ཟླ་3ཚེས་31ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་ལྗོངས་ཏང་ཨུད་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཧའོ་ཕུང་གིས་ནན་ཅང་དམག་ཁུལ་ཁང་གི་ཆབ་སྲིད་ཨུ་ཡོན་གཞོན་པ་ཨའེ་ནའེ་ཐེ་བཅས་པ་དང་མཇལ་འཛོམས་གནང་བ་རེད།
རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་དྲུང་ཆེ་ཏེང་ཞའོ་ཀང་མཇལ་འཛོམས་གནང་བར་ལྷན་དུ་ཕེབས་ཡོད་པ་རེད།
ཧའོ་ཕུང་གིས་ཆབ་སྲིད་ཨུ་ཡོན་གཞོན་པ་ཨའེ་ནའེ་ཐེ་ཉེ་ཆར་བོད་དུ་ཕེབས་ནས་མངའ་རིས་ས་ཁུལ་དུ་བཅའ་སྡོད་དམག་དཔུང་གི་འབྲེལ་ཡོད་ལས་དོན་ལ་བརྟག་ཞིབ་དང་མཛུབ་ཁྲིད་གནང་བ་དེ་ཐོག་ནས་ལན་ཀྲོའུ་དམག་ཁུལ་ཁང་དང་ནན་ཅང་དམག་ཁུལ་ཁང་གིས་བོད་དང་ལྷག་པར་དུ་མངའ་རིས་ས་ཁུལ་གྱི་འཕེལ་རྒྱས་དང་བརྟན་ལྷིང་གི་བྱ་གཞག་ཁག་ལ་ཚད་མཐོའི་མཐོང་ཆེན་གནང་ལུགས་དང་། དོ་ཁུར་དང་རྒྱབ་སྐྱོར་གནང་ལུགས་མཚོན་ཡོད། ཁོང་གིས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་། ཧྲུའུ་ཅི་ཁྲེན་ཆོན་གོ་དང་ཀྲུའུ་ཞི་པད་མ་འཕྲིན་ལས་རྣམ་གཉིས་ཀྱི་ཚབ་ཞུས་ནས་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན་ཞེས་མཛུབ་སྟོན་གནང་བ་དང་། ཧའོ་ཕུང་གིས་དུས་ཡུན་རིང་པོའི་ནང་མངའ་རིས་སུ་བཅའ་སྡོད་ནན་ཅང་དམག་ཁུལ་གྱི་དཔུང་སྡེས་མི་དམངས་དམག་དཔུང་གིས་མི་དམངས་ཀྱི་ཆེད་དུ་ལས་དོན་སྒྲུབ་པའི་རྩ་དོན་ཐོག་མཐའ་བར་གསུམ་དུ་མཐའ་འཁྱོངས་ཀྱིས་མང་ཚོགས་ལས་དོན་ཧུར་ཐག་བསྒྲུབས་ནས་ས་གནས་འཛུགས་སྐྲུན་ཐད་ནུས་ཤུགས་ཡོད་རྒུས་རྒྱབ་སྐྱོར་བྱེད་པ་དང་ལྷག་པར་དུ་བརྟན་ལྷིང་སྲུང་སྐྱོང་དང་གངས་སྐྱོན་སོགས་རང་བྱུང་གནོད་འཚེ་ཚབས་ཆེན་ལ་འགོག་རྒོལ་བྱེད་པའི་ཁྲོད་དཔའ་ངར་ཆེར་བསྐྱེད་ཀྱིས་གདོང་ལེན་པ་བྱེད་པ་དང་དཔའ་ངར་ཆེན་པོས་འགན་འཁྲི་ལྕི་པོ་ཕྲག་ཐོག་ཏུ་འཁུར་ནས་བོད་ཀྱི་དཔལ་འབྱོར་འཕེལ་རྒྱས་དང་། དུས་བབ་བརྟན་ལྷིང་། སྤྱི་ཚོགས་ཡར་ཐོན། མི་རིགས་མཐུན་སྒྲིལ། མཐའ་མཚམས་སྲ་བརྟན་བཅས་ཀྱི་ཆེད་དུ་ལེགས་སྐྱེས་མངོན་གསལ་དོད་པོ་ཕུལ་བ་དང་མཐའ་མཚམས་སྲུང་སྐྱོང་དང་མཐའ་མཚམས་འཛུགས་སྐྲུན་གྱི་དཔའ་བོའི་བསྟོད་གླུ་མང་དག་ཅིག་བརྩམས་ཡོད་ཅེས་གསུངས་པ་རེད། ཁོང་གིས་ནན་ཅང་དམག་ཁུལ་གྱིས་བོད་ཀྱི་འཕེལ་རྒྱས་དང་བརྟན་ལྷིང་ལས་དོན་ལ་མུ་མཐུད་རྒྱབ་སྐྱོར་གནང་སྟེ་བོད་ཀྱི་མི་རིགས་ཁག་གི་མི་དམངས་རྣམས་ལ་བདེ་སྐྱིད་སྐྲུན་པ་དང་། བོད་ཀྱི་རིམ་ཁག་ཏང་ཨུད་དང་སྲིད་གཞུང་ལ་སྔར་བཞིན་རྒྱབ་སྐྱོར་བྱེད་པ་དང་བོད་དུ་བཅའ་སྡོད་ནན་ཅང་དམག་ཁུལ་གྱི་དཔུང་སྡེའི་ལས་དོན་ལ་གཞོགས་འདེགས་བྱེད་པ། གཉིས་བཀུར་མཉམ་སྐྲུན་གྱི་བྱེད་སྒོར་ཐུན་མོང་ཐོག་སྐུལ་འདེད་གཏོང་བ་བཅས་བྱས་ནས་སྲ་ཞིང་བརྟན་པའི་མེས་རྒྱལ་གྱི་ལྷོ་ནུབ་མཐའ་མཚམས་འཛུགས་སྐྲུན་བྱ་ཆེད་ཐུན་མོང་ཐོག་འབད་བརྩོན་བྱེད་རྒྱུའི་རེ་བ་ཡོད་ཅེས་གསུངས་པ་རེད།
ཨའེ་ནའེ་ཐེས་སླད་ཕྱིན་གྱི་ལས་ཀའི་ཁྲོད་ནན་ཅང་དམག་ཁུལ་གྱིས་ཏང་ཀྲུང་དབྱང་དང་ཀྲུང་དབྱང་དམག་ཨུད་དང་ལན་ཀྲོའུ་དམག་ཁུལ་གྱི་བཀོད་སྒྲིག་གཞིར་བཟུང་ཏང་གི་བཀོད་འདོམས་ལ་ཉན་པ་དང་། མི་དམངས་ལ་ཞབས་འདེགས་ཞུ་བ། དཔའ་མཛངས་ལྡན་ལ་དམག་རྒྱག་མཁས་པ་བཅས་ཀྱི་སྲོལ་རྒྱུན་བཟང་པོ་དར་སྤེལ་ཤུགས་ཆེན་བཏང་སྟེ་དཔུང་སྡེ་འཛུགས་སྐྲུན་ཡག་པོ་བྱེད་པ་དང་། མཐའ་མཚམས་སྲུང་སྐྱོང་ཡག་པོ་བྱེད་པ། བོད་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་དང་མཉམ་དུ་ལག་གདང་དཔུང་སྦྲེལ་བཅས་ཀྱི་ཐོག་ནས་སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་སྔར་བས་མཛེས་སྡུག་ལྡན་པ་ཞིག་འཛུགས་སྐྲུན་བྱ་རྒྱུ་ཡིན་ཞེས་གསུངས་པ་རེད།