ཟླ་2ཚེས་20ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་། ལྗོངས་སྲིད་གྲོས་ཏང་ཙུའུ་ཡི་ཧྲུའུ་ཅི་དང་ཀྲུའུ་ཞི་གཞོན་པ། ལྗོངས་ཏང་ཨུད་འཐབ་ཕྱོགས་གཅིག་གྱུར་པུའི་པུའུ་ཀྲང་བཅས་ཡིན་པའི་མགོན་པོ་བཀྲ་ཤིས་ཀྱིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་བྱམས་བརྩེའི་ཐུགས་ཁུར་འཆང་བཞིན་དུ་སྔ་རྗེས་སུ་སེ་ར་དགོན་དང་འབྲས་སྤུངས་དགོན་དུ་ཕེབས་ཏེ་དགོན་སྡེ་དོ་དམ་ཨུ་ཡོན་ལྷན་ཁང་གི་ལས་དོན་མི་སྣ་དང་དེ་བཞིན་དགེ་འདུན་པའི་འཐུས་མི་ཁག་གཅིག་ལ་གཟིགས་པ་དང་འཚམས་འདྲི་གནང་བ་དང་ཁོང་ཚོར་བོད་ཀྱི་ལོ་གསར་གྱི་བཀྲ་ཤིས་སྨོན་འདུན་ཞུས་པ་དང་འབྲེལ་དུས་ཆེན་གྱི་འཚམས་འདྲིའི་དངུལ་ཡང་གནང་བ་རེད།
རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་ཏང་ཙུའུ་ཡི་ཧྲུའུ་ཅི་གཞོན་པ་དང་། ཀྲུའུ་རེན་གཞོན་པ། སེ་ར་དགོན་དུ་བཅའ་སྡོད་ལས་དོན་ཚོགས་ཆུང་གི་ཙུའུ་ཀྲང་བཅས་ཡིན་པའི་ཉི་མ་ཚེ་རིང་དང་། རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་སེ་ར་དགོན་དུ་བཅའ་སྡོད་ལས་དོན་ཚོགས་ཆུང་གི་ཙུའུ་ཀྲང་གཞོན་པ་ལིའུ་ཆིང་ཧུའེ། རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་། ལྗོངས་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གི་ཀྲུའུ་རེན། འབྲས་སྤུངས་དགོན་དུ་བཅའ་སྡོད་ལས་དོན་ཚོགས་ཆུང་གི་ཙུའུ་ཀྲང་གཞོན་པ་བཅས་ཡིན་པའི་བློ་བཟང་འགྱུར་མེད་བཅས་ཕེབས་ཡོད་པ་རེད།
བྱེད་སྒོ་སྤེལ་རིང་མགོན་པོ་བཀྲ་ཤིས་ཀྱིས་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་དང་། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་འཕགས་པ་ལྷ་དགེ་ལེགས་རྣམ་རྒྱལ། རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་བཅས་ཀྱི་ཚབ་ཞུས་ནས་སེ་ར་དགོན་དང་འབྲས་སྤུངས་དགོན་པའི་དོ་དམ་ཨུ་ཡོན་ལྷན་ཁང་གི་ལས་དོན་མི་སྣ་དང་དགེ་འདུན་པ་ཡོངས་ལ་བྱམས་བརྩེའི་འཚམས་འདྲི་གནང་བ་དང་དགོན་སྡེར་བཅའ་སྡོད་ལས་དོན་ཚོགས་ཆུང་དང་དགོན་སྡེ་དོ་དམ་ཨུ་ཡོན་ལྷན་ཁང་གིས་བསྒྲུབས་པའི་ལས་དོན་ཁག་ལ་ཁས་ལེན་གང་ལེགས་གནང་བ་རེད།
དགོན་སྡེར་བཅའ་སྡོད་ཀྱི་ལས་དོན་སྔར་བས་ཡག་པོ་སྒྲུབ་པའི་ཐད་མགོན་པོ་བཀྲ་ཤིས་ཀྱིས་དགོན་སྡེ་དོ་དམ་ཨུ་ཡོན་ལྷན་ཁང་དང་དགོན་སྡེར་བཅའ་སྡོད་ལས་དོན་ཚོགས་ཆུང་གི་ལས་བྱེད་པས་དགོན་སྡེར་བཅའ་སྡོད་ཀྱི་ལས་དོན་སྔར་བས་ཡག་པོ་སྒྲུབ་པའི་ཐད་ཧྲུའུ་ཅི་ཁྲེན་ཆོན་གོས་གནང་བའི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་ནན་ཏན་དང་གོ་བ་གཏིང་ཟབ་བླངས་ཏེ་ཡང་འབད་བསྐྱར་འབད་ངང “དྲུག་འཛུགས ”དང “གཅིག་དྲུག ”དགོན་སྡེར “ཡོད་པ་དགུ ”བཅས་ཀྱི་ལས་དོན་ཡག་པོ་སྤེལ་བ་དང་དགོན་སྡེར “ཡོད་པ་དགུ ”ཡི་ལས་དོན་ལ་ཏན་ཏིག་ངང་དམ་འཛིན་ཡག་པོ་བྱས་ཐོག་ལྗོངས་ཏང་ཨུད་དང་སྲིད་གཞུང་གིས་བཏོན་པའི་དགོན་སྡེ་དང་གྲྭ་བཙུན་སྐོར་གྱི་སྲིད་ཇུས་དྲིལ་བསྒྲགས་ཧུར་ཐག་བྱེད་པ་དང་སྔར་རྒྱུན་བཞིན་དགོན་སྡེའི་དགེ་འདུན་པར་ཐུགས་ཁུར་དང་དགའ་གཅེས་བྱས་ཏེ་ཁོང་ཚོར་རྒྱལ་གཅེས་ཆོས་གཅེས་བྱ་རྒྱུའི་སློབ་གསོ་གཏོང་བ་དང་། རྒྱ་ཆེའི་དགེ་འདུན་པ་ཚོས་ཏང་གི་འགོ་ཁྲིད་ལ་བརྩི་བཀུར་ཞུ་རྒྱུར་ཁྲིད་སྟོན་ཧུར་ཐག་བྱས་ཏེ་མི་རིགས་མཐུན་སྒྲིལ་དང་། སྤྱི་ཚོགས་བརྟན་ལྷིང་། མེས་རྒྱལ་གཅིག་གྱུར་བཅས་སྲུང་སྐྱོང་བྱེད་པའི་འགན་འཁྲི་འཁུར་སེམས་ཆེ་རུ་ཏན་ཏིག་གཏོང་བ། དགོན་སྡེར་དོ་དམ་ཡག་པོ་དང་བརྟན་ལྷིང་དང་ཞི་མཐུན་ལ་དོ་དམ་བྱེད་པ་དང། བོད་བརྒྱུད་ནང་བསྟན་དེ་སྤྱི་ཚོགས་རིང་ལུགས་སྤྱི་ཚོགས་དང་འཚམ་རྒྱུར་ཁྲིད་སྟོན་ཧུར་ཐག་བྱེད་པ། དགོན་སྡེའི་ལས་དོན་གྱི་རྣམ་པ་གསར་པ་ཧུར་ཐག་གཏོད་པ་བཅས་བྱས་ཏེ་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་ཆེད་དགེ་མཚན་ལྡན་པའི་ལེགས་སྐྱེས་འབུལ་བ་བཅས་བྱེད་དགོས་པའི་ནན་གསུངས་གནང་བ་རེད།
མགོན་པོ་བཀྲ་ཤིས་ཀྱིས་བོད་ཀྱི་ལོ་གསར་རིང་ནི་དད་ལྡན་མང་ཚོགས་ཆོས་མཇལ་ལ་ཡོང་མང་བའི་དུས་ཤིག་ཡིན་པས་དགོན་སྡེ་དོ་དམ་ཨུ་ཡོན་ལྷན་ཁང་གི་ལས་དོན་མི་སྣས་ལས་གནས་བརྟན་སྲུང་དང་། རང་འགན་ནན་སྒྲུབ། རང་འགན་གཙང་སྒྲུབ་བཅས་བྱས་ཏེ་ཁྲིམས་ལྟར་དགོན་སྡེར་དོ་དམ་བྱེད་པའི་བྱེད་ཐབས་ཁག་དོན་ཐོག་ཏུ་འཁྱོལ་བ་བྱེད་པ་དང་དགེ་འདུན་པ་ཚོ་དང་ཐུན་མོང་ཐོག་འབད་བརྩོན་བྱས་ཏེ་དགོན་སྡེའི་སྒྲིག་ལམ་སྲུང་སྐྱོང་ཡག་པོ་བྱེད་པ་དང་། རྒྱུན་གཏན་གྱི་ཆོས་ལུགས་བྱེད་སྒོར་ཁྲིམས་ལྟར་སྲུང་སྐྱོང་བྱེད་པ། དད་ལྡན་མང་ཚོགས་ཀྱི་ཆོས་དད་རང་མོས་ལ་བརྩི་བཀུར་ཞུ་བ་བཅས་བྱས་ནས་ཆོས་མཇལ་ཞུ་རྒྱུ་དེ་བརྟན་པོ་དང་། བདེ་འཇགས། གོ་རིམ་ལྡན་པ་བཅས་ཡོང་བ་བྱས་ཏེ་སྤྱི་ཚོགས་ཀྱི་སྤྱི་ཡོངས་ཞི་མཐུན་བརྟན་ལྷིང་ཡོང་ཆེད་དགེ་མཚན་ལྡན་པའི་ལེགས་སྐྱེས་འབུལ་དགོས་པའི་བླང་བྱ་བཏོན་གནང་བ་རེད།