ཟླ་3ཚེས་27ཉིན་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་འཛུགས་སྐྲུན་བྱེད་བཞིན་པའི་རང་སྐྱོང་ལྗོངས་རང་བྱུང་ཚན་རིག་རྟེན་རྫས་བཤམས་མཛོད་ཁང་དང་ལྷ་ས་གནས་མཆོག་ལྷ་ཡུལ་གླིང་སྐྱོད་གསོལ་སྟོན་ཁང་སོགས་གཙོ་གནད་རྣམ་གྲངས་ལས་གྲྭའི་ལས་ཡུལ་དངོས་སུ་ཆེད་མངགས་ཕེབས་ནས་ལས་གྲྭའི་འཕེལ་རིམ་དང་འཛུགས་སྐྲུན་བྱེད་ཚུལ་ལ་གཟིགས་ཞིབ་གནང་བ།

    ཟླ་3ཚེས་27ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་སྐྲུན་བཞིན་པའི་བོད་ཀྱི་རང་བྱུང་ཚན་རིག་རྟེན་རྫས་བཤམས་མཛོད་ཁང་དང་ལྷ་ས་གནས་མཆོག་ལྷ་ཡུལ་གླིང་སྐྱོད་གསོལ་མགྲོན་ཁང་སོགས་གཙོ་གནད་རྣམ་གྲངས་འཛུགས་སྐྲུན་བྱ་ཡུལ་དུ་ཕེབས་ནས་ལས་གྲྭའི་འཛུགས་སྐྲུན་མཁན་ལ་མཛའ་བརྩེའི་ངང་གཟིགས་ཐོག་འཚམས་འདྲི་ཡང་གནང་བ་དང་ལས་གྲྭའི་འཕེལ་རིམ་དང་འཛུགས་སྐྲུན་བྱེད་ཚུལ་ལ་རྟོག་ཞིབ་གནང་ཞིང་། ཁོང་གིས་རྣམ་གྲངས་གཙོ་གཉེར་སྡེ་ཚན་ཁག་དང་ཨར་ལས་དང་ལྟ་སྐུལ་དོ་དམ་ཚན་པར་ངོས་འཛིན་གཅིག་གྱུར་དང་། དམིགས་ཚད་ཁ་གསལ། ཚན་རིག་དང་མཐུན་པའི་ལས་སྐྲུན། དོ་དམ་ཞིབ་ཚགས་བཅས་བྱས་ཏེ་གཙོ་གནད་རྣམ་གྲངས་འཛུགས་སྐྲུན་སྤུས་འབོར་གཉིས་ལྡན་ངང་བྱེད་དགོས་པའི་བླང་བྱ་བཏོན་གནང་བ་རེད།

    རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷ་དང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་མོང་ཏེ་ལི། རང་སྐྱོང་ལྗོངས་སྲིད་གཞུང་གི་ཏང་ཙུའུ་ཡི་ཁོངས་མི་དྲུང་ཆེ་ཀའོ་དབྱང་བཅས་ཀྱིས་རྟོག་ཞིབ་གནང་བར་ཕེབས་རོགས་ཞུས་པ་རེད།

    པད་མ་འཕྲིན་ལས་དང་བཅས་པས་བོད་ཀྱི་རང་བྱུང་ཚན་རིག་རྟེན་རྫས་བཤམས་མཛོད་ཁང་གི་ལས་གྲྭ་གཙོ་བོ་འཛུགས་སྐྲུན་བྱེད་ཚུལ་ལ་རྟོག་ཞིབ་གནང་སྟེ་རྣམ་གྲངས་འགན་འཁུར་བའི་ངོ་སྤྲོད་གསན་ཞིང་། ཁོང་གིས་བོད་ཀྱི་རང་བྱུང་ཚན་རིག་རྟེན་རྫས་བཤམས་མཛོད་ཁང་ནི་རང་ལྗོངས་ཀྱི་དམངས་འཚོའི་འདུ་འགོད་གལ་ཆེན་ཞིག་ཡིན་པས་རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་ཁག་དང་རིམ་ཁག་སྲིད་གཞུང་གིས་སྤྱི་ཡོངས་ཀྱི་འདུ་ཤེས་དང་། ཞབས་ཞུའི་འདུ་ཤེས། ཕན་འབྲས་ཀྱི་འདུ་ཤེས་བཅས་སྔར་བས་ཆེ་རུ་བཏང་སྟེ་བོད་ཀྱི་རང་བྱུང་ཚན་རིག་རྟེན་རྫས་བཤམས་མཛོད་ཁང་གི་རྣམ་གྲངས་འཛུགས་སྐྲུན་ཆེད་སྤུས་ལེགས་ཀྱི་ཞབས་འདེཌ་ཞུ་བ་དང་། ཁོར་ཡུག་ཡག་པོ་ཞིག་གཏོད་པ། ལས་གྲྭ་འཛུགས་སྐྲུན་བདེ་བླག་ཡོང་རྒྱུར་འགན་ལེན་བྱེད་པ་བཅས་བྱས་ནས་རང་བྱུང་ཚན་རིག་རྟེན་རྫས་བཤམས་མཛོད་ཁང་འདི་ཉིད་རང་ལྗོངས་ཀྱི་སྤུས་རྟགས་ལས་གྲྭར་འགྱུར་རྒྱུའི་བརྩོན་ལེན་བྱས་ཏེ་དམངས་ཡོངས་ཀྱི་ཚན་རིག་དང་རིག་གནས་བྱང་ཚད་མཐོ་རུ་གཏོང་ཆེད་ནུས་པ་གལ་ཆེན་འདོན་སྤེལ་གྱིས་མཐུན་སྒྲིལ་དང་། དམངས་གཙོ། འབྱོར་ཕྱུག ཤེས་དཔལ། ཞི་མཐུན་བཅས་ཀྱི་སྤྱི་ཚོགས་རིང་ལུགས་ཀྱི་བོད་གསར་འཛུགས་སྐྲུན་བྱེད་ཆེད་ལེགས་སྐྱེས་འབུལ་དགོས་པའི་རེ་བ་བཏོན་གནང་བ་རེད།

    ད་དུང་པད་མ་འཕྲིན་ལས་ཀྱིས་ལྷ་ས་གནས་མཆོག་ལྷ་ཡུལ་གླིང་སྐྱོད་གསོལ་མགྲོན་ཁང་གི་འཛུགས་སྐྲུན་བྱས་ཚུལ་ལ་རྟོག་ཞིབ་གནང་སྟེ་ཁོང་གིས་ལྷ་ས་གནས་མཆོག་ལྷ་ཡུལ་གླིང་སྐྱོད་གསོལ་མགྲོན་ཁང་གི་རྣམ་གྲངས་བསྐྲུན་རྗེས་ལྷ་ས་དང་ཐ་ན་བོད་ཀྱི་སྤྲོ་གསེང་ཡུལ་སྐོར་ས་ཁོངས་འཛུགས་སྐྲུན་ཐད་རྒྱབ་སྐྱོར་ཐུབ་ཐོག་ས་ཁོངས་དཔལ་འབྱོར་འཕེལ་རྒྱས་ལ་སྐུལ་མ་གཏོང་ཐུབ་པ་མ་ཟད་ད་དུང་ལྷ་ས་འདི་ཉིད་རྒྱལ་སྤྱིའི་གྲགས་ཅན་གྲོང་ཁྱེར་དང་ཡུལ་སྐོར་གནས་མཆོག་ཏུ་སྐྲུན་ཆེད་དགེ་མཚན་ལྡན་པའི་སྐུལ་འདེད་ཀྱི་ནུས་པ་ཐོན་ངེས་རེད་ཅེས་གསུངས་པ་རེད།