ཚེས་25ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ལྷ་སར་བཞུགས་མོལ་ཚོགས་འདུ་འཚོགས་ནས་རྒྱལ་ས་པེ་ཅིང་དུ་རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་བཅུ་གཅིག་པའི་ཚོགས་འདུ་ཐེངས་ལྔ་པ་དང་སྲིད་གྲོས་རྒྱལ་ཡོངས་ཨུ་ཡོན་ལྷན་ཁང་སྐབས་བཅུ་གཅིག་པའི་ཚོགས་འདུ་ཐེངས་ལྔ་པར་ཕེབས་ཉེར་ཡོད་པའི་བོད་ཀྱི་འཐུས་མི་དང་ཨུ་ཡོན་ལ་ཕེབས་སྐྱེལ་ཞུས་པ་རེད།

    ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཝུའུ་དབྱིང་ཅེས་བཞུགས་མོལ་ཚོགས་འདུ་གཙོ་སྐྱོང་གནང་བ་དང་སྦྲགས་གསུང་བཤད་ཀྱང་གནང་བ་རེད།

    ལྗོངས་ཏང་ཨུད་ཀྱི་རྒྱུན་ཨུ་དང་། ལྗོངས་སྲིད་གྲོས་ཏང་ཙུའུ་ཡི་ཧྲུའུ་ཅི། ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ། ལྗོངས་ཏང་ཨུད་འཐབ་ཕྱོགས་གཅིག་གྱུར་པུའི་པུའུ་ཀྲང་བཅས་ཡིན་པའི་མགོན་པོ་བཀྲ་ཤིས་དང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ཀྱི་ཀྲུའུ་རེན་གཞོན་པ་དྲུང་ཆེ་ཀྲའོ་ཀྲེང་ཤིའུ། རྒྱལ་ཡོངས་མི་དམངས་འཐུས་ཚོགས་སྐབས་བཅུ་གཅིག་པའི་འཐུས་མི་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ཀྱི་ཀྲུའུ་རེན་གཞོན་པ་ཤིང་རྩ་བསྟན་འཛིན་ཆོས་གྲགས། རྒྱལ་ཡོངས་སྲིད་གྲོས་སྐབས་བཅུ་གཅིག་པའི་ཨུ་ཡོན་རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་ཚེ་སྨོན་གླིང་བསྟན་འཛིན་འཕྲིན་ལས་བཅས་བཞུགས་མོལ་ཚོགས་འདུར་ཕེབས་ཡོད་པ་རེད།

    རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་རྡོ་རྗེ་ཚེ་རིང་གིས་འཐུས་མི་དང་ཨུ་ཡོན་ལྷན་རྒྱས་ལ་2011ལོའི་རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་འགྲོ་ཚུལ་དང་དེ་བཞིན་2012ལོའི་ལས་ཀའི་བཀོད་སྒྲིག་ངོ་སྤྲོད་མདོར་བསྡུས་གནང་བ་རེད།

    ཝུའུ་དབྱིང་ཅེས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ཏེ་རྒྱལ་ཡོངས་ཀྱི “ཚོགས་འདུ་གཉིས ”རྒྱལ་ཁའི་ངང་འཚོག་རྒྱུ་དང་འཐུས་མི་ལྷན་རྒྱས་དང་ཨུ་ཡོན་ལྷན་རྒྱས་པེ་ཅིང་དུ་རྒྱལ་ཡོངས་ཀྱི “ཚོགས་འདུ་གཉིས ”ལ་ཕེབས་རྒྱུ་ཡིན་པར་སྤྲོ་སེམས་འཁོལ་བའི་རྟེན་འབྲེལ་ཞུས་ཤིང་། ཁོང་གིས་ད་རེས་རྒྱལ་ཡོངས་ཀྱི “ཚོགས་འདུ་གཉིས ”ནི་རང་རྒྱལ་དུ “ལོ་ལྔ་ཚན་བཅུ་གཉིས་པའི ”འཆར་འགོད་ལག་བསྟར་བྱེད་པའི་སྔ་རྗེས་རྒྱུན་མཐུད་ཀྱི་འགག་རྩའི་དུས་མཚམས་དང་རྒྱལ་ཡོངས་ཀྱི་གོང་འོག་ཚང་མས་ཏང་གི་ཚོགས་ཆེན་བཅོ་བརྒྱད་རྒྱལ་ཁའི་ངང་འཚོག་ཉེར་ཡོད་པར་བསུ་བ་ཞུ་བའི་སྐབས་དེར་ཚོགས་པའི་གལ་འགངས་ཧ་ཅང་ཆེ་བའི་ཚོགས་འདུ་ཞིག་ཡིན་ལ་སྐབས་འདིའི་འཐུས་མི་དང་ཨུ་ཡོན་ལྷན་རྒྱས་ཀྱིས་རང་འབབ་འགན་འཁྲི་སྒྲུབ་པའི་མཐའ་མའི་ལོ་དེའང་ཡིན་ཞིང་། སྐྱེ་བོ་ཀུན་གྱིས་དོ་སྣང་བྱེད་པ་དང་རྒྱལ་ཡོངས་ཀྱིས་དོ་ཁུར་བྱེད་པ་དང་རྒྱལ་ཡོངས་མི་རིགས་ཁག་གི་མི་དམངས་ཀྱི་ཆབ་སྲིད་འཚོ་བའི་ཁྲོད་ཀྱི་དོན་ཆེན་ཞིག་ཡིན། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་སྲིད་གྲོས་ཀྱི་ཨུ་ཡོན་ལྷན་རྒྱས་ཀྱིས་ལྗོངས་ཡོངས་ཀྱི་མི་རིགས་ཁག་གི་མི་དམངས་ཁྲི་ཚོ་300ལྷག་ཙམ་གྱི་ཚབ་ཞུས་ནས་རྒྱལ་ཁབ་ཀྱི་ཆབ་སྲིད་དང་། དཔལ་འབྱོར། རིག་གནས་དང་སྤྱི་ཚོགས་ཀྱི་བྱ་བར་དོ་དམ་བྱས་ཏེ་སྲིད་ཞུགས་སྲིད་གྲོས་བྱེད་པ་དང་རང་ཐག་རང་གཅོད་ཀྱི་དབང་ཆ་ལག་བསྟར་བྱས་ནས་ཕྲག་ཐོག་གི་འཁུར་པོ་ལྕི་བ་དང་འགན་འཁྲི་ཆེན་པོ་ཡིན་ལ་ལས་འགན་ཀྱང་གཟི་བརྗིད་ལྡན་པ་ཞིག་ཡིན། ཚང་མས་ངེས་པར་དུ་རྒྱལ་ཡོངས་ཀྱི “ཚོགས་འདུ་གཉིས ”ཀྱི་དོན་སྙིང་གལ་ཆེན་ལ་ངོས་འཛིན་གང་ལེགས་བྱས་ཏེ་འཐུས་མི་དང་ཨུ་ཡོན་གྱི་འགན་འཁྲི་ལག་བསྟར་ཡག་པོ་བྱེད་པ་དང་རྩ་ཁྲིམས་དང་བཅའ་ཁྲིམས་ཀྱིས་སྤྲད་པའི་དབང་ཆ་ལག་བསྟར་གང་ལེགས་བྱས་ནས་སྲིད་གཞུང་གི་ལས་དོན་སྙན་ཞུ་དང་དོན་ཚན་གལ་ཆེན་གཞན་དག་ལ་གྲོས་ཞིབ་ནན་ཏན་བྱེད་དགོས་ཞེས་གསུངས་པ་རེད། ཝུའུ་དབྱིང་ཅེས་བསམ་བློ་གཏོང་མཁས་པ་དང་ཐབས་འདོན་ཇུས་འདོན་བྱེད་དགོས་པའི་ནན་བཤད་གནང་ཞིང་། ཁོང་གིས་རྒྱལ་ཡོངས་ཀྱི “ཚོགས་འདུ་གཉིས ”ལ་ཞུགས་མཁན་འཐུས་མི་དང་ཨུ་ཡོན་ལྷན་རྒྱས་ཀྱིས་ཚོགས་འདུའི་དགོངས་དོན་སློབ་སྦྱོང་ནན་ཏན་བྱས་ཏེ “ཚོགས་འདུ་གཉིས ”ཀྱི་དགོངས་དོན་ལག་བསྟར་བྱ་རྒྱུ་དང་ཏང་གི་ཚོགས་ཆེན་བཅུ་བདུན་པ་དང་སྐབས་བཅུ་བདུན་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་སློབ་སྦྱོང་དང་ལག་བསྟར་བྱ་རྒྱུ་ཟུང་འབྲེལ་ཏན་ཏིག་གིས་སྤྱི་ཁྱབ་ཧྲུའུ་ཅི་ཧུའུ་ཅིན་ཐའོ་ཡི “བདུན་གཅིག ”གི་གསུང་བཤད་གལ་ཆེན་དང་བོད་ཀྱི་ལས་དོན་སྐོར་གྱིས་མཆན་བཀོད་མཛུབ་སྟོན་གལ་ཆེན་ཁག་གི་དགོངས་དོན་དང་ཟུང་འབྲེལ་ཏན་ཏིག་བྱེད་དགོས་པ་དང་། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ་དང་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བར་རྟེན་འབྲེལ་ཞུ་བའི་བྱེད་སྒོར་ཕེབས་མཁན་ཀྲུའུ་ཞི་གཞོན་པ་ཞིས་ཅིན་ཕིང་གི་གལ་ཆེའི་གསུང་བཤད་རབ་དང་རིམ་པའི་དགོངས་དོན་སློབ་སྦྱོང་དང་ལག་བསྟར་བྱ་རྒྱུ་དང་ཟུང་འབྲེལ་བྱེད་དགོས་པ། རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བརྒྱད་པའི་དགོངས་དོན་སློབ་སྦྱོང་དང་ལག་བསྟར་བྱ་རྒྱུ་དང་ཟུང་འབྲེལ་བྱེད་དགོས་པ། དེང་སྐབས་ཀྱི་ལས་དོན་དམ་འཛིན་ཡག་པོ་བྱ་རྒྱུ་དང་ཟུང་འབྲེལ་བྱེད་དགོས་པ་བཅས་བྱས་ཏེ་རང་ལྗོངས་ཀྱི་བསྒྱུར་འཕེལ་བརྟན་གསུམ་སྤྱི་ཡོངས་དང་འབྲེལ་བའི་གལ་ཆེའི་གནད་དོན་ལ་བསམ་གཞིག་ནན་པོ་བྱས་ནས་ཚོགས་འདུའི་གྲོས་བསྡུར་དང་གྲོས་ཞིབ་ནང་ཧུར་ཐག་ཞུགས་ཏེ་གཏམ་བཤད་ལྷུག་པོ་སྤེལ་དགོས་པའི་ཐུགས་རེ་གནང་བ་རེད། ཝུའུ་དབྱིང་ཅེས་རྒྱལ་ཡོངས་ཀྱི “ཚོགས་འདུ་གཉིས ”ནི་ང་ཚོས་ཕྱི་རོལ་དུ་བོད་ལྗོངས་གསར་པ་དྲིལ་བསྒྲགས་བྱེད་པ་དང་བོད་ཀྱི་མི་རིགས་ཁག་གི་མི་དམངས་ཀྱི་གཟུགས་བཪྙན་གསར་པ་མངོན་པ་བྱེད་པའི་སྟེགས་བུ་གལ་ཆེན་ཞིག་ཡིན་པས་འཐུས་མི་དང་ཨུ་ཡོན་ལྷན་རྒྱས་ཀྱིས་ད་རེས་ཀྱི་ཚོགས་འདུའི་བཀོད་སྒྲིག་གི་འབྲེལ་ཡོད་བྱེད་སྒོ་བེད་སྤྱོད་གང་ལེགས་བྱས་ཏེ་བོད་ལྗོངས་གསར་པའི་འཕེལ་རྒྱས་གསར་པ་དང་། འགྱུར་ལྡོག་གསར་པ། འཚོ་བ་གསར་པ་བཅས་ངོ་སྤྲོད་ཡག་པོ་བྱེད་དགོས་པ་དང་དེང་སྐབས་བོད་ཀྱིས་འཕེལ་རྒྱས་དང་བརྟན་ལྷིང་ལ་དམིགས་ནས་སྤེལ་བའི་སྔོན་གཏོད་ལེགས་བརྩོན་གྱི་བྱེད་སྒོ་དང་དམངས་འཚོའི་བྱ་ཐབས་རབ་དང་རིམ་པ་བཟོས་ཡོད་པ་ངོ་སྤྲོད་ཡག་པོ་བྱས་ཏེ་ང་ཚོས་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་དང་རྒྱལ་ཡོངས་མི་དམངས་ཀྱིས་སྒེར་སེམས་མེད་པར་རོགས་སྐྱོར་གནང་བར་ཐུགས་རྗེ་ཞུ་ལུགས་མངོན་པ་བྱེད་དགོས་པ་དང་། ང་ཚོས་ཀྲུང་དབྱང་གི་ཐབས་ཇུས་དང་བཀོད་སྒྲིག་ལ་གཞིགས་ཏེ་བོད་ཀྱི་འཕེལ་རྒྱས་དང་བརྟན་ལྷིང་གི་ལས་དོན་ཡག་པོ་བསྒྲུབས་པ་དང་ཀྲུང་གོའི་ཁྱད་ཆོས་དང་བོད་ཀྱི་དམིགས་བསལ་ཁྱད་ཆོས་ལྡན་པའི་འཕེལ་རྒྱས་ཀྱི་ལམ་བུའི་ཐོག་ཧུར་ཐག་སྐྱོད་རྒྱུའི་ཆོད་སེམས་བརྟན་པོ་གང་ལེགས་མངོན་པ་བྱེད་དགོས་པ། བོད་ལ་མཁས་དབང་ཤིན་ཏུ་མཁོ་བ་དང་ཚོང་འགུག་མ་འདྲེན་གྱི་འདུན་པ་ཤིན་ཏུ་ཆེ་ལུགས་མངོན་པ་བྱེད་པ་བཅས་བྱས་ནས་སྐྱེ་བོ་དེ་ལས་མང་བས་བོད་ལྗོངས་ཤེས་རྟོགས་དང་། བོད་ལ་སེམས་ཁུར། བོད་ལ་རྒྱབ་སྐྱོར་བཅས་བྱེད་དུ་འཇུག་དགོས་ཞེས་བསྟན་གནང་བ་རེད།

    ཝུའུ་དབྱིང་ཅེས་མཇུག་ཏུ་འཐུས་མི་དང་ཨུ་ཡོན་ལྷན་རྒྱས་ཀྱིས་ངེས་པར་དུ་ཆབ་སྲིད་ལ་སྣང་ཆེན་དང་། སྤྱི་ཡོངས་ལ་ལྟ་རྟོགས། ཁྱོན་ཡོངས་ཤེས་རྟོགས་བཅས་བྱས་ཏེ་རྩ་འཛུགས་ཀྱི་སྒྲིག་ཁྲིམས་ནན་པོ་སྲུང་ནས་ཚོགས་འདུའི་གྲོས་རིམ་ལ་གཞིགས་ཏེ་བྱེད་སྒོ་ཁག་ནང་ཧུར་ཐག་ཞུགས་དགོས། ཚོགས་འདུའི་སྒྲིག་ཁྲིམས་དཔེ་སྟོན་རུང་བའི་སྒོ་ནས་སྲུང་དགོས་པ་དང་། མཐུན་སྒྲིལ་ཡག་པོ་བྱེད་དགོས་པ། རང་ལ་བླང་བྱ་ནན་པོ་བཏོན་པ་བཅས་ཀྱི་ཐོག་ནས་བོད་ཀྱི་འཐུས་མི་དང་ཨུ་ཡོན་གྱི་གཟུགས་བཪྙན་བཟང་པོ་ཧུར་ཐག་འཛུགས་དགོས་པའི་བླང་བྱ་བཏོན་པ་རེད། བཞུགས་མོལ་ཚོགས་འདུའི་ཐོག་ད་དུང་རྡོ་རྗེ་ཚེ་རིང་གིས་འཐུས་མི་ཚོགས་པར 《གྲོས་འགོ 》དང་《གྲོས་གཞི 》བརྒྱུད་སྤྲོད་གནང་བ་དང་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་མཚོ་སྣ་རྫོང་མག་མང་ཤང་གི་ཤང་ཀྲང་དཔལ་ལྡན་མཚོ་མོ་དང་རྒྱལ་ཡོངས་སྲིད་གྲོས་ཀྱི་ཨུ་ཡོན་རང་སྐྱོང་ལྗོངས་མི་དམངས་སྨན་ཁང་དང་པོའི་ཡོན་ཀྲང་གཞོན་པ་སྐལ་བཟང་ནོར་བུ་སོ་སོས་གཏམ་བཤད་སྤེལ་བ་རེད།