ཟླ་2ཚེས་29ཉིན་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་ཉེ་དུས་ཀྱི་བརྟན་ལྷིང་སྲུང་སྐྱོང་ལས་དོན་ཡག་པོ་བསྒྲུབ་རྒྱུའི་ཐད་མཆན་བཀོད་མཛུབ་སྟོན་གནང་བ་དང་། ཁོང་གིས་སྔ་ཙམ་དམ་འཛིན་དང་། ཆུང་ས་ནས་དམ་འཛིན། དམ་འཛིན་མྱུར་པོ། དམ་འཛིན་ཡག་པོ་བཅས་བྱ་རྒྱུ་མཐའ་འཁྱོངས་ཀྱིས་བརྟན་ལྷིང་སྲུང་སྐྱོང་གི་ལས་དོན་ཁག་སྔར་བས་གཏིང་ཟབ་དང་ཞིབ་ཚགས། ཏན་ཏིག་ཡག་པོ་བཅས་བསྒྲུབས་ཏེ་རྒྱལ་ཡོངས་ཀྱི་ཚོགས་འདུ་གཉིས་རྒྱལ་ཁའི་ངང་འཚོག་རྒྱུར་ཁོར་ཡུག་བཟང་པོ་ཞིག་གཏོད་དགོས་པའི་བླང་བྱ་བཏོན་གནང་བ་རེད།

    ཁྲེན་ཆོན་གོའི་མཆན་བཀོད་མཛུབ་སྟོན་ནང་འདི་ལོ་ཤར་ཚུན་ལྗོངས་ཡོངས་ཀྱི་རིམ་ཁག་ཏང་ཨུད་དང་སྲིད་གཞུང་དང་། ལྷག་པར་དུ་རིམ་ཁག་བརྟན་ལྷིང་སྲུང་སྐྱོང་ལས་དོན་ཚན་ཁག་དང་། སྲིད་ཁྲིམས་ལས་ཁུངས། བོད་སྡོད་མི་དམངས་བཅིངས་འགྲོལ་དམག དྲག་ཆས་ཉེན་རྟོག་དང་སྤྱི་བདེའི་དངོས་ཞབས་དཔུང་སྡེ་བཅས་ཀྱིས་སྤྱི་ཁྱབ་ཧྲུའུ་ཅི་ཧུའུ་ཅིན་ཐའོ་ཡི “བདུན་གཅིག ”གི་གལ་ཆེའི་གསུང་བཤད་དང་བོད་ཀྱི་ལས་དོན་སྐོར་གྱི་གལ་ཆེའི་མཛུབ་སྟོན་རབ་དང་རིམ་པའི་དགོངས་དོན་ལག་བསྟན་དོན་འཁྱོལ་ནན་ཏན་བྱས་པ་དང་། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ་དང་ཀྲུའུ་ཞི་གཞོན་པ་ཞིས་ཅིན་ཕིང་བོད་ཞི་བས་བཅིངས་འགྲོལ་བཏང་ནས་ལོ་ངོ་60འཁོར་བའི་རྟེན་འབྲེལ་མཛད་སྒོར་ཞུགས་རིང་གི་གལ་ཆེའི་གསུང་བཤད་རབ་དང་རིམ་པའི་དགོངས་དོན་ལག་བསྟར་དོན་འཁྱོལ་བྱས་ནས་བློ་མཐུན་ཧུའུ་ཅིན་ཐའོ་ཡིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གིས་གསལ་སྟོན་གནང་བའི “ལྟེ་བ་གཅིག ”དང་། “དོན་ཆེན་གཉིས ” “འགན་ལེན་བཞི ”བཅས་ལ་དམ་པོར་དམིགས་པའི་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་གི་བརྟན་ལྷིང་སྲུང་སྐྱོང་ཐད་ཀྱི་བྱེད་ཐབས་ཁག་ཕྱོགས་ཡོངས་ནས་དོན་འཁྱོལ་གྱིས་སྔ་ཙམ་དམ་འཛིན་བྱེད་པ་དང་། ཆུང་ས་ནས་དམ་འཛིན། དམ་འཛིན་མྱུར་པོ། དམ་འཛིན་ལེགས་པོ་བཅས་བྱེད་རྒྱུ་མཐའ་འཁྱོངས་བྱས་ནས་བཀོད་སྒྲིག་ཞིབ་ཚགས་དང་། ལས་འགན་གཙང་སྒྲུབ། ནུས་ཤུགས་ཡོད་རྒུ་འདོན་པ་བཅས་བྱས་པས་གནད་དོན་ཆེན་པོ་མི་ཐོན་པ་བྱེད་དགོས་ལ་གནད་དོན་འབྲིང་བ་ཡང་མི་ཐོན་པ་བྱེད་དགོས་པ་དང་། གནད་དོན་ཆུང་ངུ་ཡང་མི་ཐོན་པ་བྱེད་ཐུབ་པ་བྱུང་ཡོད། ལྗོངས་ཡོངས་ཀྱི་རྒྱ་ཆེའི་ཏང་ཡོན་ལས་བྱེད་པ་དང་ལྷག་དོན་དུ་སྲིད་ཁྲིམས་ཁོངས་གཏོགས་ཀྱི་བརྟན་ལྷིང་སྲུང་སྐྱོང་བྱེད་མཁན་ལས་བྱེད་པ་དང་ཉེན་རྟོག་པ་དང་ལས་འགན་སྒྲུབ་མཁན་དཔུང་སྡེའི་དཔོན་དམག་ཚོས་དུས་ཆེན་དང་གུང་གསེང་དང་དུས་ཐུང་གི་རེས་མོས་ངལ་གསོ་བློས་གཏོང་གིས་བསྟུད་མར་དམག་འཐབ་རྒྱག་པ་དང་ལས་གནས་བརྟན་སྲུང་བྱས་ཏེ་སེམས་ནུས་ཡོད་རྒུ་བརྟན་ལྷིང་སྲུང་སྐྱོང་གི་ལས་དོན་ནང་བཞག་སྟེ་སྡུག་བསྲན་ཁྱད་པར་ཐེག་པ་དང་། དམག་འཐབ་ཁྱད་པར་འཇོན་པ། བཟོད་བསྲན་ཁྱད་པར་ཐུབ་པ། མཐུན་སྒྲིལ་ཁྱད་པར་ཐུབ་པ། ལེགས་སྐྱེས་ཁྱད་པར་འབུལ་བ་བཅས་ཀྱི “བོད་སྐྱོད་པ་རྒན་གྲས་ཀྱི ”སྙིང་སྟོབས་དེ་བས་མངོན་པ་བྱས་ནས་ལྗོངས་ཡོངས་ཀྱི་སྤྱི་ཚོགས་ཞི་མཐུན་དང་བརྟན་ལྷིང་རྒྱུན་འཁྱོངས་བྱེད་ཆེད་ལེགས་སྐྱེས་ཕུལ་ཡོད་པས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ལྗོངས་ཡོངས་ཀྱི་རིམ་ཁག་སྡེ་ཚན་དང་རྒྱ་ཆེའི་ཏང་ཡོན་ལས་བྱེད་པ་ཚོར་སྙིང་དབུས་ནས་ཐུགས་རྗེ་ཆེ་ཞུ་རྒྱུ་དང་། བརྟན་ལྷིང་སྲུང་སྐྱོང་གི་འཐབ་ས་དང་པོར་ལས་ཀ་བྱེད་མཁན་རིམ་ཁག་བརྟན་ལྷིང་སྲུང་སྐྱོང་ཚན་ཁག་དང་། བརྟན་ལྷིང་སྲུང་སྐྱོང་བཀོད་འདོམས་པུའི་ཁོངས་མི། རྒྱ་ཆེའི་སྲིད་ཁྲིམས་ལས་བྱེད་པ་དང་ཉེན་རྟོག་པ། བོད་སྡོད་དཔུང་སྡེའི་བཀོད་འཐབ་པ། དྲག་ཆས་ཉེན་རྟོག་དང་སྤྱི་བདེའི་དངོས་ཞབས་དཔུང་སྡེའི་དཔོན་དམག་བཅས་ལ་སྙིང་དབུས་ནས་ཐུགས་རྗེ་ཞུ་རྒྱུ་དང་འབྲེལ་བླ་ན་མེད་པའི་གུས་འདུད་ཞུ་རྒྱུ་ཡིན། ཚང་མས་གྲུབ་འབྲས་ལ་གཅེས་སྤྲས་དང་ཡང་འབད་བསྐྱར་འབད་བྱས་ཏེ་ཏང་དང་མི་དམངས་ལ་ཚད་མཐོའི་འགན་འཁུར་བའི་སྙིང་སྟོབས་ཀྱི་ཐོག་ནས་བརྟན་ལྷིང་སྲུང་སྐྱོང་གི་ལས་དོན་ཁག་སྔར་བས་གཏིང་ཟབ། ཞིབ་ཚགས། ཏན་ཏིག་དང་ཡག་པོ་བཅས་བསྒྲུབས་ནས་བོད་ཀྱི་ཞི་མཐུན་བརྟན་ལྷིང་གི་རྣམ་པ་བཟང་པོ་སྲ་བརྟན་དང་འཕེལ་རྒྱས་གཏོང་རྒྱུའི་རེ་བ་ཡོད་ཅེས་མཛུབ་སྟོན་གནང་ཡོད་པ་རེད།

    དེའང་གཅིག་ནས་བརྟན་ལྷིང་སྲུང་སྐྱོང་གི་དོགས་ཟོན་བྱེད་ཤུགས་ཆེ་རུ་དང་སླར་ཡང་ཆེ་རུ་གཏོང་དགོས། མིག་སྔའི་བརྟན་ལྷིང་སྲུང་སྐྱོང་གི་ལས་དོན་ལ་འཕྲད་པའི་ཛ་དྲག་གི་དུས་བབ་ལ་ངོས་འཛིན་གང་ལེགས་ཐུབ་པ་བྱས་ཏེ་ཚད་མཐོའི་མཐོང་ཆེན་དང་ཉེན་ཟོན་དྲིལ་བརྡ་རྟག་ཏུ་སྒྲོག་པ་དང་མ་བྱུང་སྔོན་འགོག་དང་སྔོན་ནས་དོགས་ཟོན་བྱེད་པ་བཅས་དངོས་འབྲེལ་བྱེད་ཐུབ་པ་བྱེད་པ་དང་། བརྟན་ལྷིང་ནི་ཐམས་ཅད་ལས་ལྷག་པའི་བསམ་བློ་སྔར་བས་བརྟན་དུ་བཏང་ནས་དུས་དང་རྣམ་པ་ཀུན་ཏུ་རྩ་བ་ཡིན་པའི་བརྟན་ལྷིང་དེ་དམ་པོར་འཛིན་པ་དང་། འགན་འཁྲི་འཁུར་སེམས་དང་། དགོས་གཏུགས་ཀྱི་སེམས་པ། ཉམས་ཉེན་གྱི་སེམས་པ་བཅས་སྔར་བས་ཆེ་རུ་གཏོང་བ། བག་མེད་ལྷོད་གཡེང་གི་བསམ་བློ་ཁྱད་བསད་མཐར་ཕྱིན་པ་བཅས་བྱས་ཏེ་མིག་སྔའི་བརྟན་ལྷིང་སྲུང་སྐྱོང་གི་སྔོན་འགོག་ཚོད་འཛིན་ལས་དོན་ནུས་ཤུགས་ཡོད་རྒུས་ཡག་པོ་བསྒྲུབས་ནས་དགྲ་ཡའི་ཕྱོགས་གཏོགས་དང་ཏཱ་ལའི་རུ་ཚོགས་ཀྱིས་བོད་ཀྱི་བརྟན་ལྷིང་ལ་གཏོར་བཤིག་གཏོང་བ་དང་རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བའི་ལྐོག་གཡོ་ཐལ་བའི་རྡུལ་དུ་བརླགས་ཏེ་རྒྱལ་ཡོངས་ཀྱི་ཚོགས་འདུ་གཉིས་རྒྱལ་ཁའི་ངང་འཚོག་རྒྱུར་ཁོར་ཡུག་བཟང་པོ་ཞིག་གཏོད་དགོས་པ་དང་།

    གཉིས་ནས་བརྟན་ལྷིང་སྲུང་སྐྱོང་གི་འགན་འཁྲི་ནན་དུ་དང་སླར་ཡང་ནན་དུ་གཏོང་དགོས། ནུས་ཤུགས་ཡོད་རྒུ་འདོན་རྒྱུ་མཐའ་འཁྱོངས་ཀྱིས་རིམ་ཁག་ཏང་ཨུད་དང་སྲིད་གཞུང་དང་བརྟན་ལྷིང་སྲུང་སྐྱོང་ལས་དོན་ཚན་ཁག་དང་ལྷག་དོན་དུ་འགན་འཁུར་བློ་མཐུན་གཙོ་བོ་དང་ལས་བགོས་འགན་འཁུར་བློ་མཐུན་གྱིས་ལས་གནས་བརྟན་སྲུང་དང་རང་འགན་གཙང་སྒྲུབ་ཀྱིས་བརྟན་ལྷིང་སྲུང་སྐྱོང་བྱ་རྒྱུ་དེ་མིག་སྔའི་སྲོག་ཤིང་གི་ལས་འགན་དང་། ལས་དོན་ཨང་དང་པོ། འགན་འཁྲི་ཨང་དང་པོ་བཅས་ལ་བརྩིས་ནས་ཐམས་ཅད་བརྟན་ལྷིང་ལ་བསྟུན་པ་དང་ཐམས་ཅད་བརྟན་ལྷིང་ལ་ཞབས་འདེགས་ཞུ་ཐུབ་པ་བྱས་ཏེ་ཉིན་མཚན་བལྟོས་མེད་དུ་འགོ་ཁྲིད་ཀྱིས་ལས་རེས་བྱེད་པ་དང་ལས་སྣེ་ཁྲིད་ཐུབ་པའི་འགན་ལེན་བྱེད་པ་དང་། འགན་འཁྲི་ཁག་བགོས་བྱེད་རྒྱུ་དོན་འཁྱོལ་བྱེད་དགོས་པ་སྟེ། རང་སྐྱོང་ལྗོངས་ཀྱི་འགོ་ཁྲིད་ཀྱིས་ས་ཁུལ་དང་གྲོང་ཁྱེར་འགན་གཙང་ལེན་པ་དང་། ས་ཁུལ་རིམ་པའི་འགོ་ཁྲིད་ཀྱིས་རྫོང་འགན་གཙང་ལེན་པ། རྫོང་རིམ་པའི་འགོ་ཁྲིད་ཀྱིས་ཤང་འགན་གཙང་ལེན་པ། ཤང་རིམ་པའི་འགོ་ཁྲིད་ཀྱིས་གྲོང་ཚོ (ཡུལ་མི་ཨུ་ལྷན )འགན་གཙང་ལེན་པ་བཅས་ཀྱི་བརྟན་ལྷིང་སྲུང་སྐྱོང་ལས་དོན་གྱི་ལམ་སྲོལ་ཕྱོགས་ཡོངས་ནས་དོན་འཁྱོལ་གྱིས་གཤམ་འོག་ཏུ་གནས་སྡོད་བྱེད་པ་དང་། འཐབ་ཕྱོགས་དང་པོར་སྐྱོད་པ། ཞིབ་བཤེར་མཛུབ་ཁྲིད་བཅས་བྱས་ཏེ་གནད་དོན་ཤེས་འཕྲལ་དུས་ཐོག་ཏུ་ཐག་གཅོད་བྱེད་པ་དང་། ས་ཁོངས་དོ་དམ་ལ་ཤུགས་སྣོན་བརྒྱབ་ནས་ས་ཁུལ་ཁག་དང་། ཚན་པ་ཁག སྡེ་ཚན་ཁག་བཅས་ཀྱིས་ས་སྲུང་གི་འགན་འཁྲི་མཐའ་འཁྱོངས་ཀྱིས་ཕྱོགས་གཅིག་གི་དུས་བདེ་སྲུང་སྐྱོང་བྱེད་དགོས་པ་དང་། འགན་འཁུར་བློ་མཐུན་གཙོ་བོས་འགན་འཁྲི་ཨང་དང་པོའི་ལས་འགན་དངོས་འབྲེལ་ཡག་པོ་བསྒྲུབས་ཏེ་རང་ཉིད་ཀྱི་སྒོ་ཡག་པོ་སྲུང་བ་དང་། རང་ཉིད་ཀྱི་མིར་དོ་དམ་ཡག་པོ་བྱེད་པ། རང་ཉིད་ཀྱི་བྱ་བ་ཡག་པོ་སྒྲུབ་པ་བཅས་དངོས་འབྲེལ་བྱེད་ཐུབ་པ་བྱེད་པ། དགོངས་ཞུའི་ལམ་ལུགས་ནན་པོ་ཡོང་བ་བྱེད་དགོས་པ་སྟེ་ཉེ་དུས་ལས་བྱེད་པ་ཡོངས་རྫོགས་ཀྱིས་ངེས་པར་དུ་ལས་གནས་བརྟན་སྲུང་བྱེད་དགོས་པ་དང་རྩ་དོན་ཐོག་དགོངས་ཞུ་བྱེད་མི་ཆོག་ལ་ལས་གནས་ནས་རང་དགར་ཁ་དེ་བས་འབྲལ་མི་ཆོག

    གསུམ་ནས་བརྟན་ལྷིང་སྲུང་སྐྱོང་གི་སྒྲིག་ཁྲིམས་ནན་པོ་ཡོང་བ་དང་སླར་ཡང་ནན་པོ་ཡོང་བ་བྱེད་དགོས། མངོན་གསལ་དུ་བརྟག་དཔྱད་དང་མངོན་མེད་དུ་བརྟག་དཔྱད་བྱེད་རྒྱུ་ཟུང་འབྲེལ་དང་རྒྱུན་གཏན་གྱི་བརྟག་དཔྱད་དང་འཕྲལ་གྱི་བརྟག་དཔྱད་ཟུང་འབྲེལ་བྱེད་རྒྱུ་མཐའ་འཁྱོངས་ཀྱིས་བརྟན་ལྷིང་སྲུང་སྐྱོང་ལས་དོན་གྱི་ལྟ་ཞིབ་དང་འགན་འཁྲི་བདའ་འདེད་བྱེད་ཤུགས་ཆེ་རུ་བཏང་ནས་ལས་གནས་བརྟན་སྲུང་མི་བྱེད་པ་དང་། འགན་འཁྲི་མི་འཁུར་བ། འགན་འཛོལ་ཤོར་བ། ལས་ཀ་དོན་འཁྱོལ་མི་བྱེད་པ། བྱེད་ཐབས་གནད་ལ་མི་འཁེལ་བ། བརྟན་ལྷིང་ཐད་གནད་དོན་ཐོན་པ་བཅས་ལ་ཉེས་ཆད་དྲག་པོ་གཅོད་པ་ལས་གུ་ཡངས་གཏོང་རྒྱུ་མེད་པ་སྟེ། བྱས་རྗེས་ཆེན་པོ་གང་འདྲ་ཡོད་པ་དང་། རིམ་པ་གང་ཞིག་གི་ལས་བྱེད་པ་ཡིན་པ། དེ་སྔ་ལས་ཀ་ཡག་པོ་གང་འདྲ་ཡོད་རུང་ཚང་མ་སྔོན་ལ་རང་སར་གོ་གནས་མེད་པ་བཟོས་རྗེས་སྒྲིག་བཤེར་ལྟ་ཞིབ་དང་རྩ་འཛུགས་མི་དོན་སོགས་སྡེ་ཚན་ལ་བརྟག་དཔྱད་ཐག་གཅོད་བྱེད་རྒྱུར་རྩིས་སྤྲོད་པ་དང་སྦྲགས་ལྗོངས་ཡོངས་སུ་བརྡ་ཁྱབ་གཏོང་བ་དང་། རང་སྐྱོང་ལྗོངས་ཀྱི་གསར་འགྱུར་སྨྱན་སྦྱོར་ཐོག་ཡོངས་བསྒྲགས་བྱས་ཏེ་ལྕགས་ལྟར་གྱི་སྒྲིག་ཁྲིམས་ལ་བརྟེན་ནས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་དང་བླང་བྱ་ཁག་དོན་འཁྱོལ་ཐུབ་པའི་འགན་ལེན་བྱེད་པ།

    བཞི་ནས་བརྟན་ལྷིང་སྲུང་སྐྱོང་གི་བྱེད་ཐབས་དོན་འཁྱོལ་དང་སླར་ཡང་དོན་འཁྱོལ་བྱེད་དགོས། བློ་བརྟན་འགྱུར་མེད་ངང་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཉེ་དུས་བཏོན་པའི་ཕྱོགས་བཅུའི་ཐད་ཀྱི་བརྟན་ལྷིང་སྲུང་སྐྱོང་གི་བྱེད་ཐབས་ལག་བསྟར་དོན་འཁྱོལ་བྱེད་དགོས་པ་དང་། ཏང་སྲིད་དམག་ཉེན་དམངས་བཅས་ཀྱི་མཉམ་སྲུང་མཉམ་སྐུལ་ལམ་སྲོལ་མཐའ་འཁྱོངས་བྱས་ཏེ་ཆད་ལུས་མེད་པའི་སྒོ་ནས་དངོས་སུ་དོན་འཁྱོལ་ཡོང་བའི་འགན་ལེན་བྱེད་དགོས་པ་སྟེ། ཁུག་ཆ་མ་ལུས་པ་དང་། གསང་མ་ལུས་པ། སྟོང་ཆ་མ་ལུས་པ་བཅས་ཀྱི་འགན་ལེན་བྱེད་དགོས། མིག་སྔར་འགག་རྩའི་ལྷུ་ཚིགས་བརྒྱད་མངོན་གསལ་དུ་དམ་འཛིན་བྱེད་དགོས་པ་གཤམ་གསལ་ཏེ། གྲོང་ཚོར་བཅའ་སྡོད་ལས་དོན་རུ་ཁག་གིས་བརྟན་ལྷིང་སྲུང་སྐྱོང་གི་འགན་ནུས་ཆེ་རུ་བཏང་ནས་ཁོངས་མི་ཡོངས་ལས་གནས་ཐོག་ཡོད་པ་བྱེད་དགོས་པ་དང་། མི་མངོན་པའི་རྐྱེན་ངན་སྣ་ཚོགས་གྲལ་བཤེར་ནན་ཏན་བྱེད་དགོས་པ། འགལ་ཟླ་དུས་ཐོག་ཏུ་འདུམ་འགྲིག་དང་སེལ་དགོས་པ། ཐོན་བཟོ་ཡོད་པའི་གནད་དོན་ཤེས་རྟོགས་དང་ཐག་གཅོད་བྱེད་དགོས་པ་དང་། དགོན་སྡེའི་དོ་དམ་ཨུ་ལྷན (ཆེད་མངགས་པ )ཁག་གིས་འགན་འཁྲི་ཡག་པོ་བསྒྲུབས་ནས་ཞི་མཐུན་དཔེ་བཟང་དགོན་སྡེ་དང་རྒྱལ་གཅེས་ཁྲིམས་སྲུང་གི་སྔོན་ཐོན་གྲྭ་བཙུན་གཏོད་པའི་དཔྱད་འདེམས་དང་། “གཅིག་དྲུག ”དང “ཡོད་པ་དགུ ”སོགས་གྲྭ་བཙུན་ལ་ཐུགས་ཁུར་བྱེད་པའི་བྱེད་སྒོ་དང་ཟུང་འབྲེལ་གྱིས་གྲྭ་བཙུན་གྱི་བསམ་བློ་ཆབ་སྲིད་ཀྱི་ལས་དོན་ཡག་པོ་བསྒྲུབས་ཏེ་ཁོང་ཚོས་རྒྱལ་གཅེས་ཆོས་གཅེས་དང་སྒྲིག་ཁུར་ཁྲིམས་སྲུང་བྱ་རྒྱུར་ཁྲིད་སྟོན་བྱེད་དགོས་པ། དམངས་ཕན་ཉེན་རྟོག་ཞབས་ཞུའི་ས་ཚིགས་ཀྱིས་གྲ་སྒྲིག་ཨང་བསར་བྱས་ཏེ་ཉེན་རྟོག་པ་མང་དུ་གཏོང་བ་དང་བྱེད་ཐབས་ལ་ཤུགས་སྣོན་རྒྱག་པ་དང་། དྲ་རྒྱ་ཆགས་པ་དང་གང་གི་དུས་སུའང་ཉེན་ཟོན་བྱེད་པའི་རྣམ་པ་ཞིག་ཆགས་པ་བྱས་ཏེ་གནས་ཚུལ་འཕྲད་ཚེ་མགྱོགས་མྱུར་བྱ་སྤྱོད་སྤེལ་བ་དང་དུས་ཐོག་ཏུ་ཐག་གཅོད་བྱེད་ཐུབ་པའི་འགན་ལེན་བྱེད་དགོས་པ། སྤྱི་ཚོགས་ཐོག་དྲ་རྒྱ་བཤམས་པ་ལྟར་ཕྱོགས་ཡོངས་ནས་གྲལ་བཤེར་བྱས་ཏེ་སྤྱི་ཚོགས་ཀྱི་བརྟན་ལྷིང་འགན་ལེན་བྱེད་དགོས་པ། གཙོ་གནད་ས་ཁུལ་དང་གཙོ་གནད་ཁུལ་དུ་ཉེན་ཟོན་ནན་པོ་བྱེད་དགོས་པ་སྟེ། གཙོ་གནད་ས་ཁུལ་དང་། “མཐའ་གཉིས་དང་ལམ་ཐིག་གཅིག ” མི་སྣ་བསྡུ་རུབ་ཆེ་ཁུལ་སོགས་གཙོ་གནད་ཁུལ་གྱི་དོ་དམ་ཚོད་འཛིན་ལ་ཤུགས་སྣོན་རྒྱག་དགོས་པ་དང་སྔོན་འགོག་ཚོད་འཛིན་གྱི་བྱེད་ཐབས་ཁག་ཕྱོགས་ཡོངས་ནས་དོན་འཁྱོལ་བྱེད་དགོས་པ། ལག་ཐོགས་ཁ་པར་དང་དྲ་བ་སོགས་གསར་དར་སྨྱན་སྦྱོར་གྱི་དོ་དམ་བྱེད་ཐབས་ཕྱོགས་ཡོངས་ནས་དོན་འཁྱོལ་བྱས་ཏེ་སྤྱི་པའི་ཁེ་ཕན་དང་རྒྱལ་ཁབ་ཀྱི་བདེ་འཇགས་སྲུང་སྐྱོང་བྱེད་དགོས་པ། འཕྲལ་སྡོམ་ཐག་གཅོད་ལས་དོན་བློ་ཐག་ཆོད་པོས་ཡག་པོ་བསྒྲུབས་ནས་མཉམ་འགོག་མཉམ་འཛིན་གྱི་སྟོབས་ཤུགས་དང་། ལྟ་སྐུལ་དོ་དམ་གྱི་བྱེད་ཐབས་གཙོ་བོ། འཕྲལ་སྡོམ་ཐག་གཅོད་ཀྱི་སྒྲིག་ཆས་བཅས “དོན་འཁྱོལ་གསུམ ”འགན་ལེན་བྱེད་དགོས་པ། གླེང་ཕྱོགས་ཀྱི་ཁྲིད་སྟོན་ཚན་རིག་དང་མཐུན་ལ་ནུས་པ་ལྡན་པ་ཞིག་ཡོང་བ་བྱས་ཏེ་སྤྱི་ཚོགས་གླེང་ཕྱོགས་ལ་ཁྲིད་སྟོན་ཧུར་ཐག་གིས་དགའ་སྤྲོ་ཞི་མཐུན་དང་སྤྲོ་སྣང་འཆམ་མཐུན་གྱི་སྤྱི་ཚོགས་ཀྱི་རྣམ་པ་བཟང་པོ་ཞིག་གཏོད་དགོས།

    ལྔ་ནས་བརྟན་ལྷིང་སྲུང་སྐྱོང་གི་དམིགས་ཚད་འགན་ལེན་དང་སླར་ཡང་འགན་ལེན་བྱེད་དགོས། སྔ་ཙམ་དམ་འཛིན་དང་། ཆུང་ས་ནས་དམ་འཛིན། དམ་འཛིན་མྱུར་པོ། དམ་འཛིན་ལེགས་པོ་བཅས་བྱེད་རྒྱུ་མཐའ་འཁྱོངས་ཀྱིས་མ་བྱུང་སྔོན་འགོག་བྱས་ཏེ་བདེ་འཇགས་མེད་པ་དང་བརྟན་ལྷིང་མེད་པའི་རྒྱུ་རྐྱེན་སྣ་ཚོགས་ཐོན་བཟོ་ཡོད་པའི་དུས་ནས་མེད་པ་བཟོས་ཏེ་གནད་དོན་ཆེན་པོ་མི་ཐོན་པ་བྱེད་དགོས་ལ་གནད་དོན་འབྲིང་བ་ཡང་མི་ཐོན་པ་བྱེད་དགོས་པ་དང་། གནད་དོན་ཆུང་ངུ་ཡང་མི་ཐོན་པའི་བརྩོན་ལེན་བྱས་ནས་ལྗོངས་ཡོངས་ཀྱི་སྤྱི་ཚོགས་ཞི་མཐུན་དང་ཁྱོན་ཡོངས་བརྟན་ལྷིང་ཡོང་རྒྱུ་འགན་ལེན་གྱིས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་དགོས།