ཟླ་2ཚེས་28ཉིན་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་ཧའོ་ཕུང་ལྗོངས་ཏང་ཨུད་གཞུང་ལས་ཐིང་དང་། རྩ་འཛུགས་པུའུ། དྲིལ་བསྒྲགས་པུའུ་བཅས་སུ་ཕེབས་ནས་ལས་བཟོ་ཚོར་འཚམས་འདྲི་གནང་བ་དང་ལོ་གསར་གྱི་མཇུག་ཏུ་ལས་གནས་བརྟན་སྲུང་བྱེད་ཚུལ་དང་སྡེ་ཚན་ཁག་གིས་ལས་ཀ་བཀོད་སྒྲིག་བྱས་ཚུལ་ལ་ཞིབ་བཤེར་དང་མཁྱེན་རྟོགས་གནང་ཞིང་། འདི་ནི་ཧའོ་ཕུང་གིས་ལྗོངས་ཏང་ཨུད་གཞུང་ལས་ཐིང་གི་ལས་བཟོ་ཚོར་གཟིགས་པའི་གནས་ཚུལ་ཡིན་པ།

    ཚེས་28ཉིན་ནི་བོད་ཀྱི་ལོ་གསར་རྗེས་ཀྱི་ལས་ཀ་བྱེད་འགོ་ཚུགས་པའི་ཉིན་དང་པོ་ཡིན་པ་དང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོའི་བཀའ་མངགས་ལྟར་གོང་ཚེས་ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཧྲུའུ་ཅི་གཞོན་པ་ཧའོ་ཕུང་རང་སྐྱོང་ལྗོངས་ཏང་ཨུད་ཀྱི་གཞུང་དོན་ཐིང་དང་། རྩ་འཛུགས་པུའུ། དྲིལ་བསྒྲགས་པུའུ་བཅས་ལ་ཕེབས་ནས་རྒྱ་ཆེའི་ལས་བྱེད་པ་དང་ལས་བཟོར་གཟིགས་ནས་དུས་ཆེན་རྗེས་ལས་བྱེད་པ་དང་ལས་བཟོ་ལས་གནས་ཐོག་འབྱོར་འཁོད་དང་སྡེ་ཚན་ཁག་གི་ལས་དོན་བཀོད་སྒྲིག་གི་གནས་ཚུལ་ལ་ཞིབ་བཤེར་དང་ཤེས་རྟོཌ་གནང་ཡོད་པ་རེད། ལྗོངས་ཏང་ཨུད་ཀྱི་རྒྱུན་ཨུ་དྲུང་ཆེ་ཏེང་ཞའོ་ཀང་གཟིགས་པ་དང་འཚམས་འདྲི་བྱེད་པའི་ནང་ལྷན་དུ་ཕེབས་རོགས་ཞུས་ཡོད་པ་རེད།

    ལྗོངས་ཏང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་ཏུང་ཡུན་ཧུའུ་ཡིས་དྲིལ་བསྒྲགས་པུའུ་རུ་གཟིགས་པ་དང་འཚམས་འདྲི་བྱེད་པའི་བྱེད་སྒོའི་ནང་ཞུགས་ཡོད་པ་རེད།

    རང་སྐྱོང་ལྗོངས་ཏང་ཨུད་གཞུང་དོན་ཐིང་གི་ལས་བྱེད་པ་དང་ལས་བཟོར་གཟིགས་སྐབས་ཧའོ་ཕུང་གིས་རང་སྐྱོང་ལྗོངས་ཏང་ཨུད་ཀྱི་བློ་གྲོས་འདོན་ས་དང་། ཐབས་ཇུས་འདོན་ས། ཕྱོགས་བསྡུས་ལས་སྒྲུབ་བྱེད་ས་བཅས་ཀྱི་སྒྲིག་གཞི་ཡིན་པའི་ངོས་ནས་དུས་ཡུན་རིང་པོའི་ནང་རང་སྐྱོང་ལྗོངས་ཏང་ཨུད་གཞུང་དོན་ཐིང་གི་ལས་བྱེད་པ་དང་ལས་བཟོ་ཡོངས་ཀྱིས་འབད་བརྩོན་ཧུར་ལེན་དང་རང་འགན་འབད་སྒྲུབ་བྱས་ནས་ལས་འགན་ཁག་ལེགས་སྒྲུབ་ཡག་པོ་བྱས་ཡོད་པས་རང་སྐྱོང་ལྗོངས་ཏང་ཨུད་ཀྱིས་གཞུང་དོན་ཐིང་གི་ལས་དོན་ལ་ཧ་ཅང་བློ་ཡིད་ཚིམ་པོ་གནང་གི་ཡོད། གོམ་སྟབས་རྗེས་མར་རང་སྐྱོང་ལྗོངས་ཏང་ཨུད་གཞུང་དོན་ཐིང་གི་ལས་བྱེད་པ་དང་ལས་བཟོ་ཡོངས་ཀྱིས་ཆབ་སྲིད་ལ་སྣང་ཆེན་བྱེད་པ་དང་། ཏང་གཤིས་ལ་སྣང་ཆེན་བྱེད་པ། ཁྱོན་ཡོངས་ལ་བསམ་བློ་གཏོང་བ། སྒྲིག་ཁྲིམས་ནན་པོ་སྲུང་བ་བཅས་མཐའ་འཁྱོངས་བྱེད་པ་དང་། “བློ་དཀར་སེམས་དཀར་དང་། ལས་གནས་ལ་དགའ་ཞེན། ལེགས་སྐྱེས་འབུལ་བ ”བཅས་ཀྱི་ཕུལ་བྱུང་གི་སྲོལ་རྒྱུན་རྒྱུན་འཛིན་བྱེད་པ། ལས་དོན་ཏན་ཏིག་སྒྲུབ་པ། སླར་ཡང་གྲུབ་འབྲས་བཟང་པོ་གཏོད་པ། ཡིག་ཆ་བཟོ་བ་དང་། ཚོགས་འདུ་བཀོད་སྒྲིག་བྱེད་པ། བྱ་བ་སྒྲུབ་པ་བཅས་ཀྱི་ནུས་པ་རྒྱུན་ཆད་མེད་པར་ཆེ་རུ་གཏོང་བ། “ཞབས་ཞུ་གསུམ་གྱི ”འཇོན་ཐང་ཆེ་རུ་གཏོང་བ། ཚད་མཐོའི་བྱ་གཞག་སྒྲུབ་སེམས་དང་འགན་འཁྲི་འཁུར་སེམས་ཀྱི་ཐོག་ནས་རང་འཁྲིའི་ལས་ཀ་དེ་བས་ལེགས་པར་སྒྲུབ་པ་བཅས་བྱས་ཏེ་བོད་ཀྱི་འཕེལ་རྒྱས་དང་བརྟན་ལྷིང་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་དགོས་ཞེས་གསུངས་པ་རེད།

    རང་སྐྱོང་ལྗོངས་ཏང་ཨུད་རྩ་འཛུགས་པུའུ་རུ་གཟིགས་ཞིབ་གནང་སྐབས་ཧའོ་ཕུང་གིས་ཉེ་བའི་ལོ་ཤས་རིང་རང་ལྗོངས་ཀྱི་ཏང་འཛུགས་སྐྱོང་དང་རྩ་འཛུགས་མི་དོན་ལས་དོན་ལ་སྒོ་ཀུན་ནས་ཤུགས་སྣོན་དང་སྒྱུར་བཅོས་བྱས་ཡོད་པ་དང་ལྷག་དོན་དུ་གཞི་རིམ་གྱི་རྨང་གཞིར་རྒྱུན་ཆད་མེད་པར་ཤུགས་སྣོན་བརྒྱབ་ཡོད་པ་དང་རིམ་ཁག་རྩ་འཛུགས་སྡེ་ཚན་གྱིས་ལྗོངས་ཡོངས་ཀྱི་འཕེལ་རྒྱས་དང་བརྟན་ལྷིང་ཆེད་དམིགས་བསལ་གྱི་ལེགས་སྐྱེས་ཕུལ་ཡོད་པས་ལྗོངས་ཏང་ཨུད་ཀྱིས་དེར་ཁས་ལེན་གང་ལེགས་གནང་གི་ཡོད་ཅེས་གསུངས་པ་རེད། ཧའོ་ཕུང་གིས་ཏང་འཛུགས་སྐྱོང་ལས་དོན་ལ་དམ་འཛིན་བྱེད་པའི་སྡེ་ཚན་གལ་ཆེན་ཞིག་ཡིན་པའི་ངོས་ནས་ལྗོངས་ཡོངས་ཀྱི་རིམ་ཁག་རྩ་འཛུགས་སྡེ་ཚན་གྱིས་ཏང་དང་མི་དམངས་ཀྱི་བྱ་གཞག་ལ་ཚད་མཐོའི་འགན་འཁྲི་འཁུར་བའི་སྙིང་སྟོབས་ཀྱི་ཐོག་ནས་རང་རྟོགས་རང་བཞིན་དང་། རང་འགུལ་རང་བཞིན། གསར་གཏོད་རང་བཞིན་བཅས་ལ་ཤུགས་སྣོན་རྒྱག་པ་དང་རྩ་འཛུགས་སྡེ་ཚན་གྱིས་འཁུར་བའི་ལས་དོན་ཁག་ལ་དམ་འཛིན་ཏན་ཏིག་བྱེད་པ། གཞི་རིམ་གྱི་རྨང་གཞི་སྔར་བས་བརྟན་དུ་གཏོང་བ། གཞི་རིམ་ཏང་རྩ་འཛུགས་ཀྱི་དམག་འཐབ་མཁར་རྫོང་ནུས་པ་དང་གུང་ཁྲན་ཏང་ཡོན་གྱི་སྔོན་ཐོན་མིག་དཔེའི་ནུས་པ་འདོན་སྤེལ་གང་ལེགས་བྱེད་པ། འགོ་ཁྲིད་ལས་བྱེད་པའི་འགན་འཁྲི་བདའ་འདེད་ནན་པོ་གཏོང་བ། དཔྱད་ཞིབ་དང་སྐུལ་ལྕག་ལམ་སྲོལ་འཛུགས་པ་དང་འཐུས་ཚང་དུ་གཏོང་བ། རྩ་འཛུགས་ལས་དོན་གྱི་རྣམ་པ་གསར་པ་རྒྱུན་ཆད་མེད་པར་གཏོད་པ་བཅས་བྱས་ཏེ་རང་ལྗོངས་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་ཆེད་སྲ་ཤིང་བརྟན་པའི་རྩ་འཛུགས་ཀྱི་འགན་ལེན་བྱེད་དགོས་ཞེས་ནན་བཤད་གནང་བ་རེད།

    རང་སྐྱོང་ལྗོངས་ཏང་ཨུད་དྲིལ་བསྒྲགས་པུའུ་རུ་ལས་དོན་ལ་ཞིབ་བཤེར་དང་མཛུབ་ཁྲིད་གནང་སྐབས་ཧའོ་ཕུང་གིས་དུས་ཡུན་རིང་པོའི་ནང་ལྗོངས་ཏང་ཨུད་དྲིལ་བསྒྲགས་པུའུ་ཡིས་དར་ཆ་མཐོན་པོར་སྒྲེང་བ་དང་། མི་དམངས་ལ་ཞབས་འདེགས་ཞུ་བ། སྒྱུར་བཅོས་གསར་གཏོད་བྱེད་པ་བཅས་བྱ་རྒྱུ་མཐའ་འཁྱོངས་བྱས་ནས་ཁྱོན་ཡོངས་ཀྱི་ལས་དོན་ལ་གཞོགས་འདེགས་ནུས་ལྡན་བྱས་ཡོད་པ་དང་ལྷག་དོན་དུ་ཉེ་བའི་ལོ་ཤས་རིང་ལྗོངས་ཏང་ཨུད་དྲིལ་བསྒྲགས་པུའུ་ཡིས་དྲིལ་བསྒྲགས་དང་རིག་གནས་འཐབ་ཕྱོགས་ཀྱི་འབྲེལ་ཡོད་སྡེ་ཚན་སྒྲིག་འཛུགས་དང་མཐུན་སྦྱོར་བྱས་ནས་2012ལོའི་བོད་ཀྱི་ལོ་གསར་གྱི་རིག་རྩལ་མཚན་ཚོགས་གྲབས་གཉེར་བྱས་པ་དང་། “གཤམ་སྤེལ་གསུམ ”གྱི་བྱེད་སྒོ་རྒྱ་ཁྱབ་ངང་སྤེལ་བ། རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འགྱུར་ལྡོག་དྲིལ་བསྒྲགས་དང་འཕྲིན་སྤེལ་གཏིང་ཟབ་བྱས་པ། སྤྲོ་སྣང་ལྡན་པའི་བོད་ཀྱི་ལོ་གསར་གྱི་རྣམ་པ་ཞིག་གཏོད་པ་བཅས་བྱས་ཏེ་ལྗོངས་ཡོངས་ཀྱི་སྤྱི་ཚོགས་ཞི་མཐུན་དང་བརྟན་ལྷིང་ཡོང་ཆེད་ལེགས་སྐྱེས་གལ་ཆེན་ཕུལ་ཡོད་ཅེས་གསུངས་པ་རེད། དེང་སྐབས་ཀྱི་གཙོ་གནད་ལས་དོན་སྐོར་གླེང་སྐབས་ཧའོ་ཕུང་གིས་དྲིལ་བསྒྲགས་དང་རིག་གནས་ཁོང་གཏོགས་ཀྱིས་ལྟེ་བར་དམིགས་པ་དང་སྤྱི་ཡོངས་ལ་ཞབས་འདེགས་ཞུས་ནས་རྒྱལ་ཡོངས་ཀྱི “ཚོགས་འདུ་གཉིས ”རིང་གི་གསར་འགྱུར་འཕྲིན་སྤེལ་ལས་དོན་ནུས་ཤུགས་ཡོད་རྒུས་ཡག་པོ་བསྒྲུབས་ནས་རང་ལྗོངས་ཀྱི་དཔལ་འབྱོར་དང་སྤྱི་ཚོགས་ཕྱོགས་ཁག་གི་འཕེལ་རྒྱས་ཀྱི་གྲུབ་འབྲས་སྒོ་ཀུན་ནས་གང་ལེགས་མངོན་པར་བྱེད་དགོས། གླེང་ཕྱོགས་ལ་བརྟེན་ནས་ལས་དོན་ལ་ཁྲིད་སྟོན་བྱ་རྒྱུར་སྔར་བས་ཤུགས་སྣོན་བརྒྱབ་ནས་མཐུན་སྒྲིལ་དང་། དམངས་གཙོ། འབྱོར་ཕྱུག ཤེས་དཔལ། ཞི་མཐུན་བཅས་ཀྱི་སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་འཛུགས་སྐྲུན་བྱ་ཆེད་བསམ་པའི་འགུལ་ཤུགས་དང་། བསམ་པའི་འགན་ལེན། གླེང་ཕྱོགས་ཀྱི་རྒྱབ་སྐྱོར་བཅས་མཁོ་འདོན་བྱེད་དགོས་པའི་བླང་བྱ་བཏོན་གནང་བ་རེད།