ཟླ་3ཚེས་18ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཧའོ་ཕུང་གིས་དྲག་ཆས་ཉེན་རྟོག་དཔུང་སྡེའི་རྒྱབ་ཕྱོགས་མཁོ་སྒྲུབ་པུའི་པུའུ་ཀྲང་ཧྲའོ་ཅང་དབྱང་ཧྲེ་ཝུའུ་བཅས་པ་དང་མཇལ་འཛོམས་གནང་བ་རེད།
རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དྲུང་ཆེ་ཏེང་ཞའོ་ཀང་ལྷན་དུ་ཕེབས་ཡོད།
དང་ཐོག་ཧའོ་ཕུང་གིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ཧྲའོ་ཅང་དབྱང་ཧྲེ་ཝུའུ་བོད་དུ་རྟོག་ཞིབ་མཛུབ་ཁྲིད་གནང་བར་ཕེབས་པར་དགའ་བསུ་ཞུས་པ་དང་འབྲེལ་དྲག་ཆས་ཉེན་རྟོག་དཔུང་སྡེའི་རྒྱབ་ཕྱོགས་མཁོ་སྒྲུབ་པུས་བོད་ཀྱི་འཕེལ་རྒྱས་དང་བརྟན་ལྷིང་གི་བྱ་གཞག་ཁག་ལ་ཐུགས་ཁུར་དང་རྒྱབ་སྐྱོར་ཡུན་རིང་གནང་བར་ཐུགས་རྗེ་ཆེ་ཡང་ཞུས་པ་རེད། ཉེ་བའི་ལོ་ཤས་རིང་དང་ལྷག་པར་དུ་འདི་ལོ་ཤར་ཚུན་ཁ་ཕྲལ་སྟོབས་ཤུགས་ཀྱིས་བོད་ནང་ཟང་ཟིང་བཟོ་རྒྱུའི་ངན་ཇུས་བཤམས་པའི་ཪྙོག་འཛིང་གི་དུས་བབ་མདུན་དུ་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ལྗོངས་ཡོངས་ཀྱི་མི་རིགས་ཁག་གི་མི་དམངས་ཀྱི་སྣེ་འཁྲིད་དེ་སེམས་ནུས་མཉམ་འདོན་དང་ཀུན་སེམས་གཅིག་སྒྲིལ་ཡོང་བ་བྱས་པ་དང་། དམག་ཉེན་དམངས་གསུམ་གྱིས་མཉམ་འགོག་མཉམ་བཅོས་བྱ་རྒྱུར་ཤུགས་སྣོན་ཟམ་མི་ཆད་པར་བརྒྱབ་པ། གཙོ་གནད་ས་ཁུལ་དང་ས་ཁོངས་ཀྱི་དོ་དམ་ཚོད་འཛིན་བྱེད་ཤུགས་ཆེ་རུ་བཏང་བ་བཅས་ཀྱིས་ལྗོངས་ཡོངས་སུ་བྱ་བ་ཆེ་འབྲིང་མི་ཐོན་པ་དང་ཆུང་ངུ་ཡང་མི་ཐོན་པ་བྱས་ཡོད། གྲུབ་འབྲས་འདི་ལྟ་བུ་ཐོབ་པ་ནི་ཀྲུང་དབྱང་གིས་བོད་ཀྱི་ལས་དོན་ལ་མཐོང་ཧ་ཅང་ཆེན་པོ་གནང་བ་དང་། ལྗོངས་ཡོངས་ཀྱི་གོང་འོག་ཚང་མས “བརྟན་ལྷིང་ནི་ཐམས་ཅད་ལས་ལྷག་པའི ”བསམ་བློའི་ངོས་འཛིན་ཚད་མཐོའི་གཅིག་གྱུར་བྱུང་བ། ལྗོངས་ཡོངས་ཀྱི་མི་རིགས་ཁག་གི་མི་དམངས་མང་ཚོགས་ཀྱིས “མཐུན་སྒྲིལ་བརྟན་ལྷིང་ནི་བདེ་སྐྱིད་དང་། ཁ་ཕྲལ་ཟང་ཟིང་ནི་ཆག་སྒོ་ཡིན ”པར་ཚད་མཐོའི་ངོས་འཛིན་གཅིག་མཐུན་བྱས་པ་བཅས་ལས་བྱུང་བ་ཞིག་ཡིན་ལ་ལྷག་པར་དུ་དྲག་ཆས་ཉེན་རྟོག་དཔུང་སྡེའི་སྤྱི་ཁྱབ་པུའུ་ཡི་ཤུགས་ཆེའི་རྒྱབ་སྐྱོར་དང་མཛུབ་ཁྲིད་འོག་བོད་སྡོད་དྲག་ཆས་ཉེན་རྟོག་དཔུང་སྡེའི་རྒྱ་ཆེའི་ལས་སྒྲུབ་དཔོན་དམག་གིས་ཆབ་སྲིད་ལ་སྣང་ཆེན་དང་ཁྱོན་ཡོངས་ལ་དམིགས་ནས་བརྟན་ལྷིང་སྲུང་སྐྱོང་གི་བྱ་ཐབས་ཁག་དོན་འཁྱོལ་ཇི་བཞིན་བསྟར་བ་དང་། གྲ་སྒྲིག་ཨང་གསར། རང་འགན་གཙང་སྒྲུབ་བཅས་ཐོག་ནས་རང་ལྗོངས་ཀྱི་སྤྱི་ཚོགས་དང་ཞི་མཐུན་བརྟན་ལྷིང་སྲུང་སྐྱོང་ཆེད་དམིགས་བསལ་གྱི་ནུས་པ་བཏོན་པར་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས།
དབྱང་ཧྲེ་ཝུའུ་ཡིས་ད་རེས་བོད་དུ་རྟོག་ཞིབ་བྱེད་པར་ཡོང་བའི་གཙོ་བོའི་ལས་ཀའི་ནང་དོན་ངོ་སྤྲོད་མདོར་བསྡུས་ཤིག་གནང་བ་དང་འབྲེལ་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་བོད་སྡོད་དྲག་ཆས་ཉེན་རྟོག་དཔུང་སྡེའི་ལས་དོན་ཁག་ལ་སྔ་བར་ཕྱི་བར་གསུམ་དུ་མཐོང་ཆེན་དང་། སེམས་ཁུར། རྒྱབ་སྐྱོར་བཅས་གནང་བར་ཐུགས་རྗེ་ཆེ་ཞུས་པ་མ་ཟད། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་གི་འཛུགས་སྐྲུན་ལས་དོན་ཁག་ལ་མུ་མཐུད་ཐུགས་ཁུར་དང་རྒྱབ་སྐྱོར་གནང་རོགས་ཀྱང་ཞུས་པ་རེད།