ཟླ་3ཚེས་12དང་13ཉིན་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཝུའུ་དབྱིང་ཅེས་ལྷ་སར་རང་སྐྱོང་ལྗོངས་ཀྱི་མཐོ་སློབ་སློབ་ཐོན་སློབ་མའི་ལས་ཞུགས་ལམ་ལུགས་སྒྱུར་བཅོས་མཐུན་སྦྱོར་ལས་དོན་འགོ་ཁྲིད་ཚོགས་ཆུང་གི་ཚོགས་འདུ་གཙོ་སྐྱོང་དང་སྐོང་འཚོགས་གནང་ཞིང་། ཁོང་གིས་སྐྱེ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མ་ཚང་མ་ལས་ཞུགས་ཐུབ་རྒྱུའི་སྲིད་ཇུས་ལས་དོན་ལ་དམིགས་ནས “ལས་ཞུགས་གཅིག་ཀྱང་མེད་པའི་ཁྱིམ་ཚང ”ལས་ཞུགས་ཐུབ་པ་དང་མི་སེར་གྱི་སེམས་ཁྲལ་སེལ་དགོས་པའི་ནན་བཤད་གནང་བ་རེད།

    རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་མོང་ཏེ་ལི་ཚོགས་འདུར་ཕེབས་ཡོད་པ་རེད།

    ཝུའུ་དབྱིང་ཅེས་སྐྱེ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མའི་ལས་ཞུགས་ཀྱི་གནད་དོན་ཐག་གཅོད་ཡག་པོ་བྱ་རྒྱུ་དེ་ནི་བོད་ཀྱི་དམངས་འཚོའི་གནད་དོན་གལ་ཆེན་ཞིག་རེད། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་དང་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་ལ་ཧ་ཅང་ཐུགས་ཁུར་དང་མཐོང་ཆེན་གནང་ནས་རང་ལྗོངས་ཀྱི་མཐོ་སློབ་སློབ་ཐོན་སློབ་མ་ཚང་མ་ལས་ཞུགས་ཐུབ་པ་བྱེད་དགོས་པའི་བླང་བྱ་བཏོན་པ་དང་འབྲེལ་ཞིབ་ཕྲའི་ལས་དོན་ཁག་ཡག་པོ་སྒྲུབ་རྒྱུའི་ཐད་མཆན་བཀོད་མཛུབ་སྟོན་གལ་ཆེན་ཐེངས་མང་གནང་བ་དེ་ཐོག་ནས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་རང་ལྗོངས་ཀྱི་མཐོ་སློབ་སློབ་ཐོན་སློབ་མར་ཐུགས་ཁུར་དང་དགའ་གཅེས་གནང་བ་མཚོན་ཡོད། སྐྱེ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མ་ཚང་མ་ལས་ཞུགས་ཐུབ་པ་བྱ་རྒྱུ་དེ་ནི་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་གཟབ་ནན་ངང་ཞིབ་འཇུག་དང་གཏན་འབེབས་བྱས་པའི་དམངས་འཚོའི་ལས་དོན་ཞིག་ཡིན་པས་རྒྱ་ཆེའི་མང་ཚོགས་ཀྱི་བརྩི་བཀུར་ཐོབ་པ་དང་མཐོ་སློབ་སློབ་ཐོན་སློབ་མས་དང་ལེན་ཞུས་ཡོད། 2011ལོར་མཐོ་སློབ་སློབ་ཐོན་སློབ་མའི་ལས་ཞུགས་སྒྱུར་བཅོས་འགོ་ཁྲིད་ཚོགས་ཆུང་གི་འགོ་ཁྲིད་འོག་དང་སྡེ་ཚན་ཁག་གིས་ལས་དོན་ཧུར་ཐག་བསྒྲུབས་པའི་འོག་རང་ལྗོངས་ཀྱི་ས་གནས་ཁག་གིས་རོགས་རམ་དང་སྐུལ་ལྕག་གི་བྱེད་ཐབས་སྣ་ཚོགས་བཏོན་ནས་སློབ་ཆེན་སློབ་མའི་ལས་ཞུགས་དང་ལས་སྐྲུན་ལ་སྐུལ་འདེད་བཏང་བ་དང་གཞུང་ཞབས་མི་སྣའི་ལས་གནས་མང་དུ་བཏང་བ་དང་། སྤྱི་ཕན་རང་བཞིན་གྱི་ལས་གནས་ཉོ་བ། ཁེ་ལས་ཀྱིས་མི་སྣ་བསྡུ་བའི་ནུས་པ་ཆེ་རུ་བཏང་བ། ལས་ཞུགས་བོད་སྐྱོར་གྱི་ལེགས་ཆ་འདོན་སྤེལ་བྱས་པ། མཐོ་སློབ་སློབ་ཐོན་སློབ་མས་ལས་ཞུགས་འདུ་ཤེས་བརྗེ་རྒྱུར་ཁྲིད་སྟོན་བཅས་བྱས་པར་བརྟེན་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་ལ་གྲུབ་འབྲས་མངོན་གསལ་དོད་པོ་ཐོབ་ཡོད་ལ་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དོན་དེར་གདེང་འཇོག་གང་ལེགས་བྱས་ཡོད་ཅེས་གསུངས་པ་རེད། ཝུའུ་དབྱིང་ཅེས་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་དེ་དམངས་འཚོ་འགན་ལེན་དང་ལེགས་སུ་གཏོང་རྒྱུ་དང་སློབ་གསོ་དང་དཔལ་འབྱོར་དང་སྤྱི་ཚོགས་མཐུན་སྦྱོར་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་བའི་ཐད་གལ་འགངས་ཆེ་བའི་དོན་སྙིང་ལྡན་ཡོད། ལྗོངས་ཡོངས་ཀྱི་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་ཡག་པོ་སྒྲུབ་རྒྱུ་དེ་རང་ལྗོངས་ཀྱི་སྒྱུར་འཕེལ་བརྟན་གསུམ་གྱི་སྤྱི་ཡོངས་དང་འབྲེལ་བ་ཡོད་པ་དང་ཁྱིམ་ཚང་ཁྲི་སྟོང་མང་པོའི་ཁེ་ཕན་དང་ཡང་འབྲེལ་བ་ཡོད་པས་དེ་ནི་རང་ལྗོངས་ཀྱི་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བ་དང་། སྤྱི་ཚོགས་དུས་བབ་བརྟན་ལྷིང་སྲུང་སྐྱོང་བྱེད་པ། ཞི་མཐུན་སྤྱི་ཚོགས་བསྐྲུན་པ་བཅས་ཀྱི་དོན་ཆེན་ཞིག་ཡིན། སྡེ་ཚན་ཁག་གིས་ཏང་དང་མི་དམངས་ལ་ཚད་མཐོའི་འགན་འཁུར་བའི་རྣམ་འགྱུར་གྱི་ཐོག་ནས་སྐྱེ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མ་ཚང་མ་ལས་ཞུགས་ཐུབ་རྒྱུའི་སྲིད་ཇུས་ལས་དོན་ལ་དམིགས་ཏེ་འདི་ལོའི་ལས་དོན་དམ་འཛིན་ཡག་པོ་དང་དོན་འཁྱོལ་བྱ་རྒྱུར་དམ་འཛིན་བྱེད་པ་དང་། མི་མངོན་པའི་སྟོབས་ཤུགས་སྔོག་འདོན་བྱས་ཏེ་ལས་ཞུགས་ཀྱི་ལས་གནས་གང་ཐུབ་ཅི་ཐུབ་ཀྱིས་མང་དུ་གཏོང་བ་དང་ལས་ཞུགས་ཀྱི་གོ་སྐབས་གཏོད་དེ་སྐྱེ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མ་ཚང་མ་ལས་ཞུགས་ཐུབ་པ་དང་། “ལས་ཞུགས་གཅིག་ཀྱང་མེད་པའི་ཁྱིམ་ཚང ”ལས་ཞུགས་ཐུབ་པ། མི་སེར་གྱི་སེམས་ཁྲལ་སེལ་བ་བཅས་བྱས་ཏེ་བོད་ཀྱི་དཔལ་འབྱོར་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཆེད་སྟོབས་ཤུགས་ལེགས་སྐྱེས་སུ་ཕུལ་བ། སྐྱེ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མ་ཚང་མ་ལས་ཞུགས་ཐུབ་པ་བྱེད་པའི་སྲིད་ཇུས་ལ་གོ་བ་ཡང་དག་ལེན་རྒྱུ་སྟངས་འཛིན་བྱེད་པ་དང་སློབ་མ་དང་ཁྱིམ་བདག་གི་འབྲེལ་ཡོད་ལས་དོན་ཡག་པོ་བསྒྲུབས་ནས་དེ་བས་རྒྱ་ཆེ་བའི་བར་མཐོངས་སུ་སློབ་མ་རང་ཉིད་ཀྱི་འཇོན་ཐང་མངོན་པ་བྱེད་པ། རྒྱལ་ཁབ་ཀྱི་གཞུང་ལས་པའི་རྒྱུགས་བསྡུའི་སྲིད་ཇུས་མཐའ་འཁྱོངས་ནན་པོ་བྱེད་པ་དང་འབྲེལ་དེ་ཡི་རྨང་གཞིའི་ཐོག་བོད་ཀྱི་དོན་དངོས་དང་བསྟུན་ནས་རྒྱུགས་བསྡུའི་གོ་རིམ་སྟབས་བདེ་རུ་བཏང་སྟེ་མཐོ་སློབ་སློབ་ཐོན་སློབ་མའི་ཁུར་པོ་ཡང་དུ་གཏོང་བ་དང་འབྲེལ་མི་སེམས་ལ་ཟུག་པ་དང་དམངས་ཀྱི་འདོད་བློ་དང་མཐུན་པའི་བྱ་བ་བཟང་པོ་དེ་ཡག་པོ་སྒྲུབ་པ། “གཞུང་དྲང་དང་། དྲང་བཞག མངོན་གསལ ”བཅས་ཀྱི་རྩ་དོན་ལ་བསྟུན་ནས་རྒྱུགས་བསྡུའི་སྒྲིག་ཁྲིམས་ནན་དུ་གཏོང་བ་དང་སྐྱེ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མ་ཚང་མ་ལས་ཞུགས་ཐུབ་པའི་གནད་དོན་ཐག་གཅོད་བྱེད་པ་དང་ཆབས་ཅིག་རང་ལྗོངས་ཀྱི་ལས་ཁུངས་ཚན་པ་ཁག་དང་གཞི་རིམ་གྱི་འཐབ་ཕྱོགས་དང་པོར་ཕུལ་བྱུང་ཤེས་ལྡན་པའི་དཔུང་ཁག་ཕུན་སུམ་ཇེ་ཚོགས་སུ་གཏོང་བ་བཅས་བྱེད་དགོས་པའི་ནན་བཤད་གནང་བ་རེད།

    མཇུག་ཏུ་ཝུའུ་དབྱིང་ཅེས་སྐྱེ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མ་ཚང་མ་ལས་ཞུགས་ཐུབ་པའི་ལས་དོན་དྲིལ་བསྒྲགས་བྱེད་ཤུགས་ཆེ་རུ་གཏོང་བ་དང་མཐོ་སློབ་སློབ་ཐོན་སློབ་མས་ལས་ཞུགས་ཀྱི་འདུ་ཤེས་བརྗེ་རྒྱུར་སློབ་གསོ་གཏོང་བ་དང་ཁྲིད་སྟོན་བྱེད་པ་དང་དུས་མཚུངས་རྒྱ་ཆེའི་མང་ཚོགས་ཚོས་སྐྱེ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མ་ཚང་མ་ལས་ཞུགས་ཐུབ་པའི་སྲིད་ཇུས་དང་དེ་མིན་གྱི་དམངས་ཕྱུག་དམངས་ཕན་སྲིད་ཇུས་ཤེས་རྟོགས་ཐུབ་པ་བྱས་ཏེ་བོད་ཀྱི་མི་སེར་གྱིས་བློ་གཅིག་སེམས་གཅིག་ངང་ཏང་གི་རྗེས་སུ་འབྲངས་རྒྱུའི་ཆོད་སེམས་དེ་བས་བརྟན་དུ་གཏོང་དགོས་ཞེས་ནན་བཤད་གནང་བ་རེད།