བོད་ཀྱི་ལོ་གསར་གྱི་གུང་གསེང་དུས་ཚོད་སྤྱད་དེ་ཟླ་2ཚེས་25ཉིན་གྱི་སྔ་དྲོར་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་ཧའོ་ཕུང་གིས་ཆེད་མངགས་ལྷོ་ཁ་ས་ཁུལ་གྲ་ནང་རྫོང་དང་ཟངས་རི་རྫོང་ལ་ཕེབས་ནས་སྤྱི་ཚོགས་དོ་དམ་གསར་གཏོད་དང་ཤུགས་སྣོན་རྒྱག་ཚུལ་དང་། དཔལ་འབྱོར་དང་སྤྱི་ཚོགས་འཛུགས་སྐྲུན་བྱེད་ཚུལ་ལ་དམིགས་ཏེ་བརྟག་དཔྱད་ཞིབ་འཇུག་གནང་བ་དང་འབྲེལ་དགོན་སྡེའི་གྲྭ་བཙུན་དང་། དགོན་སྡེའི་དོ་དམ་ཨུ་ལྷན་གྱི་ལས་བྱེད་པ། གཞི་རིམ་གྱི་སྤྱི་བདེའི་མི་དམངས་ཉེན་རྟོག་པ་བཅས་ལ་གཟིགས་པ་དང་འཚམས་འདྲིའང་གནང་བ་རེད།
ཧའོ་ཕུང་དང་བཅས་པ་དང་ཐོག་གྲ་ནང་རྫོང་དུ་ཡོད་པའི་བསམ་ཡས་དགོན་དུ་ཕེབས་ནས་དགོན་སྡེའི་དོ་དམ་ཨུ་ལྷན་གྱི་ལས་བྱེད་པ་དང་དགོན་སྡེའི་དགེ་འདུན་པར་བྱམས་བརྩེའི་ངང་གཟིགས་པ་དང་འཚམས་འདྲི་གནང་ནས་ཁོང་ཚོར་བོད་ཆུ་འབྲུག་ལོའི་ལོ་གསར་གྱི་སྨོན་འདུན་ཞུས་གནང་ཞིང་། གཟིགས་ཞིབ་གནང་རིང་ཧའོ་ཕུང་གིས་སི་ཁྲོན་དཀར་མཛེས་ནས་མཆོད་མཇལ་དུ་ཡོང་མཁན་གྲྭ་པ་གཅིག་དང་ཐུགས་སྣང་གཤིན་པོའི་ངང་གླེང་མོལ་གནང་ནས “བོད་དུ་མཆོད་མཇལ་ཡོང་བར་སྟབས་བདེ་པོ་བྱུང་ངམ། ང་ཚོའི་དགོན་སྡེའི་དོ་དམ་དང་ཞབས་ཞུའི་ཐད་བསམ་འཆར་གང་ཡོད་དམ ”ཞེས་བཀའ་འདྲི་གནང་བར “སྟབས་བདེ་པོ་བྱུང་། བསམ་ཡས་དགོན་སྡེའི་དོ་དམ་དང་ཞབས་ཞུ་ཧ་ཅང་ཡག་པོ་འདུག དགོན་སྡེ་ཞི་མཐུན་ལྡན་པ་ཞིག་འདུག ”ཅེས་མིང་ལ་ཡེ་ཤེས་དབང་རྒྱལ་ཞེས་པའི་གྲྭ་པ་དེས་ཞུས། དགོན་སྡེའི་དོ་དམ་ཨུ་ལྷན་གྱི་ལས་བྱེད་པ་དང་དེ་བཞིན་དགོན་སྡེའི་དགེ་འདུན་པའི་འཐུས་མི་དང་བཞུགས་མོལ་གནང་སྐབས་ཧའོ་ཕུང་གིས་དགོན་སྡེའི “འཛུགས་སྐྱོང་དྲུག ”དང་། “གཅིག་དྲུག ”“ཡོད་པ་དགུ ”སོགས་ཀྱི་ལས་དོན་སྤེལ་ཚུལ་མཁྱེན་རྟོགས་ཞིབ་ཕྲ་གནང་བ་རེད། དགོན་སྡེའི་དོ་དམ་ཨུ་ལྷན་གྱི་ཀྲུའུ་རེན་གཞོན་པ་གྲྭ་པ་བློ་བཟང་མཁས་རབ་ཀྱིས་དགོན་སྡེའི་དོ་དམ་ཨུ་ལྷན་དགོན་སྡེར་བཅའ་སྡོད་བྱས་རྗེས་མཐུན་སྦྱོར་གྱི་ནུས་པ་འདོན་སྤེལ་གང་ལེགས་བྱེད་པ་དང་ཞིབ་ཅིང་ཕྲ་བའི་ལས་ཀ་མང་པོ་བྱས་ནས་རྒྱུན་གཏན་གྱི་ཆོས་ལུགས་བྱེད་སྒོ་སྲུང་སྐྱོང་བྱེད་པ་མ་ཟད། སྲིད་ཇུས་དང་བཅའ་ཁྲིམས་དྲིལ་བསྒྲགས་དང་ལམ་ལུགས་འཛུགས་སྐྱོང་ལ་ཤུགས་སྣོན་ཡང་རྒྱག་པ་དང་དུས་མཚུངས་དགོན་སྡེ་དང་གྲྭ་བཙུན་ཚོར་དོན་བཟང་དང་དོན་དངོས་མི་ཉུང་བ་བསྒྲུབས་ཡོད། དགོན་སྡེ་ཡོངས་ཀྱི་དགེ་འདུན་པ་ཚོ་དགོན་སྡེའི་དོ་དམ་ཨུ་ལྷན་གྱི་ལས་བྱེད་པ་དང་མཐུན་སྒྲིལ་རྡོག་རྩ་གཅིག་སྒྲིལ་བྱས་ནས་འབྲེལ་བ་མཐུན་སྦྱོར་ལྡན་པ་ཞིག་ཡོད་ཅེས་ཧའོ་ཕུང་ལ་ཞུས་པ་རེད། ཧའོ་ཕུང་གིས་དེ་དག་གསན་རྗེས་དགྱེས་ཚོར་ཆེན་པོ་བྱུང་བ་དང་ཁོང་གིས་དགོན་སྡེའི་དོ་དམ་ལ་ཤུགས་སྣོན་རྒྱག་པ་དང་གསར་གཏོད་བྱ་རྒྱུའི་ཐད་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་བྱ་ཐབས་གལ་ཆེན་རབ་དང་རིམ་པ་བཏོན་པའི་དམིགས་ཡུལ་ནི་ཁྲིམས་ལུགས་ལྟར་ཆོས་དད་རང་མོས་ལ་སྔར་བས་སྲུང་སྐྱོང་བྱེད་པ་དང་ཆོས་ལུགས་ཀྱི་རྒྱུན་གཏན་སྒྲིག་ལམ་སྲུང་སྐྱོང་བྱས་ནས་རྒྱ་ཆེའི་གྲྭ་དམངས་ལ་སྔར་བས་ཞབས་འདེགས་ཡག་པོ་ཞུ་ཆེད་རེད། རྒྱལ་གཅེས་ཆོས་གཅེས་ཀྱི་སྲོལ་རྒྱུན་ལྡན་ལ་ལྗོངས་ཕྱི་ནང་དུ་སྐད་གྲགས་ཆེན་པོ་ལྡན་པའི་བསམ་ཡས་དགོན་སྡེའི་རྒྱ་ཆེའི་གྲྭ་དམངས་ཚོས “མཐུན་སྒྲིལ་དང་བརྟན་ལྷིང་ནི་བདེ་སྐྱིད་དང་ཁ་ཕྲལ་དང་ཟང་ཟིང་ནི་ཆག་སྒོ ”ཡིན་པའི་གནས་ལུགས་དེ་བློ་ལ་བརྟན་པོ་ངེས་ནས་རྒྱལ་ཁབ་ཀྱི་བཅའ་ཁྲིམས་དང་ཁྲིམས་ལུགས་དང་དགོན་སྡེའི་འདུལ་ཁྲིམས་བརྩི་སྲུང་ཞུ་བ་དང་རིག་པ་སྒྲིམ་ནས་ཐོས་བསམ་བྱས་ཐོག་དད་ལྡན་མང་ཚོགས་ལ་ཞབས་འདེགས་ཡག་པོ་ཞུས་ཏེ་བསམ་ཡས་དགོན་དེ་ཞི་མཐུན་ལྡན་པའི་དཔེ་བཟང་གི་དགོན་སྡེ་ཞིག་ཏུ་འཛུགས་སྐྱོང་བྱེད་དགོས་ཞེས་གསུངས་པ་རེད།
དེ་རྗེས་ཧའོ་ཕུང་དང་བཅས་པ་ཟངས་རི་རྫོང་ཉི་ནུས་འོད་ཕུའུ་གློག་ཁང་གི་རྟེན་གཞིར་ཕེབས་ཏེ་གློག་ཁང་འཛུགས་སྐྲུན་དང་འཁོར་སྐྱོད་བྱེད་ཚུལ་ལ་རྟོག་ཞིབ་གནང་བ་དང་གློག་འདོན་སྒྲིག་ཆས་འཁོར་སྐྱོད་བྱེད་ཚུལ་མཁྱེན་རྟོགས་ཞིབ་ཕྲ་གནང་ཞིང་། ལས་དོན་མི་སྣའི་ངོ་སྤྲོད་གསན་རྗེས་ཧའོ་ཕུང་གིས་དང་ཐོག་ལྷོ་ཁ་ས་ཁུལ་གྱིས་ནུས་རྒྱུ་གསར་པ་འཛུགས་སྐྲུན་ལ་ཤུགས་སྣོན་རྒྱག་པའི་ཐད་ཁས་ལེན་གང་ལེགས་གནང་བ་དང་ཁོང་གིས་ལྗོངས་དེ་ཡོངས་ཀྱི་རིམ་ཁག་ཏང་ཨུད་དང་སྲིད་གཞུང་དང་འབྲེལ་ཡོད་སྡེ་ཚན་གྱིས་ནུས་རྒྱུ་གསར་པ་འཕེལ་རྒྱས་གཏོང་བའི་གལ་ཆེའི་རང་བཞིན་ལ་ངོས་འཛིན་བྱེད་ཤུགས་སྔར་བས་ཆེ་རུ་བཏང་ནས་ཉི་ནུས་འོད་ཕུའུ་གློག་ཁང་སོགས་ལྷད་མེད་ཁོར་ཡུག་སྲུང་སྐྱོང་ནུས་རྒྱུ་འཛུགས་སྐྲུན་བྱེད་མགྱོགས་སུ་གཏོང་བ་དང་ས་གནས་དེ་གའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྔར་བས་སྐུལ་འདེད་བཏང་སྟེ་འབྱོར་འབྲིང་བོད་ལྗོངས་དང་། དུས་བདེའི་བོད་ལྗོངས། ཞི་མཐུན་བོད་ལྗོངས། སྣོད་བཅུད་བཟང་བའི་བོད་ལྗོངས་བཅས་འཛུགས་སྐྲུན་བྱ་ཕྱིར་ལེགས་སྐྱེས་ཧུར་ཐག་འབུལ་དགོས་ཞེས་གསུངས་པ་རེད།
ཟངས་རི་རྫོང་སྤྱི་བདེ་ཅུས་སུ་ཧའོ་ཕུང་གིས་དུས་ཆེན་རིང་ལས་གནས་བརྟན་སྲུང་བྱེད་མཁན་སྤྱི་བདེའི་མི་དམངས་ཉེན་རྟོག་པར་བྱམས་བརྩེའི་ངང་གཟིགས་པ་དང་ཁོང་གིས་བོད་ཀྱི་ལོ་གསར་རིང་མི་རིགས་ཁག་གི་མང་ཚོགས་རྣམས་སྤྲོ་སྐྱིད་དང་འཆམ་མཐུན་ལྡན་པའི་ལོ་གསར་ཞིག་གཏོང་རྒྱུ་ཡོང་ཕྱིར་ཁྱེད་ཚོས་ནང་མི་དང་དགའ་འཛོམས་བྱ་རྒྱུའི་གོ་སྐབས་བློས་བཏང་ནས་ལས་གནས་བརྟན་སྲུང་བྱེད་པ་དང་སྐད་གྲགས་མེད་པར་ལེགས་སྐྱེས་ཕུལ་བས་ངས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུ་བ་དང་ཧྲུའུ་ཅི་ཁྲེན་ཆོན་གོ་དང་ཀྲུའུ་ཞི་པད་མ་འཕྲིན་ལས་ཀྱི་ཚབ་ཞུས་ནས་ཚང་མར་བྱམས་བརྩེའི་འཚམས་འདྲི་དང་བླ་ན་མེད་པའི་གུས་འདུད་ཞུ་རྒྱུ་ཡིན་ཞེས་གསུངས་ཤིང་། ཧའོ་ཕུང་གིས་དེང་སྐབས་རང་ལྗོངས་ཀྱི་སྤྱི་ཚོགས་ཁྱོན་ཡོངས་སྤྱིར་ན་བརྟན་ལྷིང་ཡོད་ཀྱང་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་དང་སྤྱི་ཚོགས་བརྟན་ལྷིང་སྲུང་སྐྱོང་བྱེད་པའི་གནོན་ཤུགས་སྔར་བཞིན་ཧ་ཅང་ཆེན་པོ་ཡོད་པས་རྒྱ་ཆེའི་སྤྱི་བདེའི་མི་དམངས་ཉེན་རྟོག་པས་དེང་སྐབས་ཀྱི་བརྟན་ལྷིང་སྲུང་སྐྱོང་བྱ་རྒྱུའི་ལས་དོན་ཡག་པོ་བསྒྲུབ་པའི་དོན་སྙིང་གལ་ཆེན་ངོས་འཛིན་གཏིང་ཟབ་བྱེད་པ་དང་ཏང་དང་མི་དམངས་ཀྱི་བྱ་གཞག་ལ་ཚད་མཐོའི་འགན་འཁུར་བའི་རྣམ་འགྱུར་གྱི་ཐོག་ནས་ལས་འགན་ཁག་ཏན་ཏིག་ངང་ཡག་པོ་སྒྲུབ་པ་དང་སྤྱི་ཚོགས་བརྟན་ལྷིང་དང་ཞི་མཐུན་འགན་ལེན་བྱས་ཐོག་ཏང་ཀྲུང་དབྱང་གི་ཐུགས་ཁུར་དང་རྒྱལ་ཡོངས་མི་དམངས་ཀྱི་རྒྱབ་སྐྱོར་ལ་ལན་འདེབས་པ་དང་ལྷོ་ཁ་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཆེད་བརྟན་ལྷིང་དང་ཞི་མཐུན་ལྡན་པའི་སྤྱི་ཚོགས་ཁོར་ཡུག་ཅིག་གཏོད་དགོས་ཞེས་གསུངས་པ་རེད།
ལྷོ་ཁ་ས་ཁུལ་དང་རང་སྐྱོང་ལྗོངས་འབྲེལ་ཡོད་སྡེ་ཚན་གྱི་འགན་ཁུར་བས་བརྟག་ཞིབ་ལ་ཕེབས་རོགས་ཞུས་པ་རེད།