ཟླ་3ཚེས་21ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་རང་སྐྱོང་ལྗོངས་སྤྱི་བདེ་ཐིང་བཀོད་འདོམས་ལྟེ་གནས་སུ་ཕེབས་ནས་ལས་རེས་མི་སྣར་བྱམས་བརྩེའི་ངང་གཟིགས་པ་མ་ཟད་སྙན་སེང་ཡང་གསན་གནང་ཞིང་། ཁོང་གིས་བརྟན་ལྷིང་འཕེལ་རྒྱས་ཡོང་རྒྱུ་གཅིག་འདོམས་བྱས་ཏེ་དེ་འགན་འཁྲི་ཨང་དང་པོ་ཡིན་པ་གསལ་པོ་ཡོང་བ་བྱེད་པ་དང་ལྷོད་གཡེང་སྤུ་ཙམ་མེད་པའི་ངང་བརྟན་ལྷིང་སྲུང་སྐྱོང་གི་བྱ་ཐབས་ཁག་དོན་འཁྱོལ་ཡོང་བའི་དམ་འཛིན་ཡག་པོ་བྱས་ཐོག་ལོ་ཧྲིལ་པོར་ལྗོངས་ཡོངས་ཀྱི་སྤྱི་ཚོགས་ཞི་མཐུན་བརྟན་ལྷིང་ཡོང་རྒྱུའི་འགན་ལེན་བྱེད་དགོས་པའི་ནན་བཤད་གནང་བ་རེད།

    རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་ལྗོངས་ཏང་ཨུད་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཧའོ་ཕུང་གིས་སྙན་སེང་ཚོགས་འདུ་གཙོ་སྐྱོང་གནང་བ་དང་མགོན་པོ་བཀྲ་ཤིས་དང་། ཏུང་ཡུན་ཧུའུ། མོང་ཏེ་ལི། ལི་ཀྲའོ། སུང་ཅིང་ཡོན། དབང་ཤང་ཧྭ། ཨོ་ལོ་བུ་ཆུང་། ཁྱུང་སྲས། དབྱང་ཧྲོང་ཅུས། ཀའོ་དབྱང་བཅས་ཕེབས་ཡོད་པ་རེད།

    བཀོད་འདོམས་ལྟེ་གནས་ཀྱི་ཚོགས་ཆེན་དུ་པད་མ་འཕྲིན་ལས་ཀྱིས་ལས་དོན་སྒྲུབ་བཞིན་པའི་མི་སྣ་རེ་རེ་དང་ཕྱག་བཏང་གནང་བ་མ་ཟད་རང་སྐྱོང་ལྗོངས་ཏང་ཨུད་དང་སྲིད་གཞུང་དང་དེ་བཞིན་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོའི་ཚབ་ཞུས་ནས་ལྗོངས་ཡོངས་ཀྱི་བརྟན་ལྷིང་སྲུང་སྐྱོང་གི་འཐབ་ས་མདུན་མར་ལས་གནས་བརྟན་སྲུང་བྱེད་མཁན་རྒྱ་ཆེའི་དཔོན་དམག་དང་སྲིད་ཁྲིམས་ལས་བྱེད་ཉེན་རྟོག་པ་དང་། ལྗོངས་ཡོངས་ཀྱི་བརྟན་ལྷིང་སྲུང་སྐྱོང་གི་འཐབ་ས་མདུན་མར་འབད་འཐབ་བྱེད་མཁན་རྒྱ་ཆེའི་ཏང་ཡོན་ལས་བྱེད་པ། བརྟན་ལྷིང་སྲུང་སྐྱོང་ལས་དོན་ནང་ཧུར་ཐག་ཞུགས་མཁན་དང་རྒྱབ་སྐྱོར་བྱེད་མཁན་ལྗོངས་ཡོངས་ཀྱི་མི་རིགས་ཁག་གི་མི་དམངས་བཅས་ལ་སྙིང་དབུས་ནས་ཐུགས་རྗེ་ཆེ་ཞུས་པ་དང་བླ་ན་མ་མཆིས་པའི་གུས་འདུད་ཀྱང་ཞུས་གནང་བ་རེད།

    དེ་གོང་སྐབས་ཤིག་རིང་རང་ལྗོངས་ཀྱི་སྤྱི་ཚོགས་བརྟན་ལྷིང་སྲུང་སྐྱོང་བྱེད་པའི་ལས་དོན་སྒྲུབ་ཚུལ་གྱི་ལི་ཀྲའོ་ཡི་སྙན་སེང་གསན་རྗེས་པད་མ་འཕྲིན་ལས་ཀྱིས་ཀྲུང་དབྱང་གི་མཐོང་ཆེན་དང་དེ་བཞིན་རང་སྐྱོང་ལྗོངས་ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་ལྗོངས་ཡོངས་ཀྱི་རྒྱ་ཆེའི་ཏང་ཡོན་ལས་བྱེད་པ་དང་ལྷག་དོན་དུ་བརྟན་ལྷིང་སྲུང་སྐྱོང་བྱེད་མཁན་སྲིད་ཁྲིམས་ཀྱི་ལས་བྱེད་ཉེན་རྟོག་པ་དང་ལས་སྒྲུབ་དཔུང་སྡེའི་དཔོན་དམག་ཚོས་བརྟན་ལྷིང་སྲུང་སྐྱོང་ལས་དོན་ཐད་ཧྲུའུ་ཅི་ཁྲེན་ཆོན་གོས་བཏོན་གནང་པའི་ཕྱོགས་ལྔའི་ཐད་ཀྱི་བླང་བྱ་ལག་བསྟར་དོན་འཁྱོལ་ཏན་ཏིག་བྱས་པ་དང་རང་སྐྱོང་ལྗོངས་ཀྱི་བརྟན་ལྷིང་སྲུང་སྐྱོང་ལས་དོན་གྱི་བཀོད་འདོམས་པུའི་བཀོད་སྒྲིག་རབ་དང་རིམ་པ་ལྟར་ཁྱོན་ཡོངས་སྐུལ་སློང་དང་། དོགས་ཟོན་ཆེར་བསྐྱེད། ཕྱར་བ་གྲུ་འདེགས། འགག་སྒྲོལ་དཀའ་སེལ་བཅས་བྱས་པ་ལས་ཟླ་བ་གསུམ་པའི་ཚོར་སྣང་སྐྱེན་པོའི་དུས་དང་རྒྱལ་ཡོངས་ཀྱི་ཚོགས་འདུ་གཉིས་རིང་བོད་དུ་གནད་དོན་ཆེ་འབྲིང་ཆུང་གསུམ་གང་རུང་མི་ཐོན་པའི་འགན་ལེན་བྱས་ཐོག་རྒྱལ་ཁབ་ཀྱི་བརྟན་ལྷིང་སྲུང་སྐྱོང་བྱ་ཕྱིར་ལེགས་སྐྱེས་གལ་ཆེན་ཕུལ་ཡོད་ཅེས་གསུངས་པ་རེད།

    པད་མ་འཕྲིན་ལས་ཀྱིས་ལྗོངས་ཡོངས་ཀྱི་རིམ་ཁག་ཏང་སྲིད་རྩ་འཛུགས་ཀྱིས་འཕེལ་རྒྱས་དང་བརྟན་ལྷིང་ཡོང་རྒྱུ་གཅིག་གྱུར་འཆར་འགོད་བྱེད་པ་དང་འགན་འཁྲི་ཨང་དང་པོ་ཡིན་པ་གསལ་པོ་ཡོང་བ་བྱས་ནས་སྤྱི་ཚོགས་བརྟན་ལྷིང་སྲུང་སྐྱོང་གི་ལས་དོན་ཁག་ཡག་པོ་སྒྲུབ་དགོས། དེང་སྐབས་བརྟན་ལྷིང་སྲུང་སྐྱོང་གི་ལས་དོན་ལ་འཕྲད་པའི་དུས་བབ་ཪྙོག་འཛིང་ཆེ་ཞིང་ཛ་དྲག་པོ་ཡིན་པར་ངོས་འཛིན་གསལ་པོ་བྱས་ཏེ་སྔ་བར་ཕྱི་གསུམ་དུ་རིག་པ་དྭངས་གསལ་ཡོང་བ་བྱས་ནས་ཏཱ་ལའི་རུ་ཚོགས་དང་འཐབ་རྩོད་བྱེད་པའི་སྲ་བརྟན་རང་བཞིན་དང་། རང་རྟོགས་རང་བཞིན། རང་འགུལ་རང་བཞིན་བཅས་སྔར་བས་ཆེ་རུ་བཏང་ཐོག་མཐོང་ཆེན་བྱེད་པ་དང་། ཡུན་རིང་ཉེན་བརྡ་གཏོང་བ། མ་བྱུང་སྔོན་འགོག་དང་། དོགས་ཟོན་ཆེར་བསྐྱེད་བྱེད་པ་བཅས་བྱེད་དགོས། ནང་དམ་ཕྱི་ལྷུག་བྱ་རྒྱུ་མཐའ་འཁྱོངས་ཀྱིས “བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་པའི་དྲན་གསོའི་ཉིན་མོ 3.28”ཀྱི་དྲན་གསོའི་བྱེད་སྒོ་སྒྲིག་འཛུགས་ཏན་ཏིག་བྱས་ཏེ་གཟབ་རྒྱས་ཤིག་སྤེལ་དགོས་ལ་བདེ་འཇགས་ཞི་མཐུན་ཡང་ཡོང་ཐབས་བྱེད་དགོས། ལས་དོན་སྒྲུབ་ཤུགས་རྒྱུན་ཆད་མེད་པར་ཆེ་རུ་བཏང་ནས་དགོན་སྡེ་དོ་དམ་བྱེད་པའི་ལས་དོན་ཁག་ལ་ཤུགས་སྣོན་རྒྱག་པ་དང་དེ་གསར་གཏོད་བྱས་ནས་འགལ་བ་དང་རྩོད་གཞི་གྲལ་བཤེར་དང་སེལ་རྒྱུར་ཤུགས་སྣོན་རྒྱག་པ་དང་འཕྲལ་དུ་མི་མངོན་པའི་རྐྱེན་ངན་སྣ་ཚོགས་སེལ་ནས་སྤྱི་ཚོགས་བརྟན་ལྷིང་སྲུང་སྐྱོང་བྱེད་པའི་བྱ་ཐབས་ཁག་ཞིབ་ཕྲ་བཟོས་ནས་སྤྱི་ཚོགས་བརྟན་ལྷིང་སྲུང་སྐྱོང་ཧུར་ཐག་བྱེད་དགོས། རང་སྐྱོང་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་ལྟར་ཏང་སྲིད་དམག་ཉེན་དམངས་བཅས་ཀྱི་མཉམ་འགོག་བྱ་སྤྱོད་དང་། ཆོས་ལུགས་ཁྱབ་ཁོངས་བརྟན་ལྷིང་སྲུང་སྐྱོང་བྱེད་པ། སློབ་གསོའི་ཁོངས་གཏོགས་དོ་དམ་བྱེད་པ། སྤྱི་ཚོགས་ཀྱི་འགལ་བ་གྲལ་བཤེར་བྱེད་པ། བརྟན་ལྷིང་སྲུང་སྐྱོང་གི་འགན་འཁྲི་བདའ་འདེད་གཏོང་བ། བྱ་དགའ་ཆད་གཅོད་བྱེད་པ་སོགས་ཀྱི་ལམ་སྲོལ་མཐའ་འཁྱོངས་དང་འཐུས་ཚང་དུ་བཏང་ནས་བརྟན་ལྷིང་སྲུང་སྐྱོང་གི་ལས་དོན་སྒྲུབ་པའི་ཆུ་ཚད་རྒྱུན་ཆད་མེད་པར་མཐོ་རུ་བཏང་ཐོག “གནད་དོན་ཆེན་པོ་མི་ཐོན་པ་བྱེད་དགོས་ལ་གནད་དོན་འབྲིང་བ་ཡང་མི་ཐོན་པ་བྱེད་དགོས་པ་དང་། གནད་དོན་ཆུང་ངུ་ཡང་མི་ཐོན་པའི་བརྩོན་ལེན་བྱེད་དགོས ”པའི་དམིགས་ཚད་སྒྲུབ་རྒྱུའི་འབད་བརྩོན་བྱེད་དགོས། རིམ་ཁག་ཏང་སྲིད་རྩ་འཛུགས་ཀྱིས་རང་སྐྱོང་ལྗོངས་ཀྱིས་བཟོས་པའི་དམངས་ཕན་སྲིད་ཇུས་རབ་དང་རིམ་པ་དོན་འཁྱོལ་ཏན་ཏིག་དང་དྲིལ་བསྒྲགས་ཤུགས་ཆེན་བྱས་ཏེ་མང་ཚོགས་ཀྱི་དོན་དུ་བྱ་བ་ངོ་མ་སྒྲུབ་པ་དང་དཀའ་གནད་སེལ་རོགས་བྱས་ནས་སྤྱི་ཚོགས་བརྟན་ལྷིང་སྲུང་སྐྱོང་བྱེད་པའི་མང་ཚོགས་ཀྱི་རྨང་གཞི་བརྟན་དུ་གཏོང་དགོས། དཔྱིད་དུས་ཞིང་འབྲོག་ཐོན་སྐྱེད་དང་གཙོ་གནད་རྣམ་གྲངས་འཛུགས་སྐྲུན་སོགས་ཀྱི་ལས་དོན་དམ་འཛིན་ཏན་ཏིག་བྱེད་པ་དང་བདེ་འཇགས་ཐོན་སྐྱེད་ལ་མཐོང་ཆེན་བྱས་ཏེ་འགྲིམ་འགྲུལ་དང་མེ་ཟོན་བདེ་འཇགས་ཐད་ཀྱི་མི་མངོན་པའི་རྐྱེན་ངན་གྲལ་བཤེར་སོགས་ཀྱི་ལས་དོན་ལ་མཐོང་ཆེན་བྱས་ནས་སྤྱི་པའི་བདེ་འཇགས་ཀྱི་ལས་འཛོལ་ཚབས་ཆེན་མི་ཐོན་པའི་འགན་ལེན་བྱས་ཏེ་རང་ལྗོངས་ཀྱི་ཞི་མཐུན་བརྟན་ལྷིང་ཆེད་འགན་ལེན་ནུས་ལྡན་བྱེད་པ་དང་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གཡུར་ཟའི་གྲུབ་འབྲས་ལ་བརྟེན་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་པའི་ནན་བཤད་གནང་བ་རེད།