚད་ཧུར་ཐག་སྒྲུབ་པ། གསུམ་ནས་དོགས་ཟོན་ནན་པོ་བྱེད་པ་དང་ཕན་ཡོད་ཀྱི་གོ་སྐབས་དམ་བཟུང་གིས་ལྗོངས་ཡོངས་ཀྱི་དམངས་ཕན་ཉེན་རྟོག་ཞབས་ཞུའི་ས་ཚིགས་676སྐྲུན་པའི་མྱུར་ཚད་མགྱོགས་སུ་གཏོང་བ་དང་། དམངས་ཕན་དང་ཐོལ་བྱུང་གནད་དོན་ཐག་གཅོད་བྱ་ཐབས་འཐུས་ཚང་དུ་གཏོང་བ། བརྟན་ལྷིང་སྲུང་སྐྱོང་གི་སྟོབས་ཤུགས་ཁ་གསབ་དང་ཤུགས་སྣོན་རྒྱག་པ་བཅས་བྱས་ཏེ་གྲོང་ཁྱེར་དང་གྲོང་རྡལ་དྲ་བ་ཅན་གྱི་དོ་དམ་ཁྱོན་ཡོངས་ལ་ཁྱབ་པ་དང་དམ་འཛིན་སྔ་ཙམ་དང་། ཆུང་ཙག་ནས་དམ་འཛིན། དམ་འཛིན་མྱུར་པོ། དམ་འཛིན་ཡག་པོ་བཅས་བྱེད་པ་དང་གྲོང་ཁྱེར་དང་གྲོང་གསེབ་ཀྱི་བརྟན་ལྷིང་སྲུང་སྐྱོང་གི་བྱ་ཐབས་ཁག་ཕྱོགས་ཡོངས་ནས་དོན་འཁྱོལ་གཏིང་ཟབ་བྱས་ནས་བར་ལུས་མེད་པ་དང་། མི་ཁྱབ་པ་མེད་པ། སྟོང་ཆ་མེད་པ། མི་ཚོགས་མི་ལུས་པ་བཅས་བྱེད་པ། བཞི་ནས་འགན་འཁྲི་དོན་འཁྱོལ་བྱེད་པ་དང་བརྟན་ལྷིང་སྲུང་སྐྱོང་ལས་དོན་གྱི་འགན་འཁྲིའི་ལམ་ལུགས་དང་འགན་འཁྲི་རྩད་གཅོད་ལམ་ལུགས། དོན་འཁྱོལ་ནན་པོ་བྱེད་ལ་དངོས་སུ་ཞིབ་བཤེར་བྱེད་པ་དང་མངོན་མིན་བརྟག་དཔྱད་བྱ་ཤུགས་ཆེ་རུ་བཏང་སྟེ་ལས་གནས་བརྟན་སྲུང་མི་བྱེད་པ་དང་། འགན་མི་ཁུར་བ། འགན་ཤོར་ལས་འཛོལ་བྱུང་བ། ལས་དོན་དོན་འཁྱོལ་མི་བྱེད་པ། བྱ་ཐབས་དོན་ཐོག་ཏུ་འཁྱོལ་མེད་པ། བརྟན་ལྷིང་ཐད་ཐོན་པའི་གནད་དོན་བཅས་ཡིན་ཕྱིན་བྱས་རྗེས་ག་ཚོད་བཞག་ཡོད་མེད་དང་། རིམ་པ་གང་ཞིག་གི་ལས་བྱེད་པ་ཡིན་མིན། སྔོན་མ་ལས་ཀ་ཡག་པོ་གང་འདྲ་ཞིག་བྱས་ཡོད་མེད་བཅས་ལ་མ་བལྟོས་པར་ཚང་མའི་གོ་གནས་མེད་པར་བཟོ་རྒྱུ་དང་སྒྲིག་ཁྲིམས་དམ་པོར་བརྟེན་ནས་བརྟན་ལྷིང་སྲུང་སྐྱོང་གི་བྱ་ཐབས་ཁག་དོན་འཁྱོལ་ཡོང་བའི་འགན་ལེན་བཅས་བྱེད་དགོས་པའི་ནན་བཤད་གནང་བ་རེད།